ބޮރޫޝިޔާ ޑޯޓްމުންޑް 4 – 3 އިން ބަލިކޮށް ބެޔާން މިއުނިކް ޖަރުމަނު ކަޕް ކާމިޔާބުކޮށްފިއެވެ.
ބެޔާން ރޭގެ މެޗު ކާމިޔާބުކުރީ މެޗުގެ ފުރިހަމަ ވަގުތު ހަމަވީއިރު، 0 – 0 އިން ދެޓީމު އެއްވަރުވުމުން، ޕެނަލްޓީޖަހައިގެންނެވެ. ޕެނަލްޓީގެ ކުރިން ކުޅުނު އިތުރުވަގުތުގެ ދެހާފުގައިވެސް އެއްވެސްޓީމަކަށް ލަނޑެއް ކާމިޔާބުކުރެވިފައެއްނުވެއެވެ.
ޑޯޓްމުންޑުން ޕެނަލްޓީ ކާމިޔާބުކުރީ ޝިންޖީ ކަގާވާ، ޕެޓްރިކް އައުބަމިޔަން، މާކޯ ރޮއިސް އެވެ. އެޓީމުގެ ސްވެން ބެންޑާ އާއި ޕަޕޮޑަޕްލަސް ޖެހި ޕެނަލްޓީތައްވަނީ ނާކާމިޔާބުވެފައެވެ.
ބެޔާން މިއުނިކްގެ ފަސް ޕެނަލްޓީގެ ތެރެއިން ނާކާމިޔާބުވި ހަމައެކަނި ޕެނަލްޓީއަކީ އެޓީމުގެ ޔޯޝުއާ ކިމިޗް ޖެހި ޕެނަލްޓީއެވެ. ތޯމަސް މުލާ އާއި އަރްތޫރޯ ވިޑާލް އަދި ރޮބަޓް ލެވޮންޑޯސްކީ އާއި ޑަގްލަސް ކޯސްޓާ ޖެހި ޕެނަލްޓީތައް ރޭވަނީ ކާމިޔާބުކޮށްފައެވެ.
މިމެޗުގައި ރަނގަޅަށް ކުޅެ ގިނަ ޙަމަލާތައް އުފެއްދީވެސް ބެޔާން މިއުނިކްއިންނެވެ. މިމެޗުން ބަލިވުމާއެކު މިއީ ޖަރުމަނު ކަޕުގެ ފައިނަލުގައި ބޮރޫޝިޔާ ޑޯޓްމުންޑް ޖެހިޖެހިގެން ބަލިވި ތިން ވަނަ އަހަރެވެ.
