ޕާޓީތަކުގެ މަޝްވަރާއަށް ސަރުކާރުން ގޮވައިލައްވައިފައި ވަނިކޮށް މިދަނޑިވަޅުގައި ސަރުކާރާ މަޝްވަރާ ކުރައްވަން ރައީސް މައުމޫން އަބްދުލްގައްޔޫމް ގަސްތު ނުކުރައްވާ ކަމަށް އެމަނިކުފާނުގެ ގާނޫނީ ވަކީލް މައުމޫން ހަމީދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ރައީސް މައުމޫނާ ހަވާލާ ދެއްވައި މައުމޫން ހަމީދު ވިދާޅުވީ ރާއްޖޭގެ ހާލަތު މިހިސާބަށް މިއައީވެސް ވެރިކަން ހިންގާ ފަރާތުން ބާރުގެ ބޭނުންކޮށްގެން ސިޔާސީ މަގުސަދު ހާސިލް ކުރެއްވުމަށް މަސައްކަތް ކުރެއްވުމުން ކަމަށް ރައީސް މައުމޫން ދެކެވަޑައިގަންނަވާ ކަމަށެވެ. އެ މަސައްކަތުގައި ސަލާމާތީ ޚިދުމަތްތަކު ބޭނުން ކުރައްވައިގެން ގާނޫނުއަސާސީއާއި ގާނޫނުތަކާ ޚިލާފު ގިނަ އަމަލުތައް ހިންގުވައިވައިފައިވާ ކަމަށް ރައީސް މައުމޫން ދެކެވަޑައިގަންނަވާ ކަމަށް ވަކީލް ވދާޅުވިއެވެ.
ސިޔާސީ ހުރިހާ ބޭފުޅުން "ރަހީނުކޮށް" ބަންދުގައި ތިބި ހާލަތެއްގައި "ސަރުކާރާ މަޝްވަރާ ކުރައްވާކަށް ރައީސް މައުމޫން ގަސްތެއް ނުކުރައްވާ،" މައުމޫން ހަމީދު ވިދާޅުވިއެވެ. އަދި އެމަނިކުފާނުގެ ފަރާތްޕުޅުން މަންދޫބަކުވެސް ފޮނުއްވަންވެސް ގަސްތު ނުކުރައްވާ ކަމަށް މައުމޫން ހަމީދު ވިދާޅުވިއެވެ.
