ވޭތުވެދިޔަ ހަފްތާގެ ތެރޭގައިސޫރިޔާގައި ދިން ޙަމަލާތަކުގައި މަރުވި މީހުންގެ ތެރެއިން ބައެއްމީހުންގެ ޖަނާޒާ ކުރިއަށްދިޔަ ވަގުތު ޖަނާޒާގެ ތެރެއަށް ބަޔަކުދިން ބޮމުގެ ޙަމަލާއެއްގައި މަދުވެގެން 24 މީހުން މަރުވެއްޖެއެވެ.
ޙަލަބުގައި ދިން މިޙަމަލާގައި މަރުވެފައިވަނީ މުޅިންވެސް އެޖަނާޒާގައި ބައިވެރިވި ޢާއްމުންނެވެ. އެސަރަޙައްދުގެ އިންސާނީ ޙާލަތު ދިރާސާކުރާ ފަރާތްތަކާ ޙަވާލާދީ ޚަބަރުތައްބުނާގޮތުން މިއީ ސޫރިޔާގެ ސަރުކާރާއި، ސަރުކާރަށް ވާގިވެރިވާ ރަޝިޔާގެ ފައުޖުތަކުން ދިން ޙަމަލާއެއްކަމަށް ބެލެވެއެވެ. މި ޖަނާޒާ ބޭއްވި ސަރަޙައްދަކީ ސަރުކާރާ އިދިކޮޅު ހަނގުރާމަވެރިން އުޅޭ އަދި އެމީހުންގެ ބާރުގަދަ ސަރަޙައްދެއްކަމަށް އެފަރާތްތަކުން ބުނެއެވެ.
މިޙަމަލާގައި މަރުވި މީހުންގެ ތެރޭގައިވެސް ގިނަ ޢަދަދެއްގެ ކުޑަކުދިންނައި އަންހެނުން ހިމެނެއެވެ. ފަހަކަށްއައިސް ސޫރިޔާގައި ދެވޭ މިފަދަ ކޮންމެ ޙަމަލާއެއްގެ ޝިކާރައަކަށް ވެގެންދަނީ ގިނައިން ކުޑަކުދިންނާއި އަންހެނުންނާއި ޢުމުރުންދުވަސްވީ މީހުންކަން ފާހަގަކޮށްލެވެއެވެ.
ސޫރިޔާގެ ސަރުކާރަށް ވާގިވެރިވާ ރަޝިޔާގެ ފައުޖުތަކުން އެޤައުމުގެ ޢާއްމުން ދިރިއުޅޭ އެކިސަރަޙައްދުތަކަށް ޙަމަލާދެމުންދާއިރު، އެޙަމަލާތަކުގައި ގިނައިން މަރުވަނީ ޢާއްމުންކަމަށް ޚަބަރުތައްބުނެއެވެ. ސޫރިޔާގެ އެކި ސަރަޙައްދުތަކަށް ހަމަލަދިނުމުގައި ރަޝިއާއިން މިހާރުދަނީ އީރާނުގެ ބިމުގެ ސަރަޙައްދުތަކާއި، ވައިގެ މަރުކަޒުތައް ބޭނުންކުރަމުންނެވެ. އީރާނަކީވެސް ސޫރިޔާގެ ސަރުކާރަށް ވާގިވެރިވާ ޤައުމެކެވެ.
