ސީރިޔާގެ ދާޚިލީ ހަނގުރާމައިގެ އަޑު މަޑުވެފައި ވަނިކޮށް، އެގައުމުގެ އާ ހަނގުރާމެއެއްގެ އަޑު ގަދަވެއްޖެއެވެ. އެއީ ސީރިޔާގައި ތިބި އީރާނު ސިފައިންނަށް އިސްރާއީލުން ރޭ ދިން ވަރުގަދަ ހަމަލާތަކުގެ ސަބަބުންނެވެ.
"އަހަރުމެންގެ ވައިގެ ދިފާއީ ބާރުން ދުޝްމަން އަމާޒުތަކަކަށް ހަމަލާދީ އޭގެ ތެރެއިން ބައެއް ވައްޓާލާފައިވާ" ކަމަށް ރޭ ސީރިޔާއިން އިއުލާނުކޮށްފަ ވާއިރު، ރޭގެ ވަގުތެއްގައި އިސްރާއީލުގެ ވައިގެ އަސްކަރިއްޔާއިން ވަނީ ދިމިޝްޤުގެ ކައިރީގައިވާ ވައިގެ މަރުކަޒަކަށް ހަމަލާދީފައެވެ.
ދިމިޝްޤުގެ ދެކުނުން ކިސްވާ ސަރަހައްދުގައި އޮންނަ ވައިގެ މަރުކަޒަށް އިސްރާއީލުގެ ވައިގެ ސިފައިންގެ އެފް-16 މަރުކާގެ ހަތަރު މަތިންދާބޯޓުން ހަމަލާދީފައި ވެއެވެ. މީގެ އިތުރަށް އިސްރާއީލުން ވަނީ އެ ސަރަހައްދަށް މިސައިލު ހަމަލާތަކެއް ވެސް ދީފައެވެ.
"ރޭ ދަންވަރު 1:10 ހާއިރު އިސްރާއީލުގެ އުދުވާނީ ސިފައިންވަނީ ވައިގެ މަގުންނާއި، އެއްގަމު މަގުން، ފޮނުވާލުވުނު ގިނަ މިސައިލަތެކަކުން އަހަރުމެންގެ ބިމަށް ހަމަލާ ދީފައެވެ." ސީރިޔާ ސިފައިންގެ މިއަދު ފަތިހު ނެރުނު ބަޔާނެއްގައި ވެއެވެ. އަދި އެބަޔާނުގައި ވާގޮތުން ގިނަ މިސައިލްތަކެއް އޭގެ އަމާޒަށް ވާސިލުމުގެ ކުރިން ވަނީ ވައްޓާލެވިފައެވެ.
"ޙިޒްބުﷲއާއި އީރާނުގެ ހަނގުރާމަވެރިންގެ ހަތިޔާރު ހުރި ގުދަންތައް ހުންނަނީ އެ ސަރަހައްދުގައި." ސީރިޔަން އޮބްޒަވޭޓަރީ ފޯ ހިއުމަން ރައިޓްސްގެ ރާމީ ޢަބްދުއްރަޙްމާން ވިދާޅުވިއެވެ.
"އަހަރުމެން މިދަނީ ސީރިޔާގައި އީރާނުގެ އިންގިލާބީ ބާރުތަކުގެ 'ޤުދްސް ލަޝްކަރަށް' ހަމަލާ ދެމުން. އިސްރާއީލަށް ގެއްލުންދިނުމަށް މަސައްކަތް ނުކުރުމަށް ސީރިޔާއަށް އިންޒާރު ދެވިފައިވާނެ." ރޭ ދަންވަރު އިސްރާއީލުން ނެރުނު ބަޔާނެއްގައި ވެއެވެ.
"މިސައިލްތައް އޭގެ އަމާޒަށް ވާސިލުވެ އީރާނު މީހުންނާއި، ލުބްނާނުގެ ޙިޒްބުﷲގެ ގުދަންތަކަށް އަރާފައި ވަނީ." އިސްރާއީލުގެ ބަޔާނުގައި ވެއެވެ.
އިސްރާއީލުގެ މިހަމާއާއި ގުޅިގެން އިސްރާއީލުގެ އުތުރަށާއި، އިސްރާއީލުން ހިފާފައިވާ ޖޫލާންގެ ސަރަހައްދަށް މިސައިލް ހަމަލާތަކެއް އަރާފައިވާ ކަމަށް އިސްރާއީލުން ބުނެއެވެ. އަދި އެ ސަރަހައްދުން ލިބޭ ޚަބަރުތައް ބުނާ ގޮތުން، އެސަރަހައްދުން ރޭ ދަންވަރު ބާރުގަދަ ގޮވުންތަކެއްގެ އަޑު އިވިފައި ވެއެވެ.
" ސީރިޔާގައި ފައިހަރުކޮށްގެން ތިބި އީރާނު ސިފައިންނަށް ހަމަލާދިނުމާއި، އަހަރުމެންނަށް ގެއްލުންދޭ މަސައްކަތްކުރާ މީހުންނަށް ގެލުންދިނުމަކީ އަބަދުވެސް އަހަރުމެންގެ ސިޔާސަތު." އިއްޔެ ނޫސްވެރިންނާ ބައްދަލުކުރަމުން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނެފައި ވެއެވެ.
އިސްރާއީލުގެ އަސްކަރިއްޔާއިން ސީރިޔާއަށް ދޭ ހަމަލާތައް މީގެ ކުރިން އިސްރާއީލުން ގެންދިޔައީ ސިއްރުކުރަމުންނެވެ. ނަމަވެސް މިހާރު މިވަނީ ފާޅުގައި އެކަން ކުރަން ފަށާފައެވެ.
