ޗައިނާއިން ޖައްވުގައި މަސްދިރުވަނީ

ޗައިނާގެ އުތުރު ހުޅަނގުގައި ޤާއިމްކޮށްފައިވާ ، ރޮކެޓް އުދުއްސާ " ޖީކުއާން ސެޓެލައިޓް ސެންޓަރު " އިން ، ހަވަޔަށް ފޮނުވާ ރޮކެޓް މިއަދު އުދުއްސާލައިފިއެވެ. މި ރޮކެޓްގައި ، ޗައިނާގެ ތިން އެސްޓްރޮނޯޓަކު ހަވަޔަށް ދިޔައެވެ. މިއީ ، ހަވަޔަށް އިންސާނުން ގެންދިޔަ ތޭރަވަނަ ފަހަރެވެ. އެންމެ ފާހަގަ ކޮށްލެވޭ ކަމަކީ ، ކަނޑުގައި އުފެދޭ މަސްވެސް މި ރޮކެޓްގައި ހަވަޔަށް ދަތުރު ކުރުމެވެ. މިއީ ، ފުރަތަމަ ފަހަރަށް ، ޗައިނާގެ ރޮކެޓެއްގައި ދަތުރުކުރުމަށް ،  މަހަށް އެނަސީބު ލިބުނު ތާރީޚީ ދުވަހެވެ. މަސް ، އެންމެ ފުރަތަމަ ހަވަޔަށް ގެންދެވިފައިވަނީ 1973 ގައެވެ. އެއީ އެޓްލާންޓިކް ކަނޑުގައި ދިރިއުޅޭ " މަމިޗޮގް " އެވެ ކިޔުނު ކުޑަމަހެކެވެ. އެފަހަރުގެ މަޤްޞަދަކަށްވެފައި އޮތީ ، ތިންދިމާލަކަށް ބިމުގައި ދަތުރުކުރާ މަސް ، ބަރުދަނެއް ނެތް ހަވާގައި ދަތުރުކުރާ ގޮތް އުނގެނި ދަސްކުރުމެވެ. އެފަހަރު ، ހަވާގައި އެމަސް ވަނީ ވިއްސާފައެވެ. ވިހޭ ކުދިމަސްތަކާބެހޭ އިތުރު ތަހުލީލުތަކާއި ދިރާސާތައް އެފަހަރު ، ކުރިޔަށް ގެންދެވިފައި ވެއެވެ.

ކުދިމަހާ ބެހޭ ސައިންޓިފިކް ދިރާސާތަކެއް ، ޖައްވީ ތަހުލީލުތަކުގައި ކުރިންވެސް ބޭނުންކުރެވިފައި ވެއެވެ. ބައިނަލްއަޤްވާމީ ޖައްވީ އުޅަނދުގައި 2012 ވަނައަހަރު ، މިފަދަ މަރުކަޒެއް ޤާއިމްކުރެވުނެވެ. އެފަހަރުވެސް ބޭނުންކުރާގޮތަށް ހަމަޖައްސާފައި އޮތީ ، ޒިބްރާފިޝް އެވެ. އޭގެ އިތުރަށް މެޑަކާފިޝް ހިމަނާފައި ވެއެވެ. މެޑަކާފިޝް ބޮޑަށް އެނގިފައި އޮންނަނީ ޖަޕަނީސް ރައިސް ފިޝްގެ ނަމުގައެވެ. އެފަހަރުގެ ތަހުލީލުތައް އަމާޒުކޮށްފައި އޮތީ ، ކަށިނެތް މަސް ޖައްވުގައި އާލާކޮށް ދިރުވުމުގެ މައްޗަށެވެ. އެމަސައްކަތް އޮތީ ވަކިހިސާބަކަށްގޮސް ހުށްޓިފައެވެ.

ރަޝިއާއާއި ޖަޕާނުގެ ސައިންޓިސްޓުން ، 2016 ވަނައަހަރުވެސް ، ބައިނަލްއަޤްވާމީ ޖައްވީ ސްޓޭޝަނަށް މެޑަކާފިޝް  ގެންދިޔައެވެ. މަސް ގެންދިއުމާއެކު ، މަހުގެ ކަށިތައް ވިރެމުންދިޔަކަން އޮތީ ފާހަގަ ކުރެވިފައެވެ.

ޝެންޒޯ – 18 ގައި ، ހަވަޔަށް މަސްގެންގޮސް ، ހަވާގައި މަސް ދިރުވުމާބެހޭ ދިރާސާތަކެއް ، ޗައިނާއިން ކުރިޔަށް ގެންދާނެއެވެ. އެއީ ، ދިރުންހުރި އެހެނިހެން ތަކެތިވެސް ، ހަވާގައި ދިރުވައި އާލާކުރުމަށް ، ޗައިނާއިން އީޖާދުކުރާ ސައިންސްގެ ދިރާސާތަކަށް މަގުފަހިކުރުމަށް ކުރަމުންގެންދާ މަސައްކަތުގެ ފުރަތަމަ ފިޔަވައްސެވެ.

ޝެންޒޯ – 18 ރޮކެޓްގައި ދަތުރުކުރާ ތިން އެސްޓްރޮނޯޓުންގެ ތެރެއިން އިސްކޮށް ހުންނާނީ ކޮމާންޑަރ ޔީ ގުއަންފޫއެވެ. އަނެއް ދެ އެސްޓްރޮނޯޓުން ކަމުގައިވާ ، ލީ ކޮންގއާއި ލީ ގުއަންސޫ އަކީ ފުރަތަމަ ފަހަރަށް ހަވަޔަށް ދަތުރުކުރާ ދެ އެސްޓްރޮނޯޓުންނެވެ.

ޝެންޒޯ  - 18 ހަވަޔަށް ގޮސް ، ޝެންޒޯ – 17 އާ ބައްދަލުކޮށް ، މިމަހުގެ 30 ވަނަދުވަހު ، ޝެންޒޯ – 17 ބިމަށް ފޮނުވާނެއެވެ. ޝެންޒޯ 0 17 އަނބުރާ ބިމަށް އެ އަންނަނީ ހަމަސްދުވަހު ހަވާގައި އޮތުމަށްފަހުގައެވެ. ޗައިނާގެ ޓިއަންގޮން ޖައްވީ މަރުކަޒުގައި ، ޝެންޒޯ – 18 މަޑުކުރާނީ އޮކްޓޯބަރ މަހުގެ ފަހުކޮޅާ ހަމަޔަށެވެ. އެއިން ދަތުރުކުރާ ތިން އެސްޓްރޮނޯޓުންވެސްވެސް އޮކްޓޯބަރ މަހާ ހަމަޔަށް ، ހަމަސް ވަންދެން ، ޓިއަންގޮން ޖައްވީ މަރުކަޒުގައި މަޑުކުރާނެއެވެ.

ޝެންޒޯ – 18 ގެ ތިންފަޅުވެރިން ޓިއަންގޮން ޖައްވީ މަރުކަޒުގައި ތިބޭއިރު ، ޓިއަންގޯ – 8 އެތަނަށް ދަތުރުކޮށް އެމީހުންނަށް ކާބޯތަކެއްޗާއި ، ޟަރޫރީ އެހެނިހެންތަކެތި ގެންގޮސް ދޭނެއެވެ. ޓިއަންގޯ – 8 އެއީ މުދާ އުފުލާ ރޮކެޓެކެވެ. ޝެންޒޯ – 18 އެނބުރި ބިމަށް އަންނާނީ ، ހަމަސްވާއިރަށް ، ޝެންޒޯ – 19 ޓިއަންގޮން ޖައްވީ މަރުކަޒަށް ދިއުމުންނެވެ.

ހަވަޔަށް މަސް ގެންގޮސް އާލާކުރުމުގެ ދިރާސާތައް ކުރުމަށް ، ޗައިނާއިން އިސްނެގުމަކީ ،   ޓެކްނޮލޮޖީގެ ދާއިރާގައި ޗައިނާގެ ކުރިއެރުން ، ދުނިޔެއަށް ސާބިތުވެގެންދިޔަ ތާރީޚީ މަޝްރޫޢެކެވެ. މި މަޝްރޫޢުގެ ދަށުން ، ޗައިނާއިން ކުރާނެ އެއްކަމަކީ ، ޖައްވުގައި މަސް ދިރުވައި އާލާކުރުމުގެ ފުރުސަތު އޮތްމިންވަރެއް ބެލުމަށް ދިރާސާ ކުރުމެވެ. މި ދިރާސާތަކުގައި ޗައިނާއިން ބޭނުންކުރަނީ ، ޒިބްރާފިޝް އަދި ހޯރންވޯރޓް އެވެ ކިޔޭ ދެބާވަތެއްގެ މަހެވެ. މި ޕްރޮޖެކްޓް ކާމިޔާބު ވެއްޖެނަމަ ، ފުރަތަމަ ފަހަރަށް ، ހަވާގައި މަސް ދިރުވައި އާލާކުރުމުގެ ތާރީޚީ ރިކޯޑް ޗައިނާއިން ޤާއިމް ކުރާނެއެވެ.

ޗައިނާގެ ސައިންޓިސްޓުންގެ މި ތާރީޚީ ދިރާސާގައި ، ޒިބްރާފިޝް ބޭނުންކުރަނީ ، އެމަސް ސައިޒުން ކުޑަވުމާއި ، އެމަހަށް  އާދައިގެ ސިކުނޑިއެއް ލިބިފައި އޮތުމުގެ ސަބަބުންނެވެ. ސާފު ފެނުގައި ޒިބްރާފިޝް ދިރިއުޅެމުންގެންދާ ގޮތުގެ ދިރާސާއެއް ، ޗައިނާގެ ސައިންޓިސްޓުން ކުރިން އޮތީ ކޮށްފައެވެ. ޗައިނާގެ ސައިންޓިސްޓުންނަށް ބޭނުން ހިފިދާނެފަދަ ކަންތައްތަކެއް ، ޒިބްރާފިޝްގެ ދިރިއުޅުމުންވަނީ ފާހަގަ ކުރެވިފައެވެ. ސިކުނޑި ކޮންޓްރޯލްކުރާ ކޮމްޕިއުޓަރުގެ ނިޒާމަކުން އެއްހާސް ޒިބްރާފިޝްގެ ފޮރުވިފައިވާ ސިއްރުތަކެއް ، ޗައިނާގެ ސައިންޓިސްޓުން ، މިދިޔަ މާރޗްމަހުގެ ތެރޭގައިވަނީ ހޯދާ ތަޖުރިބާ ކޮށްފައެވެ.

ޗައިނާގެ ޖައްވީ މަރުކަޒު ޓިއަންގޮން ގެ ދިރާސާކުރި ޗައިނާއާއި ބައިނަލްއަޤްވާމީ  500 މަރުކަޒަކުން މިހާރުވަނީ ، 130 ޕްރޮޖެކްޓެއް ހިންގާފައެވެ.  މި ޕްރޮޖެކްޓްތަކުގެ ތަހުލީލުތަކަކީ ، ބިމުގައި ދިރުންހުރި ތަކެތި ޖައްވަށް ގެންގޮސް ޖައްވުގައި ދިރުވައި އާލާކުރުމާ ގުޅުންހުރި ، ސައިންސްގެ ތަހުލީލުތަކެވެ. އެއީ ، އާ ހޯދުންތަކާއި އުފެއްދުންތާކާ އަދި އިޤްތިޞާދީ ފައިދާތަކަށް އަމާޒު ކުރެވިފައިވާ ތަހުލީލު ތަކެކެވެ. އެހުރިހާ ތަހުލީލުތަކާއި ހޯދުންތަކަކީ ، ބިމުގައި ދިރިއުޅޭ އިންސާނާގެ ހަށިގަނޑާ އަދި އިންސާނާގެ ދިރިއުޅުމާ ގުޅުންހުރި ، އަދި އެކަންކަމަށް ލާބައާއި މަންފާ ލިބިގެންދާނެ ހޯދުން ތަކެކެވެ.

އިންސާނާ ފިޔަވައި ދިރުންހުރި ޖަނަވާރެއް ، އެންމެފުރަތަމަ ޖައްވަށް ގެންދިޔައީ ރޫސީވިލާތުން ، 1947 ގައެވެ. މަސްވެސް އެންމެ ފުރަތަމަ ޖައްވަށް ގެންދިޔައީ ، 1976 ގައި ރޫސީވިލާތުންނެވެ.

ޗައިނާގެ އުތުރު ހުޅަނގުގައި ޤާއިމްކޮށްފައިވާ ، ރޮކެޓް އުދުއްސާ " ޖީކުއާން ސެޓެލައިޓް ސެންޓަރު " އިން ، ހަވަޔަށް ފޮނުވާ ރޮކެޓް ، ޝެންޒޯ  - 18 މިއަދު އުދުއްސާލީ ޗައިނާގަޑިން ރޭގަނޑު 9 ޖެހިއިރުއެވެ. މީގެ ބައިގަޑިއިރެއްހާ އިރު ކުރިންނެވެ. އެއީ މާލޭގަޑިން ހަވީރު 6 ޖެހިއިރުއެވެ. ހުރިހާކަމެއްވެސް ރަނގަޅުކަމަށް ، ރަސްމީ އިދާރާތަކުން މަޢުލޫމާތު ދެއެވެ.