(17 ޑިސެމްބަރ 2024 ގައި ޝާއިޢުކުރި ބަޔާގުޅޭ)
( ދިލްނަޝީން ގޮވައިގެން ކުލްސޫމް އެގެއިން ނުކުތްއިރު ، ކާރުގައި ލެނގިލައިގެން ޙައިދަރު ، ބޭރުގައި ހުށްޓެވެ. ޙައިދަރު ގޭތެރެޔަށް ނުވަނީ ، މަންމަ ކުރާކަމެއް ކުރަން މަންމަޔަށް ފުރުޞަތު ދޭން ވެގެންނެވެ. )
މައިދައިތަޔާއެކީ ، ތިރިޔަށް ފޭބިތަނުން ، އެންމެ ފުރަތަމަވެސް ދިލްނަޝީނަށް ކުރިމަތިލާޏްޖެހުނީ ، ކާރުގައި ލެނގިލައިގެންހުރި ޙައިދަރާއެވެ. މަންމަޔާއެކީ ގޭތެރެޔަށް ނުވަދެ ، ބޭރުގައި ޙައިދަރު އެހުރި ސަބަބު ދެނެގަންނާކަށް ދިލްނަޝީން ބޭނުމެއް ނުވިއެވެ. ކާރުގެ ފަހަތުޝީޓާ ދިމާލަށް ދިލްނަޝީން ހިނގައިގަތުމާއެކީ ، ކުލްސޫމް އޭނާ ހުށްޓުވިއެވެ. އަދި ދިލްނަޝީނަށް ޙައްޤު މަޤާމާމެދު އިހުމާލު ނުވުމަށް ބުނެ ، ޙައިދަރާއެކު ކުރީޝީޓްގައި އިނުމަށް އެންގިއެވެ. އިރުއިރުކޮޅުން ، އެކުށް ތަކުރާރު ނުކުރުމަށް ދިލްނަޝީނަށް ނަޞޭޙަތްތެރި ވިއެވެ. އެކަމަށް ފަރުވާލެއް ނުބަހައްޓައިފިނަމަ ، އެހެންމީހަކު އެޖާގަޔަށް އައުމަށް ގިނައިރެއް ނުނަގާނެކަން ހަނދާން ކޮށްދިނެވެ. އަދި ކާރުގެ ފަހަތުޝީޓުގައި ބާއްވާފައި އޮތް މާބޮނޑިނަގައި ޙައިދަރަށް ދިއްކޮށްލިއެވެ.
" ޙައިދަރެވެ ! އަހަރެން އެއޮތީ އަހަރެންގެ ޒިންމާ ފުރިހަމަކޮށްފައެވެ. ދެންއޮތީ ޙައިދަރު ކުރަންޖެހޭ ކަންކަމެވެ. ފަރުވާތެރިކަމާއެކީ ، ދެމީހުންގެ ކުރިމަގު ދެމީހުން ވާހަކަދައްކައިގެން ބަށްޓަންކުރާށެވެ. މާޒީގައި ހެދިފައިވާ ގޯސްތަކުން ފިލާވަޅު ލިބިގެން ، މުސްތަޤްބަލް ބިނާކުރާށެވެ. " ކުލްސޫމް ބުންޏެވެ.
މާބޮނޑި ހިފައިގެން ޙައިދަރު އައިސް ، ދިލްނާޝީން ގާތަށް ޖެހިލިއެވެ. އެނާގެ މަންމަގެ ކުރިމަތީ ، އޭނާ ލަދުގަންނުވައިލަނީ ކީއްވެތޯ ދިލްނަޝީނާ ސުއާލު ކުރިއެވެ. އަދި އޭނާއަށް މަޢާފުކުރުމަށް އެދެމުން ، ދިލްނަޝީނަށް މާބޮނޑި ދިއްކޮށްލިއެވެ. އެއްމިޔަކަނުން ހިނިތުންވެލަމުން ދިލްނަޝީން މާބޮޑީގައި ހިފައި ، ޙައިދަރާދިމާލަށް ބަލާލައި އޭނާގެ އަޞްލު ހިނިތުންވުން ޙައިދަރަށް ހަދިޔާކޮށްލިއެވެ. ގެޔަށްދަމާހިނގާށޭ ބުނެ ، ދިލްނަޝީން ކާރަށް އަރުވައި ، ހަމަޖެހުމުގެ ނޭވާއެއްލައި ، ޙައިދަރު އޭނާގެ ހަށިގަނޑު ތެދުކޮށްލިއެވެ.
ގެޔަށްގޮސް ކޮޓަރިތެރެޔަށް ވަނުމާއެކީ ، ދިލްނަޝީންގެ މޫނުމަތީގެ ކުލަވަރު ބަދަލުވިއެވެ. ދިލްނަޝީން ހުރީ ހިތްހަމަ ނުޖެހިފައެވެ. ރުޅިނަޔަސް ، އޭނާހުރީ ރުޅިއަންނަން ނޭނގިފައެވެ. ރުޅިއައުމުގެ ޙައްޤު ، ދިލްނަޝީނަށް އެބައޮތްކަމަށް ޙައިދަރުވެސް އެއްބަސް ވެއެވެ. އެހެނަސް ، ރުޅިއައިސްހުރެ ދިލްނަޝީންގެ މޫނުމަތީގެ ޝާއްބަކަން ނެތިގޮސް ގޭތެރެ އަނދިރިވެގެންދާން އޭނާ ދޫކޮށްނުލާނެކަމަށް ޙައިދަރު ބުންޏެވެ. ދިލްނަޝީން ކޮންޓްރޯލް ކުރުމަށް މަސައްކަތްކުރާއިރު ، ޚުދު ޙައިދަރުގެ އަމިއްލަ ނަފްސު ކޮންޓްރޯލް ކުރަން މަސައްކަތްކުރަންޖެހޭކަންވެސް ، ދިލްނަޝީން އޭނާގެ ފިރިމީހާއަށް ހަނދާން ކޮށްދިނެވެ.
" އަހަރެން މިހުރީ ، ދިލްނަޝީންގެ ފުރިހަމަ ކޮންޓްރޯލްގެ ދަށުގައެވެ. އެވާހަކަ އަހަރެން މިބުނަނީ ހިތުގެ އަޑިންނެވެ. ތިހާ ތަކުލީފުން ފުރިގެންވާ ދުވަސްތަކެއް ދިލްނަޝީންގެ ޢުމުރުގައި ހޭދަކުރިކަމެއް ނޭނގެއެވެ. އެކަމަކު ، އަހަރެންގެ ފަރާތުން ދިލްނަޝީންގެ ހިތަށް އުނދަގޫވާނެ އެއްވެސްކަމެއް ދެނެއް ނުފެންނާނެއެވެ. ދިލްނަޝީނެވެ ! ތިޔައީ ދިލްނަޝީނެވެ. " ދިލްނަޝީންގެ އަތުގައި ހިފާލައިގެންހުރެ ޙައިދަރު ބުންޏެވެ.
އަހަރެންނަކީ އަހަރެންނެވެ. އެހެންކަމަށް ވަންޏާ މެހެމަލް އެއީ ކާކުތޯ ދިލްނަޝީން ސުއާލު ކުރިއެވެ. މެހެމަލްއަކީ ، ހަމައެކަނި އޭނާގެ ދެބެންގެ ދެދަރިމީހެއްކަމަށް ޙައިދަރު ބުންޏެވެ. އެއީ ، ޙައިދަރުގެ ފުރަތަމަ ލޯބިކަންވެސް ދިލްނަޝީން ، ޙައިދަރަށް ހަނދާން ކޮށްދިނެވެ. ބުއްދިވެރި އަނބިން ، އެކަނިވެރިވާ ޙާލަތުގައި އެހެން އަންހެނުންގެ ނަން ބޭނުން ނުކުރާނެކަމުގައި ޙައިދަރު ބުންޏެވެ. އެވަގުތު ، ޙައިދަރަށް ފޯނެއް އައެވެ. އަދި އެކަން ދިލްނަޝީން ، ޙައިދަރަށް ހަނދާން ކޮށްދިނެވެ. އެއީ މެހެމަލްނޫން އެހެންމީހަކަށް ނުވާނެއެވެ. ޖީބުން ފޯނުނަގައި ޙައިދަރު ބަލައިލިއިރު އެއީ ހަމަ މެހެމަލްއެވެ. ފޯނު ނުނަގަން ޙައިދަރު އިންދައި ފޯނަށް ޖަވާބުދިނުމަށް ދިލްނަޝީން ބުންޏެވެ. އެއީ މެހެމަލްގެ ކޯލެއްކަން ދިލްނަޝީނަށްވެސް އެނގިހުރެއެވެ. ފަހަރެއްގައި ވަރަށް މުހިންމުކަމެއްގައި " ބޮޑުބޭބެގެ ދަރިފުޅު " ، ފޯނުކުރަނީކަމަށްވެސް ވެދާނެއެވެ.
ޙައިދަރު ފޯނު ކަނޑައިލިއެވެ. އަދި މާދުރަށް ، އެނދުމައްޗަށް ފޯނު އެއްލައިލިއެވެ. ދިލްނަޝީނަށްވުރެ މުހިންމު އެހެން އެއްވެސް އެއްޗެއް ، ޙައިދަރުގެ ޙަޔާތުގައި މިހާރަކު ނެތެވެ. އެއީ ދިލްނަޝީނަށް ޤަބޫލުކުރަން އުނދަގޫ ކަމަކަށްވިޔަސް ، ޙަޤީޤަތަކީ އެއީއެވެ. ޙައިދަރުގެ އެފޮނިބަސްތަކުން ، ދިލްނަޝީންގެ މޫނުމަތިން ހިނިތުންވުމެއް ފާޅުވިއެވެ. ޙައިދަރުގެ ލޮލަށް ބަލަހައްޓައިގެން އެތައްއިރަކު އިނދެވުނެވެ.
އިރުއިރުކޮޅުން މެހެމަލް ކޮންމެވެސް މީހަކަށް ފޯނުކުރާތީ ، އަދި އެމީހަކު މަންމަގެ ފޯނުނުނަގާތީ ، ޢީޝަލްވެސް ކަންބޮޑުވިއެވެ. މަންމަ ފޯނު އެކުރަނީ ކާކަށްތޯ ސުއާލު ކުރިއެވެ. ދަރިފުޅުގެ ސުއާލަށް މެހެމަލް ، ޖަވާބެއް ނުދެއެވެ. މަންމަ އެ ފޯނުކުރަނީ ބޭބެއަށްތޯ އެންމެފަހުން ، ޢީޝަލްއަށް އަހައިލެވުނެވެ. އެއަކަށްވެސް މެހެމަލް ޖަވާބެއް ނުދެއެވެ. ބޭބެ ފޯނުނުނަގަންޏާ ، ބޭބެމެންގެޔަށް އެމީހުން ދާންވީނޫންތޯ ޢީޝަލް އެހިއެވެ. އެވަގުތު ، ކޮޓަރީގެ ރަނގަބީލު ޖެހުނެވެ.
ދަރިފުޅުގެ ބޭބެ އެއައީއޭ ބުނެ ހެމުންނަށަމުންގޮސް ، މެހެމަލް ދޮރުހުޅުވާލިއެވެ. ކުރިމަތީ އެހުރީ ކުލްސޫމެވެ. މެހެމަލްއަށް ލިބުނު ޙައިރާންކަން ފޮރުވަން މަސައްކަތް ކުރަމުން ، ކުލްސޫމް އެތެރެޔަށް ވަނުމަށް އެދުނެވެ. އަދި ، އެނދުމަތި ސާފުކޮށްލުމަށްފަހު އިށީނުމަށް އެދުނެވެ. ޢީޝަލްއާ ސަމާސާކޮށްލުމަށްފަހު ، ކުލްސޫމް ، މެހެމަލްގާތަށް އައެވެ.
" އަހަރެން މިއައީ އިށީންނާކަށް ނޫނެވެ. އަދި މާގިނައިރު ، މިތާ ހުންނާކަށްވެސް ނޫނެވެ. އަހަރެން މިއައީ އަހަރެންނާއެކީ މެހެމަލް ގެންދަން ވެގެންނެވެ." ކުލްސޫމް ބުންޏެވެ.
މެހެމަލްގެ މޫނުމަތީގައި އުފެދިފައިހުރި ނުތަނަވަސްކަން ހިނިތުންވުމަކަށް ބަދަލުވެ ، ޙައިރާންކަންވެސް އިތުރުވެގެންދިޔައެވެ.
" ޙައިރާންވެފައި ތިހުރީ ކީއްވެހެއްޔެވެ ؟ އަހަރެން އައިމަ ހެއްޔެވެ ؟ ނުވަތަ މެހެމަލް އަހަރެންނާއެކީ ދާންޖެހޭތީ ހެއްޔެވެ ؟ " ކުލްސޫމް ސުއާލު ކުރިއެވެ.
އެއިން އެއްވެސްކަމަކާ އޭނާ ޙައިރާންނުވާކަމަށް މެހެމަލް ބުންޏެވެ. މެހެމަލްއަށް ލިބުނު އެންމެބޮޑު ޙައިރާންކަމަކީ ، އޭނާގެ ނަޞީބުގެ ރަނގަޅުކަމެވެ. އެހާ އަވަހަށް އޭނާގެ ނަޞީބު ބަދަލުވެގެންއައިސް ، އޭނާގެ އަތުގައި ހިފައިފާނެކަމަކަށް މެހެމަލްއަކަށް ޤަބޫލެއް ނުކުރެވުނެވެ. މެހެމަލްގެ އެ ޙައިރާންކަމަކީ ، މެހެމަލްގެ ދުޢާ ، ﷲ ޤަބޫލުކުރެއްވިލެއް އަވަސްކުރައްވައި ، ކުލްސޫމްގެ ހިތުގައި އޭނާގެ މައްޗަށް ރަޙުމާއި އޯގާތެރިކަން ލެއްވުމެވެ. އެއަށްވުރެ ބޮޑު ނަޞީބެއް އޭނާއަކަށް ނުލިބޭނެއެވެ.
" ގާތްތިމާގެ ކަމަކީ އެއީ ނޫންހެއްޔެވެ ؟ ތިމާގެކަމުގެ ގުޅުން ދަމަހައްޓައި އެގުޅުމަށް ޒިންމާވާންޖެހޭނެ ނޫންހެއްޔެވެ ؟ އެހެންނޫނީ ބޭބެގެ ފުރާނަޔަށް ކަށްވަޅުގައިވެސް ހަމަޖެހުމެއް ނުލިބޭނެ ނޫންހެއްޔެވެ ؟ ތައްޔާރުވެލައިގެން ތިރިޔަށް އަންނާށެވެ. އަހަރެން ތިރީގައި މެހެމަލް އަންނަންދެން މަޑުކުރާނަމެވެ. " ކުލްސޫމް ބުންޏެވެ.
ކުލްސޫމް ކޮޓަރިން ނުކުތުމާއެކީ ، މެހެމަލް އޭނާގެ ފޯނު ނެގިއެވެ. ޙައިދަރަށް ގުޅަންވެގެންނެވެ. އެހެނަސް ، ފޯނެއް ނުކުރިއެވެ. މެހެމަލްއަށް ފެނުނުގޮތުގައި ، ޙައިދަރުގެ ގެއިން މެހެމަލް ފެނުނީމާ ، ޙައިދަރަށްލިބޭ ޙައިރާންކަން މާބޮޑުވާނެއެވެ. ބޮޑުދައިތަޔާއެކީ ގެޔަށްގޮސް ، ޙައިދަރު ސިއްސުވާލީމާ މާ މަޖާވާނެއެވެ.
ޙައިދަރަށް މީރުވާނެހެންހީވާނެހެންހީވާ އެއްޗެއް ތައްޔާރުކުރުމަށް ބަދިގެ ތެރޭގައި އުޅުމަށްފަހު ، ޙައިދަރު ގެޔަށް އަންނައިރަށް ތައްޔާރުވެލަން ދިލްނަޝީން ނިންމިއެވެ. ދިލްނަޝީންގެ ހިތަށް އުނދަގޫވާނެ އެއްވެސްކަމެއް މިހާރަކު ގޭތެރެޔަކު ނެތެވެ. މުޅި ގޭތެރެ އެއޮތީ އޭނާއަށް ހިތަކަށް ލިބިފައެވެ. މައްޗަށް އަރަން އަންނަނިކޮށް ، ކުލްސޫމްވެސް ބޭރުން ގެޔަށް ވަންނަން އަންނަނިކޮށް ދިލްނަޝީނަށް ފެނުނެވެ.
ޙައިދަރަށް މީރުހެން ހީވާ ހުރިހާއެއްޗެއް އޭނާ އެހުރީ ތައްޔާރުކޮށްފައިކަމަށް ދިލްނަޝީން ބުންޏެވެ. އެކަމަކު ، ޙައިދަރަށް އެންމެ މީރު ފޮނިކާއެއްޗެއް ދިލްނަޝީނަކަށް ނޭނގެއެވެ. އެކަން ސާފުކުރުމަށް ދިލްނަޝީން ކުރި ސުއާލަށް ކުލްސޫމަށް ޖަވާބު ނުދެވިގެން އުޅެނިކޮށް ، ފަހަތުން އެއިވުނީ މެހެމަލްގެ އަޑެވެ.
" ޙައިދަރަށް އެންމެ މީރުވާނީ ، ޕާންބޯކިބަލެވެ. ޕާންބޯކިބަލެއް އަޅާށެވެ. ޙައިދަރަށް އެންމެ މީރުވާނެ ފޮނިއެއްޗަކީ އެއީއެވެ. " މެހެމަލް ބުންޏެވެ.
ދިލްނަޝީންގެ ފައިދަށުން ބިންގަނޑު ދެމިގެންދިޔަހެން ހީވިއެވެ. ލިބުނު ކުއްލި ސިހުމުގައި އޭނާގެ މުޅިހަށިގަނޑު ތުރުތުރު އަޅައިގެންގޮސް އަރިއަޅައިނުލީ ހަމަކިރިޔާއެވެ.
" މި އަންހެނާ މިތާ މިކުރަނީ ކީއްހެއްޔެވެ " ރުޅިއައިސްހުރެ ، ދިލްނަޝީން ސުއާލު ކުރިއެވެ.
ދިލްނަޝީންގެ ސުއާލަށް ޖަވާބުދިނީ ކުލްސޫމެވެ. މެހެމަލް އެގެޔަށް ގެނައީ އޭނާކަމަށްބުނެ ، ދިލްނަޝީންގެ ސުއާލަށް ކުލްސޫމް ޖަވާބު ދިނެވެ.
ދިލްނަޝީނަށް ލިބުނު ޙައިރާންކަން ވަކިން ބޮޑުވިއެވެ. ފުންނަޒަރަކުން ކުލްސޫމާ ދިމާއަށް ބަލައިލިއެވެ. މެހެމަލް ހުރީ ފަޚުރުވެރިކަމާއެކީ ، ބޮޑާކަމުގެ ހިނިތުންވުމެއްގައެވެ. އޭނާއަށް އެލިބުނު ކާމިޔާބީއަށްޓަކައި ، ގިރުވާން ކޮޅަށްޖަހާލައިގެންނެވެ.
އެންމެ ސިކުންތަކުވެސް އެތަނުގައި ހުންނާކަށް ، ދިލްނަޝީން ބޭނުމެއް ނުވިއެވެ. އޭނާގެ ކޮޓަރިޔާދިމާލަށް ބާރަށް ހިނގައިގަތެވެ. ދިލްނަޝީންގާތަށް އައިސްހުރި ރުޅިގަނޑު ފަޅައިގެންދިޔައީ ކޮޓަރިޔަށް ވަތްފަހުންނެވެ. ކޮޓަރީގެ އެއްބިތުގައި ޖެހިފައި އަނެއްބިތުގައި ޖެހެންދެން ، ދެކޮޅަށް ހިނގަމުންދިޔައިރު ، ދިލްނަޝީނަށް އެހުރެވެނީ ކޮންތާކުކަމެއް އޭނާއަކަށް ނޭނގެއެވެ. އަވަސްއަވަހަށް ފޮށްޓަށް ހެދުންތައް އަޅައިގެން އަނެއްކާ ގެޔަށް ދާންވީ ހެއްޔެވެ. އޭރަށް އަނެއްކާވެސް ކުރިމަތިލާންޖެހޭނީ މަންމަގެ ފަރާތުން އޭނާއަށް ލިބޭ ތަކުލީފުތަކާއެވެ. ހަދާނެގޮތް ބޮޑުވެފައި ހުއްޓައި ކުލްސޫމް އައިސް އެކޮޓަރިޔަށް ވަނެވެ. މިފަހަރު ، ކުލްސޫމާ ކުރިމަތިލާކަށް ދިލްނަޝީން ބޭނުމެއް ނުވިއެވެ. ވާހަކައެއްވެސް ނުދައްކާނެއެވެ. ކުލްސޫމާ ދިމާލަށް ބަލައެއްވެސް ނުލާނެއެވެ. އޭނާ ހައްލާލައިގެން ގެނެސް ، އެދިނީ ކިހާބޮޑު ލަނޑެއް ހެއްޔެވެ ؟ އެއީ ދަރިންނަށް ހެޔޮއެދޭ މަޔަކު ކުރާނެކަހަލަ ކަމެއްނޫނެވެ. ކުލްސޫމަށް ފުރަގަސްދީގެން ، ދުރުގައިހުރިއިރު ، ދިލްނަޝީނުގެ ހިތަށް އަރާފައިބަމުންދާ އެއްޗެތިން އޭނާގެ ސިކުނޑި ހާސްވަމުން ދިޔައެވެ. އެކަމަކު ، ރުޅިއިސްކޮށްގެންހުރެ ، މައިދައިތަޔާ ދިމާލަށް އެއްޗެކޭ ބުނާކަށް ކުލްސޫމް ބޭނުމެއް ނުވިއެވެ. އެއީ ، އެވަގުތު އޭނާއަށް ކުލްސޫމާ މުޚާތަބުކޮށް ، މާ ރަނގަޅު އެއްޗެއް ނުބުނެވޭނެތީވެސް މެއެވެ.
" އަހަރެންގާތު މައިދާނުގައި ސާބިތުވެހުރުމަށް ނަޞޭޙަތްދީ ، މިގެޔަށް ގެނެސް ، އަހަރެން ބަލިކޮށްލާނެ ހަތިޔާރުގެނެސް މިގެޔަށް ވެއްދީ ކީއްވެ ހެއްޔެވެ ؟ އަހަރެން މިގެޔަށް ގެނެސްވެއްދި ސަބަބެއް އަހަރެންނަކަށް ނޭނގެއެވެ. " ދިލްނަޝީން ކުލްސޫމާ ސުއާލު ކުރިއެވެ.
އޭނާގާތު އިށީނދެ ވާހަކަ ދައްކާލަން އައުމަށްބުނެ ، ކުލްސޫމް ގޮސް ، އެނދުގައި އިށީނދެލިއެވެ. ކުލްސޫމް އެތައް ވަރަކަށް ކީމަވެސް ދިލްނަޝީން ، ކުލްސޫމްގާތަށް ދާކަށް ނޫޅުނެވެ. ތަންކޮޅެއް ބާރަށް ކުލްސޫމް ގޮވައިލީމަ ، ނުދާންހުރެފައި ، ދިލްނަޝީންގޮސް ، އެނދުކޮޅުގައި ކުލްސޫމާ ދުރުގައި ޖައްސައިލިއެވެ.
" ދިލްނަޝީން ބުނެބަލާށެވެ ! އަހަރެންނަށް ކިހާވަރަކަށް އިތުބާރު ކުރަން ހެއްޔެވެ ؟ " ކުލްސޫމް ސުއާލު ކުރިއެވެ.
އެވީކަމެއްވީފަހުން ، އެކަމުގައި އިތުބާރުގެ ވާހަކަ ދައްކަންޖެހުނީ ކީއްވެތޯ ދިލްނަޝީން ސުއާލު ކުރިއެވެ. ކުލްސޫމަށް އަދި ކުލްސޫމް އެކުރާކަމަކަށް ، ދިލްނަޝީނަށް އިތުބާރު ކުރެވޭތޯ އަނެއްކާވެސް ، ކުލްސޫމް ސުއާލު ކުރިއެވެ. ދިލްނަޝީން އެގެޔަށް އެއައީ ، ކުލްސޫމަށް އިތުބާރުކޮށްފައިކަމަށް ދިލްނަޝީން ބުންޏެވެ. އެހެންނޫންނަމަ ، އެގެޔަކަށް ދިލްނަޝީނެއް ނާންނާނެއެވެ. އެހެންކަމަށް ވަންޏާ ، ދިލްނަޝީނަށް ތަކުލީފެއްލިބޭނެ އެއްވެސްކަމެއް އޭނާ ނުކުރާނެކަމަށް ، ކުލްސޫމް ބުންޏެވެ.
" ދެންއޮތީ ، މެހެމަލްގެ މައްސަލައެވެ. އަހަރެމެންގެ ލޯމަތިން ދުރުގައި މެހެމަލް ހުންނާކަށް އަހަރެން ބޭނުމެއްނޫނެވެ. އެކަން އެހެން ވެއްޖެނަމަ ، ޙައިދަރުގެ ހިތަށް ވަސްވާސް ވައްދައިގެން ، އަހަރެމެންނާ މާދުރަށް ޙައިދަރު ގެންދާނެއެވެ. " ކުލްސޫމް ބުންޏެވެ.
މިހާރުވެސް ، އެގޭގައި މެހެމަލް އެއުޅެމުންދަނީ ، ޙައިދަރުގެ ކުރިމަތީގައެވެ. ދުރުގައި ހުރުމަށްވުރެ ، އެގޭގައި މެހެމަލް ހުރީމަ މާގިނައިން މެހެމަލްއާ ޙައިދަރާ ދިމާވާނެއެވެ. މާގިނަ ފުރުޞަތު މެހެމަލްއަށް ލިބޭނެކަމަށް ދިލްނަޝީނަށް ފެނުނެވެ. އެޙާލަތުގައި ޙައިދަރުގެ ހިތުގައި ދިލްނަޝީނަށް ޖާގައެއް އުފެދެން އުނދަގޫވާނެއެވެ.
އެހާރުން ފެށިގެން ، ވަރަށް ވިސްނައިގެން ދިލްނަޝީން އުޅުމަށް ކުލްސޫމް ލަފާދިނެވެ. އެކަން އެގޮތަށް ދިލްނަޝީނަށް ކުރެވިއްޖެނަމަ ، ޙައިދަރުގެ ހިތުގައި އެހެންމީހަކަށް ޖާގައެއް ނުއުފެދޭނެއެވެ. ޙައިދަރަށް ފެންނާނީ ހަމައެކަނި ދިލްނަޝީނެވެ. އެހެނަސް ، ކުލްސޫމްގެ އެވާހަކަ ، ދިލްނަޝީނަށް ޤަބޫލެއް ނުކުރެވުނެވެ. ޙައިދަރުގެ ހިތުގައި މިހާރުވެސް ރަނިކަން ކުރަމުން އެގެންދަނީ މެހެމަލްއެވެ. ދިލްނަޝީނުގެ ލޯތްބަކީ ، ޙައިދަރުގެ ހިތުގައި އުފައްދަންޖެހޭ އިޙްސާސެކެވެ. އެހެންކަމުން ، އެޙާލަތުގައި ދިލްނަޝީނަށްވުރެ ބޮޑަށް މެހެމަލްއަށް އޮތް ފުރުޞަތު ބޮޑުވާނެއެވެ.
ރަސްމީގޮތުން ޙައިދަރުގެ ނަމާގުޅިފައި ނެތްނަމެއް ، އަދި ރަސްމީގޮތުން ގުޅިފައިނެތް ގުޅުމެއްގެ އަގެއް ނޯންނާނެކަމުގައި ކުލްސޫމް ބުންޏެވެ. އެއީ ވެއްޔާ މޮޑެވި ނެތިގެންދާނެ ގުޅުމެއްކަން ، ދިލްނަޝީނަށް ކުލްސޫމް ހަނދާން ކޮށްދިނެވެ.
ދިލްނަޝީން ބޭނުންވީ ، މެހެމަލް އެގެއިން ފޮނުވައިލާށެވެ. އަދި ، މެހެމަލްއާ ބައްދަލުކުރަން ޙައިދަރު ދިއުން ކުލްސޫމް މަނާކޮށްދިނުމަށެވެ. ދިލްނަޝީނަށް ފެނުނު އެންމެ ރަނގަޅުގޮތަކީ އެއީއެވެ. އެކަން މިހާރުވެސް ، ކުލްސޫމް ކޮށްފިއެވެ. އެކަމުގެ ނަތީޖާވެސް ފެނިއްޖެއެވެ. އެއީ ފިރިހެނުންގެ ފިތުރަތުގައި ހުންނާނެ ކަމެކެވެ. ނުކުރަން ބުނާ އެކަހަލަ ހުރިހާކަމެއް ކުރާނެއެވެ. އަންހެނަކު ، ކަމެއްކޮށްދޭން އެދިއްޖިއްޔާ އެކަމެއް ނުކޮށްދީ ، އެމީހަކަށްވުރެ ދެރަވާކަށް ، ފިރިހެނުން ބޭނުމެއް ނުވާނެއެވެ. މެހެމަލްއަކީ ، ޙައިދަރުގެ ބޮޑުބޭބެގެ ދަރިއެކެވެ. ކުޑަކުޑަ ކުއްޖަކު ގޮވައިގެން ، ބޯހިޔާވަހިކަމެއްނެތި ، މެހެމަލް އުޅުމަކީ ، ޙައިދަރުގެ ހިތަށް އުނދަގޫވާނެ ކަމެކެވެ. ތިމާގެކަމުގެ ގުޅުމާއެކު ، ޙައިދަރުލައްވާ ކަންކަން ކުރުވުމަކީ މެހެމަލްއަށް އެހާ އުނދަގޫ ކަމަކަށް ނުވާނެއެވެ. މެހެމަލް ދުރުގައި ހުރެއްޖެނަމަ ، ކުލްސޫމްމެންނަށް ނޭނގި ، މެހެމަލްއާ ބައްދަލުކުރަން ޙައިދަރު ނުގޮހެއް ނުހުންނާނެއެވެ. އެކަން އެހެންވެއްޖެނަމަ ، ޙައިދަރުގެ ހިތުން ފުހެވެމުންދާ މެހެމަލްގެ ލޯބި ، އާލާކުރަން މެހެމަލްއަށް ފަސޭހަވާނެއެވެ.
" އަހަރެން މިކުރާކަމެއް މިހާރު ވިސްނިއްޖެ ހެއްޔެވެ ؟ " ކުލްސޫމް ބުންޏެވެ.
ދިލްނަޝީނަށް މަޑުމަޑުން ބޯޖަހައިލެވުނެވެ. މައިދައިތަ އެދައްކާ ވާހަކަ ، ދިލްނަޝީނަށް މިހާރު ޤަބޫލު ކުރެވިއްޖެއެވެ. އެތައް އިރެއް ވަންދެން މަޑުމަޑުން ބޯޖަހައިލަ ޖަހައިލަ ދިލްނަޝީނަށް އިނދެވުނެވެ. ދުނިޔޭގައި އުޅެ ، މައިދައިތަމެންނަށް ލިބިފައިވާ ތަޖުރިބާއިން އަޅަމުންދާ އެކަހަލަ ޙިކުމަތްތެރި ފިޔަވަޅުތަކެއް ، ދިލްނަޝީންމެންނަކަށް އަދި ނުވިސްނޭނެއެވެ. ( ނުނިމޭ )
