ފަލްސަފާ (94)

( 4 ޖޫން 2024 ގައި ޝާއިޢުކުރި ބަޔާގުޅޭ )

ތަހުނިޔާމެންގެއިން ނުކުމެގެން އައިސް ، ގޭގެ ސިޓިންރޫމުގައި ޖައްސާލައިގެން ، މުރުތަޟާ އިނެވެ. އޭނާގެ ބޮލުގައި އެޅުވިގެން އެދަނީ އެއްވެސް ޙައްޤެއްނެތް އިލްޒާމް ތަކެކެވެ. ތަހުނިޔާގެ ވިސްނުން އެހާ ހަނިވެދާނެކަމަކަށް މުރުތަޟާ ، ހިއެއް ނުކުރެއެވެ. އެހެނަސް ، މިހައެއްކަ ދުވަހުގެ ތެރޭގައި މުރުތަޟާއަށް އުޅެވިފައިވާ ގޮތުގެމައްޗަށް ، ފިރިއެއްގެ ނަޒަރިއްޔާއިން ބަލައިލައިފިނަމަ ، ތަހުނިޔާ ކަންބޮޑުވެދާފަދަ ކަންތައްތަކެއް ، އޭނާއަށްވެސް ކުރެވިފައިވާކަމަށް މުރުތަޟާއަށް ޤަބޫލު ކުރެވެއެވެ. އެދުވަސްކޮޅު އުޅެވިފައިވަނީވެސް ، ތަހުނިޔާ އެންމެ ހިތްއެދޭގޮތަކަށް ނޫނެވެ. އެކަންކަމާ ޝަކުވާކުރުމުގެ ޙައްޤު ، ތަހުނިޔާއަށް އޮންނަންވާނެއެވެ.

ގެޔަށް ވަދެގެން އައިސް މުރުތަޟާގާތަށް ހުއްޓިލައި ، ޙަފުޞާގެ އަޑުގެ ނެތްތަނަށް މުރުތަޟާއަށް ގޮވައިލިއެވެ. މުރުތަޟާ ސިއްސައިގެންދިޔައެވެ. މުރުތަޟާއިނީ ، ތަހުނިޔާ އެދެއްކި ވާހަކަތަކުން ހިތަށް ލިބުނު ތަކުލީފުގައި ހަދާނެގޮތް ބޮޑުވެފައެވެ. މީހަކަށް ޝައްކުކުރަމުންގޮސް ، އަމިއްލަ ނަފްސު އޭގެތެރެޔަށް ދޫކޮށްލަންވެސް ޙައްދެއް އޮންނާނެކަމަކށް މުރުތަޟާއަށް ބުނެވުނެވެ. މުރުތަޟާއާއި ނޫރުއާ ދެމީހުންނާ އަޅުވާކިޔައި ، ތަހުނިޔާއަށް ޝައްކު ކުރެވިދާނެ އެތައްކަމެއް އޮވެދާނެއެވެ. އެހެނަސް ، އެއިން އެއްވެސް ކަމަކީ ، ތަހުނިޔާ އެކަމާ ވިސްނަންޖެހޭނެ ކަންކަމެއް ނޫނެވެ. ތަހުނިޔާއަކަށް ، އަދިވެސް މުރުތަޟާ ދަހެއް ނުވެއެވެ. ނޫރުއާ ދިމާވާ ދެރަ ޙާލަތަކަށް ކިތަންމެ ބޮޑު ހަމްދަރުދީއެއް އުފެދުނަސް ، މުރުތަޟާގެ ހިތް ނޫރުގެ މައްޗަށް ދޫވެގެންނުދާނެކަން ، ޔަޤީންވާވަރަށް ، ތަހުނިޔާއަކަށް ، މުރުތަޟާގެ މައްޗަށް އިތުބާރެއް ނުކުރެވެއެވެ. އެއީ ، ތަހުނިޔާގެ ހިތުގައި މުރުތަޟާގެ މައްޗަށް އުފެދިގައިވާ ލޯބީގެ ސަބަބުން އުފެދޭ ޝައްކުތަކެއްކަމަށް ވެދާނެއެވެ. އަދި ، މުރުތަޟާއާއި ތަހުނިޔާއާ ދެމެދުގައި ، އެފަދަ ޝައްކެއް އުފެދިގެން ދިއުމަކީ ، ނޫރު ބޭނުންވާގޮތް ކަމަށް ވާތީ ، އެކަން އެގޮތަށް ހިނގަނީކަމަށްވެސް ވެދާނެއެވެ.

ތަހުނިޔާ އެހީކުރާފަދަ އެއްވެސް ކަމެއް ، މުރުތަޟާއާއި ނޫރުލްޢައިނުއާ ދެމެދުގައި ނެތްކަމަށް މުރުތަޟާ ބުންޏެވެ. އަދި ، މަންމަގޮސް ، ތަހުނިޔާގެ މައިންބަފައިންނާ ވާހަކަ ދައްކައިގެން ، ތަހުނިޔާ އެގެޔަށް ގެނެސްދިނުމަށް މުރުތަޟާ އެދުނެވެ. އެހިސާބުން ކަންކަން ގޮއްސައި އެއޮތީ އަތްނުފޯރާ ހިސާބަށްކަމުގައި ޙަފުޞާ ބުންޏެވެ. ތަހުނިޔާގެ މައިންބަފައިން އެތިބީ ، ތަހުނިޔާގެ ޙައްޤުގައި ކޮންމެފަދަކަމެއްވެސް ކުރަން ތައްޔާރަށެވެ. ޙަފުޞާއަށް އިތުބާރުކޮށްފައި ، ތަހުނިޔާ އަލުން އެގެޔަށް ފޮނުވައިފިނަމަ ، އެމީހުން ޙަފުޞާއަށްކުރާ އިތުބާރަށް ވާނީ ކިހިނެއްތޯ ޙަފުޞާ ސުއާލު ކުރިއެވެ.

ޙަފުޞާ އެބުނި ވާހަކައެއް މުރުތަޟާއަކަށް ސާފެއް ނުވިއެވެ. ޙަފުޞާގެ ވާހަކަ ކުރިޔަށް ގެންދިޔައެވެ. ރިޒްޤު ދެއްވަނީ ﷲ އެވެ. އެކަމަކު ، އިންސާނާގެ ނަފްސުގައި ﷲ ތަޢާލާ ލައްވާފައިވާ ކަރާމާތާއި ، ޢިއްޒަތުއްނަފްސަށް ރައްކާތެރިވުމަކީ އިންސާނާގެ ވާޖިބެކެވެ. މުރުތަޟާއަށް މިވަގުތަށް އެންމެ މުހިންމީ ، ތަހުނިޔާ ބޭނުންވާގޮތެއް ހެދުންކަމުގައި މުރުތަޟާއަށް ވިސްނައިދިނުމަށް ޙަފުޞާ މަސައްކަތް ކުރިއެވެ. އަދި ، ނޫރުލްޢައިނުއާއި ، އޭނާގެ ނުފޫޒުން ލިބުނު ވަޒީފާ ދޫކޮށްލުމަށް މުރުތަޟާގެ ކިބައިން ޙަފުޞާ އެދުނެވެ. ޠާހިރާވެސް ، މަންމަގެބަހަށް ތާއީދުކުރިއެވެ. ތަހުނިޔާއާއި އައިމަލްއަކީ ، އެމީހުންނަށް ﷲ ލެއްވި ރަޙުމަތެއްކަމުގައި ޠާހިރާ ބުންޏެވެ. އަދި އެހެން ހުރިހާކަމެއް ޤުރުބާންކޮށްފައިވެސް ، ތަހުނިޔާ އާއި އައިމަލްގެ ޙައްޤުގައި ކުރަންޖެހޭ ކޮންމެކަމެއް ކުރަން އެބަ ޖެހެއެވެ. ތަހުނިޔާގެ ހިތުގައި ޝައްކުތަކެއް އޮތްނަމަ ، އެ ޝައްކުތައް ނައްތައިލުމަކީ މުރުތަޟާގެ ކަމެކެވެ. އެކަންކުރަން މުރުތަޟާ ފަސްޖެހިގެންނުވާނެއެވެ. ޠާހިރާގެވެސް އެދުމަކީ ، މުރުތަޟާގެ ހިތުން ނޫރުލްޢައިނު ފުހެލާފައި ، ތަހުނިޔާއާއި އައިމަލް ، އަނބުރާ އެގެޔަށް ގެނައުމެވެ.

ނޫރުގެ ޢާއިލާ ، ރޭގަނޑުގެ ނާސްތާ ކުރަމުން ގެންދިޔައެވެ. ނޫރު އެގޭގައި ދުވަސްކޮޅަކު މަޑުކޮށްލުމަކީ ، އެންމެންގެވެސް އެދުމެކެވެ. ދުވަސްކޮޅަކަށް އޮފީހުން ޗުއްޓީއެއް ނަގައި އެމީހުންނާއެކީ ނޫރު ވަގުތުކޮޅެއް ހޭދަކުރުމަކީ ، އެންމެންވެސް ބޭނުންވާ ގޮތެވެ. އެހެނަސް ، އޮފީހުގެ މަސައްކަތަކީ ، ނޫރުއާ ނުލައި ފުރިހަމަކުރެވޭވަރަށްވުރެ ބުރަ ކަންތައްތަކެކެވެ. އަމީން އިޙްސާނަށް ނޫރުވެފައިވާ ވަޢުދާ އެއްގޮތަށް ، ކުންފުނީގެ އެއްވެސްކަމެއްގައި ގެއްލުމެއް ނުލިބޭނެގޮތަށް މަސައްކަތްތައް ރޭވުމަކީ ، ނޫރުގެ ޒިންމާއެކެވެ. އެހެންނަމަވެސް ، އެމީހުންގެ އެދުމާއެއްގޮތަށް ، ކުޑަދުވަސްކޮޅަކަށް ޗުއްޓީއެއް ނަގަން ނޫރު އެއްބަސްވިއެވެ. ކަންކަމުން ސަލާމަތްވުމަށް ދުވެދުވެ ، އޭނާވެސް އެހުންނަނީ ވަރުބަލިވެފައެވެ. އެކަމަކު ، މިއަދު އަދި އޮފީހަށްނުގޮސް އޭނާއަށް ގޭގައި ހުރެވޭކަށް ނެތެވެ.

ނޫރު އޮފީހަށް ވަތްގޮތަށް މުރުތަޟާއަށް ގޮވަމުން ، މުރުތަޟާގެ ކެބިންއަށް ވަތްއިރު ، މުރުތަޟާގެ ގޮޑީގައި އިށީނދެއިނީ އެހެން މީހެކެވެ. އެއީ ކާކުތޯއާއި އެއޮފީހުގައި އޭނާ އެކުރަނީ ކީއްތޯ ނޫރު ސުއާލު ކުރިއެވެ. ނޫރުއަށް ލިބުނު ޙައިރާންކަމުގައި ، އަނގަހުޅުވިފައި ހުށްޓެވެ. މުރުތަޟާގެ މަޤާމަށް އޭނާ ޢައްޔަންކުރީ ، ރަމްޝާކަމުގައި އެމީހަކު ބުންޏެވެ. ނޫރު މިސްރާބުޖެހީ ، އެޗް އާރގެ ޑިރެކްޓަރގެ ކެބިނަށެވެ. ނޫރުގެ ހުއްދަ ނެތި ، މުރުތަޟާ ވަޒީފާއިން ވަކިކޮށް އެހެންމީހަކު ، އެމަޤާމަށް ޢައްޔަންކުރީ ކީއްވެތޯ ، ނޫރު ސުއާލު ކުރިއެވެ. އެކަމުގައި އޭނާގެ ބާރެއްނެތްކަމަށާއި ، އެބަދަލު ގެނައީ ، ރަމްޝާގެ އަމުރަށް ކަމަށާއި ، އެކަންކުރުމަށް އަމީން އިޙްސާންގެ ހުއްދަ ރަމްޝާއަށް ދީފައިވާކަމަށް އޭނާ ބުންޏެވެ.

ކުންފުނީގެ އެންމެ އިސްމީހަކީ އޭނާކަމަށް ނޫރު ބުންޏެވެ. އެއޮފީހަށް ވަންނަ މެއްސަކީވެސް އޭނާގެ ހުއްދަ ލިބިގެންނޫނީ ނުވަދެވޭނެ އެއްޗެކެވެ. މުރުތަޟާއާއެކީ ކުރެވިފާ ވަޒީފާގެ އެއްބަސްވުމުގައި ، ދެއަހަރު ނުވަނިސް ، މުރުތަޟާ ވަކިނުކުރެވޭނެކަމަށް ލިޔެވިފައި އޮންނާނެކަމަށް ނޫރު ބުންޏެވެ. އަދި ، މުރުތަޟާއަށް އަލުން ވަޒީފާދީ ، މާދަމައިން ފެށިގެން ވަޒީފާއަށް ނުކުތުމަށް މުރުތަޟާއަށް އެންގުމަށް ، ނޫރު އަމުރު ކުރިއެވެ. އެއަށްފަހު ، ނޫރު ނިންމީ ރަމްޝާއާ ކުރިމަތިލާށެވެ. އެހުރިހާކަމެއް އެކުރީ ރަމްޝާއެވެ. އަމީން އިޙްސާން އެކަމަށް ހުއްދަދިންކަމެއް ނުވަތަ ނުދޭކަމެއް ބަލާކަށް ނޫރު ، ބޭނުމެއްނޫނެވެ. އަމީން އިޙްސާންގެ ހުއްދަ ލިބިގެންނޭ ކިޔައިގެންވެސް ، ރަމްޝާ އެފަދަ ކަމެއް ކޮށްފާނެއެވެ. ނޫރުލްޢައިނުއާއި އޭނާގެ ބައްޕަޔާ ދެމެދުގައި އޮތް ގުޅުމަށް ނުރަނގަޅު އަސަރެއްކުރާނެ ކޮންމެކަމެއްވެސް ރަމްޝާ ކޮށްފާނެއެވެ. ރަމްޝާ ކޮންމެފަދަ ކަމެއްކުރިޔަސް ، ބައްޕަ އެކަމާ އެހާބޮޑަށް އަޅައިނުލާނެކަން އޭނާއަށް އެނގެއެވެ. އެ ފުރުސަތުގެ ބޭނުންހިފައިގެން ، ރަމްޝާ އެގެންދަނީ ، ނޫރުއަށް ކުރެވެން އޮތް ކޮންމެ ޖެއްސުމެއް ކުރަމުންނެވެ.

ނޫރުއަށް ގެޔަށް ދެވުނުއިރު ، ރަމްޝާއުޅެނީ ޕާޓީ ބާއްވައިގެންނެވެ. ރައްޓެހިކުދިންތަކެއް ގެނެސް ، އަޑުގެ ނެތްތަނަށް ލަވަޖަހައި ، ނަށަމުން އަޑުގަދަކުރަމުން ގެންދެއެވެ.

" ރަމްޝާ ތިއުޅެނީ ކީކޭހިތައިގެން ހެއްޔެވެ ؟ " ރުޅިއައިސް ރަމްޝާއާ ދިމާއަށް ނޫރު ހަޅޭއްލަވައިގަތެވެ.

ރަމްޝާއަށް އެއީ މާބޮޑުކަމަކަށް ނުވިއެވެ. ޖަހަމުންދިޔަ މިޔުޒިކް ކަނޑައިލާފައި ، ތެދުވެގެން އައިސް ނޫރުގެ ކުރިމައްޗަށް ހުށްޓުނެވެ. ރަމްޝާހުރީ ނިކަން ކެރިގެންކަން އަންގައިލުމަށް ، ހިނިތުންވެލައިގެންނެވެ. ކުންފުނީގެ ކަންކަމުގެ ތެރެޔަށް ވަންނަން ރަމްޝާ ވިސްނީ ކޮން ގޮތަކުންތޯ ނޫރު ސުއާލު ކުރިއެވެ. އަދި ، އެކުންފުނީގެ އެމްޑީއަކީ އޭނާކަމުގައި ނޫރު ބުންޏެވެ. ނޫރުހުރީ ރަމްޝާއާ ދިމާއަށް ލޯއަޅައިގެންނެވެ. އެތަނުގައިތިބި ރަމްޝާގެ ރައްޓެހިންވެސް ، ހޫނުގަނޑު މާބޮޑުވާކަމަށް ފެނިގެން ، ގެއިން ނުކުމެގެން ދިޔައެވެ.

" އަހަރެންނަކީ ، ތިޔަބުނާ ކުންފުނީގެ ވެރިމީހާގެ ހުރި ހަމައެކަނި ދަރިފުޅެވެ. ހުރިހާ މުދަލެއް ވާރުތައިން ލިބެންހުރި ހަމައެކަނި މީހާއެވެ. ވާރުތަމުދަލުގެ ކަންކަން ދާގޮތް ނޫރުއަށް އެނގޭ ނޫންހެއްޔެވެ ؟ " ރަމްޝާ އައިސް ނޫރުއާ ގާތަށް ޖެހިލާފައި ބުންޏެވެ.

މުދާ ވާރުތަވާގޮތް ، ވަރަށް ރަނގަޅަށް އޭނާއަށް އެނގޭކަމުގައި ނޫރު ބުންޏެވެ. ވާރުތައިން ރަމްޝާއާ ހަމަޔަށްދާނީ ، ރަމްޝާގެ ބައްޕަގެ އެހެން ކުންފުނިތަކުގެ މުދަލެވެ. އެ ކުންފުނީގެ މުދަލެއް ނޫނެވެ. އެކުންފުންޏަކީ ، ނޫރުއާއި ރަމްޝާގެ ބައްޕަޔާ ދެމީހުން އެއްވަރަކަށް ޙިއްޞާވާ ކުންފުންޏެކެވެ.

" މި ކުންފުނި ހިންގުމުގައި އަހަރެން ރެޔާއިދުވާލު ދާއޮހޮރުވައި ، އެބަ މަސައްކަތް ކުރަމެވެ. އެހެންވީމާ ހަނދާން ކުރާށެވެ ! މި ކުންފުނީގެ އެއްވެސް ނިންމުމެއް އަހަރެންގެ އިޒުނަޔާނުލައި ނުނިންމޭނެއެވެ. " ނޫރު ބުންޏެވެ.

ރަމްޝާ ، ހެމުންހެމުން ، ބާރަށް އަތްޖަހަން ފެށްޓިއެވެ.

" ނޫރުލްޢައިނުއަށް ހީވަނީ ކީކޭކަމަށް ހެއްޔެވެ ؟ ނޫރުލްޢައިނު ، އަހަރެންނަށް އަމުރުކުރީމާ ، އަހަރެން އެ އަމުރަށް ކިޔަމަންވާނެކަމަށް ހީކުރަނީ ހެއްޔެވެ ؟ އެއީ ކުށް ހީއެކެވެ. ތިއުޅޭ ހުވަފެނީ ދުނިޔެއިން ބޭރަށް ނުކުންނާށެވެ ! މުރުތަޟާގެ ބަދަލުގައި މުރުތަޟާގެ މަޤާމަށް އަހަރެން އެހުރީ އެހެންމީހަކު ޢައްޔަން ކޮށްފައެވެ. އަހަރެންގެ އެނިންމުން ބަދަލުކުރުމަށް ހުވަފެނެއްގައިވެސް ނުވިސްނާށެވެ. ނޫރުލްޢައިނަކަށް އެކަމެއް ނުވާނެއެވެ. އެކަން އެގޮތަށް ކުރަން ހިތަށް އެރިނަމަވެސް ، އެ ކުންފުނިން ކީއްކުރަން ހެއްޔެވެ ؟ އަހަރެންގެ ބައްޕަގެ ދިރިއުޅުމުންވެސް ، ނޫރުލްޢައިނު ބޭރުކޮށް ނެރެލާނަމެވެ. " ރަމްޝާ ބުންޏެވެ.

ރަމްޝާއަށް ގޮވައިލުމަށްފަހު ، އަތަށް ބާރުލާފައި ރަމްޝާގެ މޫނުމަތީގައި ނޫރު ޖެހިއެވެ. އެވަގުތަކީ ، އަމީން އިޙްސާން އައިސް  ގެޔަށް ވަތް ވަގުތެވެ. ރަމްޝާގެ ކަންކަށިމަތީ ، ނޫރު އެވީއްލައިލި ބާރު އެތިފަހަރު ، އިޙްސާނަށް ފެނުނެވެ. އަދި އަޑުގެ ނެތްތަނަށް ނޫރުއޭ ބުނެ ހަޅޭއްލަވައިގަތެވެ. އިޙްސާންގެ ދެލޯހުރީ ބޮޑުވެފައެވެ. ރުޅިއައިސް ރަތްވެފައެވެ. ރަމްޝާ ، އޭނާގެ ބައްޕަޔަށް ގޮވައިލަމުން ، ރޮމުންރޮމުން ގޮސް ބައްޕަގެ ގައިގާ ބައްދައިގަތެވެ.

އެވަގުތަކީ ، އޭނާއަށް ބައްޕަގެ ބޭނުން އެންމެ މުހިންމުވި ވަގުތުކަމުގައި ރަމްޝާ ބުންޏެވެ. އޭނާގެ ކޮޅަށް ބައްޕަ ހުރީތީ ﷲ އަށް ޙަމްދުކުރަމުން ، އިޙްސާންގެ ގައިގާ ބައްދައިލަމުން ގެންދިޔައެވެ. އެކަން އިޙްސާނަށް އެނގޭކަމަށް ބުންޏެވެ. ރަމްޝާގެ އެންމެ ކޯލަކަށް ، ލަސްނުކޮށް ކަރާޗީއަށް އޭނާ އެއައީ އެހެންވެގެންކަމުގައި އިޙްސާން ބުންޏެވެ.

" ނޫރުއެވެ ! ރަމްޝާގެ މޫނުމަތީ ނޫރު  ޖެހީ ހެއްޔެވެ ؟  އަހަރެންގެ ހިތަށް ވަރަށް ތަދުވެއްޖެއެވެ. އަހަރެން ނޫރުއަށް ، މިހާރު އިތުބާރުކުރާނީ ކިހިނެއް ހެއްޔެވެ ؟ " އިޙްސާން ނޫރުއާ ދިމާއަށް ބުންޏެވެ.

އިތުބާރުގެ ވާހަކަ ، އިޙްސާންގެ ދުލުން ނުބުނާށޭބުނެ ، އިޙްސާނާ ދިމާއަށް ނޫރު އެނބުރުނެވެ. ގެއްލުނީ ، އިޙްސާނަށް ނޫރު ކުރި އިތުބާރެވެ. އިޙްސާނަކީ ، ކޮންކަހަލަމީހެއްކަން ދެނެގަތުމުގައި ނޫރުއަށް އޮޅުނީއެވެ. ޢިއްޒަތްތެރި ޤަދަރުވެރި އިންސާނެއްގެ އަބުރުވެރިކަމެއް އޮންނަންވާނެއެވެ. އަބުރު ގެއްލިއްޖެނަމަ ޤަދަރުވެރިކަމެއްވެސް އިތުބާރެއްވެސް ނުއޮންނާނެއެވެ. ނޫރުގެ ކިބައިން އިޙްސާން ބޭނުންވަނީ ކޮންކަމެއް ހެއްޔެވެ ؟ އިޙްސާންގެ އަނތްބެއްގެ ގޮތުން ، އެގޭގައި ނޫރުއަށް ލިބިގެންވަނީ ކޮން ޙައްޤުތަކެއް ހެއްޔެވެ ؟ އެގޭގައި ނޫރުއަށް އޮތީ ، މީހަކު ކުރާހާ ޝަކުވާއެއްގެ ޝިކާރަޔަކަށްވުން ނޫން އެހެން ކޮންކަމެއް ހެއްޔެވެ ؟

" ޝަކުވާގެ ވާހަކަ ނުދައްކާށެވެ ! ފައިންފެށިގެން ބޮލާހަމަޔަށް ނަޒަރު ހިންގައިލަ ބަލާށެވެ ! ނޫރުލްޢައިނުއޭ ކިޔާ އާދައިގެ ޢާންމު އަންހެނަކު ، މި އަމީން އިޙްސާންގެ ދިރިއުޅުމަށް އައިސް ، މިއަދާހަމަޔަށް ، ތި ޙާޞިލްކުރީ ކޮންކަންތައްތަކެއް ހެއްޔެވެ ؟ ވިސްނައިލަބަލާށެވެ ! އިޙްސާން ބުންޏެވެ.

ނޫރުލްޢައިނަކީ ، ޢާންމު އަންހެންކުއްޖެއްކަމަށް ވީނަމަ ، އަމީން އިޙްސާންގެ އަނތްބަކަށް ނުވާނެއެވެ. އަމީން އިޙްސާންގެ އަނތްބަކަށްވުމާއެކީ ، ނޫރުގެ ޤަދަރާއި ޢިއްޒަތް ވެއްޔާ މޮޑެވި ، ގެއްލިގެން ހިނގައްޖެއެވެ. ރޮވިފައިހުރެ ، ނޫރު އޭނާގެ އަމިއްލަ ނަފްސު ދިފާޢުކުރަމުން ގެންދިޔައެވެ. އެކަން ނޫރުއަށް ، މިއަދު ވަރަށް ރަނގަޅަށް އިޙްސާސް ކުރެވިއްޖެއެވެ.

ތަހުނިޔާގެ ހިތުގައި އުފެދިފައިވާ ހިތްދަތިކަމުގައި ބައިވެރިވުމަށް ، ސާޖިދާ މަސައްކަތްކުރަމުން ގެންދިޔައެވެ. ތަހުނިޔާގެ ބައްޕަ ތަހުނިޔާގެ ބަސް ޤަބޫލުކޮށް ، ގޭގައި ހުރުމަށް ހުއްދަދިނީ ، ސަބަބުތަކެއް އޮވެގެންކަން ، ސާޖިދާ އޭނާގެ ދަރިފުޅަށް ވިސްނައިދެމުން ގެންދިޔައެވެ. ތަހުނިޔާއަށް ދިމާވާ ކަންތައްތައް އަމިއްލަޔަށް ތަޙައްމަލުކޮށް ، ތަހުލީފުތައް ނުއުފުއްލައި މައިންބަފައިންނާ ޙިއްޞާކުރުމަކީ މުހިންމު ކަމެކެވެ. އެހެން ނޫންކަމަށްވަންޏާ މައިންބަފައިންގެ ހިތަށްވެސް ތަކުލީފުތައްލިބި ، ހިތާމަތައް އިތުރުވެގެންދާނެއެވެ. ހަނުހިމޭންކަންމަތީ ، މަންމަގެ ވާހަކަތައް އަޑުއަހަން ، ތަހުނިޔާ އިނެވެ. ( ނުނިމޭ )