ޖަލު ޙުކުމެއް ތަންފީޒު ކުރައްވަމުން ގެންދަވަނިކޮށް ޞިއްޙީ ޙާލު ދެރަވުމުގެ ސަބަބުން އައިޖީއެމްއެޗުގައި އެޑްމިޓް ކޮށްގެން މިހާރު ފަރުވާ ދެމުން ގެންދަވާ ރާއްޖޭގެ ކުރީގެ ނާއިބު ރައީސް އަޙުމަދު އަދީބުގެ ސަލާމަތީ ކަންކަން ބެލެހެއްޓުން ކުއްލި ގޮތަކަށް ފުލުހުން ހުއްޓައިލައިފިއެވެ.
އަދީބު ސަލާމަތީ ކަންކަން ބެލެހެއްޓުން ފުލުހުން ހުއްޓައިލުމަށްފަހު އެކަން މިހާރު ޙަވާލުކޮށްފައި ވަނީ މޯލްޑިވްސް ކަރެކްޝަނަލް ސާވިސަސް އާއެވެ. މިފަދަ ނިންމުމެއް ކުއްލިއަކަށް ނިންމެވުމުން ބައެއް ފަރާތްތަކުން ގެންދަނީ ސުވާލު އުފައްދަމުންނެވެ. އަދީބުގެ ޤާނޫނީ ވަކީލު މޫސާ ސިރާޖު ވެސް ވަނީ އަދީބުގެ ސަލާމަތީ ކަންކަން ބެލެހެއްޓުން ކުއްލިގޮތަކަށް ފުލުހުން ހުއްޓައިލައިފި ކަމަށް ވިދާޅުވެފައެވެ.
"އަދީބުގެ ސިއްޙީ ޙާލަތު ގޯސްވެ އެޑުމިޓް ކުރެވިފައިއޮތް ވަގުތެއްގައި ކުއްލި ގޮތަކަށް ފުލުހުން އަދީބުގެ ސެކިޔުރިޓީ ދޫކޮށްލައި ކަރެކްޝަނާ ސެކިޔުރިޓީ ޙަވާލު ކޮށްފި،" މޫސާ ސިރާޖު ކުރައްވައިފައިވާ ޓްވީޓެއްގައި ވިދާޅުވެފައިވެއެވެ. އޭނާ ވިދާޅުވެފައިވަނީ އެކަން އެގޮތަށް ކޮށްފައިވަނީ އެއްވެސް ފަރާތަކުން އަދީބުގެ ޞިއްޙީ ޙާލަތާމެދު ޒިންމާ ނަގަން ބޭނުން ނުވާތީ ކަމަށް ދެކެވަޑައިގަންނަވާ ކަމަށެވެ.
"މިބަދަލަކީ އެއްވެސް ފަރާތަކުން އަދީބުގެ ސިއްޙީ ޙާލަތާމެދު ޒިންމާ ނަގަން ބޭނުންނުވާތީ ނިންމި ނިންމުމެއް ކަމަށްފެނޭ،" މޫސާ ސިރާޖު ވިދާޅުވެފައިވެއެވެ.
