ސީރިޔާގެ މައްސަލައިގައި ދެ ގައުމު ގުޅިގެން މަސައްކަތްކުރުމަށް ރަޝިޔާގެ ރައީސު ވްލާޑިމީރް ޕުޓިންއާއި ތުރުކީގެ ރައީސު ރަޖަބު ޠައްޔިބު އެރްދޮޣާން އެއްބަސްވެވަޑައިގެންފިއެވެ. އަދި ޕުޓިން ވަނީ އީރާނު ބައިވެރިކޮށްގެން ތިން ގައުމުގެ ވެރިންގެ ބައްދަލުވުމެއް ރަޝިޔާގައި ބޭއްވުމަށް ތައްޔާރަށް ހުންނެވިކަންވެސް ހާމަކުރައްވާފައެވެ.
ޕުޓިންއާއި އެރްދޮޣާން 2019 ވަނަ އަހަރު ބޭއްވި ފުރަތަމަ ބައްދަލުވުން އޮތީ އިއްޔެގެ ވަގުތެއްގައި ރަޝިޔާގެ ވެރިރަށް މޮސްކޯގައެވެ. ނޫސްވެރިންނަށް ނުވަދެވޭ ގޮތަށް ބޭއްވި މި ބައްދަލުވުން އެއް ގަޑި ފަންސާސް މިނެޓަށް ދެމިގެން ގޮސްފައި ވެއެވެ.
އެމެރިކާ ސިފައިން ފޭބުމާއެކު، އުތުރު ސީރިޔާގެ އަސްކަރީ މަސްރަހު ބަދަލުވަމުންދާ ދަނޑިވަޅެއްގައި ރައީސު އެރްދޮޣާން މޮސްކޯއަށް ވަޑައިގެން ރައީސު ޕުޓިންއާ ބައްދަލުކުރެއްވީ، ކުރުދީން ގިނަ އެ ސަރަހައްދުގައި ތުރުކީން ގެންގުޅޭ ސިޔާސަތަށް ރަޝިޔާގެ ތާއީދުހޯއްދެވުމަށް ކަމަށް ޚަބަރުތައް ބުނެއެވެ.
މި ބައްދަލުވުމަށް ފަހު ދެ ބޭފުޅުން ވިދާޅުވެފައި ވަނީ "ހުރިހާ ޓެރަރިސްޓް ޖަމާއަތަކާ" ދެކޮޅަށް ގުޅިގެން މަސައްކަތްކުރުމަށް ދެގައުމުން އެއްބަސްވެފައިވާ ކަމުގައެވެ. އަދި ސީރިޔާގެ މައްސަލައަށް ދާއިމީ ސިޔާސީ ހައްލެއް ހޯދުމަށް އައު ގާނޫނު އަސާސީގެ ދެލިކޮޕީ އެކުލަވާލުމުގެ މަސައްކަތް އަވަސްކުރުމަށް ވެސް ދެގައުމުން ވަނީ ގޮވާލާފައެވެ.
ތުރުކީން މަސައްކަތްކުރަނީ އެމެރިކާ ސިފައިން އުތުރު ސީރިޔާއިން ފޭބުމުން އަންނަ އަސްކަރީ ހުސްކަން އެ ސަރަހައްދުގައި ހަކަރާތްތެރިވާ ހަތިޔާރުއެޅި ކުރުދީ ޖަމާއަތްތަކުން ހިފާފާނެތީ، އެކަމަށް ފުރުސަތު ނުދިނުމަށް މަސައްކަތްކުރަމުންނެވެ. ރައީސު ޕުޓިން ވަނީ މިކަމުގައި ތުރުކީއަށް ތާއީދުކުރައްވާކަން ހާމަކުރައްވައި، އިދްލިބުގައި ޓެރަރިޒަމާ ދެކޮޅަށް ހަނގުރާމަކުރަންޖެހޭކަމަށް ވިދާޅުވެފައެވެ. އޭނާ ވިދާޅުވީ ޓެރަރިޒަމާ ދޮކޮޅަށް ގުޅިގެން ހަނގުރާމަކުރުމަށް 1998 ވަނަ އަހަރު ރަޝިޔާއާއި ތުރުކީއާ ދެމެދު ވެފައިވާ އެއްބަސްވުމުގެ ބޭނުން މިކަމުގައި ހިފިދާނެކަމަށެވެ.
އުތުރު ސީރިޔާގެ މައްސަލަ ހައްލުކުރުމަށް ކުރުދީންނާ ސީރިޔާ ސަރުކާރާ ދެމެދު ވާހަކަތައް ބޭއްވުމަށް ތާއީދުކުރައްވާކަމުގައިވެސް ޕުޓިން ވަނީ ވިދާޅުވެފައެވެ.
ސީރިޔާގެ މައްސަލައަށް ހައްލެއް ހޯދުމުގެ މަގްސަދުގައި އީރާނާއި، ތުރުކީއާއި، ރަޝިޔާގެ ވެރިންގެ ބައްދަލުވުމެއް މޮސްކޯގައި ބޭއްވުމަށް ތައްޔާރަށް ހުންނެވިކަން ހާމަކުރައްވަމުން ޕުޓިން ވިދާޅުވީ އެމެރިކާ ސިފައިން ސީރިޔާއިން ފޭބުމުން، ސީރިޔާގެ މައްސަލަ ހައްލުކުރުމަށް ފަސޭހަވެގެން ދާނެކަމުގައެވެ.
މި ބައްދަލުވުމަށް ފަހު ވާހަކަފުޅުދައްކަވަމުން ތުރުކީގެ ރައީސު އެރްދޮޣާން ވަނީ "ހުރިހާ ޓެރަރިސްޓް ޖަމާއަތަކާ" ދެކޮޅަށް ދެގައުމުން ގުޅިގެން މަސައްކަތްކުރުމުގެ މުހިއްމުކަން ބަޔާންކުރައްވާފައެވެ. އޭނާ ވިދާޅުވީ އިދްލިބު ސަރަހައްދުން އެމެރިކާ ސިފައިން ފޭބުމުން އަންނަ އަސްކަރީ ހުސްކަމުގެ ނާޖާއިޒު ފައިދާ ނެގުމުގެ ފުރުސަތު އެއްވެސް ޖަމާއަތަކަށް ދީގެން ނުވާނެ ކަމުގައެވެ.
ސީރިޔާގެ އުތުރުގައި ސީރިޔާގެ ކުރުދީން ހަތިޔާރު އެޅި ޖަމާއަތްތަކުގެ އިތުރަށް ތުރުކީ ކުރުދީންގެ ހަތިޔާރުއެޅި ޖަމާއަތްތައް ވެސް ހަރަކާތްތެރިވަމުން ދެއެވެ. އެފަދަ ޖަމާއަތްތަކަކީ ތުރުކީގެ ސަލާމަތަށް ހުރި ނުރައްކަލެއް ކަމަށް ބުނެ ތުރުކީން ދަނީ އުތުރު ސީރިޔާއަށް ވަދެ އެ ޖަމާއަތްތަކާ ހަނގުރާމަކުރަމުންނެވެ.
