ރައްޔިތުންގެ ގިނަ އުއްމީދުތަކެއް ހަގީގަތަކަށް ހައްދަވައި ދެއްވިޖެ ކަމަށް ރައީސް ޔާމީން ވިދާޅުވެއްޖެއެވެ.
ގއ. ކޮލަމާފުށީގައި މިއަދު ދެއްކެވި ވާހަކަފުޅުގައި ރައީސް ވިދާޅުވީ ޒުވާނުންގެ އުއްމީދުތަކާއި އިސްރަށްވެހިންގެ އުއްމީދުތައް ހާސިލް ކޮށްދެއްވުނަށް އެމަނިކުފާނުވަނީ ގިނަ މަސައްކަތްތަކެއް ކޮށްދެއްވައިފައި ކަމަށެވެ.
ރައިސް ވިދާޅުވީ ރައްޔިތުންނަށް ގިނަކަންތައްތަކެއް ކޮށްދެއްވައިފައި ވިޔަސް އިތުރު ކަންތައްތައް ފުރިހަމަކޮށްދެއްވުމަށް ރައްޔިތުން އުއްމީދުކުރާނެ ކަމަށާއި، އެކަންކަމަށް މަސައްކަތްކުރެއްވުމަކީ ކޮންމެހެން ކުރަންޖެހޭނެ ކަމެއް ކަމަށެވެ. ރައްޔިތުން ބޭނުންވާ ތަރައްގީގެ މަސައްކަތްތަކަށް ބޭނުންވާ ފައިސާ ހޯދުމުގެ މަސައްކަތަކީ އިލްމީ ދިރާސާތަކާއެކު ކުރަންޖެހޭކަމެއްކަމަށް ވެސް އެމަނިކުފާނު ވިދާޅުވިއެވެ.
ރާއްޖޭގައި ވަސީލަތްތައް މަދުވުމަކީ ތަރައްގީއަށް އޮތް ހުރަހެއް ކަމުގައި ދެކެމުން އައިވިސްނުން މިހާރު ބަދަލުވެފައިވާ ކަމަށް ވެސް ރައީސް ވިދާޅުވިއެވެ. އެމަނިކުފާނު ވިދާޅުވީ ރައްޔިތުން ބޭނުންވަނީ ރައްޔިތުންނަށް ދަތިވެފައި ހުރި ކަންކަން ފުއްދައިދިނުން ކަމަށާއި، އެމަނިކުފާނުގެ ޒަޢާމަތުގައި ރައްޔިތުންނަށް ދަތިވެފައިހުރި ކަންކަން ފުއްދަވައިދެއްވާނެކަން ރައްޔިތުން ގަބޫލުކުރާ ކަމަށެވެ.
މިސަރުކާރުން ކޮލަމާފުށީގައި ތަރައްގީގެ މަޝްރޫއުތައް ކުރިއަށް ގެންދިއުމަށް 227 މިލިއަން ރުފިޔާ ހޭދަކުރައްވާފައިވާކަމަށް ވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާ ހުވަދު އަތޮޅަށް އިއްޔެ ފެއްޓެވި ތިން ދުވަހުގެ ދަތުރުފުޅުގައި އިއްޔެ ވަނީ ގދ. މަޑަވެއްޔާއި، ގދ. ފަރެސްމާތޮޑާއަށާއ، ގައްދުއަށް ވަޑައިގެންފައެވެ. މިއަދު އެމަނިކުފާނު ވަނީ ކޮލަމާފުށީގެ އިތުރަށް ކޮނޑޭއަށް ވަޑައިގެންފައެވެ.
