ދިވެހި ރައްޔިތުންގެ އަސާސީ ހައްގުތައް ރައްކާތެރިކޮށް ދެމެހެއްޓެވުމަށްޓަކައި ކުރެވެންއޮތް ހުރިހާކަމެއް ކުރައްވާނެ ކަމަށް އެޑިޔުކޭޝަން މިނިސްޓަރ ޑރ. އާއިޝަތު ޝިހާމް ވިދާޅުވެއްޖެއެވެ.
އެކަމަނާ މިހެން ވިދާޅުވީ ސްވިޒަލޭންޑްގެ ޖެނީވާގައި ހޯމަދުވަހު ފެށި އދ. ގެ އިންސާނީ ހައްގުތަކާބެހޭ ކައުންސިލްގެ 37 ވަނަ ބައްދަލުވުމުގައި މިއަދު ވާހަކަ ދއްކަވަމުންނެވެ. އެ ސެޝަންގައި އެކަމަނާ ވާހަކަ ދެއްކެވީ ރާއްޖޭ ގަޑިމް މިއަދު މެންދުރު 1:50 ގައެވެ.
މިއަދުގެ ތަގުރީރުގައި މިނިސްޓަރު ވަނީ ރާއްޖޭގައި މިހާރު އޮތް ސިޔާސީ ހާލަތާބެހޭ އެންމެ ފަހުގެ މައުލޫމާތު ކައުންސިލްގައި ހިއްސާ ކުރައްވައިފައެވެ. އޭގެ އިތުރަށް ރާއްޖޭގައި މިހާރު ކުރިއަށްދާ ބޮޑެތި މަޝްރޫއުތަކާ ބެހޭގޮތުންވެސް މިނިސްޓަރ ވާހަކަދެއްކެވިއެވެ.
ކުރިއަށް އޮތް ރިޔާސީ އިންތިޚާބު މިނިވަންކަމާއި އިންސާފުވެރި ކަމާއި އެކު ކުރިއަށް ގެންދިއުމަށް ސަރުކާރުން ފުރިހަމަ އަށް އެއްބާރުލުން ދޭން ތައްޔާރަށް އޮތް ކަމަށްވެސް މިނިސްޓަރު ވަނީ ވިދާޅުވެފައެވެ. އެކަމުގައި ބައިނަލް އަގުއާމީ ފަރާތް ތަކުގެ ބައިވެރިވެ ވަޑައިގެންގެންނެވުން ބޭނުންފުޅުވާ ކަމަށް އެކަމަނާ ވިދާޅުވިއެވެ.
މި ބައްދަލުވުމުގައި ބައިވެރިވިވަޑައިގެންނެވި ވަފުދުގައި ހިމެނި ވަޑައިގަންނަވަނީ ޑރ. އައިޝަތު ޝިހާމުގެ އިތުރަށް، ޖެންޑަރ މިނިސްޓަރ ޒެނީޝާ ޝަހީދު ޒަކީއާއި ދިވެހި ރާއްޖެއިން ޖެނީވާއަށް ކަނޑައަޅުއްވާފައި އިންނަވާ ސަފީރު ހާލާ ހަމީދެވެ.
