ބޭސްފަރުވާއަށް ކަމަށް ބުނެ އިނގިރޭސިވިލާތައް ވަޑައިގެން ހުންނެވި ކުރީގެ ރައީސް މުހައްމަދު ނަޝީދު ރާއްޖެ ވަޑައިގަތުމަށް މޯލްޑިވްސް ކަރެކްޝަނަލް ސާވިސް އިން އަންގައިފި އެވެ.
ކަރެކްޝަނަލް ސާވިސް އިން ވިދާޅުވީ 13 އަހަރުގެ ޖަލުގެ ޙުކުމެއް ތަންފީޒު ކުރަމުންދާ ކުރީގެ ރައީސް ނަޝީދަށް އިނގިރޭސިވިލާތުގައި ބޭސްފަރުވާ ކުރުމަށް ދީފައިވާ މުއްދަތު ހަމަވެފައިވާތީ އެމަނިކުފާނު ރާއްޖެ ވަޑައިގަތުމަށް އަންގަވާފައިވާ ކަމަށެވެ.
އެ އެންގުން އަންގާފައި ވަނީ ނަޝީދުގެ ގާނޫނީ ވަކީލު ހަސަން ލަތީފް މެދުވެރިކޮށް ކަމަށް ކަރެކްޝަނަލް ސާވިސް އިން މައުލޫމާތުދެ އެވެ.
ބޭސްފަރުވާއަށް ރައީސް ނަޝީދަށް ދީފައިވާ މުއްދަތު ހަމަވިތާ މަހަކަށްވުރެ ގިނަ ދުވަސް ވަނީ ވެފަ އެވެ. ކަރެކްޝަނަލް ސާވިސް އިން އެކުލަވާލާފައިވާ ކަމާ ބެހޭ ގަވާއިދުގައި ބުނާ ހުރިހާ ލިޔުންތައް ގަވާއިދުގައި ބުނެފައިވާގޮތަށް ހުށައަޅާފައިނުވާ ކަމަށް ކަރެކްޝަން ސާވިސް އިން މީގެ ކުރިން ވިދާޅުވެފައިވެ އެވެ.
ރައީސް ނަޝީދު އިނގިރޭސިވިލާތައް ފުރާވަޑައިގަތީ މިދިޔަ ޖެނުއަރީ މަހުގެ 21 ވަނަ ދުވަހު އެވެ. ރައީސް ނަޝީދު 13 އަހަރުގެ ޖަލުގެ ޙުކުމެއް ތަންފީޒު ކުރަމުން ގެންދަވަނީ އެމަނިކުފާނުގެ ވެރިކަމުގައި ކްރިމިނަލް ކޯޓްގެ ކުރީގެ އިސްގާޒީ އަބުދުﷲ މުހަންމަދު ހައްޔަރުކުރި މައްސަލައިގަ އެވެ.
ނަޝީދުގެ މައްޗަށް ދަށުކޯޓުން އިއްވި ޙުކުމް ސްޕްރީމް ކޯޓުގައި އިސްތިއުނާފް ކޮށްފައިވާއިރު އެމައްސަލައިގެ އަޑުއެހުން ތަށް ވެސް މިހާރު ވަނީ ނިއްމާލާފަ އެވެ.
