އެމެރިިކާގެ ރައީސު ޑޮނާލްޑް ޓްރަމްޕްގެ ރިޔާސީ ކެމްޕޭނުގެ މެނޭޖަރުކަން ކުރެއްވި ޕޯލް މެނެފޯޓްގެ މައްޗަށް މާލީ އަށް ކުށެއް ސާބިތުވާ ކަމަށް އެ މައްސަލަތައް ބެލި ފެޑެރަލް ކޯޓުން ނިންމައިފިއެވެ. މިއީ ޓްރަމްޕްގެ ކެމްޕޭންގެ ކަންތައް ތަހުގީގުކުރައްވާ ޚާއްސަ ކައުންސެލްއަށް ކޯޓުގައި ލިބިވަޑައިގެންނެވި ފުރަތަމަ ކާމިޔާބީއެވެ.
މި ނިންމުން މިއައީ، ތަފާތު އެހެން ޝަރީއަތެއްގައި، ރައީސު ޓްރަމްޕްގެ ކެމްޕޭނަށް ޚަރަދުކުރުމުގައި ގާނޫނާ ޚިލާފު ކަންތައްތަކެއް ކުރައްވާފައިވާ ކަމަށާއި، އަދި އެހެން ބައެއް ކަންކަމަށް ޓްރަމްޕްގެ ގާނޫނީ ވަކީލުކަން ކުރެއްވި މައިކަލް ކޯހެން އިއުތިރާފުވެވަަޑައިގެެންފައި ވަނިކޮށެވެ. އެމެރިކާގެ އިއްތިހާދީ ސަރުކާރުގެ އޮފީހަކަށް ވާދަކުރެއްވި ކެންޑިޑޭޓެއްގެ އެންގުމުގެ މަތީން 2016 ވަނަ އަހަރުގެ ރިޔާސީ އިންތިޚާބަށް ނުފޫޒުފޯރުވުމުގެ ބޭނުމުގައި ފައިސާ ޚަރަދުކޮށްފައިވާނެކަމަށް ވެސް އޭނާގެ އިއުތިރާފުގައި ވިދާޅުވެފައި ވެއެވެ.
މެނެފޯޓްގެ މައްޗަށް ސާބިތުވި އަށް ކުށުގެ ތެރޭގައި ޓެކުހަށް މަކަރު ހެދުމާއި، ބޭންކަށް އޮޅުވާލުމާއި، ބޭރުގެ ބޭންކުތަކުގައި ހުރި އެކައުންޓުތައް ސިއްރުކުރުން ހިމެނެއެވެ. ޝަރީއަތްކުރެއްވި ފަނޑިޔާރުންނަށް ސާބިތުވާ ކަމަށް ފެނިވަޑައި ނުގަތް އިތުރު 10 މައްސަލައެއް ދޫކޮށްލާފައިވާކަމަށް ވެސް ކޯޓުން ބުނެފައި ވެއެވެ.
ކޯޓުގެ މި ނިންމުމާއެކު މެެނެފޯޓުގެ މައްޗަށް އެތައް އަހަރުގެ ޖަލު ހުކުމެއް އަނާނެކަން މިވަނީ ޔަގީންވެފައެވެ. އަދި މިއީ ޅާއްސަ ކައުންސެލް ރޮބަޓް މުލާއަށާއި، އޭނާގެ ޓީމަށް އަމާޒުވި ހަމަލާތަކާއެކުވެސް (ޚާއްސަކޮށް ރައީސު ޓްރަމްޕްގެ ފަރާތްޕުޅުން) ކޯޓުގައި މައްސަަލަތާއިގެން ކުރިއަށް ދިއުމުގެ ހިތްވަރު ހުރިކަން ދައްކައިދިން ނިންމުމެކެވެ.
އަނެއްކޮޅުން ރައީސު ޓްރަމްޕްގެ ކުރީގެ ވަކީލު މައިކަލް ކޯހެންގެ ޝަރީއަތަށް ބަލާއިރު، އޭނާ ވަނީ ޓެކުހަަށް، މަކަރުހެދުމުގެ ފަސް މައްސަލައަކާއި، ބޭންކަށް އޮޅުވާލުމުގެ މައްސަލައަކާއި، ކެމްޕޭން ފައިސާއާބެހޭ ގާނޫނާ ޚިލާފުވުމުގެ ތިން މައްސަލައަކަށް އިއުތިރާފުވެވަޑައިގެންފައެވެ. އޭނާގެ މައްޗަށް ޑިސެންބަރު 12 ގައި ހުކުމް ކުރެވޭއިރު ހަތަރު ފަސް އަހަރުގެ ޖަލު ހުކުމެއް އައުން އެކަށީގެން ވެއެވެ.
ކޯހެންގެ އިއުތިރާފާ ގުޅިގެން ރައީސު ޓްރަމްޕްގެ ގާނޫނީ ވަކީލު ރޫޑީ ޖޫލިއާނީ ނެރުއްވި ބަޔާނެއްގައި ވިދާޅުވީ "ސަރުކާރުން ކޯހެންއާ ދެކޮޅަށް ކުރި ދައުވާގައި ރައީސު ޓްރަމްޕް އެއްވެސް ކަމެއް ގޯސްކޮށް ކުރައްވާފައިވާ ކަމުގެ ތުހުމަތެއް ނެތް" ކަމުގައެވެ.
