ޕާކުތަކުގައި ނަމާދުކުރުން ހުއްޓުވުމަކީ އިންޑިއާގެ ގާނޫނުއަސާސީއާ ޚިލާފު ކަމެއްކަމުގައި ސުޕްރީމްކޯޓުގެ ކުރީގެ ފަނޑިޔާރު އަދި ޕްރެސް ކައުންސިލް އޮފް އިންޑިއާގެ ކުރީގެ ޗެއާރމަން ޖަސްޓިސް މަރުކަންޑޭ ކާޓްޖޯ ވިދާޅުވެއްޖެއެވެ.
ބޮޑުވަޒީރު ނަރެންދުރަ މޯދީގެ ސަރުކާރަށް ވަރަށް ބޮޑަށް ފާޑުވިދާޅުވެ ވާހަކަފުޅުދައްކަވަމުން ޖަސްޓިސް ކާޓްޖޯ ވިދާޅުވީ ހިންދޫންނަށް ޕާކުތަކުގައި އަޅުކަންކޮށް އިޖުތިމާޢީ ބައްދަލުވުންތައް ބޭއްވޭއިރު ޕާކުތަކުގައި ހުކުރުނަމާދު ކުރުން މުސްލިމުންނަށް މަނާކުރަންޖެހޭ ސަބަބެއް ނެތްކަމުގައެވެ.
މޯދީއަށް ފާޑުވިދާޅުވަމުން ޖަސްޓިސް ކާޓްޖޯ ވިދާޅުވީ އިންޑިއާ ސަރުކާރުގެ ސިކުނޑި ހަލާކުވެފައިވާކަމަށާއި ގައުމުގައި ހިނގަމުން ދަނީ މޮޔަކަންތައްތަކެއް ކަމަށެވެ. އަދި ފާއިތުވެދިޔަ ހަތަރު އަހަރުދުވަހުގެ ތެރޭގައި މުޅިދުނިޔޭގެ ކުރިމަތީގައި އިންޑިއާ ލަދުވެތިވެ ބޭޒާރު ވެފައިވާކަމަށް ވެސް އޭނާ ވިދާޅުވިއެވެ.
"އަހަރުމެންނަށް މަލާމާތްކޮށް މީހުން ހެމުން ދަނީ. ގެރިއަކީ އަހާއި ކުއްތާ ފަދަ ޖަނަވާރެއް. ގެރިއަކީ އަޅުކަން ކުރަންޖެހޭ ފަދަ ޚާއްޞަ ސިފައެއް ހުރި އެއްޗެއްނޫން." އޭނާ ވިދާޅުވިއެވެ. "ގެރިއަށް އަޅުކަން ކުރުމަކީ މޮޔަކަމެއް."
ހައްދުފަހަނަޅާފައިވާ ހިންދޫންނާއި މޯދީގެ ސަރުކާރުން މުސްލިމުންނާ ދެކޮޅަށް އިންޑިއާގައި ހިންގަމުންގެންދާ ހަރަކާތްތަކާ ދެކޮޅަށް ވަރަށް ގިނަ ބަޔަކު ދަނީ ފާޑުކިޔައި ނުރުހުން ފާޅުކުރަމުންނެވެ.
