ވެނެޒުއެލާގެ އިދިކޮޅޫ ލީޑަރު ހުވާން ގުއާޑިއޯ އޭނާއަކީ ވެނެޒުއެލާގެ ވަގުތީ ރައީސުކަމުގައި އިއްޔެ އިއުލާންކުރައްވައިފިއެވެ. އަދި އެމެރިކާއާއި، ކެނެޑާއާއި، ދެކުނު އެމެރިކާގެ ބައެއް ގައުމުތަކުން މިހާރު ވަނީ ގުއާޑިއޯއަކީ ވެނެޒުއެލާގެ ވަގުތީ ރައީސުކަން ގަބޫލުކޮށްފައެވެ. ދެކުނު އެމެރިކާއިން ބްރެޒީލާއި، ކޮލޮމްބިއާއިންވެސް ވަނީ އޭކަން ގަބޫލުކޮށްފައެވެ.
ހުވާން ގާޑީއޯ އޭނާއަކީ ރައީސުކަމަށް އިއުލާންކުރެއްވީ ވެރިރަށް ކަރާކަސްގައި ރައީސޫ ނިކޮލަސް މަޑޫރޯއާ ދެކޮޅު އެތައް ލައްކަ ބަޔަކު އެއްވެ ބޭއްވި ބިޔަ މުޒާހަރާގެ ތެރޭގައެވެ.
"ޣައިރު ގާނޫނީގޮތުން ވެރިކަމަށް އަތްގަދަކުރުން ނިމުމަކަށް ގެނައުމަށްޓަކައި، ހުރިހާ ބާރުތަކާއި ހަވާލުވުމަށް އަހަރެން ހުވައިކުރަން". އެއްވެފަ ތިބި މީހުންނާ މުޚާޠަބުކޮށް ވެނެޒުއުލާގެ އިދިކޮޅު ފަރާތްތަކުން ކޮންޓްރޯލުކުރާ ގާނޫނުހަދާ މަޖިލީހުގެ ރައީސުކަންވެސް ކުރައްވާ ގުއާޑިއޯ ވިދާޅުވިއެވެ.
ގުއާޑިއޯއަކީ ވެނެޒުއެލާގެ ވަގުތީ ރައީސުކަން އެމެރިކާއިން ގަބޫލުކުރުމާއެކު ރައީސު ނިކޮލަސް މަޑޫރޯގެ ސަރުކާރުން ވަނީ އެމެރިކާއާއި ސިޔާސީ ގުޅުން ކަނޑާލައި، އެގައުމުގެ ޑިޕްލޮމޭޓުން ވެނެޒުއެލާ ދޫކޮށް ދިއުމަށް 72 ގަޑިއުރު ދީފައެވެ.
ޔޫރަޕިއަން ޔުނިއަން (އީޔޫ) އިން ނެރުނު ބަޔާނެއްގައި ވެނެޒުއެލާގެ "ރައްޔިތުންގެ އަޑު" އަހައި "މިނިވަން، ތެދުވެރި" އިންތިޚާބެއް ބޭއްވުމަށް ގޮވާލާފައި ވާއިރު، އިއްޔެ ކަރާކަސްގައި ބޭއްވި ބިޔަ މުޒާހަރާއަށް އިޝާރާތްކުރައްވައި، އެ ޖަމާއަތުގެ ހައި ރެޕްރެޒެންޓެޓިވް ފޯ ފޮރިން އެފެއާޒް އެންޑް ސެކިއުރިޓީ ފޮލިސީ ފެޑެރިކާ މޮގެރިނީ ވިދާޅުވެފައި ވަނީ "23 ޖަނަވަރީގައި ވެނެޒުއެލާގެ ގިނަ އަދަދެއްގެ ރައްޔިތުން ވަނީ ޑިމޮކްރަސީއަށާއި، އެމީހުންގެ މުސްތަގުބަލު މިނިވަންކަމާއެކު ކަނޑައެޅުމުގެ ފުރުސަތުދިނުމަށް އެދި ގޮވާލާފައި. އެއަޑު ނީވޭކަމަށް ހެދުމަކީ ވާނޭކަމެއް ނޫން."
ހުޅަނގުގެ ގައުމުތަކާއި، ދެކުނު އެމެރިކާގެ ބައެއް ގައުމުތަކުން ގުއާޑިއޯގެ ރައީސުކަން ގަބޫލުކުރިނަމަވެސް، ރައީސު ނިކޮލަސް މަޑޫރޯއާކު ވާކަން ބާރު ގަދަ ގައުމުތަކަކުން ވަނީ ހާމަކޮށްފައެވެ.
ރަޝިޔާއިން ބުނެފައިވަނީ ރަޝިޔާއިން ގަބޫލުކުރަނީ ވެނެޒުއެލާގެ ގާނޫނީ ރައީސަކީ ނިކޮލަސް މަޑޫރޯ ކަމުގައެވެ. އަދި އެ ސިޔާސަތަށް ބަދަލެއް ގެންނަން ވިސްނާފައި ނުވާ ކަމުގައެވެ.
"އަހުރެންގެ އަޚު މަޑޫރޯއެވެ. މަނިކުފާނު މަގާމުގައި ހުންނަވާ. އަހަރުމެން މިތިބީ މަނިކުފާނާއެކު." ތުރުކީގެ ރައީސު ރަޖަބު ޠައްޔިބު އެރްދޮޣާން ރައީސު މަޑޫރޯއަށް ފޯނުން ގުޅުއްވައި ވިދާޅުވިކަމަށް ތުރުކީ ރިޔާސީ ތަރުޖަމާނު ހާމަކޮށްފައި ވެއެވެ.
އަނެއްކޮޅުން، މެކްސިކޯއާއި، ބޮލީވިއާއިންވެސް ބުނުފައި ވަނީ އެ ދެގައުމުން ގަބޫލުކުރަނީ ނިކޮލަސް މަޑޫރޯގެ ސަރުކާރުކަމުގައެވެ.
20 މޭ 2018 ގައި ބޭއްވުނު ރިޔާސީ އިންތިޚާބު ނިކޮލަސް މަޑޫރޯ ކާމިޔާބުކުރައްވައި، ދެވަނަ ދައުރަކަށް ހޮވިވަޑައިގަތް ނަމަވެސް، އިންތިޚާބު އޮޅުވާލާފައިވާ ކަމަށް ބުނެ އިދިކޮޅު ފަރާތްތަކުން އިންތިޚާބު ނަތީޖާ ގަބޫލުނުކޮށް އިހުޖާޖަށް ނުކުތެވެ. އެއާއެކުވެސް، މަޑޫރޯ ވަނީ މި ޖަނަވަރީ މަހުގެ 10 ގައި ދެވަނަ ދައުރަކަށް ރައީސުކަމުގެ ހުވައިކުރައްވާފައެވެ.
