ފަލްސަފާ (104)

( 2 ޖުލައި 2024 ގައި ޝާއިޢުކުރި ބަޔާގުޅޭ )

އެންމެ ފަހު ވަގުތުގައިނަމަވެސް ، މުރުތަޟާގެ ޙާލަތު ތަހުނިޔާއަށް އިޙްސާސްވީތީ ، ﷲ އަށް ޙަމްދު ކުރިއެވެ. އެ އެއްބާރުލުން ، ތަހުނިޔާގެ ފަރާތުން ކޮންމެވެސް ސިފައެއްގައި ލިބޭނެ ދުވަހަކަށް ، މުރުތަޟާ އިންތިޒާރު ކުރަމުން ގެންދާތާ އެތައް ދުވަހެކެވެ. އެންމެފަހުން ، އެ މަޤްޞަދު އެ ޙާޞިލްވީ ، އެކަމަށް އެންމެ ބޭނުންވެފައި އޮތް ނާޒުކު ދަނޑިވަޅެއްގައެވެ.

ކުއްލިގޮތަކަށް ކަރާޗީއަށް އަންނަންޖެހިގެން ، ހާރިސް އައުމުން ރައިދާއަށްވެސް ޙައިރާންކަމެއް ލިބުނެވެ. ނޫރުއަށްވެސް ބޭބެ ފެނުމާއެކު ، ހިތުގެ ތަކުލީފުތައް ލުއިވެގެން ދިޔައެވެ. ތިންމީހުން ވާހަކަ ދައްކަމުންގޮސް ، ނޫރު މިހާރު ވަކިގޮތެއް ނިންމައިފިންތޯ ހާރިސް ސުއާލު ކުރިއެވެ. މިހާރު އެއީ ނޫރު ނިންމައިގެންހުރިގޮތް ، އެންމެންގާތު ބުނަންޖެހޭ ވަގުތުކަމަށް ނޫރުއަށް ފެނުނެވެ.

އިޙްސާނާއި އޭނާގެ ސެކްރެޓަރީ ގޭތެރޭގައި މަސައްކަތެއްކުރަން ތިއްބާ ، ނޫރު އެގެޔަށް ދިޔައެވެ. ނޫރު ވަނުމާއެކު ، އިޙްސާން އޭނާގެ ސެކްރެޓަރީ ފޮނުވައިލިއެވެ. އަދި ، ނޫރުއަށް ގޮވާލައި ، އިށީނުމަށް ބުންޏެވެ. ނޫރު އެގޭތެރެއިން ފެނުނީމާ ، އިޙްސާންގެ މޫނުމަތިން އުފާވެރިކަން ފާޅުވާން ހުށްޓެވެ. ނޫރު އެގެޔަށް އައުމުގެ މާނަޔަކީ ، އެދެމީހުންގެ މެދުގައި އޮތް ހިތާހިތުގެގުޅުން އަދިވެސް އޮތްގޮތަށް އޮތީކަމަށް އިޙްސާނަށް ޤަބޫލު ކުރެވުނެވެ. އިތުބާރެއްނެތް ގުޅުމެއްގައި ، ހިތާހިތުގެ ޖަޒުބާތެއް ނޯންނާނެކަމުގައި ނޫރު ބުންޏެވެ. އިޙްސާންގެ ހިތުގައި ނޫރުގެ މައްޗަށް އޮތް އިތުބާރު އޮތީ ގެއްލިފައެވެ. އެހެނަސް ، އިޙްސާންގެ ހިތް ، އަދިވެސް ނޫރުއަށް އެދެއެވެ. އިތުބާރު އުފެއްދުމަށްޓަކައި ، ނޫރުގެ ކިބައިން އިޙްސާން އެދުނީ ކުޑަމިންވަރެއްކަމުގައި އިޙްސާން ބުންޏެވެ. ނޫރުދޭން އޮތީ ހަމަ އެއް ޖަވާބެކެވެ.

" އަހަރެންގެ ކުރިއެރުން ހުއްޓުވައި ، ތަޞައްވުރު ކިލަނބުކޮށް ، ގޭގައި ބަންދުކޮށް ހެދުމަށްފަހު ތިޔަބުނަނީ ، އަހަރެންނަށް މިނިވަންކަން ލިބިގެންވާ ވާހަކަ ހެއްޔެވެ ؟ އެއީ ، ކޮންކަހަލަ މިނިވަންކަމެއް ހެއްޔެވެ ؟ އިޙްސާންގެ ޙަޔާތުގެ އެހާބޮޑު ޙަޤީޤަތެއް ސިއްރުކޮށްގެންހުރެ ، އަހަރެންނާ ކައިވެނި ކުރުމަށްފަހު ، ތިޔަބުނަނީ ކޮން އިތުބާރެއްގެ ވާހަކަ ހެއްޔެވެ ؟ އަހަރެންގެ އަބުރާއި ޢިއްޒަތަށް އަރައިގަތުމަށްފަހު ، ތިޔަ އެދެނީ އިޙްސާންގެ ބަންދެއްގައި އަހަރެން ހުންނަން ހެއްޔެވެ ؟ ޝުކުރިއްޔާއެވެ ! އިޙްސާން އެވެ ! އެއީ އަހަރެންގެ މަންޒިލެއް ނޫނެވެ. " ނުރު ބުންޏެވެ.

އެހެންކަމަށް ވަންޏާ ، ނޫރުގެ މަންޒިލަކީ ކޮބައިތޯ އިޙްސާން ސުއާލު ކުރިއެވެ. ހުރިހާ އެއްޗެއް ނޫރުގެ ކުރިމަތީގައި އެހެރީއެވެ. މަދުވާޏެ އެއްވެސް އެއްޗެއް ނުހުންނާނެއެވެ. ފައިސާ އާއި މުދަލުގެ ސުމާރެއް ނެތެވެ. އަންހެނަކު ، އޭނާގެ މުއްސަނދި  ގެ ދޫކޮށްފައި ، މަސައްކަތުގެ މާޙައުލަށް ނުކުންނަންވީ ކީއްކުރަން ހެއްޔެވެ. ފައިސާއަށް ޓަކައިކަމަށް އިޙްސާން ބުންޏެވެ. އެ ފައިސާ ނޫރުއަށް މަދެއް ނުވާނެއެވެ. އުފަލާއި އަރާމުގެ ކޮޅެއް ނެތެވެ. އިނގިއްޔަކަށް ނޯކަރަކު އެބަހުށްޓެވެ. ޖަވާހިރާއި ގަހަނާއާއި ، ހިތްއެދޭފަދަ ފިރިއަކު އެބަހުށްޓެވެ. އެހުރިހާ އެއްޗެއް ނޫރުއަށް އެއޮތީ ތަނަވަސް ވެފައެވެ. މަދީ ހަމަ އެންމެ އެންމެ އެއްޗެކެވެ. މުރުތަޟާ ޙަސަނެވެ.

އިޙްސާނަށް މިހާރު އެ އަރައިގަނެވެނީ ، އޭނާގެ އަބުރާއި ޢިއްޒަތަށްކަމުގައި ނޫރު ބުންޏެވެ. ކޮންމެ އެއްޗެކޭ އިޙްސާން ބުންޏަށް ނޫރުއަކަށް ތަފާތެއް ނެތެވެ. އިޙްސާން އޭނާއަށް އިތުރަށް ދޭނެ ތަކުލީފެއް ނެތެވެ. ޞަދަޤާތެއްގެ ގޮތުގައި ނޫރުއަށް ދޭން އިޙްސާން ބޭނުންވާ ހުރިހާ އެއްޗެއް ، އޭނާ އެހުރީ އަނބުރާ އިޙްސާނަށް ދޭ ގޮތަށެވެ. އިޙްސާންގެ އެއްވެސް އެއްޗެއް ނޫރު ، ބޭނުމެއްނޫނެވެ.

" މިއަދު ، މިގެޔަށް އަހަރެން އައިސް މިއިނީ އަހަރެންގެ ޙައްޤު ހޯދާށެވެ. " ނޫރު ބުންޏެވެ.

ނޫރު އެދައްކަނީ ކޮން ޙައްޤެއްގެ ވާހަކައެއްކަން ސާފުކުރުމަށް ، އިޙްސާން ބޭނުންވިއެވެ. ނޫރު ، ހޯދަން އެއައީ އޭނާކުރި ބުރަ މަސައްކަތުގެ ޙައްޤުކަމުގައި ނޫރު ބުންޏެވެ. އެއީ ، ދެމީހުން ބައިވެރިވެގެން ފެށި ވިޔަފާރީގައި ، ނޫރުއަށް ޙައްޤުވާ ޙިއްޞާ އެވެ. ނޫރުގެ ދިރިއުޅުމަށް ، އިޙްސާން އައުމުގެ ޙައްޤެވެ.

" އަހަރެން މިގެޔަށް އައިސް މިއަދު މިއިނީ ، އިޙްސާންގާތުން ވަރިވުމަށް ބޭނުންވާ ފޯމު ބަލައެވެ. " ނޫރު ބުންޏެވެ.

ނޫރު އެ އެދެނީ ކިހާވަރެއްގެ އެއްޗަކަށްކަން ނޫރުއަށް އިޙްސާސް ވޭތޯ ، އިޙްސާން ސުއާލު ކުރިއެވެ. ނޫރުއަށް އެކަން އެނގޭކަމަށް ހަރުއަޑުން ބުންޏެވެ. ނޫރު ބޭނުންވަނީ ، އޭނާގެ އަމިއްލަ ޙަޔާތް ، އޭނާގެ އަމިއްލަ ފަލްސަފާގައި ދެމިއޮތުމުގެ ޙައްޤެވެ. ﷲ ލެއްވި ހުރިހާ ރަޙުމަތަކާއި ، މުއްސަނދި ދިރިއުޅުމުގެ ނަސީބު ލިބުމަށްފަހުވެސް ، ނުރު އެދަނީ އެކަންކަމާ ދުރަށް ކަން ، އިޙްސާން ހަނދާން ކޮށްދިނެވެ. ވަރަށްބޮޑު ޢަޖައިބެކެވެ. ދިރިއުޅުމަކީ ދެއަތް ދެއަތަށް ޖެހޭ އަޑުން އާބާދުވާ އެއްޗެކެވެ. އެއްއަތް ހޫރައިގެން އެއަކުން އަޑެއް ނުނުކުންނާނެއެވެ. ނޫރު އެކަނިވެރިވާތަން ، ނޫރުއަށް ފެންނާނެއެވެ. ނޫރު ދޫކޮށްލަން ، އިޙްސާން ބޭނުންނުވާކަމުގައި ބުންޏެވެ.

" މި ޢުމުރަށް އިންސާނާ ދާއިރު ، މަދު ބަޔަކު ކައިރީގައި ތިބުމަކީ ، ކިތަންމެ ފައިސާ އަކާއި މުދަލެއް ހޯދިޔަސް ، އެ އިންސާނާ ދުނިޔެއަށް އުފަންވުމުގެ މަޤްޞަދާ ޚިލާފު ކަމެކެވެ. ލޭގެ ގުޅުމެއް ނެތްތާނގައި ، އަހަރެންގެ ހުރި ހަމައެކަނި އަންހެންދަރިފުޅާއެކީ ، ދެންހުރި މީހަކީ ނޫރުއެވެ. ނޫރުއާއެކީ ޤާއިމްކުރެވުނު ކައިވެނީގެ ގުޅުން ދަމަހައްޓަން އަހަރެން ބޭނުމެވެ. އަހަރެން ދޫކޮށްލާފައި ނޫރުލްޢައިނު ނުދާށެވެ ! ނޫރުވެސް ކޮންމެވެސް ވަރަކަށް ގޮތް ދޫކުރާށެވެ. އަހަރެންވެސް ބައެއްކަންކަން ދޫކޮށްލާނަމެވެ. " އިޙްސާން ބުންޏެވެ.

އިޙްސާން ބޭނުންވަނީ ކޮންކަމެއްތޯ ނޫރު ސުއާލު ކުރިއެވެ. އޭނާއަށް ނޫރު ހުއްޓުވޭނެކަމަށް ވަންޏާ ، އިޙްސާން ބޭނުންވަނީ ، ނޫރުއެވެ.

މުރުތަޟާގެ ޙާލަތު ތަހުނިޔާއަށް އެނގުމާއެކު ، އެވާހަކަތައް މަންމައާއި ދައްތަގާތު ނުދައްކާ ހުރުމަކީ ގޯހެއްކަމަށް މުރުތަޟާއަށް ފެނުނެވެ. އަދި ، ވަގުތުން ބޭރަށް ނުކުމެ މަންމައާއި ދައްތަ ، ސިޓިންރޫމަށްނެރެ ، ހުރިހާ ވާހަކައެއް އަކުރުން އަކުރަށް އެމީހުންނަށް މުރުތަޟާ ކިޔައިދިނެވެ. އެވާހަކަތައް އަޑުއަހާފައި ، ޙަފުޞާގެ ހިތް ނުހުއްޓުނީ ކިރިޔާއެވެ. ޠާހިރާވެސް ، އޭނާ އިށީނދެއިން ގޮނޑިޔަށް ފެތިލިއެވެ. އެހާ ގިނަ ޢަދަދެއްގެ ފައިސާ އެމީހުން ، އެހާ ކުއްލި ގޮތަކަށް ހޯދާނެގޮތެއް ޙަފުޞާއަކަށް ނޭނގެއެވެ. ހަމައެކަނި އޮތް ޙައްލެއްކަމަށް ޙަފުޞާއަށް ފެނުނީ އެ ގެ ވިއްކައިލުމެވެ. ގެ ވިއްކައިލުމަށްފަހު ، މުރުތަޟާ ދައްކަންޖެހޭ ހަލައްކަ ރުފިޔާ އަމީން އިޙްސާނަށް ދައްކާފައި ބާކީވާ ފައިސާއިން ، ތަންކޮޅެއް ކުޑަ ގެޔެއް ގަންނާނީއެވެ. އެހެނަސް ، އެއީ މުރުތަޟާ އެއްވެސް ޙާލެއްގައި ކުރާނެކަމެއްނޫނެވެ. އެކަހަލަ ވާހަކަ ނުދެއްކުމަށް މުރުތަޟާ ، އޭނާގެ މަންމަ ގާތު ބުންޏެވެ. ތިންމައިން ވާހަކަ ދައްކަން ތިއްބާ ، ކުޑަފޮށްޓެއް އަތަށްލައިގެން ތަހުނިޔާ އައިސް އެމީހުންގެ ކުރިމަތީގައި ހުށްޓުނެވެ. އެންމެން ތިބީ ތަހުނިޔާއާ ދިމާއަށް ބަލަހައްޓައިގެންނެވެ.

" ނޫރުލްޢައިނު ޖާގަހޯދީ ހަމައެކަނި އަހަރެންގެ ކުންފުނިން އެކަންޏެއްނޫނެވެ. އަހަރެންގެ ހިތުންވެސް ، ނޫރުލްޢައިނު ޖާގަ ހޯދައިފީމުއެވެ. އެކަމަކު ، އަހަރެންގެ ފިކުރަށް ވަރަށް އަސަރުކޮށްފިއެވެ. މުރުތަޟާއާއި ނޫރުލްޢައިނުގެ ގުޅުމުގެ ވާހަކައިން ފެށިގެން ، ދެން އިވެންފެށި އަޑުތަކުން ، އަހަރެންނަށް ނޫރުލްޢައިނުއާމެދު ހަރުކަށިވާން މަޖުބޫރު ވީއެވެ. ރަމްޝާގެ އެދުމުގެ މަތިން ، ޕާކިސްތާނުގައި ހުރި އަހަރެންގެ ހުރިހާ ކުންފުނިތަކެއް އޭނާގެ ނަންމައްޗަށް މި ބަދަލު ކުރަނީއެވެ. އެއަށްފަހު އަހަރެން ބަދަލުވާނީ އެމެރިކާއަށެވެ. އަހަރެން ބޭނުމީ ، ނޫރު އަހަރެންނާއެކީ އެމެރިކާއަށް ދިއުމަށެވެ. އެމެރިކާއަށްގޮސް ، އެމެރިކާގައިހުރި އަހަރެންގެ ވިޔަފާރިތައް ހިންގަން ނޫރު ބޭނުންކަމަށް ވަންޏާ ، އަހަރެންގެ އެއްވެސް މައްސަލައެއް ނެތެވެ. " އިޙްސާން ބުންޏެވެ.

ފަޚުރުވެރިކަމާއެކީ ، އިޙްސާންގެ ދަރިފުޅުގެ ނަމަށް މިއަދު އެ ބަދަލުކުރާ ކުންފުނިތަކަކީ ، އިޙްސާން ހަނދާން ނެތުނަސް ، ނޫރުގެ ބުރަމަސައްކަތާއި ، ރެޔާއި ދުވާލު ދާ އޮހޮރުވައިގެން އުފައްދައި ކޮޅަށްޖަހާފައިހުރި ވިޔަފާރިތަކެއްކަމުގައި ނޫރު ބުންޏެވެ. އޭނާ އެމެރިކާގައި އުފަލާއެކީ ދިރިއުޅެމުން ގެންދަނިކޮށް ، ޕާކިސްތާނަށް ގެނައީ  އިޙްސާންކަން ނޫރު ، ހަނދާން ކޮށްދިނެވެ. ޕާކިސްތާނަށް އައިސް ހަމަޖެހިނުލެވި އުޅެނިކޮށް ، އަނެއްކާ އިޙްސާން އެ ބޭނުންވަނީ ، އެމެރިކާއަށް ނޫރު ބަދަލުވާށެވެ.

" ޙަޤީޤަތަށް ބަލާއިރު ، އިޙްސާން ބޭނުންވަނީ ، އިޙްސާން ކުޅެން ގެންގުޅޭ ބުދެއްހެން ، އިޙްސާނަށް އަޅުދާސްވެގެން ، އިޙްސާންގެ ބޭނުންތައް ފުއްދައިދީގެން ، އަހަރެން ގަނަތެޅުވުމެވެ. އެކަމަކު ، އަހަރެން އެކަމަކަށް ބޮލެއް ނުލަނބާނަމެވެ. އަހަރެންގެ މުޅި ޢުމުރު ، އިޙްސާން ބޭނުންވާހާ ގޮތަކަށް އެނބުރޭ ވަހުތާނެއްހެން ހުސްކޮށްލާކަށް އަހަރެން ތައްޔާރެއް ނޫނެވެ. އަހަރެން ބޭނުންވަނީ ، އަހަރެންގެ ޙަޔާތް އަހަރެން ބޭނުންވާގޮތަށް ގޮސް ނިމުމެވެ. އެހެންވީމާ ، އަހަރެން ބޭނުމީ އިޙްސާންގާތުން ވަރިވާށެވެ. " ނޫރު ބުންޏެވެ.

ނޫރު އެއައީ ، ވަކިގޮތަކަށް ނިންމައިގެންކަން އިޙްސާނަށް އެނގުނެވެ. އޭނާ އެއައީ ވާހަކަ ދައްކައިގެން ޙައްލެއް ހޯދާކަށްނޫނެވެ. އިޙްސާން ހީކުރަން ބޭނުންވާގޮތަކަށް ހީކުރަން ވީކަމަށް ނޫރު ބުންޏެވެ.

މުރުތަޟާއާ ވާހަކަ ދައްކައިފިންތޯ ، އިޙްސާން ސުއާލު ކުރިއެވެ. އިޙްސާން ބޭނުންވާ ނަތީޖާއަކާ ހަމަޔަށް ވާޞިލްވުމުގެ މިނިވަންކަން ، އިޙްސާނަށް އެބައޮތްކަމަށް ނޫރު ބުންޏެވެ. އެހެންކަމުން ، ނޫރުލްޢައިނުވެސް މިނިވަންކުރުމަށް ނޫރު އެދުނެވެ.

އިޙްސާން ބޭނުން އެއްވެސް ކަމަކަށް ނޫރު ، ފުރުސަތެއް ނުދިނެވެ. އެހެންކަމުން ، ނޫރު ބޭނުންވާގޮތެއް ހެދުންފިޔަވައި ، އިތުރުގޮތެއް އިޙްސާނަށް ނެތުނެވެ. އެއްވެސް ގުޅުމަކީ ، ގަދަބާރުން ދެމެހެއްޓޭނެ ގުޅުމެއްނޫނެވެ. އެއީ ގުޅުމުގެ ޚާލިސްކަމުން ހެތޮހިތުން ކުރިޔަށް ގެންދެވޭނެ އެއްޗެކެވެ. އިޙްސާން ، އޭނާގެ ހިތުގެ އިޚްލާޞްތެރިކަން ސާބިތުކޮށްދޭނެކަމަށް އިޙްސާން ބުންޏެވެ.

" ނޫރު ބޭނުންވާގޮތަށް ، ވަރީގެ ފޯމު ނޫރުއަށް ފޮނުވާނަމެވެ. ހަމައެއާއެކީ ، ޤާނޫނީގޮތުން ނޫރުއަށް ޙައްޤުވާ ފައިސާވެސް ފޮނުވާނަމެވެ. އެއަށްފަހު ، މުރުތަޟާ ނޫރުލްޢައިނުއާ ކައިވެނިކުރޭތޯވެސް އަހަރެން ބަލާނަމެވެ. " އިޙްސާން ބުންޏެވެ.

ނޫރު ހިނިތުން ވެލިއެވެ. އެއީ ފަހުގެ ކަމެއްތާއެވެ. މުރުތަޟާ ކޮށްފައިވާ ޖޫރިމަނާވެސް ، އިޙްސާނަށް ލިބޭނެއެވެ.

" އަހަރެން ބޭނުމީ ، ހަމައެކަނި އަހަރެން މިނިވަންކޮށްދޭކަށް ނޫނެވެ. މުރުތަޟާއަށްވެސް ، އިޙްސާންގެ ފަރާތުން މިނިވަންކަންލިބި ، އިޙްސާންގެ ކިބައިން ސަލާމަތް ވުމެވެ. " ނޫރު ބުންޏެވެ.

އެވާހަކަ ނޫރު ބުނީތީ އިޙްސާން ވަރަށް ގަޔާވިއެވެ. އިޙްސާންގެ ޙަޔާތުން ނޫރުލްޢައިނު ވަކިވުމުގެ ދެރައެއް އިޙްސާސްކުރާކަށް ނުޖެހޭނެކަމަށް އިޙްސާން ބުންޏެވެ. ވަރަށް ހިތްގައިމު ވަގުތުތަކަކާއި ދުވަސްތަކެއް ނޫރުލްޢައިނުއާއެކީ ، އިޙްސާންވަނީ ހޭދަކޮށްފައެވެ. އެހެން އެއްވެސް މީހެއްގެ ފަރާތުން ނުލިބޭފަދަ ހިތްހަމަ ޖެހުމާއި އުފާ ، ނޫރުގެ ފަރާތުން އިޙްސާނަށްވަނީ ލިބިފައެވެ.  ނޫރުއަށް އިޙްސާން އަލްވަދާޢު ކިޔެވެ. އެއާއެކު ، ނޫރު ތެދުވެގެން އެގެއިން ނުކުމެގެން ދިޔައެވެ. ނޫރު އެގެއިން ނުކުންނަންދެން ، އިޙްސާން ހުރީ ނޫރުއާ ދިމާއަށް ބަލަހައްޓައިގެންނެވެ.

ތަހުނިޔާ ހިފައިގެން އައި ކުޑަފޮށްޓަށް ބަލައިލައި އެއީ ކޮންއެއްޗެއްތޯ މުރުތަޟާ ސުއާލު ކުރިއެވެ. އެއީ ، މުރުތަޟާއަށް ކުރިމަތިވެފައިވާ މައްސަލައިގެ ޙައްލުކަމަށް ތަހުނިޔާ ބުންޏެވެ. ތަހުނިޔާ ހިފައިގެން އެއައީ ، ބައެއް ގަހަނާއާއި ތަހުނިޔާގެ ނަމުގައި އޮތް ގޯއްޗެއްގެ ފަތެވެ. އެ ގޯތި ވިއްކާލައިގެން އެކަނިވެސް ، މުރުތަޟާ ދައްކަންޖެހޭ ޖޫރިމަނާ ދައްކައި ޚަލާޞް ކުރެވޭނެއެވެ. ބާކީވާ ފައިސާއިން ކޮންމެވެސް ކަމެއް ކޮށްލެވިވެސް ދާނެއެވެ.

އެއީ ، ތަހުނިޔާކުރަން ކަމުދާކަމެއްނޫންކަމަށް ޙަފުޞާ ބުންޏެވެ. އެހެނަސް ، ތަހުނިޔާއަށްޓަކައި އެމީހުން ކޮށްދީފައިވާ ކަންކަމާ އަޅާކިޔާއިރު ، އެއީ އެއްވެސް އެއްޗެއްނޫނެވެ. އެހެންނޫނަސް ، ތަހުނިޔާއަކީ ، އެމީހުންގެ މީހެކެވެ. ދުރުމީހެއްނޫނެވެ. ތަހުނިޔާގެ އެ ހަދިޔާ ޤަބޫލުކުރުމުގެ ފަޚުރު އޭނާއަށް ދިނުމަށް ތަހުނިޔާ އެދުނެވެ. މުރުތަޟާ ، ތަހުނިޔާއަށް ޝުކުރު އަދާކުރިއެވެ. އެ ގަހަނާތައް އޭނާ ނުނަގާނެކަމަށާއި ، ގޯއްޗަކީ އޭނާގެ މައްޗަށް އޮތް ދަރަންޏެއްކަމަށް ބެލުމަށް މުރުތަޟާ އެދުނެވެ. ކޮންމެވެސް ދުވަހަކުން ، އެ ގޯއްޗަށްވުރެ ބޮޑު ގޯއްޗެއް ، ތަހުނިޔާއަށް އޭނާ ހޯދައިދޭނެކަމަށް މުރުތަޟާ ބުންޏެވެ. މުރުތަޟާ އެބުނި ބުނުން ތަހުނިޔާއަށް ފުދެއެވެ. އެއީ ބަދަލެއް ހޯދުމުގެ ބޭނުމުގައި ތަހުނިޔާ ދިން އެއްޗެއްނޫނެވެ.

" އަހަރެންގެ ލޯބިވާ ދަރިފުޅާއެވެ ! މަންމަގާތުގައި އިށީނދެލުމަށް އައިސްބަލާށެވެ ! " ޙަފުޞާ ވަރަށް ލޯބިން ތަހުނިޔާއަށް ގޮވައިލިއެވެ.

މަންމައާއި އަހަރެން އެއްޗެއްދޭން ބުނީމަ ، މުރުތަޟާ ދެކޮޅުހަދައިފިކަމަށް ޠާހިރާ ބުންޏެވެ. އެކަމަކު ، ތަހުނިޔާ ގެނެސް އެދިން ހުރިހާ އެއްޗެއް އެއްފަހަރުން ބަލައިގެންފިއެވެ. މުރުތަޟާގެ ކަންފަތުގައި ހިފައިލަމުން ، ޠާހިރާ ބުންޏެވެ.

" އަވަހަށްގޮސް ، މުރުތަޟާގެ މައްޗަށް އޮތް ދަރަނި ޚަލާޞް ކޮށް އެކަމުން ސަލާމަތް ވާށެވެ. އަދި ، ނޫރުލްޢައިނުގެ ކިބައިންވެސް ސަލާމަތް ވާށެވެ. " ޙަފުޞާ ބުންޏެވެ. ( ނުނިމޭ )