ކުރިއަށްއޮތް ރިޔާސީ އިންތިޚާބު އޮބްޒާވް ކުރުމުގެ ފުރުސަތު ޔޫއެންއަށާއި އީޔޫއަށް ދެއްވުމުން އޮބްޒަވޭޝަނުގައި އަމަލީ ގޮތުން ބައިވެރިވާން ބޭނުން ނުވާކަމަށް އަންގާފައިވާ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އެކޮމިޝަންގެ ރައީސް އަހުމަދު ޝަރީފް އާދަމް ވިދާޅުވީ ޔޫއެންއަށް ދައުވަތު ދެއްވުމުން އެތަނުން ބޭނުންވީ ލަފާދޭ ކޮމިޓީގައި އެތަނުގެ މަންދޫބަކު ނުވަތަ ކޮންސަލްޓެންޓަކު ބައިވެރި ކުރުމަށް ކަމަށެވެ. އެހެންނަމަވެސް މަޝްވަރާ ކުރުމަށްފަހު ކޮމިޝަނުން މިހާރު ނިންމާފައިވަނީ ގަވާއިދާ އެއްގޮތަށް އެފުރުސަތު ނުދޭން ޔޫއެންއަށް އެންގުމަށް ކަމަށް ޝަރީފް ވިދާޅުވިއެވެ.
"އަޅުގަނޑުމެން ޔޫއެންއަށް ދައުވަތު ދިނިން ބޭނުންފުޅިއްޔާ އޮބްޒާވް ކުރުމުގެ ފުރުސަތު. އެހެންނަމަވެސް އާންމު ގޮތެއްގައި ޔޫއެންއަކީ އިންތިޚާބުގެ ކަންކަން އޮބްޒާވްކުރާ ބައެއް ނޫންކަމަށް އެބޭފުޅުން ވިދާޅުވީ. އެހެންނަމަވެސް އެބޭފުޅުންކުރި އެހެން ރިކުއެސްޓަކީ އަޅުގަނޑުމެންގެ ގައުމީ ލަފާދޭ ކޮމިޓީގައި އެބޭފުޅުންގެ ކޮންސަލްޓެންޓެއް ބޭންދިދާނެތޯ. އެހެންނަމަވެސް ކޮމިޝަނުން މަޝަވަރާ ކުރުމަށްފަހު ނިންމީ އެޑުވައިޒަރީ ކޮމިޓީގައި ހިމެނެންޖެހޭ ފަރާތެއްނޫން ފަރާތެއް (ގަވާއިދުގައި ކަނޑައަޅާފައިވާ ފަރާތެއް ނޫން ފަރާތަކަށް) ފުރުސަތު ދެވެންނެތް ވާހަކަ ދަންނަވަން" ޝަރީފް ވިދާޅުވިއެވެ.
އޭނާ ވިދާޅުވީ އިންތިޚާބު އޮބްޒާވް ކުރުމުގެ ދައުވަތު އީޔޫއަށް ވެސް ދެއްވި ކަމަށެވެ. އެހެންނަމަވެސް އެބޭފުޅުން ވަޑައިގަންނަވާނެ ކަމުގެ މައުލޫމާތު ނުރަސްމީކޮށް ކުރިން ލިބިފައި އެކަން ފަހުން ބަދަލު ވެގެންގޮސްފައިވާ ކަމަށެވެ. އެހެންނަމަވެސް މިމަހުގެ މެދެއްހާ ހީސާބު އީޔޫއިން ވަނީ ރިޔާސީ އިންތިޚާބު އޮބްޒާވް ކުރުމުގެ ޝައުގުވެރިކަމެއް ނެތްކަމަށް ބުނެ ސިޓީ ފޮނުވައިފައި ކަމަށް ޝަރީފް ވިދާޅުވިއެވެ. "އެހެންވީމާ އީޔޫއިންނާއި ޔޫއެންގެ އެއްވެސް ކަހަލަ ރެޕްރެޒެންޓިވްއެއް މިއިންތިޚާބުގެ އޮބްޒަވޭޝަންތެރޭގައި ނުހިމެނޭނެ ކަމަށް އަޅުގަނޑުމެންނަށް މިލަފާ ކުރެވެނީ،" ޝަރީފް ވިދާޅުވިއެވެ.
އިލެކްޝަންސް ކޮމިޝަންގެ މެމްބަރު އަދި ތަރުޖަމާނު މުހައްމަދު އަކުރަމް ވިދާޅުވީ އިންތިޚާބު އޮބްޒާވް ކުރުމަށް ބޭރުގެ 35 ފަރާތަކުން އެދިފައިވާ ކަމަށެވެ. އޭގެތެރެއިން އެއްފަރާތެއްގެ މައުލޫމާތު ފުރިހަމަ ނުވާތީ އެ ފޯމް ރިޖެކްޓް ކޮށްފައިވާ ކަމަށެވެ. މިހާރު ގެންދަނީ ބާކީ 34 ފަރާތުގެ ފޯމުތައް ޗަކުކުރަމުން ކަމަށް އޭނާ ވިދާޅުވިއެވެ. އޭގެ ތެރޭގައި ދުނިޔޭގެ މަޝްހޫރު ބައެއް މީޑިއާތައް ވެސް ހިމެނެއެވެ.
އަކުރަމް ވިދާޅުވީ އިންތިޚާބު އޮބްޒާވް ކުރަން ޔޫއެންއާއި އީޔޫ އިން ބައިވެރިނުވިޔަސް އިންތިޚާބުގެ ކަންކަން ކުރިއަށް ގެންދިޔުމާ ބެހޭގޮތުން އެފަރާތްތަކުންވަނީ އިލެކްޝަނާ އެކު މަޝްވަރާ ކުރައްވައިފައި ކަމަށެވެ. "އެހެންވީމާ އިންތިޚާބުގެ ކަންކަން ކުރިއަށް ގެންދިޔުމުގައި އެމީހުންގެ މަޝްވަރާ ވެސް ވަނީ ލިބިފައި،" އަކުރަމް ވިދާޅުވިއެވެ.
