މާސްޓަރސް އަށް ކިޔެވުމުގެ ފުރުސަތު 30 ޕްރިންސިޕަލަކަށް ހުޅުވާލައިފިއެވެ. މިއީ ދިވެހިރާއްޖޭގެ ސްކޫލުތަކަށް ދިވެހި ޕްރިންސިޕަލުން ތަމްރީނުކުރުމަށް މިނިސްޓްރީ އޮފް އެޑިޔުކޭޝަނުން ފަށާފައިވާ މަޝްރޫޢުގެ ދެވަނަ ބުރުގެ ދަށުން ހުޅުވާލި ފުރުސަތެކެވެ.
އެޑިޔުކޭޝަން މިނިސްޓްރީން ވިދާޅުވީ މި 30 ޕްރިންސިޕަލުން މާސްޓަރސްއަށް ކިޔަވާނީ މެލޭޝިޔާގެ ޔުނިވަރސިޓީ ޓެކްނޮލޮޖީ މާރާގައި ކަމަށެވެ. އެ މީހުން ކިޔަވާނީ "މާސްޓަރސް އޮފް އެޑިއުކޭޝަނަލް މެނޭޖްމެންޓް އެންޑް ލީޑަރޝިޕް" ގެ ރޮނގުންނެވެ. މި ބުރުގައި ބައިވެރިވުމުގެ ފުރުސަތު މިހާރުވަނީ ހުޅުވާލާފައެވެ.
މި 30 ފުރުސަތުގެ ތެރޭގައި ކޯސްފީ ހިލޭ 10 ސްކޮލަރޝިޕް ހިމެނެއެވެ. ދަރިވަރުން އަމިއްލައަށް ކުރަންޖެހޭ އެހެނިހެން ޚަރަދުތައް ސަޕްލިމެންޓްރީ ލޯނުގެ ދަށުން ޑިޕާރޓްމަންޓް އޮފް ހަޔަރ އެޑިޔުކޭޝަން ހަމަޖައްސައި ދެއްވާނެއެވެ. ބާކީ 20 ފުރުޞަތުގެ ދަށުން، ކޯސް ފީ، އަދި އެހެނިހެން ޚަރަދުތައް ވެސް ސަޕްލިމެންޓްރީ ލޯނުގެ މެދުވެރިކޮށް ހަމަޖައްސައިދެވޭނެ ކަމަށް އެޑިޔުކޭޝަނުން ވިދާޅުވިއެވެ.
"މި ފުރުސަތުތަކަށް ޝަރުތު ހަމަވާ އެންމެނަށްވެސް ކުރިމަތި ލެވޭނެއެވެ. އެހެން ނަމަވެސް މި ސްކޮލަޝިޕްތަކުގެ ދަށުން ފުރުސަތު ދިނުމުގައި އިސްކަންދޭނެ 30 ސްކޫލެއް އެޑިއުކޭޝަން މިނިސްޓްރީއިން ވަނީ ކަނޑައަޅައި އިއުލާން ކޮށްފައެވެ. އެހެން ކަމުން ނޮމިނޭޓް ކުރުމުގައި ފުރުސަތު ތަކަށް ކަނޑައެޅިފައިވާ ރަށްތަކަށް ހުށައަޅާ ކެންޑިޑޭޓުންނަށް އިސްކަންދެވޭނެއެވެ." މިނިސްޓްރީން ވިދާޅުވެފައިވެއެވެ.
"މިކޯހުގެ ޝަރުތު ތަކުގައި ތެރޭގައި ހިމެނެނީ އެޑިޔުކޭޝަނަލް އެޑްމިނިސްޓްރޭޝަން-މެނޭޖްމެންޓް ނުވަތަ ކިޔަވައި ދިނުމުގެ ދާއިރާއިން ބެޗްލަރސް ޑިގްރީއެއް ހާސިލުކުރައްވާފައިވުމާއެކު ޓީޗިންގ-އެޑްމިނިސްޓްރޭޝަން ދާއިރާއިން 1 އަހަރު ދުވަހުގެ މަސައްކަތު ތަޖުރިބާ ލިބިފައިވުން ނުވަތަ، އެޑިޔުކޭޝަން ނުވަތަ ކިޔަވައި ދިނުމުގެ ދާއިރާއިން އޮނަރސް ޑިގްރީއެއް ހާސިލުކުރައްވާފައިވުމާއެކު ޓީޗިންގ-އެޑްމިނިސްޓްރޭޝަން ދާއިރާއިން 3 އަހަރު ދުވަހުގެ މަސައްކަތު ތަޖުރިބާ ލިބިފައިވުމެވެ."
މީގެ އިތުރުން ޓީޗންގ ސަރވިސް އޮފިސަރގެ ޝަރުތު ހަމަވުމާއެކު ލީޑިން ޓީޗަރގެ މަގާމުގައި 2 އަހަރު ދުވަހުގެ ތަޖުރިބާ ލިބިފައިވުން ނުވަތަ، ޓީޗިން ސަރވިސްގެ ޝަރުތު ހަމަވުމާއެކު ކިޔަވައިދިނުމުގެ ރޮނގުން 2 އަހަރު ދުވަހުގެ ތަޖުރިބާ ލިބިފައިވާ ފަރާތްތަކަށްވެސް މި އަށް ކުރިމަތިލެވޭނެ ކަމަށް މިނިސްޓްރީން ވިދާޅުވެފައިވެއެވެ. މިފުރުސަތުތަކަށް ހުށައެޅުމުގެ އެންމެ ފަހު ތާރީޚަކީ މިފެށޭ ޖުލައި މަހުގެ 10ވާ އަންގާރަ ދުވަސް ކަމަށް ވެސް އެޑިޔުކޭޝަނުން ވަނީ ވިދާޅުވެފައެވެ.
މި ޕްރޮގްރާމުގެ ފުރަތަމަ ބުރުގެ 30 ޕްރިންސިޕަލުން މިހާރު ދަނީ ސްރީ ލަންކާގެ ނޭޝަނަލް އިންސްޓިޓިއުޓް އޮފް އެޑިޔުކޭޝަންގައި މާސްޓާރސް ފުރިހަމަ ކުރަމުންނެވެ.
