ރާއްޖޭގެ ގައުމީ ފުޓްބޯޅަޓީމުގެ ކެޕްޓަން އަލީ އަޝްފާގް (ދަނގަޑޭ) މާޒިޔާއަށް ކުޅެން ސޮއިކޮށްފިއެވެ.
ރާއްޖެއިން ބޭރުގެ ކްލަބަކަށް އެންމެފުރަތަމަ ކުޅުނު ދިވެހި ފުޓްބޯޅަ ކުޅުންތެރިޔާގެ ޝަރަފު ހޯދާފައިވާ އަޝްފާޤަކީ ދެކުނު އޭޝިއާ ސަރަޙައްދުގެ އެންމެ މޮޅު ކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. އޭނާ އެންމެފަހުން ކުޅުނީ މެލެޝިއާގެ ކްލަބެއްކަމަށްވާ ޕީޑީއާރުއެމް އަށެވެ. އަނިޔާގެ މައްސަލަތަކެއް ދިމާވެގެން އެޓީމާއެކު ހަދާފައިވާ އެއްބަސްވުން އުވާލުމަށްފަހު، އެއްވެސް ޓީމަކަށް ނުކުޅެ އަޝްފާޤު ހުންނަތާ ދުވަސްކޮޅެއްވެއްޖެއެވެ.
މީސީޒަންގެ ކުރިއަށް އޮތް ބައިގައި މާޒިޔާއަށް ކުޅެން ދަނގަޑޭ ސޮއި ކުރިއިރު، މިދިޔަ ހަފުތާގައި ދަގަނޑޭ ވަނީ މާޒިޔާގެ ސްކޮޑާއެކު ބައެއް ޕްރެކްޓިސް ސެޝަންތަކުގައި ބައިވެރިވެފައެވެ.
ދަގަނޑޭ މާޒިޔާއާ ގުޅުނު އަގު ރަސްމީކޮށް ހާމަކޮށްފައި ނުވިނަމަވެސް، އޭނާގެ އަގު އެއް މިލިއަން ރުފިޔާއަށް ވުރެ ބޮޑުކަމަށް ބައެއް ފަރާތްތަކުން ބުނެއެވެ.
