ރައީސް މުންތަޚަބު އިބްރާހީމް މުޙައްމަދު ޞާލިޙު ރައީސުލްޖުމްހޫރިއްޔާ ކަމުގެ ޤާނޫނީ ހުވައި ކުރެއްވުމަށްފަހު ޤައުމާ މުޚާތަބު ކުރައްވާނެ ކަމަށް ރައީސް އޮފީހުން ވިދާޅުވެއްޖެއެވެ.
އެމަނިކުފާނު ޤައުމާ މުޚާތަބު ކުރައްވާނީ ހުވައި ކުރެއްވުމުގެ ރަސްމިއްޔާތު ބާއްވާ ގަލޮޅު ފުޓުބޯޅަ ދަނޑުގައެވެ. ރާއްޖޭގެ ޖުމްހޫރިއްޔާގެ 7 ވަނަ ރައީސް އިބްރާހީމް މުޙައްމަދު ޞާލިޙާއި އެމަނިކުފާނުގެ ނާއިބު ފައިޞަލް ނަސީމް ހުވައި ކުރެއްވުމުގެ ރަސްމިއްޔާތު ފެށުމަށް ހަމަޖެހިފައިވަނީ މިއަދު ހަވީރު 5:00 ގައެވެ. އެރަސްމިއްޔާތަށް ވަރަށްގިނަ ޢަދަދެއްގެ މީހުންނަށް ވަނީ ދަޢުވަތު ދެއްވައިފައެވެ.
ކޯލިޝަނެއްގެ ތެރެއިން އިބްރާހީމް މުޙައްމަދު ޞާލިޙު ވެރިކަމަށް އިންތިޚާބުވެ ވަޑައިގެންނެވީ މިހާރުގެ ރައީސް ޢަބްދުﷲ ޔާމީން ޢަބްދުލްޤައްޔޫމާ ވާދަކުރައްވައި ބޮޑު ތަފާތަކުން ކާމިޔާބު ކުރައްވައިގެންނެވެ.
އިބްރާހީމް މުޙައްމަދު ޞާލިޙު ހޯއްދެވި ކާމިޔާބަށްޓަކައި ރައީސް ޔާމީން އެމަނިކުފާނަށް މަރުޙަބާ ވިދާޅުވިއެވެ. އަދި ބަލި ޤަބޫލު ވެސް ކުރެއްވިއެވެ. އެހެންނަމަވެސް އެފަހުންވަނީ އިންތިޚާބާމެދު ސުވާލު އުފައްދަވައި އިންތިޚާބު ބާޠިލް ކޮށްދެއްވުމަށް އެދިވަޑައިގެން ސްޕްރީމްކޯޓަށް މައްސަލަ ހުށަހެޅުއްވިއެވެ. އެކަމަކު ކޯޓުން ނިންމެވީ އިންތިޚާބު ބާޠިލް ކުރަންޖެހޭ އެއްވެސް ސަބަބެއްނެތް ކަމަށެވެ.
އިބްރާހީމް މުޙައްމަދު ޞާލިޙު ވެސް ވެރިކަމަށް ވަޑައިގެންނެވީ ރައްޔިތުންނަށް ވަރަށްގިނަ ވަޢުދުތަކެއް ކުރެއްވުމަށްފަހުގައެވެ. އެހެންކަމުން އެމަނިކުފާނު ކުރެއްވި ވަޢުދުތައް ފުއްދައިވައި ދެއްވާނެ ކަމަށް ރައްޔިތުން ވަރަށް އުންމީދޫގައި ތިބިކަން އެމަނިކުފާނު ހަނދުމަފުޅު ބެހެއްޓުމަށް ސިޔާސީ ދާއިރާގެ ބައެއް ބޭފުޅުން ވަނީ ވިދާޅުވިއެވެ.
