ރޮހިންޔާ މުސްލިމުންގެ ނަސްލު ނައްތާލަން މަސައްކަތްކުރުމުގެ ކުށުގައި މިޔަންމާގެ އަސްކަރީ ވެރިޔާއާއި އިތުރު ފަސް ކޮމާންޑަރުންގެ މައްޗަށް ތަހުގީގު ހިންގައި ޝަރީއަތްކުރަން ޖެހޭަކަމުގައި އދ. އިން ބުނެފިއެވެ.
މައިގަނޑުގޮތެއްގައި ބުދުދީނަށް އަޅުކަންކުރާ މީހުން އުޅޭ މިޔަަންމާގެ ސަރުކާރާ ދެކޮޅަށް ހަތިޔާރާއެކު ނުކުތް ބަޔަކާ ދެކޮޅަށް ފެށި އޮޕަރޭޝަނެއް ކަމަށް ބުނެ ފާއިތުވި އަހަރު އޮގަސްޓުމަހު މިޔަންމާގެ އަސްކަރިއްޔާއާއި، އެމީހުންނަށް އެހީތެރިވި ހަތިޔާރުއެޅި ގުރޫޕްތަކުން ރަޚައިން ސްޓޭޓުގައި ފެށި ފުޅާ ދާއިރާއެއްގައި ގެދޮރު ރޯކުރުމާއި، މެރުމާއި، އަންހެނުންގެ އިއްފަތް ފޭރިގަތުމުގެ ވަރުގަދަ 'އޮޕަރޭޝަނުން' ސަލާމަތް ވާން 7 ލައްކައަށްވުރެ ގިނަ ރޮހިންޔާ މުސްލިމުން ވަނީ ބަންގްލަދޭޝްއަށް ވަދެފައެވެ.
ނަސްލު ސާފުކުރުމުގެ ތުހުމަތުތަކަށް މިޔަންމާ ސަރުކާރުން އިންކާރުުކުރެއެވެ. އަދި އެއީ ރޮހިންޖާ ބަޣާާވާތަކާ ދެކޮޅަށް ހިންގި އަސްކަރީ އޮޕަރޭޝަނެއް ކަމަށް ސަރުކާރުން ބުނެއެވެ.
އެހެނަސް، މައްސަލައިގެ ހަގީގަތް ހޯދަން އދ. އިން ފޮނުވި ޓީމުން ހޯދި ހޯދުންތަކަށް ފަހު ހޯމަ ދުވަހު (މިއަދު) ނެރުނު ރިޕޯޓުގައި ބުނެފައި ވަނީ "އަސްކަރީ އެންމެ މަތީ ވެރިން، އޭގެ ތެރޭގައި ސިފައިންގެ އެންމެ މަތީ ވެރިޔާ ސީނިއަރ ޖެނެރަލް މިން އާންގް ހްލައިންގް ހިމެނޭހެން، ތަހުގީގުކޮށް، ރަޚައިން ސްޓޭޓުގެ އުތުރުގައި ނަސްލު ސާފުކުރުމުގެ އަމަލުތައް ހިންގާފައިވާތީ އެމީހުންގެ މައްސަލަ ޝަރީއަތަށް ފޮނުވަން ޖެހެއެވެ."
"ޓަޓްމަޑާއު (މިޔަންމާގެ އަސްކަރިއްޔާ) ގެ އަމުރުވެރިކަމުގެ ސިލްސިލާގެ އެންމެ މަތީގައި ތިބި އިސް މީހުންނާ ދެކޮޅަށް ތަހުގީގު ހިންގައި ޝަރީއަތް ކުރަން ފުދޭވަރުގެ ހެކި ލިބިފައި އެބަހުއްޓެވެ." އދ. ގެ ހިއުމަން ރައިޓްސް ކޮމިޝަނުން މާރިޗު 2017 ގައި އެކުލަވާލި އެ ކޮމިޓީގެ ރިޕޯޓުގައި ވެއެވެ.
"ރަޚައިން ސްޓޭޓުގައި ހިންގާފައިވާ ޖަރީމާތަކާއި، އެކަންތައް ހިންގާފައިވާ ގޮަތަށް ބަލާއިރު، އޭގެ ޠަބީއަތާ، ނުބައިކަމާ، އެކަން ހިންގާފައިވާ ދާއިރާ ފުޅާކަމަށް ބަލާއިރު، ނަސްލު ސާފުކުރުމުގެ ނިޔަތުގައި ކުރިކަމެއް ކަމުގައި" ބެލުމުގެ ފުރުސަތު އޮތްކަމަށް ރިޕޯޓުގައި ވެއެވެ.
ކޮމިޓީގެ ރިޕޯޓުގައި އާންގް ސަންގް ސޫޗީ އަށްވެސް ވަރަށް ބޮޑަށް ފާޑުކިޔާފައި ވެއެވެ. އޭގައި ވާގޮތުން "މިޔަންމާގެ ސަރުކާރު ހިންގާ ފަރާތުގެ ގޮތުގައި ހުރެ އޭނާގެ މަގާއި، އޭނާގެ އަޚްލާޤީ މަސްއޫލިއްޔަތުގެ ބޭނުންކޮށްގެން، ނިއުޅެމުން ދިޔަ ހާދިސާތައް ހުއްޓުވަން އޭނާ މަަސައްކަތްކޮށްފައި ނުވެއެވެ."
އދ. ގެ ކޮމިޓީގެ ރިޕޯޓުގައި ފޭސްބުކުގެ ދައުރުވެސް ފާހަގަކޮށްފައި ވެއެވެ. "ނަފުރަތު ފަތުރަން ބޭނުންވާ މީހުންނަށް ވަރަށް ބޭނުންތެރި އާލާތެއް ކަމުގައި" ފޭސްބުކް ވިފައިވާ ކަން ބަޔާންކުރަމުން ރިޕޯޓުގައި ފާހަގަކޮށްފައި ވާގޮތުގައި "ފާއިތުވި މަސްތަކުގައި ކަންކަން ރަނގަޅުކުރި ނަމަވެސް، ފޭސްބުކުން ފިޔަވަޅު އަޅާފައިވަނީ މާލަހުން، މާބޮޑު އަަސަރެއް ނުކުރާ ގޮތަށެވެ."
50 މިލިއަން މީހުންގެ އާބާދީއެއް އޮންނަ މިޔަންމާގައި 18 މިލިއަން މީހުން ފޭސްބުކް ބޭނުންކުރެއެވެ.
