މާލޭގައި ހުރި އެންމެ ޒަމާންވީ އެއް މިސްކިތް ކަމަށްވާ ކަޅުވަކަރު މިސްކިތް އެންމެ ފަހުން ހުރި ތަނުން ނަގައިގެން ގެންގޮސް އެ މިސްކިތް ނައްތާލީ ނޫން ކަމަށާއި އެ މިސްކިތުގެ ހުރިހާ ބަޔެއް ޑިޕާޓްމެންޓް އޮފް ހެރިޓޭޖުގައި ބަހައްޓާފައި ހުންނާނެ ކަމަށް ހައުސިންގ މިނިސްޓަރ ޑރ މުޙަންމަދު މުއިއްޒު ވިދާޅުވެއްޖެއެވެ.
މީގެކުރީ ސަރުކާރު ތަކުގައިވެސް ތަފާތު ފަހަރު މަތިން މިސްކިތް ނަގައި، އަލުން ރާވާފައިވާ ކަޅުވަކަރު މިސްކިތަށް ވީނުވީއެއް ނޭނގޭ ކަމަށާއި ދިވެހިންގެ އެ ތަރިކަ މި ސަރުކާރުން ނައްތާލާފައިވާ ކަމަށްބުނެ ބަޔެއް ފަރާތްތަކުން ދައްކަމުންދާ ވާހަކަ ތަކަށް ރައްދު ދެއްވައި މުއިއްޒު ވިދާޅުވީ އެ މިސްކިތުގެ ހުރިހާ ބަޔެއްވެސް ހެރިޓޭޖުގައި ބެހެއްޓިފައި ވަނީ ރައްކާތެރިކަމާއެކު "ޕެކް ކޮށްފައި" ކަމަށެވެ.
ކަޅުވަކަރު މިސްކިތް އެންމެ ފަހުން ހުރި ތަނުގައި ރޭ ހުޅުވި ވިންޓަރ ޕާކު ހުޅުވި ރަސްމިއްޔާތުގައި ޑޜ މުއިއްޒު ވިދާޅުވީ ކަޅުވަކަރު މިސްކިތް އެތަނުން ނެގީ ރަސްރަނި ބަގީޗާގެ ތެރޭގައި މިސްކިތެއް ހުރުމުން ޕާކާއި އަދި މިސްކިތާވެސް އެ ތަން ނުގުޅޭތީ ކަމަށެވެ. މިނިސްޓަރ ވިދާޅުވީ ކަޅުވަކަރު މިސްކިތް އެތަނުން ނެގުމަށް ފަހު އެންމެ ރަނގަޅު ގޮތަކީ އެ މިސްކިތް ބަހައްޓަން އަނެއްކާވެސް އެންމެ ރަނގަޅު ތަނެއް ހޯދައި އަލުން މިސްކިތް އެތަނެއްގައި ބެހެއްޓުން ކަމަށެވެ.
ކަޅުވަކަރު މިސްކިތަކީ ރޫޅައި، ރޭވޭ ގޮތަށް ހުރި ކުޑަ މިސްކިތެއް ނަމަވެސް ދިވެހިންގެ ތާރީޚާ ގުޅިފައިވާ މިސްކިތެކެވެ. މީގެކުރިންވެސް އެ މިސްކިތް ރޫޅާލުމަށް ފަހު ނަގައި އަލުން އެކި ދިމާލުގައި ރާވާފައި ވެއެވެ. ނަމަވެސް މިފަހަރު އެ މިސްކިތް އަލުން ރާވައި ބަހައްޓާނެ ވަކި ތަނެއް ސަރުކާރުން އަދި ނިންމާފައި ނުވެއެވެ.
