ކަންގަނާ ރަނޯތް އާއި ރާޖް ކުމާރު ރާއޯ އެކުގައި ކުޅޭ ދެވަނަ ފިލްމު ގެ ލުކް އާއްމު ކޮށްފިއެވެ. މި ފިލްމުގެ ނަމަކީ "މެންޓަލް ހޭ ކިޔާ" އެވެ. ފޮޓޯ ބަލައިފައި ހަމަ ހަގީގަގަތުގައި ވެސް މި ދެ ތަރީން މޮޔައީ ބާއޭ ހިތަށް އަރާވަރު ވެއެވެ.
"މެންޓަލް ހޭ ކިޔާ" ގެ ޕްރޮޑިއުސަރަކީ އެކްތާ ކަޕޫރް އެވެ. ޓްވިޓަރ ގައި ފިލްމުގެ ލުކް އާއްމުކުރީ އެކްތާ އެވެ. ފިލްމުގެ ޑައިރެކްޓަރަކީ ޕްރަކާޝް ކޮވެލަމޫދީ އެވެ. އެކްތާ އާ ހަވާލާދީ ނޫސް ރިޕޯޓްތައް ބުނާ ގޮތުން ނަފްސާނީ ގޮތުން އުނި ސިފަތަކެއް ހުންނަ މީހާ އަކީ ވެސް މުހިއްމު މީހެކެވެ. އޭނާ އަކީވެސް އެހެން މީހުން ފަދައިން ބަލައިގަންނާން ޖެހޭ މީހެކެވެ. ކަންގަނާ އާއި ރާޖްކުމާރް ރާއޯ އާ އެކު މިކަހަލަ ފިލްމެއްގައި މަސައްކަތް ކުރެވޭތީ އޭނާ ހުރީ ވަރަށް އުފަލުންނެވެ.
ކަންގަނާ އާއި ރާޖް ކުމާރް ރާއޯ އަކީ ހިންދީ ސިނަމާގައި އަމިއްލަ ހުނަރުން ވިދާލި ދެތަރީންނެވެ. އެއީ ބޮލީވުޑްގެ އާއިލާއަކަށް ނިސްބަތްވާ ނުވަތަ އެފަދަ އާއިލާ އަކާ އެއްވެސް ގުޅުމެއް ނެތްދެ ތަރީންނެވެ. މި ދެތަރީން އެކުގައި ފުރަތަމަ ފިލްމެއް ކުޅުނީ 2014 ވަނަ އަހަރު އެވެ. އެއީ ވިކާސް ބާލް ގެ ކުއީން އެވެ.
