ސިއްރު ހެކިނަގަނީ ހެކިދޭ މީހާގެ ސަލާމަތާއި ރައްކާތެރިކަން ކަށަވަރު ކޮށްދިނުމުގެ ގޮތުން ކަމަށް ފުލުހުން ވިދާޅުވެއްޖެއެވެ.
ފުލުހުންގެ ތަރުޖަމާނު ސްޕްރިންޓެންޑެންޓް އޮފް ޕޮލިސް އަހުމަދު ޝިފާން އިސްކަންދަރު ކޮށީގައި ދެންމެ ދެއްވި ޕްރެސް ސްޓޭޓްމެންޓުގައި ވިދާޅުވޯ އެކަން އެގޮތަށް ކުރައްވަނީ ގާނޫނާއި ގަވާއިދާ އެއްގޮތަކަށް ކަމަށެވެ. އެހެން ނަމަވެސް އެކަންކަން ބައެއް މީހުން ގަސްތުގައި އޮޅުވާލުމަށް މަސައްކަތް ކުރައްވާ ކަމަށާއި އެކަން އެގޮތަށް ނުކުރެއްވުމަށް އޭނާ އިލްތިމާސް ކުރެއްވިއެވެ.
"ފުލުހުންގެ ތަހުގީގުތަކުގައި ހެކިބަސްނަގަނީ އަދި ހެކިބަސް ހޯދަނީ އަދި ދައުވާ ކުރުމަށް ސިއްރުހެކި ހުށަހަޅަނީ ގާނޫނުތަކާއި ގަވާއިދުތަކުގައި އެކަން ކުރުމަށް ކަނޑައެޅިފައިވާ އުސޫލުތަކާއި މިންގަނޑުގެ ތެރެއިން،" ޝިފާން ވިދާޅުވިއެވެ.
ޚާއްސަކޮށް ޖިނާއީ ތަހުގީގު ކުރުމުގައި އެކަންކަމުގެ މިންގަނޑުތަކާއި އޮނިގަނޑު ގެންގުޅޭނެގޮތް ވަރަށް ރަނގަޅަށް ގާނޫނުގައި ކަނޑައެޅިފައި އެބަހުރި ކަމަށްވެސް އޭނާ ވިދާޅުވިއެވެ. އަދި ސިއްރުން ހެކިބަސް ނެގުމާއި ސިއްރުހެކި ބޭނުންކޮށްގެން މައްސަލަތައް ސާބިތު ކުރުމަށްޓަކައި ކުރަމުންދާ މަސައްކަތްތަކަކީ އެއްވެސް ހާލެއްގައި އެކަމުގައި ގާނޫނީ ފުށުއެރުންތަކެއް ހުރިކަމެއް ނޫންކަމަށްވެސް ޝިފާން ވިދާޅުވިއެވެ. މިއީ ރާއްޖޭގައި އަލަށް ކުރާ ކަމެއްނޫންން ކަމަށްވެސް އޭނާ ވިދާޅުވިއެވެ.
"ބޮޑެތި މައްސަލަތަކުގައި ޚާއްސަކޮށް ހެކިބަސްދޭ ފަރާތްތަކަށް ހުރި އެކިކަހަލަ ރިސްކުތައް އައިޑެންޓިފައި ކުރުން ނުވަތަ އެއްވެސް ތުރެޓެއް މިކަމުގައި އޮތްކަމަށްވާނަމަ ނުވަތަ ބޮޑެތި މައްސަލައަކަށް މީހަކުދޭ ހެކިބަހަކީ އެމީހާއަށް އޭގެ ފަހުގެ ތާރީޚެއްގައި އެއާގުޅިގެން އެއްވެސް ކަމެއްދިމާވެދާނެ ނުވަތަ އެއްވެސް ސީރިއަސް ކަމެއް އައިޑެންޓިފައި ކުރެވޭނެ ކަމެއް ވާނަމަ ހަމަ ދިވެހިރާއްޖޭގައި ހިނގަމުންދާ ބޮޑެތި މައްސަލަ ތަކުގައި ސިއްރު ހެކިބަސް ދިނުމާއި ސިއްރު ހެކި ފުލުހުން ނަގައި ދައުވާ ކުރުމަށް ފޮނުވަކީ އަލަށް ކުރެވޭ ކަމެއްނޫން،" ޝިފާން ވިދާޅުވިއެވެ.
