މެލޭޝިޔާގެ ރަސްގެފާނު ސުލްޠާނު މުޙައްމަދު 5 ރަސްކަން ދޫކުރެއްވުމާ ގުޅިގެން އެގައުމުގެ އާ ރަސްކަލަކު އައްޔަންކުރުމުގެ މަސައްކަތް މިއަދު ފަށައިފިއެވެ. އެގޮތުން މެލޭޝިޔާގެ އިއްތިހާދުގައި ހިމެނޭ ސްޓޭޓްތަކުގެ ރަސްރަސްކަލުން ވަނީ މިއަދު ބައްދުކުރައްވައި އެކަމާމެދު މަޝްވަރާކުރައްވާފައެވެ.
މެލޭޝިޔާގެ ގާނޫނު ބުނާގޮތުން އެގައުމުގެ ރަސްކަމަކީ ވިރާސީ ރަސްކަމެއް ނޫނެވެ. އެގައުމުގެ ރަސްގެފާނު އައްޔަންކުރަނީ ރަސްކަންކުރާ ސްޓޭޓްތަކުގެ ރަސްކަލުންގެ ތެރެއިންނެވެ.
މިއަދު ބައްދަލުވުމުގައި ނިންމާފައި ވަނީ ރަސްކަލަކު އައްޔަންކުރުމަށްޓަކައި ރަސްކަލުންގެ ކައުންސިލްގެ ބައްދަލުވުމެއް އަލުން ބޭއްވުމަށެވެ. އާ ރަސްކަލަކު ހަތަރު ހަފްތާގެ ތެރޭގައި އައްޔަންކުރުމަށް ވަނީ ނިންމާފައެވެ. މިހާރު ރަސްކަމާއި ވަގުތީ ގޮތުން ހަވާލުވެ ހުންނެވީ ސުލްޠާން މުޙައްމަދު 5 ގެ ނާއިބަކަށް ހުންނެވި، ޕެރަކްގެ ރަސްގެފާނު ސުލްޠާން ނަޒްރީން ޝާހު ނަމަވެސް އޭނާއަކީ ތަރުތީބުން ދެން ރަސްކަމާ ހަވާލުވެވަޑައިގަންނަވަން އޮތް ބޭފުޅާއެއް ނޫނެވެ.
ރަސްކަލުންގެ ކައުންސިލުގައި ނުވަ ބޭފުޅުން ހިމެނިވަޑަގެންނެވި ނަމަވެސް މިއަދުގެ ބައްދަލުވުމަށް ހާޒިރުވެވަޑައިގެންފައި ވަނީ ހަ ރަސްކަލުންނެވެ. އެއީ ޕްރްލިސް، ޓެރެންގާނޫ، ނެގަރޫ ސެމްބިލާން، ޖޮހޯރް، ޕެރާކް އަދި ކެޑާގެ ރަސްކަލުންނެވެ.
މެލޭޝިޔާގައި ރަސްކަން ބަދަލުވުމުގެ ނިޒާމަށް ބަލާއިރު ދެން ރަސްކަމަށް ވަޑައިގަންނަވަން ޖެހެނީ ޕަހާންގްގެ ސުލްޠާން އަޙްމަދު ޝާހްއެވެ. އޭނާގެ ސިއްހީ ހާލުކޮޅު ހުރިގޮތުން މިހާރުވެސް ޕަހާންގްގެ ވެރިކަން އަމަލީގޮތުން ހިންވަނީ އޭނާގެ ދަރިކަލުންނެވެ. ދެން ތަރުތީބުން ރަސްކަމަށް ވަޑައިގަންނަވަން ހުންނެވީ ޖޮހޯރުގެ ސުލްޠާން އިބްރާހީމް އިސްމާޢީލެވެ.
ބޮޑުވަޒީރު މަހާތީރު މުޙައްމަދު ވިދާޅުވީ ވީހާވެސް އަވަހަކަށް ރަސްކަލަކު އައްޔަންކުރުމުގެ ކަންތައް ނިމޭނެކަމަށް އުއްމީދުކުރައްވާ ކަމުގައެވެ.
