މި ސަރުކާރު ދެމިއޮތްހާ ހިނދަކު ރާއްޖޭގެ ގާނޫނު ތަންފީޒު ކުރުމަށް ފަހަތަށް ޖެހިވަޑައިނުގަންނަވާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހއ. ދިއްދޫގައި މިހާރުކުރިއަށްދާ ޖަލްސާގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ އަންހެނުންނާއި ކުޑަކުދިންގެ ހައްގުތަކަށް އަރައިގަންނަމުންދާއިރު ބައްލަވަން ހުންނަވަން ފަސޭހަފުޅު ނޫންކަމަށެވެ. މީހުން ކަތިލާ ވައްޓައިލާތަން އެމަންޒަރު ބައްލަވަނުން ހުންނަވަން ފަސޭހަފުޅު ނޫންކަމަށްވެސް ވިދާޅުވިއެވެ.
މީގެ ފަސްއަހަރު ކުރިއަށް ޖެހިލާއިރު ރަހުމެއްނެތް އެތައް ކަމެއް ރާއްޖޭގައި ހިނގާފައިވާ ކަމަށާއި އެކަންކަން ހިނގާފައިވަނީ ގުދުރަތީ ތަބީއަތުގެ ތެރެއިން ނޫން ކަމަށް ރައީސް ވިދާޅުވިއެވެ. އެފަދަ ރަހުމްކުޑަ އަމަލުތައް ހިންގާފައިވަނީ އިސްފަރާތްތަކުން މަޝްވަރާއާއި ލާރިވެސް ދީގެން ކަމަށް ރައީސް ވިދާޅުވިއެވެ. އަނިޔާވެރިންގެ އެފަދަ ކަންކަމަށްވުރެ މައުސޫމު އެތައްބައެއްގެ ހައްގުތައް މާބޮޑު ކަމަށް ވެސް ރައީސް ވިދާޅުވިއެވެ.
"އެކަހަލަ ރަހުމްކުޑަ އަމަލު ހިންގާފައި ހުރީ އިސްފަރާތްތަކުން މަޝްވަރާ ދީގެން ލާރި ވެސް ދީގެން އަދި އެކަން ކުރުވައިގެން. ޒުވާން ކުދިން މިކަހަލަ ހައްގުތަކަށް އަރައިގެންފައިހުރީ ކަންކަން ކުރުވާފައިހުރީމައި. މިހާރު މިއޮތީ އަޅުގަނޑުމެންގެ ސަރުކާރު. އަޅުގަނޑުމެންގެ ސަރުކާރުން މިކަހަލަކަންކަން ދުވަހަކުވެސް ނުކުރުވާނަން. ކުރުވަން ހިތަށްވެސް ނާރާ،" ރައީސް ވިދާޅުވިއެވެ.
ރައީސް ވިދާޅުވީ ކުރީގެ ސަރުކާރުގައި ސިޔާސީ މީހުންނަށް އަނބިދަރިން ގޮވައިގެން ގޭގައި ތިބެން އުނދަގޫ ވެގެންދިޔަކަމަށެވެ.
"ކޮންމެ ރެއަކު ގޭދޮށަށް އެއްވާނެ. ހަޅޭއްފަޅޭއް ލަވާނެ. ކޮންމެ ދެތިންރެއިން ރެއަކު ގެއަށް ގައުއުކާނެ. މިއަދު ހަމަގައިމުވެސް އަޣުލަބިއްޔަތަކަށް ބަލާކަމަށް ވަންޏާ ތާއީދަށް ބަލާ ކަމަށްވަންޏާ އަޅުގަނޑުމެންގެ ސަރުކާރަށް ތާއިދުބޮޑު. އަދި އެކަން ކުރަން އަޅުގަނޑުމެން އެދޭނަމަ ކޮންސިޔާސީ އިދިކޮޅު ލީޑަރަކަށްތޯ މާލޭގައި ކެތްވާނީ. އެކަމަކު އެއީ އަޅުގަނޑުމެން ގަބޫލުކުރާ ގޮތެއްނޫން. އަޅުގަނޑުމެން ބޭނުންވަނީ އުފެދިފައިވާ ޒަޚަމްތައް ފާރުތައް، ފަސޭހަވެ އަޅުގަނޑުމެން ބޭނުންވާނީ އެއީ މާޒީ ކަމަށް ހަދަން،" ރައީސް ވިދާޅުވިއެވެ.
