ސައޫދީ އަރަބިއްޔާގެ އިރުން ހުޅަނގަށް ތެޔޮ ގެންދިއުމަށް އަޅާފައިވާ ތެޔޮ ހޮޅީގެ ދެ ޕަންޕު ސްޓޭޝަނަކަށް ގޮވާތަކެތި ބަރުކޮށްފައިވާ ޑްރޯންތަކަކުން މިއަދު ހަމަލާދީފައިވާ ކަމަށް ސައޫދީ ހަކަތައާ ބެހޭ ވަޒީރު ޚާލިދު އަލްފާލިޙު ވިދާޅުވެއްޖެއެވެ. އޭނާ އެކަން ސިފަކުރެއްވީ ދުނިޔޭގެ ތެލުގެ ބާޒާރަށް ދެވުނު ޓެރަރިސްޓު ހަމަލާއެއްގެ ގޮތުގައެވެ.
ހަކަތައާ ބެހޭ ވަޒީރާ ހަވާލާދީ ސައޫދީ ޕްރެސް އެޖެންސީން ބުނި ގޮތުގައި އިރުމަތީގެ ތެޔޮވަޅުތަކުން ރަތްކަނޑުގެ ބަނދަރު ޔަންބުޢުއަށް ތެޔޮ ފޮނުވުމަށް އަޅާފައިވާ ތެޔޮ ހޮޅީގައި، ރިޔާޒު ޕްރޮވިންސުގެ އައްދަވާދުމީއާއި ޢަފީފުގައި ގާއިމުކޮށްފައިވާ ދެ ޕަންޕް ސްޓޭޝަނަށް ހަމަލާދީފައި ވަނީ މިއަދު ހެނދުނު 6:30 ގައެވެ.
އަލްފާލިޙު ވިދާޅުވިގޮތުގައި ޑްރޯން ހަމަލާގެ ސަބަބުން 8 ނަންބަރު ޕަންޕު ސްޓޭޝަނުގައި އަލިފާން ރޯވިނަމަވެސް މިހާރު ވަނީ ނިއްވާލެވިފައެވެ. އަދި ސައޫދީ ތެޔޮ ކުންފުނި އަރާމްކޯއިން ވަނީ އެ ތެޔޮ ހޮޅީ ވަގުތީގޮތުން ބަންދުކޮށްފައެވެ.
ސައޫދީ އަމާޒުތަކަކަށް ހަމަލާދީފައިވާކަމަށް އެގައުމުން އެއްބަސްވުމުގެ ކުރިން ޙޫޘީން ވަނީ ސައޫދީ އަމާޒުތަކަކާ ދެކޮޅަށް 'ބޮޑު އަސްކަރީ އޮޕަރޭޝަނެއް' ހިންގާފައިވާ ކަމަށް ބުނެއެވެ. އެމީހުންގެ އަމާޒުތަކަކީ ކޮބައިކަން ހާމަނުކޮށް، ޙޫޘީ ޖަމާއަތުގެ ޕޮލިޓިކަލް ބިއުރޯގެ މެންބަރު މުހައްމަދު އަލްބަޚީތީ ބުނީ އެ ހަމަލާތަކުގައި 7 ޑްރޯން ބޭނުންކޮށްފައިވާ ކަމުގައެވެ.
އޭނާ ބުނި ގޮތުގައި އެހަމަލާތަކުގެ ބޭނުމަކީ ސަރަހައްދުގައި ސައޫދީ އަރަބިއްޔާއާއި ޔުނައިޓެޑް އަރަބް އެމިރޭޓްސް (ޔޫއޭއީ) އިން ގެންގުޅޭ ސިޔާސަތު ބަދަލުކުރުމަށް އެދެގައުމަށް ފިއްތުންތައް ކުރިމަތިކުރުމުގެ ގޮތުން ހަމަލާތައް ފުޅާކުރުމެވެ.
މި ހަމަލާތައް އައިސްފައި މިވަނީ ޔޫއޭއީގެ ފުޖައިރާ ކައިރިން ސައޫދީ ތެޔޮ އުފުލާ ދެ ޓޭންކަރަކަށް ހަމަލާދީ ގެއްލުންދީފައި ވަނިކޮށެވެ. އެ ހަމަލާގެ ޒިންމާ އެއްވެސް ފަރާތަކުން އުފުލާފައި ނުވެއެވެ. ތެޔޮ ޓޭންކަރުތަކަށް ދިން ހަމަލާގެ ޚަބަރާއެކުވެސް ދުނިޔޭގެ ބާޒާރުގައި ތެލުގެ އަގު އުފުލިފައި ވެއެވެ. އަނެއްކާވެސް ތެލާ ގުޅުންހުރި ތަންތަނަށް އިތުރު ހަމަލާ އަމާޒުވުމާއެކު ތެލުގެ އަގު އުފުލޭނެ ކަމަށް ބެލެވެއެވެ.
އީރާނާއި، ރަޝިޔާ ފަދަ އީރާނަށް ތާއީދުކުރާ ބައެއް ގައުމުތަކުގެ އަސްކަރީ ތަޖުރިބާކާރުން ބުނާގޮތުގައި ސައޫދީ ތެޔޮ ޓޭންކަރުތަކަށް ދިން ހަމަލާއަކީ އީރާނާއި ދެކޮޅު ހަނގުރާމައެއްގެ ތެރެއަށް އެމެރިކާ ވެއްދުމުގެ ބޭނުމުގައި ސައޫދީ ނުވަތަ އިސްރާއީލުގެ ޖާސޫސީ އިދާރާއަކުން ހިންގި އަމަލެކެވެ.
