ގަދަ ވަޔާއި، ބޯ ވާރޭއާއެކު ބާރުގަދަ ޠޫފާން 'ފްލޮރެންސް' އެމެރިކާގެ ނޯތު ކެރޮލައިނާ ސްޓޭޓަށް މިއަދު އަރައިފިއެވެ. 'ފްލޮރެންސަކީ "ކާރިސާއެެއް ކުރިކުރުވާނެ" ޠޫފާނެއް ކަމުގެ އިންޒާރު އެމެރިކާގެ މޫސުމާ ބެހޭ އިދާރާއިން ކުރިންވަނީ ދީފައެވެ.
އިރުމަތީ އެމެރިކާ ގަޑިން ހެނދުނު 7:15 ވީއިރު (ރާއްޖޭ ގަޑިން ހަވީރު 4:15) ޠޫފާން ފުރަތަމަ އަރާފައި ވަނީ ނޯތު ކެރޮލައިނާގެ ރައިޓްސްވިލް ބީޗަށެވެ. ގަޑިއަކު 150 ކިލޯމީޓަރުގެ ވަޔާއި، ބޯ ވާރެއާއެކު ޠާފާން އެރި އިރު ގަނޑު ގަދަވެ ބިޔަ ރާޅު އެރުމުގެ ސަބަބުން ސަރަހައްދު ގެތައް މިހާރު ވަނީ ފެނު އަޑީގައެވެ. އެ ސްޓޭޓުގެ ގަވަރުނަރު ރޯއި ކޫޕާ ވިދާޅުވިގޮތުގައި ޠޫފާނުގެ ސަބަބުން މުޅި ސްޓޭޓުގައި އެތައް ފޫޓަކަށް ފެން ބޮޑުވުމުގެ ފުރުސަތު ބޮޑެވެ.
ކެޓެގަރީ 1 ގެ ޠޫފާނެއްގެ ގޮތުގައި ދަރަޖަކުރެވިފައިވާ 'ފްލޮރެންސް، ވިލްމިންގޓަންގެ އިރުން އޮންނަ ރައިޓްސްވިލްއަށް އެއް ގަޑިއިރުގެ ތެރޭގައި 75 މިލިމީޓަރުގެ ވާރޭ ވެހިފައި ވެއެވެ. ނޯތު ކެރޮަލައިނާއާއި ސައުތު ކޮރެލައިނާ ހުރަސްކޮށް ޠޫފާން ދާއިރު އެ ދެ ސްޓޭޓަށް 1000 މިލިމީޓަަރުގެ ވާރޭ ވެހޭނެ ކަމަށް ލަފާކުރެވެއެވެ. ގަޑިއަކު 6.5 ކިލޯމީޓަރުގެ ބާރު މިނުގައި މަޑުމަޑުން ޠޫފާން ކުރިއަށް ޖެހެމުން ދާއިރު، ޠޫފާން އަރައިގެން ފާއިތުވި ފުރަތަމަ 3 ގަޑިއެއްހާއިރު ތެރޭގައިވެސް ނޯތު ކެރޮލައިނާއަށް 300 މިލިމީޓަރުގެ ވާރޭ ވެހިފައިވާ ކަމަށް އެންމެ ފަހުގެ ޚަބަރުތައް ބުނެެއެވެ.
މިއަދު ޠޫފާން އެރުމުގެ ކުރިން މޫސުމާ ބެހޭ އިދާރާއިން ވަނީ އިންޒާރު ދީފައެވެ. އަދި 1 މިލިއަން މީހުން ވަނީ ރައްކާތެރި ސަރަހައްދުތަކަށް ބަދަލުކޮށްފައެވެ. ފެންބޮޑުވުމުގެ ސަބަބުން ގެތަކުން ނުނުކުމެވި ތާށިވެފައި ތިބި 200 މީހުން ސަލާމަތްކޮށްފައި ވާއިރު، ޖެކްސަންވިލްގެ ހޮޓަލެެއްގައި ތާށިވެފައި ތިބި 60 މީހުން ސަލާމަތްކުރުމު މަަސައްކަތް މިހާރު ދަނީ ކުރަމުންނެވެ. އަދިވެސް އިތުރު މީހުން ސަލާމަތްކުރުމުގެ މަސައްކަތްކުރަމުން ދާއިރު 30 ހާހެއްހާ މީހުންގެ އާބާދިއެއް އޮންނަ ނިއުބާން ގައި މިހާރުވެސް ފެންބޮޑުވެފައިވާ ސަރަހައްދުތަކުގައި ގިނަ ބަޔަކު ތާށިވެފައިވާ ކަމުގައި ވެއެވެ. އެހެންނަމަވެސް، އަދި އެެއްވެސް މީހަކު މަރުވިކަމުގެ ޚަބަރެއް ލިބިފައި ނުވެއެވެ.
"އަހަރުމެން ތިޔަބޭފުޅުން ސަލާމަތްކުރަން އެބަ އަންނަން. ތިޔަބޭފުޅުން ފަހަރެއްގައި ގެތަކުގެ ދެވަނަ ފަންގިފިލާއަށް ނުވަތަ ގޭތަކުގެ މައްޗަށް އަރުއްވަން ޖެހިދާނެ، އެހެންނަމަވެސް އަހަރުމެން ތިޔަބޭފުޅުން ސަލާމަތްކުރަން އަންނާނަމު." ނިއުބާން ސިޓީ ކައުންސިލްގެ ބޭފުޅަކު ކުރެއްވި ޓްވީޓެއްގައި ވެއެވެ.
