( 19 މާރިޗު 2024 ގައި ޝާއިޢުކުރި ބަޔާ ގުޅޭ )
" ހަމަ ރަނގަޅަށް ހެއްޔެވެ ؟ ތަހުނިޔާ ތިދިނީ ހާދަހާ އުފާވެރި ޚަބަރެކެވެ. " މުރުތަޟާގެ މޫނުމައްޗަށްވެސް ، މީންދުވަހަކު ނާންނަފަދަ ޝާއްބަކަމެއް އައިސް ، މޫނުމަތި ހިނިތުންވުމުން ފޮޅިގެން ދިޔައެވެ.
ތަހުނިޔާއަށް ޝުކުރު އަދާކުރުމަށްޓަކައި އެތައް ބަސްތަކެއް މުރުތަޟާ ބޭނުންކުރިއެވެ. އެއީ ޝުކުރުކުރުން ޙައްޤު ޚަބަރެކެވެ. މުރުތަޟާގެ ޙަޔާތުގައި ދެވިފައިހުރި މަގުގެ ހަތަރު އަނގޮޅީތެރޭ ، ހަމަނޭވާލައިގެން ހުރެ ، އޭނާ ދާންވީދިމާ ، ވަކިކޮށް ދެނެގަނެވޭފަދަ ކަމެކެވެ. ދެނެއް ، މަގުއޮޅިގެން އުޅޭކަށް މުރުތަޟާއަކަށް ނުޖެހޭނެއެވެ. ތަހުނިޔާ އެވަނީ މުރުތަޟާއަށް މަގު ދައްކައިދީފައެވެ. އެއީ ، މިހާރު މުރުތަޟާވެސް ދާންބޭނުންވާ މަގެވެ. އޭނާއާ ތަހުނިޔާއާ ދެމީހުން އެކަންޏެވެ. ނޫރުއާ ނުލައެވެ. ޝުކުރު އަދާކުރަމުންގޮސް ، މުރުތަޟާއަށްވެސް ރޮވުނެވެ. އަދި ތަހުނިޔާގެ ކިބައިން މަޢާފަށް އެދުނެވެ. މުރުތަޟާގެ ޙަޔާތުގައި ، އެއްވެސް އިންސާނެއްގެ ހިތަށް ދަތިނުކުރާވަރަށް ، ތަހުނިޔާގެ ހިތަށް ، މުރުތަޟާވަނީ ތަދުކޮށްފައެވެ. އެކަން އަނބުރާ ގެނެވޭނެ ގޮތެއް ނެތެވެ.
ތަހުނިޔާގެ މޫނުމަތިން ފާޅުވަމުން ދިޔަ އުފާވެރިކަމާއެކު ، ތުންފަތަށް ވެރިވި ހިނިތުންވުމުން ، އޭނާގެ ކުދިކުދި ދަތްތައް ހީވަނީ މުތީތަކެއް އަތުރާލާފައި ހުރި ހެންނެވެ. ލޮލުން ފައިބަމުން ދިޔަ ކަރުނަތައްވެސް އޭނާގެ ކޯތާފަތުގައި ބީހިލަމުން އެދަނީ ނިކަން ލޯބިންނެވެ. މުރުތަޟާ ، ހިނިތުންވުމާއެކު ، ތަހުނިޔާއާ ގާތަށް ޖެހިލައި ، ތަހުނިޔާގެ ލޮލުންފައިބަމުންދިޔަ ކަރުނަތައް ފުހެލަދިނެވެ.
" އަހަރެންނަށް ހާދަވަރަކަށް ތަހުނިޔާގެ ހިތަށް ދަތިކުރެވިއްޖެއެވެ. އަހަރެން އެކަމަށްޓަކައި މަޢާފަށް އެދެމެވެ. އެކަމަކު ، ތިދިން އުފާވެރި ޚަބަރަށްޓަކައި ، ހާސްފަށުން ޝުކުރިއްޔާއެވެ ! " ތަހުނިޔާގެ ލޮލަށް ބަލަހައްޓައިގެން އިނދެ މުރުތަޟާ ބުންޏެވެ.
މުރުތަޟާގެފަރާތުން ލިބުނު ހިތާމަތަކާގުޅިގެން ، ނޫރުއަށްވެސް ވަގުތުން ބަދަލުތަކެއް އައެވެ. އެދުވަހުގެ ހެނދުނުގެ ނާސްތާއަށް އެންމެންނާއެކު ، އެއްމޭޒުދޮށަށް ނޫރުވެސް އެރިއެވެ. އެއީ އެގޭގެ ހަމަ ކޮންމެ މީހަކަށްވެސް ، ލިބުނު ޙައިރާންކަމެކެވެ. ނޫރުއާއެކީ ހެނދުނުގެ ނާސްތާކޮށްނުލާތާ އެތައްދުވަހެއް ވެއްޖެކަމަށް ބުނެ ، ރައިދާއަށް ލިބުނު އުފާވެރިކަން ހާމަކުރިއެވެ. ހާރިސް އަދިވެސް ހުރީ ނޫރުދެކެ ފޫހިވެފައެވެ. ލޯބިވާމީހުންނާ ވަކިވާން ޖެހޭތީ ، މިއަދު ކާމޭޒުދޮށުން ނޫރުފެނިލީކަމަށް ހާރިސް ނިންމިއެވެ. އެންމެފަހު ވަގުތު ، އެމީހުންނާއެކު ވަގުތުކޮޅެއް ހޭދަކޮށްލުމަށް ނިންމީއެވެ. މުރުތަޟާއާ އިނދެގެން ގެއިން ނުކުމެގެން ދިއުމަށްފަހު ، މާ ފަސޭހައިން ނޫރުގެ މޫނު ފެނިލުމަކީ ވާނެކަމެއްނޫނެވެ. ނޫރުގެ ކައިވެނީގެ ރަސްމިއްޔާތަށް ދިއުމުގެ ޙައްޤު އެމީހުންނަށްވެސް ލިބިއޮތް ކަމަށާއި ، އެކައިވެނި އޮތީ ، ކޮންތާކު ، ކޮންދުވަހަކުތޯ ހާރިސް ސުއާލު ކުރިއެވެ. އެންމެން ވާހަކަ ދައްކަމުން ގެންދިޔައިރު ، ނޫރުއިނީ ، އަނގައިން ނުބުނެ ފާޑެއްގެ ހިންޏެއް އައިސްފައެވެ.
ކައިވެނީގެ ރަސްމިއްޔާތަށް އައިސްގެން އަދި އެ ރަސްމިއްޔާތަށް ނާދެވިގެންވެސް ، ބޭބެއަށް އަންނާނީ ކޮންތަފާތެއްތޯ ނޫރު ސުއާލުކުރިއެވެ. ނޫރުގެ އުފަލާއި ހިތާމައާއި ރުއިމާއި ތަކުލީފާއަދި މުޅިޙަޔާތަކީ ، އޭނާގެ އަމިއްލަ އެއްޗެކެވެ. އެހެން އެއްވެސްމީހަކަށް އެއިންކަމަކުން ކުރާ އަސަރެއް ނެތެވެ. ނޫރު ، ދުނިޔޭގައި އުޅުނަސް އަދި ނޫޅުނަސް ، ތަފާތެއް އަންނާނެމީހަކު ، ޚުދު އޭނާގެ އަމިއްލަ ޢާއިލާގެ ތެރެޔަކުވެސް ނެތެވެ.
ނޫރު ދައްކަމުންގެންދިޔަ ވާހަކަތަކަށް ރައްދެއްނުދީ ވަޞީމަކަށްވެސް ނުއިނދެވުނެވެ. އެތަނުގައި ، ބޭރު އެއްވެސް މީހަކު ނެތްކަމަށާއި އެއީ ނޫރުގެ އަމިއްލަ މީހުންކަމަށް ވަޞީޟު ބުންޏެވެ. އެހެނަސް ، ވަކިމީހަކު ، އެހެންމީހުންނާއެކު އޮންނަ ގުޅުމެއް ކަނޑައިލުމުން ، އެއީ އެކަނިވެރިޔަކަށް ވެދެއެވެ. އެކަނިވެރިކަމަކީ ، އަމިއްލަ އިޚްތިޔާރުގައި އިންސާނާ އުފައްދާ ޙާލަތެކެވެ. ތިމާގެ އެހެންމީހުންނާ ދުރަށް ދިއުމަށް ދައްކާ ޙުއްޖަތެކެވެ.
ނޫރުމެންފަދަ ނަސީބުދެރަ ، ބައެއްމީހުންގެ މައްސަލަޔަކީ އެއީއެވެ. ލިބެން އޮންނަ ކާމިޔާބީ ދޫކޮށްލާފައި ، ގުޅުންތަކާ ވަކިވަމުން ދިއުމެވެ. ތިމާގެ ލެޔާގުޅިފައިވާ މީހުންގެ އެހީތެރިކަމާއި އެއްބާރުލުން ނުލިބިގެން ، އަތްމަތިން ދޫވަމުންދާ ގުޅުންތައްވެސް މަދެއްނޫނެވެ. އަހަރެމެންގެ އެއްރަޙިމުގެ ގުޅުމުގެ އަގުވަޒަންކޮށް ، ބޭނުންވާ އެހީތެރިކަން ލިބުނުނަމަ ، ކޮންފަދަ ހެއްޔެވެ ؟
" ދެން އެވާހަކަ ނުދައްކަމާ ހެއްޔެވެ ؟ މިގޭގެމީހުންނަށް ދޭން ، ވަރަށް މުހިންމު ޚަބަރެއް އެބައޮތެވެ. އެ ޚަބަރަކީ ، އަހަރެންނާ މުރުތަޟާއާ ދެމީހުން ކައިވެނި ނުކުރަން ނިންމައިފީމެވެ." ނޫރު ބުންޏެވެ.
ނޫރުގެ އެވާހަކައިން ، އެތާތިބި އެންމެންގެ އިސްއުފުލިގެންދިޔައެވެ. ޙައިރާންވެގެންގޮސް އަންތަރީސް ވެ ، އެންމެންގެ އަނގަ ތަންމިނަށް ހުޅުވުނެވެ. ވަޞީމުގެ މިލާމޯޅިވެފައިވާ މޫނުމައްޗަށް ހިނިތުންވުން ވެރިވިއެވެ. ހާރިސްގެ ދެމަފިރިންނަށް ، ނޫރުގެ އެވާހަކަ ޤަބޫލެއް ނުކުރެވުނެވެ. އެއީ ، ނޫރުގެ މަކަރުވެރިކަމުން އާ މަންޒަރެއް ދައްކަނީކަމަށް އެމީހުން ދުށްޓެވެ.
ޙަފުޞާއިނީ ، ހެނދުނު ސައިބޮއި ނިމިގެން ސިޓިންގރޫމުގައި އިށީނދެލައިގެންނެވެ. މުރުތަޟާ ، މަންމަގާތަށް ޖެހިލިއެވެ. އެދުވަހު ، މުރުތަޟާ އޮފީހަކަށް ނުދެއެވެ. އެކަމާބެހޭގޮތުން ، ޙަފުޞާ ސުއާލު ކުރިއެވެ.
މުރުތަޟާ މިއަދު އެހުރީ އޮފީހަށް ސަލާމް ބުނެފައެވެ. ތަހުނިޔާ ގޮވައިގެން ހޮސްޕިޓަލަށް ދާންޖެހިގެންނެވެ. އެއީ ، ޙަފުޞާއަށް ޙައިރާންކަން ލިބުނު ކަމެކެވެ. ތަހުނިޔާ ބަލިވެ އުޅޭއިރު އޭނާއަށް ނޭނގުނީތީ ، ޙަފުޞާ ކަންބޮޑުވިއެވެ. ތަހުނިޔާއާ އެންމެ ރަނގަޅަށް އަޅައިނުލެވޭކަމުގެ އިޙްސާސް ކުރެވިގެން ދިޔައެވެ.
" ތަހުނިޔާ ބައްޔެއް ނުވެއެވެ. އެއީ ކަންބޮޑުވާކަހަލަ ކަމެއްނޫނެވެ. އުފާވެރިކަމުގެ ޚަބަރެކެވެ. " ތަހުނިޔާ ބަލިވެއިންކަން މަންމަގާތު ބުނާނެގޮތެއް ނޭނގިހުރެ ، މުރުތަޟާއަށް ބުނެވުނެވެ. މުރުތަޟާ އެބުނީ ކީކޭކަން ޙަފުޞާ ، ވަގުތުން ދެނެގަތެވެ. އަދި ޙަފުޞާގެ މޫނުމަތިން އުފާވެރިކަން ފާޅުވެގެން ދިޔައެވެ.
ޙަފުޞާއަށް ކޮޅަށް ތެދުވެވުނެވެ. އުފަލުންގޮސް ރޮއެގަނެވުނެވެ. މުރުތަޟާއަށާއި ތަހުނިޔާއަށް ހެޔޮ ދުޢާކުރިއެވެ. ޠާޙިރާއަށް ގޮވާގެނެސް ، އެޚަބަރު ޠާހިރާއަށްވެސް ދިނެވެ. ޙަފުޞާ މާމަޔަކަށް ވަނީއެވެ. ޠާހިރާއަށް ބޮޑުދައިތަ ކިޔަނީއެވެ. ޠާހިރާއަށް ، އެއުފާވެރި ޚަބަރުދީ ، ފޮނިކާ އެއްޗަކުން އަވަށްޓެރިންނަށް ޞަދަޤާތްކުރަން ، އެއްޗެއް ތައްޔާރުކުރުމަށް ބުންޏެވެ. ޠާޙިރާއަށްވެސް އުފަލުންގޮސް ނަށައިގަނެވުނެވެ.
ޙަފުޞާ ، މުރުތަޟާއަށް ގޮވައިލިއެވެ. އަދި އެ ޙާލަތުގައި ތަހުނިޔާގެ ހިތަށް ދަތިވާނެ އެއްވެސް ވާހަކައެއް ތަހުނިޔާގާތު ނުބުނުމަށާއި ، އެކަހަލަ އެއްވެސްކަމެއް ނުކުރުމަށް ، ޙަފުޞާ އެދުނެވެ.
ތަހުނިޔާއަށް އެއްވެސް ތަކުލީފެއް އުފުއްލަން ނުޖައްސާނެކަމަށް މުރުތަޟާ ވަޢުދުވިއެވެ. ނޫރުލްޢައިނުއާއި މުރުތަޟާ މިހާރު އެތިބީ ދުރުވެފައިކަމަށް ތަހުނިޔާގާތު ، މުރުތަޟާވަނީ ބުނެފައެވެ. އެގެޔަށް ކުއްލިގޮތަކަށް އެއައި އުފާވެރިކަމުގައި ޙަފުޞާއާއި ޠާހިރާއާ ދެމައިންތިބީ އުފަލުން ފޮޅިފައެވެ. ދެމައިން އެކަކު އަނެކަކަށް ބައްދައިލިއެވެ.
ހެނދުނު ހެނދުނާ އޮފީހަށްގޮސް ، އެމެރިކާއަށް ފުރުމުގެކުރިން ހަމަޖައްސަންޖެހޭ ކަންކަން ރޭވުމަށް ނޫރު ، އިސްކަންދިނެވެ. މިވަގުތު އޭނާގެ ކުރިމަތީގައިވާ އެންމެ މުހިންމު ކަމަކީ އެއީއެވެ. ކައިވެނީގެ ކަންތައްވެސް އެއީ ކުޑަކަމެއްނޫނެވެ. ކައިވެނި ނުކުރަން ނިންމިޔަސް އަދި މުޅިން އެކަން ފައިނަލެއް ނުވެއެވެ. އެކަން މުޅިން ނިމުމަކަށް އަންނާނީ ، މުރުތަޟާއާ ދިމާއަށް އެވާހަކަ ބުނެލައިގެންނެވެ. އެއީ އެހާ ފަސޭހަކަމަކަށް ނުވާނެއެވެ.
ނޫރުގެ ޚިޔާލުތައް ، މާކުރިޔަށް ގެންދިޔައެވެ. އެންމެ ފުރަތަމަ ، ކައިވެނީގެ ވާހަކަ ދެކެވުނު ހިސާބުން ފެށިގެން ، އެކައިވެނި ކުރަން އޭރު ނޫރުބޭނުންނުވާ ވާހަކަ ބުނިހިސާބުން ފެށިގެންނެވެ. މުރުތަޟާއާއި ނޫރުގެ ލޯބީގެ މުޢާމަލާތުތަކުގެ ފީތާތައް ނޫރުގެ ކުރިމަތީ ނިއުޅިގެން ދިޔައެވެ. ހަނދާނުން ފިލައިދާންނެތް އެތައްކަމެކެވެ. އެތައް ވަޢުދަކާއި ޢަހުދެކެވެ. އެތައް ހިނިތުންވުމަކާއި އެތައް ރުއިމެކެވެ.
ޓަކިޖަހައިލުމަށްފަހު ، ސެކްރެޓަރީ ވަދެ ، ނޫރުމެންގެ ވިސާޖަހަން އެމްބަސީއަށް ދާގަޑިޖެހިއްޖެކަމަށް ، ސެކްރެޓަރީ ބުންޏެވެ. ނޫރުވެސް މަޑުކޮށްގެން އެއިނީ އެމްބަސީއަށްދާ ގަޑިޖެހެންދެނެވެ. އެމެރިކާއަށް ދިއުމާމެދު ، ނޫރުގެ ފަލްސަފާއާ ، އޭނާގެ ބައްޕަ އެއްބަހެއް ނު ވެއެވެ. އެއީވެސް ނޫރުގެ ކުރިމަތީގައި އޮތް ކަންބޮޑުވުމެކެވެ. ވަޞީމަށް އެކަމާ އެއްބަސް ނުވެވިގެން އެއުޅެނީ ، ނޫރުގެ ޢަމަލުތައް މިހާރަކަށް އައިސް ހުންނަ ގޮތުން ، ކޮންމެފަދަކަމެއްވެސް ނޫރު ކޮށްފާނެތީއެވެ. އަމިއްލަ ޤައުމުގައި ޢާއިލާއާ އެކީގައި ހުންނައިރުވެސް ، އެމީހުންނަށް އެއުޅެނީ ، ނޫރު ކޮންޓްރޯލް ނުކުރެވިގެންނެވެ،
ވަޞީމުގެ ކަންބޮޑުވުމަކީ ޖާއިޒް ކަމެކެވެ. ވަޞީމުގެ ކަންބޮޑުވުމުގައި އެންމެ ގާތުން ، ޙިއްޞާކުރަނީ ރައިދާއާއެވެ. ވަޞީމުގެ ބަލިހާލަތު ހުރިގޮތުން ވަޞީމުގެ ޙާލަތު އެންމެ ރަނގަޅަށް އެނގޭނީ ރައިދާއަށެވެ. ރައިދާގެ ފަރާތުން ބޭނުންވާ އަޅައިލުމާއި އޯގާތެރިކަން އަބަދުވެސް ވަޞީމަށް ލިބެއެވެ. ނޫރު ، މިހާރު ބޭނުން އެވަނީ އެމެރިކާއަށް ދާށެވެ. ނޫރު އެދޭގޮތަށް އޭނާ ފޮނުވައިލުމަށް ބައްޕަގެ ކިބައިން ރައިދާ އެދުނެވެ. އެނޫންގޮތަކަށް ނޫރު މައިތިރި ނުކުރެވޭނެކަން ރައިދާއަށް އެނގެއެވެ. އެއީ ، ވަޞީމަށްވެސް އެނގޭ ކަމެކެވެ. އެހެންނަމަވެސް ، އެއީ އޭނާއަށް ދަތިކަމަކަށް ވެގެން އެއުޅެނީ ، ސަބަބުތަކެއްވެސް ނެތިއެއްނޫނެވެ.
އަމިއްލަ ނިންމުންތައް ނިންމުމުގެ ޤާބިލްކަން ، ނޫރުގެ ކިބައިގާ އެބަހުށްޓެވެ. އެގޭގެ އެއްވެސްމީހެއްގެ ލަފަޔާއި އިރުޝާދަކީ ، ނޫރުއަށް ބޭނުންވާ އެއްޗެއްނޫނެވެ. ބައްޕައަކަށްވިޔަސް ، ނޫރުގެ ލަފާދާރަކަށް ، ވަޞީމަކަށް ނުވެވުނެވެ. ހާރިސްއަކީ ބޭބެކަމަށްވިޔަސް ، ހާރިސްއަށްވުރެ ، ނޫރު ބޮޑުވެ އިސްވެއްޖެއެވެ. އެކަކަށްވެސް ނޫރުއާ އެއްވެސްކަމަކާ ސުއާލެއް ނުކުރެވޭނެއެވެ. އެއްވެސްކަމެއްގައި ލަފަޔެއް ނުދެވޭނެއެވެ. އެހުރިހާކަމަކީވެސް ، ރައިދާވެސް ޤަބޫލުކުރާ ކަންކަމެވެ. އެހެންނަމަވެސް ، މިވަގުތަށް އޮތްއެންމެ ރަނގަޅުގޮތަކީ ، ނޫރު ބޭނުންވާގޮތަކަށް ، ކަންކަން ނިމިގެންދާން ދުޢާ ކުރުމެވެ. އެކަމަށް ، ނޫރުއަށް މަގުފަހިކޮށްދިނުމެވެ. ހިތްހަމަޖެހިގެންހުރެ ، ފުރައިގެން ދާން ފުރުޞަތު ދިނުމެވެ.
ނޫރު ، އިންޑިއާއިން ފުރައިގެން ދިއުމުން ، ހަމަގައިމުވެސް ދެ ޢާއިލާއަކަށް ހަމަޖެހުން ލިބޭނެއެވެ. އެއީ ތަހުނިޔާގެ ޢާއިލާއާއި މުރުތަޟާގެ ޢާއިލާއެވެ. އެތައް ބަޔެއްގެ ދިރިއުޅުން ބަރުބާދުވުމާ އަދި ތަކުލީފުތައް ، ނޫރުގެ އެނިންމުމާވަނީ ގުޅިފައެވެ.
ވަޞީމުވެސް ، ރައިދާގެ ވާހަކަޔަށް އެއްބަސްވިއެވެ. ނޫރު ، އެމެރިކާއަށް ދިޔަދޭނީއެވެ. ނޫރުބޭނުންވާ ގޮތަކަށް އެކަން ދާން ދޫކޮށްލާނީއެވެ. އޭރަށް ، ހުރިހާ މީހުންނަށްވެސް ، ހަމަނޭވާލައިގެން އުޅުމަށް ފުރުސަތު ލިބޭނެއެވެ. ނޫރުގެ ވިސްނުމުގައިއޮތީ ، އެމެރިކާއަށްގޮސް ، އެޤައުމުގައި ވަޒަންވެރިވުމަށެވެ. ނޫރުގެ ދުލުން އެވާހަކަ ބުނެ އިއްވާލިގޮތް ، ވަޞީމުގެ ހަނދާނުގައި އަދިވެސް އެބަހުށްޓެވެ. ފަހަރެއްގައި ނޫރުގެ ދިރިއުޅުން އެއްކޮށް ، އެމެރިކާއަށް ބަދަލުވެސް ކޮށްފާނެއެވެ. އެއީ ، ވަޞީމަށް ހީވާގޮތެވެ. ނޫރުގެ ކަންތަކުގައި ފިކުރުކުރަމުންގޮސް ، ވަޞީމަށް ރޮވުނެވެ. ރައިދާ އޭނާގެ ބަފައިބެއަށް ހިތްވަރުދީ މަސަލަސް ކުރެވޭތޯ ބަލަމުން ގެންދިޔައެވެ.
ތަހުނިޔާ ޑޮކްޓަރަށް ދެއްކުމަށްޓަކައި އޭނާއާއެކީގައި ދިޔައީ މުރުތަޟާއެވެ. ޑޮކްޓަރު ބުނިގޮތުގައި ، ތަހުނިޔާގެ ބަނޑުގައިވާ ދަރިފުޅުގެ އުފެދުން އެހާ ރަނގަޅެއްނޫނެވެ. ތަހުނިޔާ އުޅެންވާނީ ވަރަށް ބަލައިގެންނެވެ. ރަނގަޅަށް ކާންވާނެއެވެ. އަދި ، ހިތްދަތިވެ ހާސްވާ ހުރިހާކަމަކުން ދުރުހެލިވާން ވާނެއެވެ. ތަހުނިޔާ ކަންބޮޑުވާނެ އެއްވެސްކަމެއް ނުކުރުމަށް މުރުތަޟާއަށް ޑޮކްޓަރު އެންގިއެވެ. ތަހުނިޔާ އުފަލުގައި ހިތްހަމަޖެހިގެން ހުރެއްޖެނަމަ ، ހުރިހާކަމެއްވެސް ރަނގަޅުވާނެއެވެ. އެކަން ޔަޤީންކުރުން އެއީ މުރުތަޟާގެ ޒިންމާއެއްކަން ، ޑޮކްޓަރު ހަނދާން ކޮށްދިނެވެ.
ނޫރުގެ އެމެރިކާ ދަތުރަށް ތައްޔާރު ވުމަށްޓަކައި ، ޝޮޕިންގމޯލަކަށްގޮސް ، ބާޒާރުކުރަމުން ގެންދިޔައެވެ. މުރުތަޟާއާއި ތަހުނިޔާއަށްވެސް ، ކްލިނިކުން ނުކުމެގެން ބާޒާރުކޮށްލުމަށްޓަކައި ދެވުނީ ، ހަމަ އެ ޝޮޕިންގމޯލަށެވެ. މުރުތަޟާއާއި ތަހުނިޔާ އަތުގުޅާލައިގެން ، ފިހާރަތަކުގައި އެނބުރެމުންދިޔަތަން ނޫރުއަށް ފެނުނެވެ. މުރުތަޟާއަށް އެއައި ކުއްލިބަދަލަކީ ، ނޫރުއަށް ޙައިރާންކަން ލިބުނު ކަމެކެވެ. އެކަމާ ވިސްނަން ، ނޫރުއަށް އެކިފިހާރަތަކުގެ ކަނުގައި ހުރެލެވެއެވެ.
ގެޔަށް އައިމަގުމަތީ ކާރުގައި ތިބެގެން ، މުރުތަޟާއާއި ތަހުނިޔާ ވާހަކަދައްކަމުން ދިޔައީ ، އެދެމަފިރިންނަށް ކަމެއްދިމާވެގެން އުޅޭހެންވެސް ހީނުވާފަދަ ގޮތަކަށް އުފާވެރިކަމާއެކުގައެވެ. އެހާގިނަތަކެތި ތަހުނިޔާއަށް ގަނެދިނީތީ ، ތަހުނިޔާ އިނީ އުފަލުން ފޮޅިފައެވެ. މުރުތަޟާއަކީ ، ކުޑަކުދިންދެކެ ވަރަށްލޯބިވާ މީހެކެވެ. އޭގެ ހެއްކަކީ އަރުސަލާނެވެ. އަރުސަލާނަކީ ، މުރުތަޟާގެ ފުރާނައެވެ. އޭނާގެ އަމިއްލަ ދަރިޔަކަށް ކުރެވޭ އުއްމީދަށް މިހާރު އެވަނީ ފުރުސަތު ހުޅުވިފައެވެ. މުރުތަޟާއިނީ ، އުފަލުންގޮސް ފޮޅިފައެވެ. (ނުނިމޭ)
