މާތްވެގެންވާ އިސްލާމްދީނާއި، ވަތަނާއި، ރާއްޖޭގެ މިނިވަން ކަމަށް ލޮޅުން އަރާފާނެ ފަދަ އެއްވެސް ކަމެއް ރައީސް އަބްދުﷲ ޔާމީން ނުކުރައްވާނެކަން ކަށަވަރުވާ ކަމަށް އެމަނިކުފާނުގެ ރަނިންމޭޓް ޑރ. މުހައްމަދު ޝަހީމް އަލީ ސައީދު މިރޭ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޕީޕީއެމުން ކާނިވާ ސަރަހައްދުގައި މިރޭ ބޭއްވި "ބްރިޖު ސަޅި" ޖަލްސާގައި ވާހަކަފުޅު ދައްކަވަމުންނެވެ.
"އަޅުގަނޑަށް ކަށަވަރޭ މިރާއްޖޭގެ ދީނާއި މިރާއްޖޭގެ ވަތަނާއި މިރާއްޖޭގެ މިނިވަންކަމަށް ލޮޅުން އަރާފާނެފަދަ އެއްވެސް ކަމެއް ރައީސް އަބްދުﷲ ޔާމީން އަބްދުލްގައްޔޫމް ނުކުރައްވާނެކަން،" ޝަހީމް ވިދާޅުވިއެވެ.
އެމަނިކުފާނު ވިދާޅުވީ ރައީސް ޔާމީންގެ ރަނިންމޭޓުކަން ގާބޫލުފުޅު ކުރެއްވީ ސަމާސައަކަށް ނޫން ކަމަށެވެ. "ރައީސް ޔާމީނުގެ ރަނިންމޭޓްކަން ގަބޫލުކޮށްގެން އަޅުގަނޑު މި ހައްސާސް ވަގުތު އެމަނިކުފާނުގެ އަރިހަށް މިއައީ ސަމާސާ ކުރާކަށް ނޫނޭ. އަޅުގަނޑުގެ ނިންމުމަކީ ދިވެހިރާއްޖޭގެ ދީނާއި ގައުމަށްޓަކައި ނިންމި ނިންމުމެކޭ އިނގޭތޯ،" ޝަހީމް ވިދާޅުވިއެވެ.
އެމަނިކުފާނަކީ މިސަރުކާރުގެ އިސްލާމީ އެންމެބޮޑު ދެ މުއައްސަސާ ކަމަށްވާ އިސްލާމިކް އެފެއާޒު މިނިސްޓްރީއާއި، އިސްލާމިކް ޔުނިވަރުސިޓީގެ ވެރިކަން ކުރައްވާފައިވާ ބޭފުޅެއް ކަމުން ރައީސް ޔާމީންގެ ދީނީ ސިޔާސަތު ވަރަށް ރަނގަޅަށް އެނގިވަޑައި ގަންނަވާ ކަމަށް ވެސް ޑރ. ޝަހީމް ވިދާޅުވިއެވެ.
"އަޅުގަނޑަކީ މިސަރުކާރުގެ އިސްލާމީގޮތުން އެންމެ ބޮޑު ދެ މުއައްސަސާގެ ވެރިކަން ކޮށްފައި ހުރިމީހެއް. އިސްލާމިކް މިނިސްޓްރީއާއި އިސްލާމިކް ޔުނިވަރުސިޓީ. އަޅުގަނޑަށް އެނގޭ އަޅުގަނޑަށް ތަޖުރިބާ ކުރެވިފައިވަނީ ރައީސް އަބްދުﷲ ޔާމީން އަބްދުލްގައްޔޫމުގެ ދީނީ ސިޔާސަތު،" އެމަނިކުފާނު ވިދާޅުވިއެވެ.
ރައީސް ޔާމީންފަދަ ބޭފުޅަކު ރާއްޖޭގެ ވެރިކަމަށް ކުރިމަތި ލައްވައިފައިވަނިކޮށް އިސްލާމްދީނަށް ގެއްލުންދިން މީހުން އެކަންކުރިއިރު އަތްތިލަބަޑި ކަހަންތިބި މީހުންނަށް ވޯޓުދޭން ޖެހޭނެތޯ ވިދާޅުވެ ޝަހީމް ވަނީ ސުވާލު އުފައްދަވައިފައެވެ.
"މިފަދަ ބޭފުޅަކު (ޔާމީން ފަދަ ބޭފުޅަކު) އަޅުގަނޑުމެން ތަޖުރިބާކޮށްފައިވަނިކޮށް އިސްލާމްދީނަށް ގެއްލުންދިން އެއްކަލަ މީހުންނާއި އެމީހުން ގެއްލުން ދެމުންދިޔައިރު އަތްތިލަބަޑި ޖަހަން ތިބި މީހުންނަށް އަޅުގަނޑުމެން މިއަދު ވޯޓުދޭން ޖެހޭނެތޯ. އަޅުގަނޑުމެން ނުޖެހޭ ވޯޓުދޭކަށް،" ޝަހީމް ވިދާޅުވިއެވެ.
ޑރ. ޝަހީމް ވިދާޅުވީ ޕީޕީއެމްގެ ސަފުތައް ބަދަހިކަންމަތީ އޮތްހާ ހިނދަކު އެސަފުތައް ފޫއަޅުވާލުމަށްފަހު ދިވެހި ދައުލަތުގެ ވެރިކަން އެހެން ބަޔަކަށް ނުކުރެވޭނެ ކަމަށެވެ. ޕީޕީއެމްގެ ސަފުތަކަކީ ރާއްޖޭގެ ދެކުނާއި އުތުރަށް ދެމިފައިވާ ސަފުތަކެއް ކަމަށާއި 23 ސެޕްޓެމްބަރުގައި ބާއްވާ އިންތިޚާބުގައި އެސަފުތައް ރައީސް ޔާމީނާއި ޕީޕީއެމްގެ ލީޑަރޝިޕްގެ ފަހަތުގައި ރުކުރުވާލަންޖެހޭ ކަމަށް ޝަހީމް ވިދާޅުވިއެވެ.
