ދިވެހިރާއްޖޭގެ ޑިމޮކްރަސީ މިހާރު މިއޮތީ ގަހެއްގެ ތޮފަޅައިގައި ތާށިވެ، ފިތި، ބާރުވެފައި ކަމަށް ރައްޔިތުންގެ މަޖިލީހުގެ ކުރީގެ ރައީސް ޢަބްދުﷲ ޝާހިދް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އިދިކޮޅު ކޯލިޝަނުން މިރޭ ޅ. ހިންނަވަރުގައި ބޭއްވި ޖަލްސާގައި ވަހަކަފުޅުދައްކަވަމުންނެވެ.
ޝަހިދަކީ ސިޔާސީ ޕޯޑިއަމްތަކުގައި އަދަބިއްޔާތުން މިސާލު ޖައްސަވައި ވާހަކަފުޅު ދައްކަވާ ބޭފުޅެކެވެ. 15 ސެޕްޓެންބަރަކީ ދުނިޔޭގެ ޑިމޮކްރެސީ ދުވަސްކަން ފާހަގަކުރައްވައި އެމަނިކުފާނު ވިދާޅުވީ "ޑިމޮކްރަސީ ދުވަސް ފާހަގަ ކުރާއިރު ރާއްޖޭގެ ޑިމޮކްރަސީ އޮތް ހާލަތާ ބެހޭ ގޮތުން ފިކުރުކުރެއްވުމުން އެމަނިކުފާނުގެ ހިތްޕުޅަށް އައީ އަނބޮއްފުޅާއި ދަންބޮއްފުޅުގެ ވާހަކަ" ކަމަށެވެ.
"އަނބޮއްފުޅު އޮތީ ގަހެއްގެ ތޮފަޅައިގައި ތާށިވެފަ. ރާއްޖެގެ ޑިމޮކްރަސީ ވެސް މިހާރު މިއޮތީ އެކަހަލަ ތަނެއްގައި ތާށިވެފަ. ރާއްޖޭގެ އިންސާނީ ހައްގުތަކާއި ޑިމޮކްރަސީ އާއި މިހުރިހާ ކަމެއް މިހާރު މިއޮތީ ގަހެއްގެ ތޮފަޅައިގައި ތާސިވެ، ފިތި، ބާރުވެފަ." ޝާހިދް ވިދާޅުވިއެވެ.
ޑިމޮކްރަސީ އޮތް ހާލަތާ މެދު އިތުރަށް ވާހަކަދައްކަވަމުން ޝާހިދް ވިދާޅުވީ "ފަސް އަހަރު ދުވަސްވަންދެން ތާށިކޮށްފައި އޮތް ތާށި ކުރުުމުގެ ސަބަބުން ޑިމޮކްރަސީގެ އިންސާނީ ހައްގުތަކުގެ ހާލަތު ދެރަވަމުން ނިކަމެތި ވަމުން ގޮސް މިއަދު މިވަނީ ވަރަށް ނާޒުކު ފައްތަރަކާއި ހަމައަށް ގޮސްފަ" އެވެ. އަދި އަނބޮއްފުޅާއި ދަނބޮއްފުޅު ވާހަކައިގައި އަނބޮއްފުޅު ތާށިވީމާ ދަންބޮއްފުޅު އެކި ފަރާތްތަކަށް ދިޔަހެން ދިވެހިރާއްޖޭގެ އިންސާފަށް ލޯބިކުރާ ހުރިހާ ފަރާތްތަކަކުން އާދޭސްކޮށް، ރޮމުން އެއްފަރާތުން އަނެއް ފަރާތަށް ދަތުރުކުރަމުން ގެންދިޔައެވެ. އަދި އާދޭސް ކުރަމުން މިކަން ރަނގަޅުކުރުމަށް އެދެމުން ދިޔައެވެ.
ރާއްޖޭގެ ޑިމޮކްރެސިގެ ހާލަތު ޝަހިިދު ސިފަކުރެއްވީ އަނބޮއްފުޅާއި ދަނބޮއްފުޅުގެ ވާހަކައިންނެވެ. "ގަސް ކަނޑާލުމަށް އެދި މާވަޑިބެ ކައިރިއަށް ދިޔައިން. މާވަޑިކަލޭގެ ފުރޯ ފަންވަރު ބާލައިދިނުމަށް ކަނބުރު ކައިރިއަށް ދާން ކަނބުރު ގިނި ނިވައިލަދޭން ވާރޭ ކައިރިއަށް ދިޔައިން. ވާރޭ ފެން ބޮއެ ހުސްކޮށްދޭން އެތް ކައިރިއަށް ދިޔައިން. އެތު ކަންފަތަށް ރީ އަޅައިދޭން މާބުރު ކައިރިއަށްވެސް ދިޔައިން. މާބުރު ހިފައި ކައިމަދުކޮށްދިނުމަށް އިރުވައިހުދު ކައިރިއަށް ދިޔައިން. އިރުވައިހުދު ފޭރުހަރާ މަރާލަދިނުމަށް އެދި ފޭރު ކައިރިއަަށްވެސް ދިޔައިން. ފޭރުގެ ގުއިގަނޑު ކޮށާދިނުމަށް އެދި މިދާ ކައިރިއަށްވެސް ދިޔައިން. ހަމަ ޚަބަރެއްވެސް ނުވި"
ނަމަވެސް އެމަނިކުފާނު ވިދާޅުވީ އަނބޮއްފުޅާއި ދަނބޮއްފުޅު ވާހަކައިގައިވީހެން ވީހޭން އުއްމީދުގެ ދުވަަހެއް އެބައާދެއެވެ. 23 ސެޕްޓެންބަރަކީ ބަންޑާރަ ބޮޑު ގަސް ކަނޑަލަން ރައްިޔތުން ނިކުން ދުވަހެވެ. އެމަނިކުފާނު ވިދާޅުވިގޮތުގައި ކޮންމެ ވޯޓު ކަރުދާސްކޮޅަކީ މާވަޑިބޭގެ ފުރޯގެ މިޔައެކެވެ. އަދި ވޯޓުލާން ގޮސްފައި އިބްރާހިމް މުޙައްމަދް ޞާލިޙަށް ވޯޓު ދޭންވީ ސަބަބަކީ އެދުވަހަކީ ދިވެހިރާއްޖޭގެ ޑިމޮކްރެސީ މިނިވަން ކުރާ ދުވަސްކަމުގައިވާތި އެވެ.
