ފަލްސަފާ (73)

( 23 މާރިޗު 2024 ގައި ޝާއިޢުކުރި ބަޔާ ގުޅޭ )

ހެނދުނު ހޭލައިގެން ތެދުވެ ، ކުޑަދޮރުތަކުގެ ފޮތިތައް ، މުރުތަޟާ ކަހައިއަޑަށް އަދި މޫނަށް އަލިއެޅުމުން ، ތަހުނިޔާއަށް ހޭލެވުނެވެ. މުރުތަޟާއަށް ގޮވައިލުމަށްފަހު ، މިއަދަކީ އާދީއްތަދުވަސް ނޫންތޯ ތަހުނިޔާ ސުއާލު ކުރިއެވެ. އެއީ އާދީއްތަ ދުވަހެވެ. އެކަމަކު ، އެކަމާ ތަހުނިޔާ ކަންބޮޑުވާނެ ކަމެއްނެތެވެ. އެދުވަހުގެ ހެނދުނުގެ ނާސްތާ ތައްޔާރުކުރާނީ މުރުތަޟާކަމުގައި އޭނާ ބުންޏެވެ.

އެއީ ތަހުނިޔާ އެދޭގޮތެއްނޫނެވެ. މުރުތަޟާ ތެދުވަން ބޭނުމިއްޔާ ތެދުވާންވީއެވެ. އޭނާ ، ނާސްތާ ހަދައިދޭނެކަމަށް ތަހުނިޔާ ބުންޏެވެ. އެހެންނަމަވެސް ، މުރުތަޟާ ބޭނުންވީ ތަހުނިޔާ އަރާމު ކުރުމަށެވެ. އެއްވެސް ކަމެއް ކުރާނެކަމެއް ނެތެވެ. ތަހުނިޔާއަށް އެންމެ ބޮޑަށް މިހާރު ބޭނުންވާނީ އަރާމު ކުރުމެވެ. ތަހުނިޔާގެ މޫނުމައްޗަށް އުފާވެރިކަން ގެނެސްދިނުމަށްޓަކައި ، ރީތި މަލެއް މުރުތަޟާ ދިއްކޮށްލިއެވެ. މުރުތަޟާ ދައްކަންވެފައި ވަރަށްގިނަ ވާހަކަ އެބަހުރިކަމަށާއި ، ތައްޔާރުވެލައިގެން އިރުކޮޅަކުން ، ސައިބޯން އައުމަށްބުނެ ، މުރުތަޟާ ބަދިގެފަރާތަށް ދިޔައެވެ. ކޮޓަރިން ނުކުތުމުގެ ކުރިން މުރުތަޟާ ތަހުނިޔާއާ ދިމާލަށް ބަލައިލިއެވެ. ތަހުނިޔާގެ މޫނުމަތިން ފާޅުވާންހުރި އުފާވެރިކަން ދެކެލުމަށްޓަކައެވެ. އަސްލުވެސް ، ތަހުނިޔާ އިނީ ހިނިތުންވެލައިގެން ، ވަރަށް އުފާވެރި ގޮތަކަށެވެ. މުރުތަޟާ ދިއުމާއެކު ، އެމަލުން ދުވާ މީރުވަސް ބަލައިލުމަށްފަހު ، ތަހުނިޔާ ހަމަޖެހުމުގެ ނޭވާއެއްލިއެވެ. ކުރީރޭ ، އެދިމާވިކަންކަން އޭނާގެ ހިތުގައި އެއްވެސް ވަރަކަށް މިހާރަކު ނެތެވެ. އުފަލެއް ލިބެން އޮތިއްޔާ އޭގެބޭނުން އެންމެ ފުރިހަމަގޮތުގައި ހިފާނީއެވެ. އަދި ހިތާމައާއި ކެކުޅުން ލިބޭވަގުތު އެކަމަށް ޝުކުރުކޮށް ކެތްކޮށްލާނީއެވެ. އެއީ އޭނާގެ ދުނިޔެކަން ތަހުނިޔާ ދެނެގަތެވެ.

ފާޚާނާއަށްވަދެ ތައްޔާރުވެލައިގެން ، ތަހުނިޔާއަށް ބޭރަށް ނުކުމެވުނުއިރު ، މުރުތަޟާހުރީ ސައިތައްޔާރު ކޮށްފައެވެ. ސައިތައްޔާރުކޮށްފައިހުރީ ، ގޯތިތެރޭގައި މޭޒެއްބަހައްޓައި ވަރަށް އުފާވެރި މާޙައުލެއް އުފައްދާފައެވެ. ތަހުނިޔާ ފެނުމާއެކު ، މުރުތަޟާއައިސް ތަހުނިޔާޣެ އަތުގައި ނިކަންލޯބިން ހިފާލައިގެން ގެންގޮސް މަޑުމަޑުން ، ގޮނޑީގައި ބޭންދިއެވެ. ތަހުނިޔާ އިނީ ހެވިދިލިފައެވެ.

" މިފަދަ އުފާވެރި ހިތްގައިމު ވަގުތުތަކަށް ފުރުސަތުދޭންލިބުނު ، އަގުހުރި ދުވަސްތައް ، އެއްވެސް ވިސްނުމެއްނެތި އަހަރެމެންނަށް މިވަނީ ބޭކާރު ކުރެވިފައެވެ. އަހަރެންނަށް އެކަން އެބަ ، މިހާރު އިޙްސާސް ކުރެވެއެވެ. އެކަމަށްޓަކައި ، ތަހުނިޔާ އަހަރެންނަށް މަޢާފު ކުރާށެވެ. ދެން ، އެހެންނެއް ނުވާނެއެވެ. އަހަރެމެން ދިރިއުޅޭނީ އެކަކު އަނެކަކަށްޓަކައެވެ. " މުރުތަޟާ ބުންޏެވެ.

ތަހުނިޔާއަށް ހީވީ ހުވަފެނެއްގައި އުޅެވޭހެންނެވެ. މުރުތަޟާއަށް ގޮވައިލުމަށްފަހު ، އެއީ އަނެއްކާ ހުވަފެނެއް ނޫންތޯ މުރުތަޟާއާ ސުއާލު ކޮށްލިއެވެ. އެއީ ފަހަރެއްގައި ހުވަފެނަކަށްވެސް ވެދާނެކަމަށް މުރުތަޟާ ބުންޏެވެ. އެކަމަކު ، އަހަރެމެން ދެމީހުން ގުޅިގެން ، އެކަން ޙަޤީޤަތަކަށް ހަދާނީއެވެ. " މުރުތަޟާ ބުންޏެވެ.

ތަހުނިޔާގެ މޫނުމަތިން އުފާވެރިކަމުގެ އިޙްސާސްތައް ފާޅުވިއެވެ. ހިނިތުންވެލުމުން ، ހިތުގެ ހުރިހާ އުދާހެއް ބޭރުކޮށްލެވުނެވެ. ސައިބޮއެނިމިގެން ތަހުނިޔާއާއި މުރުތަޟާދިޔައީ ، ބާޒާރުކޮށްލާށެވެ. ދެމަފިރިން އެކުގައި ވަގުތުކޮޅެއް ހޭދަކޮށްލައި ، ހިތަށް ހަމަޖެހުން ގެނެސްދިނުމަށެވެ.

އަނެއްކޮޅުން ، އެމެރިކާއަށް ފުރުމަށްޓަކައި ނޫރު ގެއިން ނުކުތެވެ. އޭނާ އެއަރޕޯޓަށް ގެންގޮސްދިނުމަށްޓަކައި އެކުގައި ކާރުގައި ދިޔައީ ހާރިސް އެވެ. އެންމެންނާ ސަލާންގަލާންކުރަމުން ދަނިކޮށް ، މުރުތަޟާއާއި ތަހުނިޔާ ގެޔަށް އައި މަގުމަތީ އެހިސާބަށް އާދެވުމާއެކު ، މުރުތަޟާ ކާރުހުށްޓައިލިއެވެ. މުރުތަޟާއާއި ތަހުނިޔާ ، ކާރުންފައިބައިގެން އައިސް ހާރިސް އާއި ވަޞީމާ ސަލާމް ކޮށްލިއެވެ. ތަހުނިޔާވެސް ނޫރުއަށް ގޮވާލައި ހިތްހެޔޮ ކުރުމަށް އެދުނެވެ. އަދި ކޮންމެ ތާކު ހުރިނަމަވެސް އުފަލުގައި ހުރުމަށް އެދުނެވެ.

އެނގިގެންނާއި ނޭނގިނަމަވެސް ، އެމީހުންގެ ހިތަށް އުނދަގޫވާފަދަ ކަމެއް ކުރެވިފައި އޮތިއްޔާ އެކަމަށް ، ނޫރު މަޢާފަށް އެދުނެވެ. އަދި ، ޝަކުވާގެ ހުރިހާ ޞަފުޙާތަކެއް ވީދާލާފައި ފުރައިގެންދާން ބޭނުންވާކަމަށް ނޫރު ބުންޏެވެ. މުރުތަޟާހުރީ ، އަނގައިންވެސް ނުބުނެ ، ދުރުބަލަހައްޓައިގެންނެވެ. މުރުތަޟާ އެއްޗެކޭ ބުނޭތޯ ، ކާރަށް އަރަމުން އަދި އެއްފަހަރު މުރުތަޟާއާދިމާއަށް ނޫރު ބަލައިލިއެވެ. އެހެންނަމަވެސް މުރުތަޟާ ، ނޫރުއާ ދިމާއަށް ބަލައިވެސް ނުލައެވެ.

ނޫރުމެންގެ ކާރުގޮސް އޮބާލަންދެން އެންމެން ބަލަހައްޓައިގެން ތިއްބެވެ. އެއަށްފަހު ، މުރުތަޟާއާއި ތަހުނިޔާވެސް އެމީހުންގެ ގެޔަށް ވަނެވެ. މުރުތަޟާގޮސް ، ގޮނޑީގައި އަތްވިއްދާލައިގެން ހުރިތަން ތަހުނިޔާއަށް ފެނުނެވެ. އެކަމާ ތަހުނިޔާވެސް ހުރީ އުނދަގޫ ވެފައެވެ. އަދި މުރުތަޟާއަށް އުނދަގޫވެފައިހުރިކަން ، ތަހުނިޔާއަށްވެސް އިޙްސާސްކުރެވުނެވެ. މުރުތަޟާ ހިންދެމިލާފައި އައިސް ތަހުނިޔާ ގާތުގައި ހުއްޓިލިއެވެ. އަދި މުރުތަޟާ އެހުރީ އުނދަގޫވެފައި ނޫންކަމަށާއި އެކަމާ ތަހުނިޔާ ކަންބޮޑުނުވުމަށް އެދުނެވެ. މުރުތަޟާ އައިސް ތަހުނިޔާގެ އަތުގައި ހިފައިލުމަށްފަހު ، ޝުކުރު އަދާކުރިއެވެ. މުރުތަޟާ އެބުނީ ކީކޭކަން ތަހުނިޔާ ދެނެގަތެވެ.

އެއާޕޯޓަށް ދިއުމަށްޓަކައި ގެއިން ނުކުމެގެން ދަތުރުކުރަން ޖެހެނީ ދިގު މަގަކުންނެވެ. މުޅި އެ ދަތުރުގައި ، ނޫރުއިނީ ހިތްދަތިކަމުން ހާސްވެފައެވެ. ރަށުން ފުރައިގެން ދާންޖެހުމާއެކު ، އެރަށުގައި އޭނާއާއި މުރުތަޟާ ހޭދަކޮށްފައިވާ އުފާވެރި ވަގުތުތަކުގެ މަންޒަރުތައް ނޫރުގެ ކުރިމައްޗަށް ނިއުޅެމުން ދިޔައެވެ. ނޫރުއަށް ވަމުންދާގޮތް ، ކާރުދުއްވަމުންދިޔައިރު ، ހާރިސްއަށްވެސް އިޙްސާސް ކުރެވުނެވެ. އަދި ، އޭނާގެ ލޮލުންވެސް ހުރީ ކަރުނަ ފާއްދާލާފައެވެ. ނޫރުގެ ލޮލުން ފައިބަމުންދިޔަ ކަރުނަތައް ބޭބެއަށް ނުދެއްކުމަށްޓަކައި އަނެއްފަރާތަށް އެނބުރިއިނދެ ، ފުހެމުން ގެންދިޔައެވެ.

މުރުތަޟާހުރީ ، ގޭގެ ބެލްކަނީއަށް ނުކުމެ އެކަންޏެވެ. އޭނާގެ ކުރިމަތިން އެފެންނަނީ ނޫރުމެންގޭގެ ބެލްކަންޏެވެ. އެއީ ނޫރުއާއި އޭނާ ، ސިއްރުން ވާހަކަދައްކަމުން ގެންދިޔަ ދެ ބެލްކަންޏެވެ. މުރުތަޟާ އެތާ ހުއްޓައި ، ތަހުނިޔާވެސް އައިސް ދުރުގައި މަޑުކޮށްލިއެވެ. މުރުތަޟާ އެ އިޙްސާސްކުރަމުންދާ މަންޒަރުތައް ތަހުނިޔާއަށްވެސް ފެންނަ ކަހަލައެވެ. އެދެމީހުން ބެލްކަންޏަށް ނުކުމެ ތިއްބާ ، ނޫރު ދަތުރުކުރާ މަތިންދާބޯޓު ، އެގޭމަތިން އުދުހިފައި ދިޔަތަން ބަލަހައްޓައިގެން ދެމީހުންވެސް ތިއްބެވެ. މުރުތަޟާއަށް ހުސް ވަގުތުކޮޅެއް ދިނުމަށްޓަކައި ، އޭނާއަށް އުނދަގޫނުކޮށް ، ތަހުނިޔާ މަޑުމަޑުން ހިނގައިގޮސް ގޭތެރެޔަށް ވަނެވެ. ތަހުނިޔާ އެތަނަށް އައިކަމެއް މުރުތަޟާއަކަށް ނޭނގޭނެއެވެ. ކުޑައިރުކޮޅެއް މުރުތަޟާއަށް ދިނުމަށްފަހު ، ތަހުނިޔާ އައިސް މުރުތަޟާއަށް ގޮވައިލިއެވެ. ތަހުނިޔާ އައީ ފޮޓޯ އަލްބަމެއް ހިފައިގެންނެވެ. އެއީ އެމީހުންގެ ކައިވެނީގެ ފޮޓޯތައް ހުރި އަލްބަމެވެ. ދެމީހުން އެކީގައިތިބެ ، އެއަލްބަމް އަދި ބަލައިލެވިފައެއް ނުވެއެވެ. އެހެންކަމުން ، އެކުގައި އިށީނދެތިބެ ، އަލްބަމް ބަލައިލުމަށް އައުމަށް މުރުތަޟާގާތު ، ތަހުނިޔާ އެދުނެވެ. މުރުތަޟާ އައިސް ތަހުނިޔާގާތު ޖައްސާލައި ، ފޮޓޯތައް ބަލަމުން ، އެކަކު އަނެކަކަށް ސަމާސާ ކުރަމުން ގެންދިޔައެވެ.

މެންދުރު ބޭރަށްގޮސް އުޅެފައި މުރުތަޟާ ގެޔަށް އައިމަގުމަތީ ، ތަހުނިޔާއަށް މާބޮނޑިއެއް ގެނެސްދިނެވެ. އެދެމީހުން ރާވާފައި އޮތީ މެންދުރު ކެއުމަށް ބޭރަށް ގޮސްލުމަށެވެ. ތަހުނިޔާވެސް ، މުރުތަޟާ ގެޔަށް އައިސް ބޭރުގައި މަޑުކޮށްލިތަނުން ، ތައްޔާރުވެލައިގެން އަތުވެއްޖެއެވެ. ގޭގައި މިވަގުތު ތިބީ އެދެމީހުން އެކަންޏެވެ. މަންމަމެން އައިމަ އެމީހުން އެކުގައި ބޭރަށްގޮސްލާކަށް ވަގުތެއް ނުވާނެއެވެ. އެހެންކަމުން ، މެންދުރުގެ ކެއުން ބޭރުން ނިންމައިލުމަށް ރޭވީ މުރުތަޟާއެވެ.

" ދެމީހަކު ކައިވެންޏެއްގެ ގުޅުމުން އެކުގައި އުޅެންޖެހިއްޖެނަމަ ، ކޮންމެވެސް ވަރަކަށް ކުނިޖެހޭނެއެވެ. އެއީ ކަމެއްނޫނެވެ. އެކަކު އަނެކަކަށް އަޅާލައި އެހީތެރިވުމުން އެކަހަލަ ކުދިކުދި ކުނިޖެހުން ކަމަކަށްނުވެ ނިމިދާނެއެވެ. އެންމެ އުފާވެރި ވަގުތަކަށްވާނީ ، އެމީހަކު ލޯބިވާމީހަކާ އެކީގައި ވަގުތު ހޭދަކުރެވުމެވެ. " މުރުތަޟާ ބުންޏެވެ.

ވިސްނައި ނުލާ ، މުރުތަޟާ އެންމެފަހުން އެބުނި ޖުމްލައިން ތަހުނިޔާގެ މޫނުމަތީގެ ކުލަ ބަދަލުވެގެން ދިޔައެވެ. މުރުތަޟާ އެހެން އެބުނީ ކޮންމެ މާނައެއްގައިކަމަށްވިޔަސް ، އެއީ ތަހުނިޔާގެ ހިތަށް އުނދަގޫވި ޖުމްލައެކެވެ. ތަހުނިޔާދެކެ ލޯބިވާވާހަކަ ، މުރުތަޟާގެ ދުލުން އަދި މިހާތަނަށް ބޭރުވެފައެއް ނެތެވެ. އެހެންނަމަވެސް ، ނޫރުދެކެ މުރުތަޟާ ލޯބިވާކަން ، ތަހުނިޔާގެ ހިތުން ފިލައިގެންނެއް ނުދެއެވެ.

ކާރުގައި ޖައްސައިލިތަނުން ، ތަހުނިޔާގެ ލޮލަށް ސިފަވެގެން އެދިޔައީ ، ދެލޯބިވެރިޔަކު ސަމާސާކުރަމުން ގޮނޑުދޮށުގައި ދުވަމުންގެންދާ މަންޒަރެވެ. އެވަގުތު އަންހެންކުއްޖާ ހުށްޓިލައި ، ތަހުނިޔާއާ ދިމާއަށް ބަލައިލިއެވެ. އެއީ ނޫރުއެވެ. އޭނާގެ ޢިޝާރާތުން ބުނަމުން އެގެންދިޔައީ މުރުތަޟާ އަދިވެސް ހުރީ ނޫރުއާއެކީގައި ކަމުގައެވެ. އޭރު ، އަންހެންކުއްޖާގެ ފައިކުރި އޮޅާލަދެމުން ގެންދިޔަ ފިރިހެނަކީ މުރުތަޟާކަމަށް ތަހުނިޔާގެ ލޮލަށް ސިފަވެގެން ދިޔައެވެ. މުރުތަޟާ އައިސް ކާރަށް އެރިއިރު ، ތަހުނިޔާ އިނީ ޚިޔާލީ ދުނިޔެއަކަށް ގެއްލިފައެވެ. ކިހިނެއްވީތޯ އަހައި މުރުތަޟާ ކުރި ސުއާލަށް ތަހުނިޔާ ސިއްސައިގެން ދިޔައެވެ. އަދި އެއްވެސްކަމެއް ނުވާކަމަށް ތަހުނިޔާ ބުންޏެވެ. ލޯމަރައިލާފައި އަލުން ބަލައިލިއިރު ، ތަހުނިޔާގެ ކުރިމަތިން އެފެނުނީ ނޫރުއެއް ނޫނެވެ. މުރުތަޟާއެއްވެސް އެތާކު ނެތެވެ. އެއީ އެހެން ދެމީހެކެވެ. މުރުތަޟާ އެންމެފަހުން އެބުނި ޖުމްލައާ ، ތަހުނިޔާއަށް އެ ޙާދިސާ ގުޅުވައި ލެވުނެވެ. ދާންވީ ކޮންތާކަށްތޯ މުރުތަޟާ ސުއާޅު ކުރިއެވެ. ތަހުނިޔާ ބޭނުންވީ ، އަތިރިމައްޗަށް ޖައްސައި ލުމަށެވެ. އެކަމާ މުރުތަޟާއަށް ލިބުނީ ޙައިރާން ކަމެކެވެ. އެއީ ، ދުވަހަކުވެސް ތަހުނިޔާ ދިޔަތަނެއްނޫނެވެ. އެހެންކަމުން ، އަތިރިމައްޗަށްގޮސް ކުރާނެ މާބޮޑުކަމެއް ނޯންނާނެ ވާހަކަ ބުނެ ، ރެސްޓޯރެންޓަކަށް ގޮސް ކައިލިއްޔާ މާ ރަނގަޅުވާނެކަމަށް މުރުތަޟާ ބުންޏެވެ.

ތަހުނިޔާ ބޭނުންވީ ، އަތިރިމައްޗަށްގޮސް ، ރާޅުއަރާފަށުގައި ހުސްފަޔާ ހިނގައިލުމަށެވެ. މުރުތަޟާއާ އެކީގައެވެ. ތަހުނިޔާ އެބުނި ވާހަކަޔަކުން މުރުތަޟާގެ ހިތަށް ކޮންމެވެސް ވަރެއްގެ އުނދަގުލެއް ލިބުނުކަން ތަހުނިޔާއަށް އިޙްސާސް ކުރެވުނެވެ. އަދި އެއީ އޭނާއަށް ވިސްނައި ނުލާ ބުނެވުނު ވާހަކައެއްކަމަށް ބުނެ ، މުރުތަޟާ ބޭނުންތަނަކަށް ދިއުމަށް އެދުނެވެ. ރަނގަޅު ރެސްޓޯރެންޓަކަށް ގޮސް ، މީރުކޮށް ކާލެވުނަސް ތަހުނިޔާއަށް އެންމެ ރަނގަޅެވެ. އޭރަށްވެސް އެވަގުތުކޮޅު ، މުރުތަޟާއާއެކީ ހޭދަކޮށްލުމަށް އޭނާއަށް ފުރުސަތު ލިބިގެންދާނެއެވެ. އެވަގުތު މުރުތަޟާއަށް ހަނދާންވީ ، އޭނާބުނި ވާހަކަޔަކަށް ތަހުނިޔާ ދިން ޖަވާބެވެ. މައްސަލަ ޖެހިގެން އުޅުނުއިރު ބީޗަކަށް ގެންގޮސް ތަހުނިޔާގާތު ، މުރުތަޟާ ބުނި އެވާހަކަތަކާއި ތަހުނިޔާދިން ޖަވާބު ، އަދިވެސް މުރުތަޟާގެ ހިތުގައި ހަރުލާފައި އެބަހުށްޓެވެ.

" ދިރިއުޅުމަކީ ދަތުރަކަށް ދެވިފައި އޮންނަ ނަމެކެވެ. އަހަރެމެން އެންމެންނަކީވެސް އެދަތުރުގެ ބައިވެރިންނެވެ. އެހެނަސް ، އެކުގައި ދަތުރުކުރާ ދެބައިވެރިޔަކު ، ބީރަށްޓެހިވެ ، އެކަކު ކުރާކަމެއް އަނެކަކަށް ނޭނގި އެދަތުރު ކުރިޔަށްދާނަމަ ، ދާންވީދިމާ އޮޅޭނެއެވެ. އެކަން އެހެން ދިމާވެއްޖެނަމަ ، ދެން އޮންނާނެ އެންމެ ރަނގަޅު ގޮތަކީ ، ދެމީހުންގެ މިސްރާބު ބަދަލު ކުރުމެވެ.

" ނޫނީ އެކުގައި ދަތުރުކުރާ މީހާ ބަދަލު ކުރުމެވެ. " މުރުތަޟާގެ ބަސް ތަހުނިޔާ ފުރިހަމަ ކޮށްދިނެވެ. "

މުރުތަޟާގެ މޫނުމައްޗަށް ހިނިތުންވުމެއް ވެރިވިއެވެ. އަދި ގޮނޑުދޮށަށް ގޮސްލާނީއޭ ބުނެ ، ކާރު ދުއްވައިލިއެވެ.

އަތިރިމައްޗަށްގޮސް ، އެތާހުރި ގޮނޑިއެއްގައި މުރުތަޟާ އާއި ތަހުނިޔާ އިށީނދެލައިގެން މޫދަށް ބަލަހައްޓައިގެން ތިއްބެވެ. މޫދުދެކެ ، ވަރަށް ބިރުގަންނަކަމުގައި ތަހުނިޔާ ބުންޏެވެ.

" އަހަރެން ދޫކޮށްނުލައްޗެވެ. މުރުތަޟާގެ އަތް އަހަރެންގެ އަތުން ދޫކޮށް ނުލައްޗެވެ. " ތަހުނިޔާ ބުންޏެވެ.

އެހާވަރަށް ބިރުގަންނަންޏާ ، އެތަނަށް އަންނަން އެހާބޮޑަށް ބާރުއެޅީ ކީއްވެތޯ މުރުތަޟާ ސުއާލު ކުރިއެވެ. ތަހުނިޔާ ބޭނުންވީ އޭނާގެ ހިތުގައި އޮތް އެ ބިރުވެރިކަން ދޫކޮށް ނެތިކޮށްލުމަށެވެ. އަދި ، މުރުތަޟާ އަބަދުވެސް ހުންނާނީ އޭނާއާއެކީގައިކަން އިޙްސާސް ކޮށްލުމަށެވެ. އެކަން ޔަޤީން ކުރުމަށެވެ. އަދި ، މުރުތަޟާ އޭނާއާއެކީ އުފަލުން ދިރިއުޅުމަށެވެ. އެއްވެސް މަޖުބޫރުކަމެއް ނެތިއެވެ. ތަހުނިޔާގެ ސުއާލުތަކަށް ، މުރުތަޟާ އެއްވެސް ޖަވާބެއް ނުދެއެވެ. އެހެންނަމަވެސް ، ތަހުނިޔާ ލަދުގަންނަންދެން ، ތަހުނިޔާގެ ލޮލަށް ބަލަހައްޓައިގެން އިނެވެ. މުރުތަޟާއަށްޓަކައި ތަހުނިޔާގެ ހިތުގައި އުފެދިފައިވާ ލޯބި ، އެލޮލުން ފާޅުވާން ހުށްޓެވެ. އަދި ، އެލޯބި ،  މުރުތަޟާއަށް ރަނގަޅަށް އެބަ ފެނެއެވެ.

ޠާހިރާގެ ދައްތައަށް ހާޓްއެޓޭކެއް ޖެހުމާގުޅިގެން ، ޙަފުޞާ އެނބުރިއައުން ތަންކޮޅެއް ލަސްވިއެވެ. މުރުތަޟާވެސް އެދުނީ އިހަށް ދައްތަގާތު ޙަފުޞާ މަޑުކޮށްލުމަށެވެ. އެއީ ތަހުނިޔާއާއި މުރުތަޟާއަށް މައްސަލަޔަކަށް ނުވާނެއެވެ. (ނުނިމޭ)