އަރިއޮތޮޅު ދެކުނުބުރީ މަހިބަދޫގައި އައިސްޕްލާންޓެއް ބެހެއްޓުމުގެ މަސައްކަތް އަމިއްލަ ފަރާތަކާ ހަވާލު ކުރައްވައިފިއެވެ.
މި މަސައްކަތް ހަވާލު ކުރައްވައިފައިވަނީ ގދ. ފިޔޯރީ ގުލްބަކާގޭ، މުހައްމަދު މުއްތަލިބާއެވެ. އޭނާއަކީ އައިސްޕްލާންޓް ބެހެއްޓުމުގެ މަސައްކަތުގެ ތަޖުރިބާ ލިބިފައިވާ ބޭފުޅެކެވެ. ކޫއްޑޫގައި މަސައްކަތް ކުރެއްވި ދުވަސްވަރު އޭނާ ވަނީ ސަރުކާރާ ގުޅިގެން ރަށްރަށުގައި އައިސްޕްލާންޓް ބެހެއްޓުމުގެ މަސައްކަތް ފުޅާދާއިރާއެއްގައި ކޮށްފައެވެ.
މި މަސައްކަތް ހަވާލުކުރުމުގެ އެއްބަސް ވުމުގައި ސޮއިކުރައްވައިފައިވަނީ އޯގަސްޓް މަހު ފުރަތަމަ ދުވަހުއެވެ. މި އެއްބަސްވުމުގައި ފިޝްރީޒް މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރ މުހައްމަދު އާދަމް (އެޑަމް) އެވެ. މުހައްމަދު މުއްތަލިބު ގެފަރާތުން ސޮއި ކުރެއްވީ ސީދާ އޭނާއެވެ.
އޭނާ ވިދާޅުވީ މަހިބަދޫގައި ބަހައްޓަން ސަރުކާރުން ހަވާލުކުރެއްވީ 25 ޓަނުގެ އައިސް ޕްލާންޓެއް ކަމަށެވެ. އެހެންނަމަވެސް ސަރުކާރާ ވާހަކަ ދައްކައިގެން އަމިއްލަގޮތުން އެވަނީ 30 ޓަނަށް ބަދަލު ކުރައްވައިފައެވެ. "މަހިބަދޫގައި ބަހައްޓަން ހަވާލުކުރީ 25 ޓަނުގެ ޕްލާންޓެއް. އެކަމަކު އަޅުގަނޑުވާނީ އެ 30 ޓަނަށް ބަދަލުކޮށްފައި، ސަރުކާރާ ވާހަކަ ދައްކައިގެން،" މުއްތަލިބު ވިދާޅުވިއެވެ.
އޭނާ ވިދާޅުވީ އަމަލީ މަސައްކަތް އަންނަ ހަފްތާގައި ފަށާނެ ކަމަށެވެ. އަދި 90 ދުވަސް ތެރޭގައި މަސައްކަތް ނިންމަން ޖެހޭކަމަށްވެސް ވިދާޅުވިއެވެ. އެރަށުގައި ބަހައްޓާ ޕްލާންޓް ގެންނަން ހަމަޖެހިފައިވަނީ ޗައިނާއިންނެވެ. "މިމަސައްކަތް އެއްކޮށް ނިންމާލެވޭނީ ގާތްގަނޑަކަށް 4.5 މިލިއަން ރުފިޔާއިން،" މުއްތަލިބު ވިދާޅުވިއެވެ.
މިއީ ރައީސް ޔާމީންގެ ވައުދުތަކުގެ ތެރެއިން ކޮންމެ އަތޮޅެއްގައި އައިސްޕްލާންޓެއް ގާއިމްކޮށް ދެއްވާނެ ކަމަށް ކުރައްވައިފައިވާ ވައުދުގެ ދަށުން ހިންގާ އެންމެ ފަހު ޕްރޮޖެކްޓެވެ.
