ރައްޔިތުންގެ މަޖިލީހުގެ ރައީސް އިސްތިއުފާ ދެއްވައިފިކަމަށް ދެކެވޭ ވާހަކަ އެމަނިކުފާނު ވިދާޅުވެއްޖެއެވެ.
ޕީޕީއެމްއިން މިހާރު ކުރިއަށް ގެންދާ ޕްރެސް ޗެއާކުރައްވަމުން ގެންދަވާ އެޕާޓީގެ ނާއިބު ރައީސް އަބްދުރަހީމް އަބްދުﷲ އަށް ފޯނުން ގުޅުއްވައި މަސީހު ވިދާޅުވީ މިހާރުވެސް އެމަނިކުފާނު ހުންނެވީ ގައުމީ މަސައްކަތުގައި ކަމަށެވެ. އެމަނިކުފާނު އިސްތިއުފާ ދެއްވި ކަމަށް ފަތުރަމުންދަނީ ކަނޑައެޅިގެން ދޮގު ޚަބަރެއް ކަމަށާއި އެފަދަ ޚަބަރުތައް ނުފެތުރުމަށް އެމަނިކުފާނު އެދިވަޑައިގެންނެވިއެވެ.
"އަޅުގަނޑު މިހާރުވެސް މިހުރީ ދިވެހި ޖުމްހޫރިއްޔާގެ ރައްޔިތުންގެ މަޖިލީހުގެ ރައީސް ކަމުގެ މަގާމުގައި. އަދި އަޅުގަނޑު ދެމިހުންނާނަން އެގޮތުގައި. މިހާރުވެސް މަސައްކަތް ކުރަމުން މިގެންދަނީ މާދަމާ ދައުރުން ބޭރުގައި އިތުރު ޖަލްސާއެއް ބޭއްވުމަށް،" މަސީހު ވިދާޅުވިއެވެ.
އެމަނިކުފާނު ސާބިތުވެ ހުންނެވީ ދިވެހި ރައްޔިތުންނާ އެކުގައި ކަމަށާއި، ގައުމަށް މިހާރު ދިމާވެފައިވާ ކަންތައްތަކުން އަރައިގަތުމަށްޓަކައި ކުރަންޖެހޭ އެންމެހާ މަސައްކަތް ކުރުމުގައި ދެމިހުންނަވާނެ ކަމަށް އެމަނިކުފާނު ވިދާޅުވިއެވެ.
"ދިވެހިރާއްޖޭގޭ ރައްޔިތުންގެ މަޖިލިސް ވެސް މަސައްކަތް ކުރަމުން ގެންދާނީވެސް އެގޮތުގެ މަތީން. އެހެންވީމާ އެވާހަކަ އަޅުގަނޑު ދަންނަވާލަން ބޭނުންވޭ ވަރަށް ބޮޑަށް،" މަސީހު ވިދާޅުވިއެވެ.
