ސޫރިޔާގައި ހިނގަމުންދާ ދަޚިލީ ހަނގުރާމާގައި ވޭތުވެދިޔަ ދެދުވަހުގެ ތެރޭގައި 150 އަށްވުރެ ގިނަ ޢާއްމުން މަރުވެފައިވާކަމަށް ސޫރިޔާގައި ޙަރަކާތްތެރިވާ އިންސާނިއްޔަތަށްޓަކައި މަސައްކަތްކުރާ ފަރާތްތަކުން ހާމަކޮށްފިއެވެ.
އޭގެތެރޭގައި ގިނައިން ހިމެނެނީ އަންހެނުންނާއި ކުޑަކުދިންނާއި ޢުމުރުންދުވަސްވީ މީހުންކަމަށް ޚަބަރުތައް ބުނެއެވެ. ސޫރިޔާގެ ދާޚިލީ ހަނގުރާމަ ހިނގާތާ މިވީ ފަސް އަހަރުދުވަހުގެ ތެރޭގައި 280000 މީހުން ވަނީ މަރުވެފައެވެ.
މިދިޔަ ދެދުވަހު އެކަނިވެސް ސޫރިޔާގައި ވަނީ 180 މީހުން މަރުވެފައެވެ. އޭގެތެރޭގައި 22 ކުޑަކުދިންނާއި 23 އަންހެނުން ހިމެނެއެވެ.
ސޫރިޔާގެ ދާޚިލީ ހަނގުރާމައަށް ފަސް އަހަރުދުވަސް ވެފައިވާއިރު، އެޤައުމުގައި މިހާރުވަނީ ޤަތުލުޢާއްމުތައް ޢާއްމުވެފައެވެ. ކޮންމެދުވހަކު އެތައް ސަތޭކަ ޢާއްމުން މަރުވަމުންދާއިރު، މި އިންސާނީ މުސީބާތަށް ހުއްޓުމެއް އަންނަނެކަމުގެ އުންމީދެއް ނެތެވެ.
