ދިވެހި ސަރުކާރުން ޔޫރަޕިއަން ޔޫނިއަން (އީޔޫ) އާއެކު މަޝްވަރާތަކެއް ކުރައްވަން ނިންމަވައިފިއެވެ.
ފޮރިން މިނިސްޓްރީން ވިދާޅުވެފައިވަނީ މި މަޝްވަރާތަކުގައި ރާއްޖެއިން މަތީފެންވަރުގެ ވަފުދެއް ބައިވެރިވެ ވަޑައިގަންނަވާނެކަމަށެވެ. ވަފުދުގެ އިސްބޭފުޅަކަށް ހުންނަވާނީ ފޮރިން މިނިސްޓަރ ޑރ. އާސިމެވެ. އެމަނުކުފާނުގެ އިތުރަށް ވަފުދުގައި ހިމެނިވަޑައިގަންނަވަނީ ފިޝަރީޒް މިނިސްޓަރ ޑރ. މުހައްމަދު ޝައިނީއާއި، ރައީސް އޮފީހުގެ ލީގަލް އެފެއާޒް މިނިސްޓަރ އާއިޝަތު އާޒިމާ ޝަކޫރެވެ. އަދި ރާއްޖެއިން އީޔޫއަށް ކަނޑައަޅާފައި ހުންނަވާ ސަފީރު އަހުމަދު ޝިޔާން ވެސް ބައިވެރިވެ ވަޑައިގަންނަވާނެއެވެ.
މި މަޝްވަރާތައް ބޭއްވުމަށް ހަމަޖެހިފައިވަނީ މި ހަފްތާގެ ބުދަ ދުވަހާއި ބުރާސްފަތި ދުވަހު ބެލްޖިއަމްގެ ވެރިރަށް ބްރަސަލްސްގައެވެ.
މި ބައްދަލުވުމުގައި އީޔޫ އާއި ރާއްޖެއާ ދެމެދު ގުޅުން އިތުރަށް ބަދަހިކުރުމާ ބެހޭގޮތުން މަޝްވަރާ ކުރާނެއެވެ. އަދި މޫސުމަށް އަންނަ ބަދަލުތަކާއި މަސްވެރިކަމާއި، ރާއްޖޭގައި މިއަހަރު ބާއްވާ ރިޔާސީ އިންތިޚާބާއި، ވިސާގެ ކަންތަކާބެހޭ ގޮތުން ވެސް މަޝްވަރާ ކުރައްވާނެއެވެ. މި މަޝްވަރާއަށް ވަޑައިގަންނަވާ ބޭފުޅުން މިހާރުވަނީ ފުރާވަޑައިގެންފައެވެ.
