ށ. ސިއްރުފެންފުށީގައި ބަހައްޓައިފައިވާ ބުދުތައް ނެގުމަށް ރައީސް އޮފީހުން ޓޫރިޒަމް މިނިސްޓްރީއަށް އަންގަވައިފި ކަމަށް ރައީސް އޮފީހުގެ ތަރުޖަމާނު އިބްރާހީމް މުއާޒު އަލީ ވިދާޅުވެއްޖެއެވެ.
މުއާޒު ކުރައްވައިފައިވާ ޓްވީޓެއްގައި ވިދާޅުވެފައިވަނީ "ށ. ސިއްރުފެންފުށީގައި ބަހައްޓައިފައިވާ ބުދުތައް ނެގުމަށް ރައީސުލްޖުމްހޫރިއްޔާގެ އޮފީހުން މިނިސްޓްރީ އޮފް ޓޫރިޒަމަށް އަންގަވައިފި،" ކަމަށެވެ.
ސިއްރުފުށީގައި ބަހައްޓައިފައިވާ ބުދުތައް މާދަމާގެ ނިޔަލަށް ނަގައި ނިންމުމަށް ރައީސް އޮފީހުން ވަނީ ޓޫރިޒަމް މިނިސްޓްރީއަށް އަންގަވައިފައެވެ.
ށ. ސިއްރުފެންފުށީގައި ބަހައްޓައިފައިވާ ބުދުތައް ނެގުމުގެ މަސައްކަތް އެ ރިޒޯޓްގެ މެނޭޖްމެންޓާއި ގުޅިގެން މިނިސްޓްރީ އޮފް ޓޫރިޒަމުން މިހާރު ކުރައްވަމުން ގެންދަވާ ކަމަށް ވެސް ރައީސް އޮފީހުން ވަނީ ވިދާޅުވެފައެވެ. ސިއްރުފެންފުށީގައި ބުދުއްތައް ބަހައްޓައިފައިވަނީ މޫދުގައި ހަދައިފައިވާ "ކޮލަރޭލިއަމް" ގައެވެ. އެތަނުގައި ވަނީ އިންސާނުންގެ ސޫރަ ދައްކުވައިދޭ ބުދަތަކެއް ބަހައްޓައިފައެވެ. އެހެންމަވެސް ބަހައްޓައިފައިވަނީ ކިތައް ބުދު ކަމެއް އެނގިފައެއް ނުވެއެވެ.
އެ ބުދުތައް އެތަނުގައި ބަހައްޓައިފައިވާތީ ދީނީ އިލްމުވެރިން ވެސް ގެންދަވަނީ އެކަމަށް ފާޑު ވިދާޅުވަމުންނެވެ. އެހެންނަމަވެސް އެތަކެތި އެތަނުގައި ބެހެއްޓި ގޮތާއި ރާއްޖެ އެތެރެވިގޮތާ ބެހޭ ގޮތުން ސަރުކާރުން އަދި އެއްވެސް އެއްޗެއް ވިދާޅުވެފައެއް ނުވެއެވެ.
