ރައީސުލްޖުމްހޫރިއްޔާ އަބްދުﷲ ޔާމީން އެމެރިކާގެ ރައީސް ޑޮނަލްޑް ޓްރަމްޕަށް ޚާއްސަ މެސެޖެއް ފޮނުއްވައިފިއެވެ.
އެމެރިކާގެ ރައީސް ޓަރަމްޕަށް ރައީސް ޔާމީން ޚާއްސަ މެސެޖެއް ފޮނުއްވީ އެމެރިކާގެ މިނިވަން ދުވަހުގެ މުނާސަބަތުގައެވެ. ރައީސުލްޖުމްހޫރިއްޔާ، ފޮނުއްވި މެސެޖުގައި، އެފަދަ ދުވަހެއްގެ މުހިންމުކަމުގެ މައްޗަށް ބައްލަވާލައްވަމުން އެއީ ޤައުމުގެ މިނިވަންކަމާ، ތާރީޚާ ސަޤާފަތް ރަމްޒުކޮށްދޭ ދުވަހެއްކަން ފާހަގަ ކުރައްވާފައިވެއެވެ.
ޓްރަމްޕަށް ރައީސް ފޮނުއްވި މެސެޖުގައި ވިދާޅުވީ އެމެރިކާއަކީ ދިވެހި ރާއްޖެއަށް މުހިންމު ޤައުމެއް ކަމަށާއި މިހާރުވެސް ދިވެހި ރާއްޖެއަށް ވެދެއްވާ އެހީތެރިކަމަށް ޝުކުރު އަދާކުރައްވާ ކަމަށެވެ. މީގެ އިތުރުން ރާއްޖެއާއި އެމެރިކާ އާއި ދެމެދު އޮތް މިގުޅުން ކުރިއަށް އޮތްތާގައި ބަދަހިވެ އެކުގައި ގުޅިގެން މަސައްކަތް ތަކެއްކުރެވި ދެޤައުމަށާއި ރައްޔިތުންނަށް ފައިދާ ކުރުވަނިވި ގޮތެއްގައި މަސައްކަތްތަކެއް ކުރުމަށް ބޭނުންފުޅުވާކަން ފާހަގަ ކުރައްވާފައިވެއެވެ.
ރައީސްގެ މެސެޖުގައި ދިވެހިރާއްޖެ އާއި އެމެރިކާ އާއި ދެޤައުމުގެ ދެމެދުގައި ސިޔާސީ ގުޅުން ޤާއިމުކުރިތާ 50 އަހަރު ވެފައިވާކަން ފާހަގަ ކުރައްވައި ދެޤައުމުގެ ދެމެދުގައި އޮތް ގާތް އެކުވެރި ގުޅުން ބިނާވެފައި ވަނީ ތާރީޚާއި، ދެޤައުމުން ޤަބޫލުކުރާ އުސޫލުތަކާއި، ދެޤައުމުގެ ދެމެދުގައި އޮތް އިތުބާރުގެ މައްޗަށް ކަމުގައި ވިދާޅުވެފައިވެއެވެ.
އެމެރިކާގެ މިނިވަން ދުވަހުގެ ގޮތުގައި ފާހަގަކުރާ ދުވަހަކީ، 1776 ވަނަ އަހަރުގެ ޖުލައި މަހުގެ ހަތަރު ވަނަ ދުވަހު، އިނގިރޭސިންގެ އަޅުވެތިކަމުން އެޤައުމަށް މިނިވަންކަން ލިބުނުކަން އިޢުލާން ކުރި ދުވަހެވެ.
