ހިފާފައިވާ ޣައްޒާގެ އެކި ހިސާބުތަކަށް އިސްރާއީލުގެ ވައިގެ އަސްކަރިއްޔާއިން ވަރުގަދަ ވައިގެ ހަމަލާތަކެެއް ދެމުން އެެބަދާ ކަމުގައި އެގައުމުގެ އަސްކަރިއްޔާއިން ބުނެފިއެވެ.
އިސްރާއީލުގެ އަސްކަރިއްޔާއިން ބުނީ"މުޅި ޣައްޒާގައި" "ޓެރަރިސްޓް އަމާޒުތަކަކަށް" ހަމަލާ ދޭންފެށީ ޣައްޒާއިން ފޮނުވާލި ރޮކެޓުތަކަކުން އިސްރާއީލުގެ 12 މީހަކު ޒަޚަމްވުމުންނެވެ. އިސްރާއީލުން ބުނީ ޣައްޒާއިން ފޮނުވާލި ރޮކެޓެއް އިސްރާއީލު ތެރެއިން ދަތުރުކުރަމުން ދިޔަ ބަހަކަށް އަރާފައިވާ ކަމުގައެވެ. ޣައްޒާގެ ސަރަހައްދީ ރޮނގު ހުރަސްކޮށް އިސްރާއީލު ތެރެއަށް ވެއްޓުނު ރޮކެޓުގެ އަދަދު ސަތޭކައަށްވުރެ ގިނަވާނެކަމަށް އިސްރާއީލުން ބުނެއެވެ.
ސިއްހީ ފަރުވާދޭ މީހުންނާ ހަވާލާދީ އިސްރާއީލުން ބުނި ގޮތުގައި ބަހަށް ރޮެކެޓު ހަމަލާ އެެރުމުގެ ސަބަބުން 19 އަހަރުގެ ޒުވާނަކު ޒަޚަމުވެ ނާޒުކު ހާލަތުގައި ހޮސްޕިޓަލުގައި އެބައެތެވެ. އެ ރޮކެޓް އެރި ސަރަހައްދުން ބޯ ދުން އަރަމުންދާ ތަން ފެނިފައި ވެއެވެ.
ޣައްޒާއިން ލިބޭ ޚަބަރުތައް ބުނާ ގޮތުގައި އިސްރާއީލުގެ ވައިގެ ހަމަލާތަކުގެ ސަބަބުން މިހާތަނަށް ފަަލަސްޠީނު ދެ މީހުން މަރުވެ ތިން މީހުން ޒަަޚަމްވެފައި ވެއެވެ.
އިސްރާއީލާއި ޣައްޒާއާއި ދެމެދު މަސްރަހު ހޫނުވެ ހަމަލާތައް ބަދަލުކުރަން ފެށުމާއެކު ބޮޑުވަޒީރު ނަތަންޔާހޫ ވަނީ އޭނާ ފްރާންސަށް ކުރަމުން ދިޔަ ދަތުރު ކުރުކޮށްލާފައި އިސްރާއިލަށް އެނބުރި އައިސްފައެވެ. އަދި އޭނާއާއި ދިފާއީ ވަޒީރު އެވިގްދޯ ލީބަމަންއާއެކު ވަނީ އަވަސް މަޝްވަަރާތަކެއް ބާއްވާފައެވެ.
އިސްރާއީލަށް ދޭންފެށި ރޮކެޓް ހަމަލާތަކުގެ ޒިންމާ ހަމާސްއިން އުފުލާފައިވަނީ އިސްރާއީލު ސިފައިންގެ ކޮމާންޑޯއިންގެ ބަޔަކު ޣައްޒާއަށް ވަދެ ހަމާސްގެ ކޮމާންޑަރެއް ކަމަށްވާ ނޫރު ބަރަކާ ޝަހީދުކޮށްލާފައި ވަނިކޮށެވެ. ޚަބަރުތައް ބުނާ ގޮތުގައި އިސްރާއީލު ކޮމާންޑޯއިން މަސައްކަތްކުރީ، ހަަމާސްގެ އަތްދަށުގައި ތިބި އިސްރާއީލު ސިފައިން ސަލާމަތްކުރުމަށް ބޭނުންކުރުމަށް ނޫރު ބަރަކާ ވަގަށް ނަގައިގެން ދާށެވެ. އެހެންނަމަވެސް، ހަމާސްގެ މުޖާހިދުންނާ ބަދަލުކުރެވުނު ހަމަލާތަކުގައި ނޫރު ބަރަކާ ޝަހީދުވީއެވެ. އަދި އިސްރާއީލު ސިފައިންގެ އޮފިސަަރަކުވެސް މަރުވީއެވެ.
އެންމެ ފަހުން ލިބުނު ޚަަބަރުތަކުން އެނގޭ ގޮތުގައި އިސްރާއީލުން ވަނީ ޣައްޒާއަށް ވަދެ ނުކުމެވޭ ހުރިހާ މަގުތަކެއް ބަންދުކޮށް ޣައްޒާއަށް ބޮޑުބަޑީގެ ހަމަލާދޭން ފަށާފައެވެ.
