( 13 މާރިޗު 2024 ގައި ޝާއިޢުކުރި ބަޔާ ގުޅޭ )
ތަހުނިޔާހުރީ ، ގޯތިތެރެޔަށް ނުކުމެ ، އެކަނިމާ އެކަނި ، އޭނާއަށް ކުރިމަތިވެފައިވާ ޙާލާމެދު ކަންބޮޑުވުމުގެ ފިކުރުތަކުގައި ގެއްލިފައެވެ. ޠާހިރާއަށް ގޯތިތެރެޔަށް ނުކުމެވުނުއިރު ، ތަހުނިޔާ އެތާހުށްޓާ ފެނުނެވެ. ތަހުނިޔާގެ ހިތާމަތަކުގައި ބައިވެރިވުމަށް ޠާހިރާގޮސް ، ތަހުނިޔާއާ ވާހަކަ ދައްކަން ފެށްޓިއެވެ. ޙައްޤުމަގުގައި ސާބިތުވެ ހުންނަ އިންސާނާގެ ލޮލުން ކަރުނަ ފެނުމަކީ ، ރަނގަޅުކަމެއްނޫނެވެ. ތަހުނިޔާގެ ޙައްޤު ހޯދުމަށް ، އޭނާގެ ކުރިމަތީގައިވާ ހަނގުރާމަޔަށް ތައްޔާރުވެ ، އެކަމާ ކުރިމަތިލުމަށް ޠާހިރާ ވިސްނައިދިނެވެ. އެހެނަސް ، ކަމަކާ ކުރިމަތިލުމަށް ، އޭނާގެއަތުގައި އެއްޗެއް އޮތްކަމަކަށް ، ތަހުނިޔާއެއް މިހާރަކު ނުދެކެއެވެ. ކަމަކާ ކުރިމަތިލެވޭނީވެސް އަތުގައި އެއްޗެއް އޮވެގެންތާއެވެ. މުރުތަޟާ ނެތްތާނގައި މުރުތަޟާގެ ލޯބިވެސް އޭނާގެ އަތަކު ނެތެވެ.
ތަހުނިޔާގެ އަމިއްލަ ނަފްސަށް ، އެއްޗެއް ޙައްޤުނޫންކަމަށް އެދެކޭ ޙާލަތުން ނުކުތުމަށް ޠާހިރާ ، ތަހުނިޔާއަށް ވިސްނައިދެމުން ގެންދިޔައެވެ. ތަހުނިޔާގެ ވިސްނުން އެހާ ހަނިވެފައި އޮންނަ އޮތުމާމެދު ޠާހިރާ ސުއާލު ކުރިއެވެ. ނޫރުލްޢައިނުގެ އަތުގައި އޮތީ ، ތަހުނިޔާގެ އަތުގައި ނެތް ކޮން އެއްޗެއް ހެއްޔެވެ ؟ ތަހުނިޔާއަކީ އެގޭގެ ދިރުމެވެ. ޙަފުޞާއާއި ޠާހިރާއާ ދެމީހުން އެތިބީ ، ކޮންމެ ޙާލެއްގައިވެސް ތަހުނިޔާއަށް އެހީތެރިވުމަށް ނިންމައިގެންނެވެ. ތަހުނިޔާގެ ދިރިއުޅުން އާބާދު ކުރުމަށް ކުރެވޭ ކޮންމެ ކަމަކަށް ޙަފުޞާއާއި ޠާހިރާ ތާއީދުކޮށް އެހީތެރިވާނެއެވެ. ތަހުނިޔާގެ މަންމައާއި ބައްޕަގެ ހެޔޮއެދުމާއި ދުޢާވެސް ވަނީ ތަހުނިޔާއާ އެކުގައެވެ. ކުރިމަތިވެފައިވާ ޙާލަތާ ، ތަހުނިޔާ ކުރިމަތިލުމަށް އެވަރު މަދުތޯ ޠާހިރާ ސުއާލު ކުރިއެވެ. ތަހުނިޔާގެ އަމިއްލަ ނަފުސަށް އިތުބާރު ކުރުމަށް ، ޠާހިރާ ، ތަހުނިޔާއަށް ނަސޭޙަތް ދިނެވެ.
އެ ، ނޫރުލްޢައިނަށް ނިކަން ބަލައިލާށެވެ. ތަހުނިޔާއާ ކައިވެނިކުރަން ، މުރުތަޟާ ، ނޫރުލްޢައިނު ދޫކޮށްލީމާ ، އެންމެ ކަރުނަތިއްކެއްވެސް ، ނޫރުލްޢައިނުގެ ލޮލުގައި ނުއުފެދެއެވެ. ތަހުނިޔާ އެހުރީ ، އެންމެންގެ ކުރިމަތީގައިވެސް ، ހަރުދަނާ މަޤާމެއްގައެވެ. އެއްވެސްކަމަކާ ދެރަވެގެން ތަހުނިޔާ ރޯކަށް ނުޖެހެއެވެ. ޠާހިރާގެ ވާހަކަ މާ ދިގުވާން ފެށީމާ ، ތަހުނިޔާވެސް ވާހަކަ ފެށްޓިއެވެ.
" އަހަރެންގެ އަތުގައި ހުރިހާ އެއްޗެއް އޮވެމެ ، އަހަރެންގެ އަތުގައި އެއްވެސް އެއްޗެއް ނެތްކަން ، ޠާހިރާ ހަނދާން ނެތުނީ ހެއްޔެވެ ؟ އަހަރެންގެ އެއްވެސް އެއްޗެއް ނެތެވެ. މުރުތަޟާ ، އަހަރެންދެކެ ލޯތްބެއް ނުވެއެވެ. އެންމެ ދެރަވެގެން މުރުތަޟާގެ ހިތުގައިވެސް ، އަހަރެންގެ ނަން ލިޔެވިފައެއް ނެތެވެ. " ތަހުނިޔާ ފެންކަޅިވެފައިހުރެ ބުންޏެވެ.
ނާއުއްމީދުން ފުރިގެންވާ ތަހުނިޔާގެ ދުނިޔެއަށް ، އުއްމީދުގެ އަލިކޮޅެއް ގެންނަން ޠާހިރާއަށް އެބަޖެހެއެވެ. އޭނާގެ ކޮއްކޮގެ ޙައްޤުގައެވެ. އަދި މަންމަޔަށް ޓަކައެވެ. އެ ހަނގުރާމަޔަކީ ، ހިތް ޙާޞިލްވުމާ ނުވުމާ ގުޅިފައިވާ އެއްޗެއްކަމަށް ޠާހިރާ ބުނަމުން ގެންދިޔައެވެ. އަދި އެ ހަނގުރާމަ ، ތަހުނިޔާ ފަތަޙަ ކުރަން ޖެހެއެވެ. މުރުތަޟާގެ ހިތުން ޖާގަހޯދަން ތަހުނިޔާއަށް އެބަޖެހެއެވެ. ކަމަކާ ކުރިމަތިނުލައެއް ، އެކަމެއް ޙާޞިލެއް ނުކުރެވޭނެއެވެ. ކަމެއް ކާމިޔާބު ކުރެވޭނީ އެކަމަކަށް ކެރިގެން ކުރިމަތިލައިގެންނެވެ. އެކަމާ ފިލަން ދުވެގެން އެއްވެސް ކަމެއް ޙާޞިލެއްނުވާނެއެވެ. ފިލަން ދުވެދުވެ އޮއްވާ ފެންނާނީ ނެތިދާތަނެވެ. ތަހުނިޔާއަށް ހީވަނީ ކީކޭކަމަށް ހެއްޔެވެ ؟ އަންނަ ފޯރީގައި ، ޠާހިރާގެ ވާހަކަ ބައެއްފަހަރަށް ބާރުވެފައި ރުންކުރު ވެއެވެ.
ތަހުނިޔާއާ މުރުތަޟާ ކައިވެނިކުރިއިރު ، ނޫރުލްޢައިނުވަނީ ، މުރުތަޟާގެ ހިތް ކަތިލާފައެވެ. ހިތްދަތިކަމުން ފުރިފައެވެ. އަލުން ، ނޫރުލްޢައިނާ ދިމާއަށް މުރުތަޟާ އެދަނީ ، ނޫރުލްޢައިނުގެ ބޯބޮޑުކަމުން ފުރުޞަތު ހޯދައިގެންނެވެ. ނޫރުލްޢައިނަށް އެ ފުރުޞަތު ދެނީ ތަހުނިޔާއެވެ. އަދިވެސް ވަގުތު އެބައޮތެވެ. މުރުތަޟާގެ ހިތުން ، ތަހުނިޔާއަށް ޖާގަހޯދޭނެއެވެ. އެހެނަސް ، ތަހުނިޔާ އެކަމާ ކުރިމަތިލާޏްޖެހޭނީ ވަރަށް ކެރިގެންނެވެ. ޠާހިރާ ، ތަހުނިޔާއަށް އިތުރަށް ވިސްނައިދެމުން ގެންދިޔައެވެ.
" އަހަރެންނަކީ ، ހިލައިން ހަދާފައިވާ ބުދެއްނޫނެވެ. ސާދާ ސީދާ އަންހެންކުއްޖެކެވެ. މުރުތަޟާ އަހަރެންނަށް ގެއްލެމުންދާކަން އިޙްސާސް ކުރެވޭހިނދު ، އަހަރެންގެ ލޮލަށް ޖަމާވާ ކަރުނަތައް އަހަރެންނަކަށް ނުހިފެހެއްޓެއެވެ. އަހަރެން އެންމެ ކަންބޮޑުވަނީ ، އެއްވެސް މީހަކަށް އަހަރެންގެ ޙާލު ނޭނގޭތީއެވެ. އަހަރެންގެ ޖަޒުބާތުތައް އިޙްސާސް ނުކުރެވޭތީއެވެ. " ތަހުނިޔާ ބުންޏެވެ.
ތަހުނިޔާގެ އެ ޙާލަތަކީ އޭނާ އަމިއްލަޔަށް ހޯދައިގެން އުޅޭ ކަމެއްކަން ، ޠާހިރާ އަނެއްކާވެސް ވިސްނައިދިނެވެ. ތަހުނިޔާގެ ހިތުގައި މުރުތަޟާގެ މައްޗަށް އޮތް އެއްޗެއްގެ ވާހަކަ މުރުތަޟާގާތު ، ބުނިންތޯ ޠާހިރާ ސުއާލު ކުރިއެވެ. ތަހުނިޔާގެ އެ ހިތްވަރެއް ނެތެވެ. އެހިތްވަރު އޭނާގެ ކިބައިގާ ހުރިނަމަ ، އެއީ ތަހުނިޔާއެއްނޫނެވެ. އެފަދަކަމެއް ކުރަން ތަހުނިޔާއަށް އިސްނަގަން ކެރިއްޖެނަމަ އެއީ ނޫރުލްޢައިނެވެ. ތަހުނިޔާގެ މިޒާޖު އެކަމަށް ހުއްދައެއް ނުކުރެއެވެ.
އެވާހަކަ އިތުރަށް ދައްކާކަށް ތަހުނިޔާ ބޭނުމެއް ނުވިއެވެ. އަދި ، އެތާނގައި މަޑުކުރަންވެސް ބޭނުންނުވެ ، ގޭތެރެޔަށް ވަދެގެން ދިޔައެވެ. ޠާހިރާހުރީ ތަހުނިޔާގެ ޙާލަތާމެދު ކަންބޮޑުވެފައެވެ. ކަންބޮޑުވެގެންގޮސް ހާސްވެފައެވެ.
ތަހުނިޔާ ކޮޓަރިޔަށް ވަތްއިރު ، ކުޑަދޮރުކައިރީ މުރުތަޟާ ހުށްޓެވެ. ވަތްތަނުން އޭނާއާ ކުރިމަތިވީ ސުއާލެކެވެ. ތަހުނިޔާ އެއައީ ކޮންތާކަށްގޮސްތޯ މުރުތަޟާ ސުއާލު ކުރިއެވެ. ޖަވާބުދިނުމަށް ، ތަހުނިޔާ އަނގަހުޅުވާލިތަނުން މުރުތަޟާ ވާހަކަ ފެށްޓިއެވެ. މަންމައާއި އޭނާއާ ދެމެދު ދެކެވުނު ވާހަކަ ، ތަހުނިޔާ އަޑުއެހިކަން މުރުތަޟާއަށް އެނގޭކަން ، ތަހުނިޔާއަށް އަންގައިލިއެވެ. ކޮންމެވެސް އެކަކަށް ، އެފިޔަވަޅުއަޅަން އެބަޖެހޭކަމުގައި މުރުތަޟާ ބުންޏެވެ.
މުރުތަޟާގެ ނަމުގައި ހައްޔަރު ކުރެވިފައިވާ ޤައިދީއަކަށް ، ތަހުނިޔާ ހަދާކަށް މުރުތަޟާ ބޭނުމެއްނޫނެވެ.
" މުރުތަޟާ ބޭނުންވަނީ ނޫރުލްޢައިނުއާ ކައިވެނިކުރަން ނޫންހެއްޔެވެ ؟ އެހެންކަމަށް ވަންޏާ އެކައިވެނި ކުރާށެވެ ! އެކަމަކު ، ކޮންމެ ގޮތެއްވިޔަސް ، އަހަރެން މުރުތަޟާގާތުން ވަރިއެއް ނުވާނަމެވެ. " މުރުތަޟާއާ ކުރިމަތިލަމުން ތަހުނިޔާ ބުންޏެވެ.
މުރުތަޟާ ވާހަކަ ދައްކަން ފެއްޓިތަނާ ، މުރުތަޟާއަށް ފުރުސަތުނުދީ ، ތަހުނިޔާގެ ވާހަކަ ކުރިޔަށް ގެންދިޔައެވެ. އޭނާއަކީ ، އެހެންމީހުންގެ ހިތަށް އަނިޔާދީ ، އެމީހުން ހިތާމަކޮށް ދެރަވާ ޙާލަތުގައި އުފާކުރާމީހުންގެ ތެރޭގައި ހިމެނޭ މީހެއްނޫންކަމަށް ތަހުނިޔާ ބުންޏެވެ. އަދި އޭނާއަކީ ، އެހެންމީހުންނަށް އުފަލާއި ހިތްހަމަޖެހުން ލިބޭ ޙާލަތްތަކުގައި ، އަމިއްލަ ނަފްސު ޤުރުބާންކޮށް ތަކުލީފު އުފުއްލާ މީހުންގެ ތެރޭގައިވާ މީހެއްކަމަށްވެސް ތަހުނިޔާ ބުންޏެވެ. އޭނާ އެގޭގައި އުޅެނީ އުފަލުގައި ކަމަށްވިޔަސް އަދި ހިތްދަތިޙާލުގައި ކަމަށްވިޔަސް ، މުރުތަޟާ އެކުރަން އުޅޭކަމަކަށް ހުރަހަކަށްވާކަށް ތަހުނިޔާ ބޭނުމެއް ނޫނެވެ. ތަހުނިޔާ އެގޭގައި ހުރުމުގެ ސަބަބުން ގިނަބަޔަކަށް އުފަލާއި ހަމަޖެހުން ލިބޭނަމަ ، ތަހުނިޔާ އެހުރީ ، އަމިއްލަ ތަކުލީފުތަކަށް ކެތްކޮށްގެން ، އެގޭގައި އުޅެން ނިންމައިގެންނެވެ. މުރުތަޟާގެ ނިންމުމަކީ ކޮބައިތޯ ތަހުނިޔާ ސުއާލުކުރިއެވެ.
ތަހުނިޔާގެ ސުއާލަށް މުރުތަޟާ ޖަވާބެއް ނުދެއެވެ. ރޭގަނޑު ވަރަށް ލަސްވެއްޖެ ކަމަށާއި ، ތައްޔާރުވެގެން ނިދަން އޮށޯންނާށޭ ބުނެ ، މުރުތަޟާ ހުރީ ހަނުހިމޭނުންނެވެ.
" މިއީ އަހަރެންނަށް ރޭގަނޑުގެ ނިދީގެ ވަގުތެވެ. މުރުތަޟާއަށް މިއީ ، މުރުތަޟާގެ ޙަޔާތަށް ނޫރުލްޢައިނު ގެނައުމުގެ ވަގުތެވެ. އޭގެ މާނަޔަކީ ، ނޫރުލްޢައިނަށް ވީވަޢުދު ފުއްދުމަށް މުރުތަޟާ ފަސް ނުޖެހޭނެ ކަމެވެ. " ތަހުނިޔާގެ ހިތާހިތާ ކިޔައިލިއެވެ.
ނިދަން އުޅެއުޅެ ، ތަހުނިޔާއަކަށް އެއްގޮތަކަށްވެސް ނުނިދުނެވެ. އޭނާގެ ކަންފަތްދޮށުގައި ފަށްފަށްވަމުން އެދަނީ ، އެރޭ ، މަންމަގާތުގައި މުރުތަޟާ ބުނަމުން ގެންދިޔަ ވާހަކަތަކެވެ. މުރުތަޟާއާއެކީ އުޅުމަށް ، ތަހުނިޔާއަށް މަންމަމެން މަޖުބޫރު ކުރުވަމުން އެދަނީ ކީއްވެގެންތޯ އަހައި ، މަންމަޔާ ކުރަމުންގެންދިޔަ ސުއާލު ތަކެވެ. އެއީވެސް އިންސާނެކެވެ. އުފަލުގައި އުޅުމުގެ ޙައްޤު ، ތަހުނިޔާއަށްވެސް ލިބިގެން ވެއެވެ.
" އެހެންވީމަ ، މުރުތަޟާގެ ހަޔާތުން އަހަރެން ނެރެލުމަށް ނިންމާފައިވާ ނިންމުން ދަމަހައްޓަނީތާއެވެ ! އެހެންކަމަށް ވަންޏާ މިގޭގައި އަހަރެން ހުރެގެން މިކުރަނީ ކީއްހެއްޔެވެ ؟ މިގޭގައި މިކޮޓަރީގައި އަހަރެން އުޅުމުގެ ބޭނުމަކީ ކޮބައި ހެއްޔެވެ ؟ " ތަހުނިޔާ ، އޭނާގެ ހިތާ ސުއާލު ކުރިއެވެ.
އެނދު ކައިރީގައި ބެހެއްޓިފައިހުރި ކުޑަމޭޒުމަތީގައިހުރި ފެންތަށިނަގައި ، އެއްނޭވައިން އެތަށި ، ތަހުނިޔާ ހުސްކޮށްލިއެވެ. އަދި މަޑުމަޑުން ތެދުގެން އެގެއިން ނުކުތެވެ. އޭނާގެ އަމިއްލަގެޔަށްވަދެ ، މާދުރަކަށް ތަހުނިޔާއަކަށް ނުހިނގުނެވެ. އަޑުގެ ނެތްތަނަށް އޭނާއަށް ރޮއިގަނެވުނެވެ. އެގޭގައި ، ތަހުނިޔާ ރޯއަޑުއަހާނެ އިތުރު މީހަކު ނެތްކަން ، ތަހުނިޔާއަށް އެނގެއެވެ. އޭނާ ހިތްއެދޭވަރަށް ހިތްއެދޭހާ ބާރަކަށް ރޮއިގަތުމުގެ މިނިވަންކަން އެގޭގައި އޮންނާނެއެވެ. އެއްވެސް މީހަކަށް އެއަޑެއް ނުއިވޭނެއެވެ. ރޮމުންރޮމުންގޮސް ހުރިތަނަށް ތަހުނިޔާ ތިރިވިއެވެ. ވޭނާއި ކެކުޅުމުގައި ، އޭނާގެ އަމިއްލަ ނަފުސާ ވާހަކަ ދައްކަމުން ގެންދިޔައެވެ.
" ތަހުނިޔާއެވެ ! ތިކުރަނީ ކޮންކަމެއް ހެއްޔެވެ ؟ ތިހަދަނީ ކިހިނެއް ހެއްޔެވެ ؟ "
ފެންބޮވައިގަނެގެން ، މުރުތަޟާއަށް ދަންވަރު ހޭލެވިގެން އެނބުރިލިއިރު ، އެނދުގައި ތަހުނިޔާއެއް ނެތެވެ. ފާޚާނާއާ ދިމާލަށް ބަލައިލާ ، ތަހުނިޔާއަށް ގޮވައިލީމަވެސް ޖަވާބެއް ނުލިބުނެވެ. މަޑުމަޑުން ތެދުވެގެން ، ގޭތެރެ ހޯދަމުން ، މުރުތަޟާ ބޭރަށް ނުކުތެވެ. ތަހުނިޔާމެންގެޔާދިމާލަށް މިސްރާބު ޖެހިއެވެ. އެގެޔާ ދިމާލަށް ބަލައިލިއިރު ، ތަހުނިޔާގެ ކޮޓަރިހުރީ ދިއްލާފައެވެ. އޭގެމާނަޔަކީ ، ތަހުނިޔާވީ އެގޭގައެވެ. ގޭތެރެޔަށް ވަދެގެން އައިސް ، ތަހުނިޔާގެ ކޮޓަރީގެ ދޮރުމައްޗަށް މުރުތަޟާ ހުށްޓުނެވެ. އޭރު ތަހުނިޔާ އޮތީ އެނދުމައްޗަށް ބަންޑުން ވެއްޓި ގިސްލަ ގިސްލާފައި ރޯށެވެ.
މުރުތަޟާ ދޮރުގައި ޓަކިޖަހާލިތަނުން ސިއްސައިގެން ގޮސްފައި ތަހުނިޔާއަށް ، ފުންމައިގެން ތެދުވެވުނެވެ. ތަހުނިޔާގެ ލޮލުން ފައިބަމުންދިޔަ ކަރުނަތައް މުރުތަޟާއަށް ފެނުނެވެ. މުރުތަޟާ އެގެޔަށް އެއައީ ކީއްވެތޯ ، ތަހުނިޔާ ސުއާލުކުރިއެވެ. މުރުތަޟާ އެއައީ ތަހުނިޔާގެ ފަސްފަހަތް ބަލަމުންނެއްނޫނެވެ. ރޭގަނޑުގެ ދަންވަރު ގަޑީގައި ، އެއްވެސްމީހެއްގާތު ނުބުނެ ، ގެއިން ނުކުމެގެން ތަހުނިޔާ އައީ ނޫންތޯ މުރުތަޟާ ސުއާލުކުރިއެވެ.
މުރުތަޟާ ހީކުރީ ތަހުނިޔާއަކީ ނުވިސްނޭ މީހެއްކަމަށެވެ. އެކަމަކު ، އެއީ ކުށްހީއެއްކަމަށާއި ތަހުނިޔާއަކީ ، ގޮތްދޫނުކުރާމީހެއްކަމަށް މުރުތަޟާ ބުންޏެވެ. ތަހުނިޔާ އެކުރީ ވަރަށް ނުރައްކާތެރި ޢަމަލެކެވެ. ތަހުނިޔާގެ މައިންބަފައިންނަށް އެކަން އެނގިއްޖެނަމަ ، އެމީހުން ހީކުރާނީ ކީކޭ ހެއްޔެވެ ؟
" އަހަރެންގެ މައިންބަފައިންނާމެދު ، މުރުތަޟާ ވަރަށް ހަމްދަރުދީ ވަމެއްނޫން ހެއްޔެވެ ؟ އެމީހުންގެ ޖަޒުބާތާއި އިޙްސާސްތަކަށް އިޙްތިރާމްކުރަމެއް ނޫންހެއްޔެވެ ؟ އެކަމަކު ، އަހަރެންގެ އިޙްސާސްތަކާއި ހިތުގައިވާ ކެކުޅުންތައް މުރުތަޟާއަކަށް އިޙްސާސެއް ނުވެއެވެ. މުރުތަޟާއެވެ ! މިއީ އަހަރެންގެ ގެއެވެ. މިގޭގައި އަހަރެން ވަރަށް ހިތްހަމަ ޖެހެއެވެ. މުރުތަޟާ މިތަނުން ދާށެވެ ! " ތަހުނިޔާ ، ރޮމުންރޮމުން ބުންޏެވެ.
ތަހުނިޔާ ހިތްހަމަ ޖެހުނަސް ، މުރުތަޟާ ، އެކަމަށް ހިތްހަމައެއް ނުޖެހެއެވެ. މުރުތަޟާހުރީ ، ތަހުނިޔާ ގޮވައިގެންނޫނީ އެގެއިން ދާގޮތަކަށް ނޫނެވެ. އޭނާއާއެކީ ތަހުނިޔާ ދިއުމަށް މުރުތަޟާ އެދުނެވެ. އެހެނަސް ، ތަހުނިޔާ އެކަމަށް އިންކާރު ކުރިއެވެ. އަދި އެހުރިހާ ރަސްމީ ކަންކަމެއް ފުރިހަމަކުރުމުގެ ބޭނުމަކީ ކޮބައިތޯ ، ތަހުނިޔާ ސުއާލު ކުރިއެވެ.
" މުރުތަޟާ ތިހުރީ ވަކިގޮތަކަށް ނިންމައިގެން ނޫންހެއްޔެވެ ؟ އަހަރެންނަކީ ، މިއަދު ނޫނީ މާދަމާ މިގެޔަށް އަންނަން ހަމަޖެހިފައި އޮތްމީހެއްނޫން ހެއްޔެވެ ؟ " ތަހުނިޔާ އިތުރަށް ބުންޏެވެ.
މުރުތަޟާއަށް އެއީ މައްސަލައެއްނޫނެވެ. އެހެންނަމަވެސް ، އެކަމުގައި މުރުތަޟާ ޢަމަލުކުރަންވީ ގޮތެއް ނިންމުމުގެ ފުރިހަމަ އިޚްތިޔާރު ތަހުނިޔާއަށް ، އޭނާ ދިނެވެ. މުރުތަޟާގެ ހިތުގައިވާ ނުތަނަވަސްކަމާއި ، ކަންބޮޑުވުމަށް ވިސްނައިގެން ، މުރުތަޟާގެ ފަރާތުން ތަހުނިޔާއަށް ކުރިމަތިވާ ހިތްދަތިކަން އެއީ ކަމަކަށް ނުހަދައި ، މުރުތަޟާއާ އެކީގައި ތަހުނިޔާ އުޅެން ބޭނުންކަމަށް ވަންޏާ ، ތަހުނިޔާ ދޫކޮށްލުމަކީ ، މުރުތަޟާ ކުރާނެކަމެއް ނޫންކަމަށް ވަޢުދު ވިއެވެ. އަދި ރުއިން ހުއްޓާލުމަށް ތަހުނިޔާގެ ކިބައިން އެދުނެވެ.
ތަހުނިޔާ އެގެޔަށް އައީ ރޮއިލުމަށްކަމުގައި ތަހުނިޔާ ބުންޏެވެ. މިނިވަންކަމާއެކު ، ހިތްފުރެންދެން އޭނާއަށް ރޮވެންއޮތީ އަމިއްލަ ގޭގައެވެ. އޭރަށް ، އެހެންމީހަކަށް އެތަނެއް ނުފެންނާނެއެވެ. އަދި ، ހިތްއެދޭވަރަކަށް އޭނާ ރޮއި ، ހިތަށް ތަސައްލީއެއް ލިބުމަށް ބޭނުންވާކަމުގައި މުރުތަޟާގާތު ބުންޏެވެ.
އިރުކޮޅަކު މަޑުކޮށްލުމަށްފަހު ، މުރުތަޟާ ތެދުވެގެން ހިނގައިގަތެވެ. ތަހުނިޔާ ބަލައިލިއިރު ، މުރުތަޟާ ހުރީ ފައިވާނަކަށް ނާރައެވެ. އެއީ ކީއްވެތޯ ތަހުނިޔާ ސުއާލު ކުރިއެވެ. ( ނުނިމޭ )
Vvv.reethi