ބަރަކާތްތެރި ރަމަޟާންމަސް ، ފެށިގެންދާއިރު ، މުއުމިނާގެ ނަފްސު ޠާހިރުކޮށް ، އެމަހާ ބައްދަލުކުރުމަށް ތައްޔާރުވުމަކީ ، ކުރަންޖެހޭ ކަމެކެވެ. މިލިޔުމުގައި ބަޔާންކުރެވިފައި އެވަނީ ، މިކަމާބެހޭގޮތުން ، މުފްތީ ، ޑޮކްޓަރ އިސްމާޢީލް މެންކް ދެއްވާފައިވާ ދީނީ ތަޤްރީރެއްގެ ޚުލާޞާ އެވެ.
ބަރަކާތްތެރި ރަމަޟާން މަހަށް ، މުސްލިމުން މަރުޙަބާ ކިޔަނީ އަޅުކަމަކުންނެވެ. ރަމަޟާންމަހަށް ހަނދު ފެނުމާއެކު ކިޔާ ދުޢާއިންނެވެ. ﷲ ތަޢާލާގެ ޙަޟުރަތުގައި އަޅުގަނޑުމެން އެ ދުޢާގައި ދަންނަވަނީ ، މިބަރާކާތްތެރި މައްސަރުގެ ޘަވާބާއި ދަރުމަ އަޅުގަނޑުމެންނަށް މިންވަރުކޮށް ދެއްވުމަށެވެ. އެމައްސަރުގެ ޢަފޫއާއެކު ، ފުއްސެވުމާއި ރުއްސެވުމަށް ، އަދި އެއްފަހަރު ، ﷲ ގެ ޙަޟުރަތުގައި ދެންނެވުމެވެ.
ކޮންމެ މީހަކީވެސް ، ﷲ ތަޢާލާގެ ޢަފޫއަށް ބޭނުންޖެހިފައިވާނެ މީހެކެވެ. އެހެންކަމުން ، ކޮންމެ އިންސާނަކުވެސް ، މާފުކުރަންޖެހޭ ބަޔަކު ތިބޭނެއެވެ. ﷲ ގެ ޙަޟުރަތުން ތިމާގެ ކުށްތައް މަޢާފުކޮށްދެއްވުމަށް ދަންނަވާހިނދު ، އެހެންމީހުންނަށް ތިމާދޭންޖެހޭ މަޢާފުން ތިމާ ސަލާމަތްވެ ހުރުން މުހިންމެވެ. އެއީ އުނދަގޫ ކަމަކަށް ވެދާނެއެވެ.
ޢުމުރު ދުވަހަށްވެސް ހިތުންފިލުވައިލަން އުނދަގޫ ތަކުލީފެއް މީހެއްގެ ފަރާތުން ލިބިފައި އޮވެ ، އެކަން މަޢާފު ނުކުރެވި އޮވެދާނެއެވެ. އެފަދަ ބޮޑު ތަކުލީފެއްގައިވާ މީހާވެސް ، އަލުން އެމީހެއްގެ ފަރާތުން އިތުރު ތަކުލީފެއް އަތުވެދާނެކަން އެނގޭހިނދުވެސް ، އޭނާއަށް މަޢާފުކުރުން އެއޮތްގޮތަކަށް ދާން ދޫކޮށްލުމަކީ އެންމެ ބުއްދިވެރި ގޮތެވެ. އެމީހަކީ މަޢާފަށް އެދެން އެނގޭވަރަށްވުރެ ، ތަންދޮރު ނުފިލާމީހެއްނަމަ ، އެމީހަކު އެކަމަށް ނޭދުނަސް ، މަޢާފުކޮށްފައި ހުރެވިދާނެއެވެ. އެމީހެއްގެ ފަރާތުން ތަކުރާރުކޮށް ކުރިމަތިވާ އުނދަގުލާއި މުޞީބާތްތައް ހިތުގައި ބުރައެއްގެ ގޮތުގައި އޮތަސް ، އެއީ ކަމަކަށް ހަދައިގެން އުޅެގެން ހަލާކުވާނީ ، ޚުދު ތިމާގެ އަމިއްލަ ހިތެވެ.
މިއީ އިސްލާމީ ކަލަންޑަރުގައި ފާހަގަކުރެވޭ އެންމެ މުޤައްދަސް މައްސަރެވެ. ﷲ ގެ ޙަޟުރަތުން ، އެކަލާނގެ އަޅުތަކުންނަށް ޢަފޫކުރެއްވުމުގެ މައްސަރެވެ. މިމައްސަރަށް މަރުޙަބާކިޔާ ހިނދު ، އާކުރަންޖެހޭ ޢަޒުމަކީ ، މިމައްސަރުގެ ޘަވާބާއި ދަރުމައިން ، ނަފްސަށް މުއްސަނދިކަން ލިބުމަށްފަހު ، މަސްނިމުނަސް ، ކުރީގެ ނޭދެވޭ އާދަތަކަށް ، އަލުން އަނބުރާ އިޢާދަ ނުވާނެކަމުގެ ޢަޒުމެވެ. ބައެއްމީހުންނަށް ، ރަމަޟާންމަހުގެ އެންމެ ފަހުދުވަސްވެސް ނުލިބި ހިނގައިދާނެއެވެ.
މިމައްސަރަކީ ، ރޯދަޔަށް ޚާއްޞަވާ ، ރޯދަމަސް ފަދައިން ، ކީރިތި ޤުރުއާނަށް ޚާއްޞަވާ ، ޤުރުއާނުގެ މަސްވެސް މެއެވެ. މިމައްސަރަކީ ، މުއުމިނާއަށް ހަމަނިދި ނުލިބޭނެ މަހެކެވެ. އެއީ ، މުއުމިނަކަށްވީތީ ލިބޭ ފަޚުރެކެވެ. އެހެންމަސްތަކަށްވުރެ ބޮޑަށް އަޅުކަމުގައި ވަގުތު ހޭދަކުރަން ޖެހުމަކީ ، މި މައްސަރަށް ޚާއްޞަވެފައި އޮންނަ ކަމެކެވެ.
ކީރިތި ޤުރުއާން ކިޔެވުމަށް ކުރިމަތިލާއިރު ، ކިޔަވަން ފެށުމުގެ ކުރިން ފުރިހަމަކުރަންޖެހޭ ކަންކަމާ ކުރިމަތިލައި އެކަންކަން ފުރިހަމަ ކުރާނެއެވެ. ވީ އެންމެ ފުރިހަމަޔަކަށް ކީރިތި ޤުރުއާން ކިޔަވާނެއެވެ. އޭގެ މާނަ ފަހުމްކުރެވޭތޯ ބަލާނެއެވެ. ތަޖުވީދުމަގުން ، ކުށެއްނުލައި ރަނގަޅަށް ކިޔެވޭތޯ މަސައްކަތް ކުރާނެއެވެ. ކީރިތި ޤުރުއާނުގައި ﷲ ތަޢާލާ އަންގަވާފައިވާ ކަންކަމަށް އެ މުއުމިނާ ވިސްނާނެއެވެ.
ރަމަޟާންމަހަކީ ، އަޅުކަމަށް ޚާއްޞަވެފައިއޮތް މައްސަރަކަށްވުމާއެކު ، އެމައްސަރުގައި މުއުމިނާ އަދާކުރާ އަޅުކަން އެތައް ގުނަޔަކަށް އިތުރުވެގެން ދާނެއެވެ. ރަމަޟާންމަހަކީ މައްސަލަތައް ޙައްލުކުރުމުގެ މައްސަރެވެ. ގޭތެރޭގެ މައްސަލައެއް އުޅުނަސް ، ގޭގައި އެކަމަކާބެހޭ މީހަކާ ވާހަކަ ދައްކައިގެން އެކަން ޙައްލުކުރަން ވާނެއެވެ.
ރަމަޟާންމަހުގައި ދެން އެންމެ ގިނައިން ކުރަންޖެހޭ ކަމަކީ ، އެހެންމީހުންނަށް އެހީތެރިވުމެވެ. ޞަދަޤާތްދިނުން އިތުރު ކުރުމެވެ. ކިތަންމެ ކުޑަކަމެއްގައިވެސް ، މީހަކަށް އެހީތެރިވުމަށް ، ނުވަތަ އެހީތެރިކަމުގެ އަތެއް ދިއްކޮށްލުމަށް ފަސްޖެހިގެން ނުވާނެއެވެ.
ރަމަޟާންމަހަކީ ، ދީނުގައި ހުއްދަކުރެވިފައިވާ ތަކެތި ކެއުން މަނާކުރެވިފައި އޮންނަ މައްސަރެކެވެ. ރަމޟާންމަހުގެ ދުވާލުގެ ވަގުތުގައި ބަތެއް ނުކެވެއެވެ. ފެނެއް ނުބޮވެއެވެ. އެއީ އެހެންމަސްމަހުގައިވެސް މަނާއެއްޗެއް ނޫނެވެ. ރަމަޟާންމަހުގެ ދުވާލު ފެންބުއިން މަނާކުރެވިފައިވަނީ ކީއްވެގެން ހެއްޔެވެ ؟ ފެނުގައި އޮތް މައްސަލަޔަކީ ކޮބައި ހެއްޔެވެ ؟ ފެނުގައި އެއްވެސް މައްސަލައެއް ނެތެވެ.
ރަމަޟާންމަހަކީ ، އިސްރާފުކުރުން މަދުކުރަންޖެހޭ މައްސަރެކެވެ. ބޭނުންވާވަރަށްވުރެ ގިނައިން ، ކާބޯތަކެތި ތައްޔާރު ކުރެވެއެވެ. ނުކެވޭވަރަށް ސުފުރާމަތި ފުރާ ލެވެއެވެ.
އެންމެ ނިކަމެތިކަން ބޮޑުވެގެންވާ މީހަކީ ، އާޚިރަތަށް މަގުނުކޮށައި ، މިދުނިޔެއާ ވަކިވެގެންދާ މީހާއެވެ. އާޚިރަތަށް ކޮށަންޖެހޭ މަގު ކޮށުމަށްޓަކައި ، ﷲ ތަޢާލާ އިންސާނާއަށް ދެއްވާފައިވާ ފުރުޞަތުތައް ވަރަށް ގިނައެވެ. އޭގެ ތެރެއިން އެންމެ ބޮޑު އެއް ފުރުޞަތަކީ ، ބަރަކާތުން ފުރިގެންވާ ރަމަޟާން މަހެވެ. އެމަހުގައި އިންސާނާ ކުރާ ހެޔޮ ޢަމަލުގެ ޘަވާބު ، އެތައް ގުނަޔަކަށް މަތިކުރައްވާފައި ވެއެވެ.
ރަމަޟާންމަހަކީ ހުރިހާ ހެޔޮކަމެއްގެ މައްސަރެވެ. އެމައްސަރުގައި ލައްވާފައިވާ އެންމެހާ ހެޔޮކަންތައްތަކުން ، ވީ އެންމެ ގިނަހެޔޮކަމެއް ހޯދޭމީހަކީ ، އެންމެ ނަސީބުގަދަ މީހާއެވެ. ދުލަކީވެސް ، ރަމަޟާންމަހު ރައްކާތެރިކޮށްގެން ގެންގުޅެންޖެހޭ ގުނަވަނެކެވެ. ދުލަށް ރައްކާތެރިކަން ނުދެވިއްޖެމީހާ ، ރޯދަމަސް އެދުއްވައިލީ ބޭކާރު ގޮތުގައެވެ.
ބަރަކާތްތެރި ރަމަޟާންމަހުގެ އަޅުކަން ފުރިހަމަގޮތުގައި އަދާކޮށްފި މީހެއްގެ ހިތަށްލިބޭ ހިތްހަމަ ޖެހުމަކީ ، އެމީހެއްގެ ޢަމަލުތައް ﷲ ގެ ޙަޟުރަތުގައި ޤަބޫލުކުރައްވައިފިކަމުގެ ޢަލާމާތެވެ. އެފަދަ މީހުންގެ ޢަމަލުތައް ، ރަމަޟާންމަހަށްފަހުވެސް ސީދާކަންމަތީ ދެމިއޮންނާނެއެވެ. ހެޔޮ ޢަމަލަށް މީހާ އާދަވެ ، އެފަދަ ޢަމަލުތައް އިތުރުކުރުމުގެ މަތިވެރި ތަވްފީޤަކީ ، އެކުރި އަޅުކަމެއް ޤަބޫލުކުރައްވައިފިކަމުގެ ޢަލާމާތެކެވެ.
