ފަލްސަފާ (55)

( 18 ފެބުރުއަރީ 2024 ގައި ޝާއިޢުކުރި ބަޔާ ގުޅޭ )

ދިމާވެފައި އޮތް މުޞީބާތާ ކުރިމަތިލާނެ ގޮތަކާމެދު ވިސްނަން ކަންބޮޑުވެފައި ، ސިޓިންރޫމްގައި ޖައްސާލައިގެން ތަހުނިޔާ އިނީ އެކަންޏެވެ. މަންމަ އުޅެނީ ބަދިގޭގައެވެ. ބައްޕަ އަދި ކޮޓަރިޔަކުން ނުނުކުމެއެވެ. ހެނދުނުގެ ސައި ތަންކޮޅެއް ލަސްވެސް ވެއްޖެއެވެ. މަންމައާ ވާހަކަ ދައްކާލަން ، އެރޭ ވަރަށް ގިނައިރުވަންދެން ދެމައިން ތިއްބެވެ. ސާޖިދާއަށް ފަތިހު ނުހޭލެވުނު ސަބަބަކީ އެއީކަމަށް ވެދާނެއެވެ.

ތަހުނިޔާ ސިއްސުވައިލީ ، ޢާޞިފް އައިސް ، އޭނާއަށް ގޮވާލައި ، މުރުތަޟާ އަންނަނީ ކޮންއިރަކުންތޯ އަހާލި އަޑަށެވެ. ބައްޕަގެ ސުއާލަށް ދޭނެ ޙާޟިރު ޖަވާބެއް އެފަހަރު ، ތަހުނިޔާއަކަށް ނުފެނުނެވެ. އޭނާއަށް ހަމައެކަނި ބުނެވުނީ ، މުރުތަޟާ އަންނާނެ ކަމުގައެވެ. އެރޭ ގެޔަށް އައިފަހުން ، މުރުތަޟާއަކާ އަދި ވާހަކައެއް ނުދެއްކެއެވެ.

ރޭގައިވެސް ، ތަހުނިޔާގެ ފަރާތުން ޢާޞިފަށް ފެނުނީ ، ހާސްކަމާއި ކަންބޮޑުވުމެވެ. އެހާސްކަން މިހާރުވެސް ، ތަހުނިޔާގެ މޫނުމަތިން ފެންނަން އެބަހުއްޓެވެ. ކޮންމެވެސް ކަމެއް ގޯސްކޮށް ހިނގައިގެން އެބައުޅޭކަމުގެ ވަސް ، ޢާޞިފަށް ދުވިއެވެ. ތަހުނިޔާގާތަށް އައިސް ، ކައިރީހުރި ގޮނޑީގައި ޖައްސައިލިއެވެ. ތަހުނިޔާގެ ހިތުގައިވަނީ ކޮންކަހަލަ ތަކުލީފުތަކެއްތޯ ޢާޞިފް ސުއާލު ކުރިއެވެ. ތަހުނިޔާއަކީ ، ކުޑައިރުއްސުރެ ވަރަށް ސިޔާސަ ކުއްޖެކެވެ. ގޭގައި ހަމައެކަނިހުރި ކުއްޖާ ކަމަށްވާތީ ، ހިތުގައި ތަކުލީފުތަކެއް ހުންނާނެއެވެ. އުނިވާ ކަންތައްތަކެއް ހުންނާނެއެވެ. މިހާރު ތަހުނިޔާ އެހުރީ ބޮޑުވެފައެވެ. މިއީ ، ތަހުނިޔާގެ ހިތުގައި އުފާވެރިކަމުގެ އިޙްސާސް އުފެދެންވީ ދުވަހެވެ. ކައިވެނި ކުރެވި ، ރަނގަޅު ފިރިޔަކާއި އަޅާލާ ޢާއިލާއެއް ލިބިއްޖެއެވެ. އެމީހުން ތަހުނިޔާދެކެ އިންތިހާއަށް ލޯބި ވެއެވެ. އެ އުފާވެރިކަން ތަހުނިޔާއަށް ނުލިބިގެން އެއުޅޭ ސަބަބު އެއީ ، ޢާޞިފްގެ ހިތުގައި އުފެދިފައިވާ ވަރަށްބޮޑު ސުއާލެކެވެ.

ބުނާނެ ވަކި އެއްޗެއް ނޭނގި އިނދެމެ ، ބައްޕަޔާ ދިމާއަށް ތަހުނިޔާ ހީލިއެވެ. އެއްޗެކޭ ބުނަން އަނގަހުޅުވާލިތަނާ އޭނާގެ ފޯނު ރިންގވާން ފެށިއެވެ. އެއީ މުރުތަޟާގެ ފޯނެކެވެ. އެކަން ޢާޞިފަށްވެސް އެނގެއެވެ. މުރުތަޟާގެ ޢުމުރު ވަރަށް ދިގުކަމަށްބުނެ ތަހުނިޔާއާ ސަމާސާ ކޮށްލަމުން ، ހަމަޖެހިލައިގެން މުރުތަޟާއާ ވާހަކަ ދައްކާލާށޭ ބުނެ ، ޢާޞިފް އެތަނުން ދުރަށް ދިޔައެވެ.

ފޯނުނަގައި ، ސަލާމްވެސް ގޮވާނުލައި ، ބުނަންއޮތީ ކޮންވާހަކައެއްތޯ ތަހުނިޔާ ސުއާލު ކުރިއެވެ. މުރުތަޟާ ބުނަންއޮތް ހަމައެކަނި ވާހަކަޔަކީ ، އެންމެންވެސް އެދެނީ ތަހުނިޔާ އެނބުރި ގެޔަށް އައުން ކަމަށެވެ. ހުރިހާމީހުންވެސް ތިބީ ވަރަށް ކަންބޮޑުވެފައެވެ. އެންމެންވެސް ތިބީ ކަންބޮޑުވެފައިތޯ ތަހުނިޔާ ސުއާލު ކުރިއެވެ.

" އަހަރެންނާ ، މަންމައާއި ދައްތައާ އަދި އަރުސަލާން އާއި ...... " ލިސްޓް ކިޔަމުންގޮސް އިތުރު ނަމަކާ ދިމާއަށް މުރުތަޟާގެ ވިސްނުން އެދިޔައީ ބޭ އިޚްތިޔާރުގައެވެ. މުރުތަޟާއަށް ދެން ބުނެވުނީ ، އެމީހުންގެ ހިތްދަތިކަން އިތުރުވާނެ ކަމެއް ތަހުނިޔާ ނުކުރުމަށެވެ.

ހުރިހާކަމެއްގައިވެސް ކުށްވެރިއަކީ ތަހުނިޔާކަމުގައި ރީތިކޮށް ބުނެ ، ތަހުނިޔާގެ ބޮލުގައި އިލްޒާމްތަކެއް އެޅުވިގެންދިޔަކަން ތަހުނިޔާއަށް އިޙްސާސް ކުރެވުނެވެ. އެކަންކުރުން އެއީ މުރުތަޟާއަށް މާބޮޑުކަމަކަށް ނުވިއެވެ. އަނެއްކޮޅުން ، މުރުތަޟާގެ މައްޗަށް އެޅުވިގެންދާ އިލްޒާމްތަކުގެ ޖަވާބު ދެވޭނެ ފުރުޞަތު ، މުރުތަޟާއަށް ލިބިގެން ނުދާކަން މުރުތަޟާއަށް އިޙްސާސް ކުރެވުނެވެ. އެކަމާގުޅިގެން މުރުތަޟާއަށް ލިބިގެންދާ ތަކުލީފުތަކަށް ، އެއްވެސްމީހަކު ވިސްނައި ޚިޔާލުކޮށެއް ނުލައެވެ.

ތަހުނިޔާ ، މުރުތަޟާމެންގެޔަށް ދިޔައިމަ އަންނާނެ ބަދަލަކީ ކޮބައިހެއްޔެވެ ؟ އެބަދަލެއް ، ހަމަގައިމުވެސް ތަހުނިޔާއަކަށް ނުވިސްނެއެވެ. ތަހުނިޔާ މިއަދު ، އެގެޔަށް ދިޔަޔަސް ، ހުރިހާ އިލްޒާމެއް އެޅުވޭނީ އޭނާގެ ބޮލުގައެވެ. އެހެންކަމުން ، ގެޔަށް ދިއުމުގެ ބޭނުމެއް ތަހުނިޔާއަކަށް ނުވިސްނެއެވެ. ތަހުނިޔާއާއި މުރުތަޟާއާ ދެމީހުން ، ވާހަކަދައްކާލައި ، ޙާލަތަށް ރިޢާޔަތްކޮށް ، ދެމީހުންވެސް ވަކިކަންތައްތަކެއް ޤަބޫލުކޮށްފިއްޔާ ، ހުރިހާކަމެއް ހަމަޔަކަށް އެޅިގެން ހިނގައިދާނެކަމަށް ، މުރުތަޟާއަށް ޤަބޫލު ކުރެވެއެވެ. އެހެނަސް ، އެކަން ތަހުނިޔާއަކަށް ޤަބޫލެއް ނުކުރެވެއެވެ. ނޫރުއާއި މުރުތަޟާއާ ދެމީހުންނާބެހޭ ވާހަކަ ނުދައްކައި ، މުރުތަޟާއާއި ތަހުނިޔާއާ ދެމެދުގައި ވާހަކަތަކެއް ދައްކައިގެން ، މައްސަލަ ޙައްލު ކުރެވިދާނެކަމަށް މުރުތަޟާއަށް ފެންނަނަމަ ، އެދެމީހުން ވާހަކަ ދެއްކުމަކީ ، ތަހުނިޔާގެ ނަޒަރުގައި ބޭކާރު ކަމެކެވެ.

ތަހުނިޔާއާއި މުރުތަޟާއާ ދެމެދުގައި ދެކެވޭ ވާހަކަތައް އެއީ ، އެދެމީހުންގެ މެދުގައި  ދެކެވޭ ވާހަކަތަކެއްކަމަށް ބަލައިގެން ، ކުރިޔަށް ދެވިއްޖެނަމަ އެކަމުގައި އޮތް ފައިދާ މުރުތަޟާއަށް ވަރަށް ސާފެވެ. އަދި އެއީ ، މުރުތަޟާ ބޭނުންވެސްވާ ގޮތެވެ. އެހެން އެއްވެސްމީހަކު އެކަމުގައި ޝާމިލްކުރާކަށް މުރުތަޟާ ބޭނުމެއް ނޫނެވެ.

" މުރުތަޟާއެވެ ! އެ އަންހެންކުއްޖާގެ ނުފޫޒު ތިއޮތީ ، މުރުތަޟާގެ މުޅި ވިސްނުމާއި ފިކުރާ ކުޅެފައެވެ. މުރުތަޟާއަކީ އެއަންހެންކުއްޖާގެ ޙައްޤެއްކަމަށް އެބަ ދަޢުވާ ކުރެއެވެ. އަހަރެންނަށް ހީވާގޮތުގައި ، އަހަރެމެން ތިންމީހުންގެ ތެރެއިން ، ބޭރުކޮށްލެވިފައި މިހުރީ އަހަރެންނެވެ. އެކަމަކުވެސް އަހަރެންނަކީ ، މުރުތަޟާގެ އަނބިމީހާ އެވެ. މީ ކޮންކަހަލަ އިންސާފެއް ހެއްޔެވެ ؟ " ތަހުނިޔާގެ އަޑަށް ބާރުލާފައި ބުންޏެވެ.

ތަހުނިޔާ އެދެއްކި ވާހަކަތަކަކީ ، މުރުތަޟާއަށް އެހާ މުހިންމު ވާހަކަޔަކަށް ނުވިއެވެ. މުރުތަޟާގެ އެދުމަކީ ، އެންމެންގެ ތަކުލީފާއި އެންމެންގެ މަޞްލަޙަތަށް ބަލައި ، ތަހުނިޔާ އެނބުރި ، ހަވީރު ގެޔަށް އައުމެވެ. މުރުތަޟާގެ މަޞްލަޙަތާއި މުރުތަޟާގެ ނަން ، އެ އެންމެންގެ ތެރޭގައިވުމަށް ތަހުނިޔާ ހުރީ އެދިއެދިއެވެ. އެހެނަސް ، އެއީ މުރުތަޟާ އިސްކަންދޭކަމެއް ނޫނެވެ. އެންމެންގެ މަޞްލަޙަތަށް އަދިވެސް ބަލަންވީ ތަހުނިޔާއެވެ.

ތަހުނިޔާގެވެސް ހިތެއް އޮވެއެވެ. އެހިތްބުނާ އަޑުއަހަން ތަހުނިޔާވެސް ބޭނުމެވެ. ތަހުނިޔާ ބޭނުންވާ ގޮތް ، އެހިތް ބުނެދިނުމުގެ ބަދަލުގައި ، އެހެންމީހުންބުނާގޮތަށް ހަދައި ، އެހިތަށް ތަދުކުރާކަށް ތަހުނިޔާވެސް ބޭނުމެއްނޫނެވެ.

ތަހުނިޔާ ބޭނުންގޮތަކަށް ހަދާށޭ ބުނެ ، މުރުތަޟާ ފޯނު ކަނޑައިލިއެވެ. މުރުތަޟާއާ ވާހަކަ ދައްކާލައިގެންވެސް ތަހުނިޔާއަކަށް ހަމަޖެހުމެއް ނުލިބުނެވެ. މުރުތަޟާގެ ފަރާތުން ތަހުނިޔާ ބޭނުންވާގޮތް ޙާޞިލެއް ނުކުރެވުނެވެ. ހިތަށް ލިބިފައިވާ ހާސްކަމާއި ތަކުލީފު ، ވީ އިތުރެވެ. މުރުތަޟާ ބޭނުންވީކަމެއްވެސް ނުފުދުނެވެ. ތަހުނިޔާއާ ނުލައި ހަވީރު ގެޔަށް ނައުމަށް މަންމަ އޮތީ އޭނާގާތު ބުނެފައެވެ. އެކަން ކުރެވޭކަށް ނެތެވެ.

ތަހުނިޔާގެ ފޯނު މޭޒުމަތީ ބޭއްވުމަށްފަހު ، އެނބުރިލިތަނާ އޭނާއަށް އެފެނުނީ ، އެތާ ކައިރީ މަޑުކޮށްލައިގެންހުރި ، އޭނާގެ ބައްޕައެވެ. އެ ބައްޕަގެ މޫނުމަތިން ފާޅުވާންހުރި ސުއާލުތަކަށް ޖަވާބު ލިބިއްޖެއެވެ. އެއީ ، ތަހުނިޔާގެ މިއަދުގެ ޙާލަތެވެ. އިހަށްދުވަހު ، މީހަކާ ދެވާފަ އެގެއިން ، ޢާޞިފް ފޮނުވައިލި ، އޭނާގެ ދަރިފުޅަށް ކުރިމަތިވެފައިވާ ތަކުލީފެވެ. ތަހުނިޔާއާ އިތުރު ސުއާލެއް ނުކުރިޔަސް ޢާޞިފަށް ބޭނުންވާ ޖަވާބު ލިބިއްޖެއެވެ. މުރުތަޟާ ކޮބައިތޯ އަހައި ، މުރުތަޟާގެ ވާހަކަ ދައްކައިލެވޭ ހިނދު ، ތަހުނިޔާއަށް ލިބޭ ހަމަހިމޭންކަމުގެ ސިއްރަކީ އެއީކަން ޢާޞިފް ދެނެގަތެވެ.

ކަންބޮޑުވެފައިހުރެ ، ތަހުނިޔާ އޭނާގެ ބައްޕަޔަށް ގޮވައިލިއެވެ. ޢާޞިފްހުރީ އެކުރިމަތިވެގެން އުޅޭ އެއްވެސްކަމެއް ނޭނގިއެވެ. އެކަހަލަ އެއްވެސް ވާހަކައެއް އެއްވެސް މީހަކު ، އޭނާގާތަކު ނުބުނެއެވެ. ހުރިހާކަމެއް އޮތީ އޭނާއަށް ސިއްރު ކުރެވިފައެވެ. ތަހުނިޔާވެސް އަދި ސާޖިދާވެސް އޭނާގާތު އެއްވެސް ވާހަކައެއް ނުބުނެވެ. ނުރުހުމުގެ ޢިޝާރާތަކަށް ބޯހޫރައިލުމަށްފަހު ، އެއްވެސް އެއްޗެކޭ ނުބުނެ ، ޢާޞިފް އޭނާގެ ކޮޓަރިޔަށްގޮސް ވަނެވެ.

މުރުތަޟާއިނީ ، އޭނާކުރި މަސައްކަތް ފެނަށްދިޔައިމަ ، އެކަމާ ބޯހާސްވެގެން ނިތްކުރިމަތީ ދެއަތް އަޅައި މޫނު ފޮރުވައިގެންނެވެ. ފޯނު ރިންގވާއަޑަށް ސިއްސައިގެންގޮސް ފޯނު ބަލައިލިއިރު އެއީ އޭނާގެ މަންމަގެ ފޯނެކެވެ.

މުރުތަޟާއާ ފުރަތަމަވެސް ކުރިމަތިވީ މަންމަގެ ސުއާލެވެ. އޭނާގެ ސަލާމްވެސް ބަލައި ނުގަނެއެވެ. ޙަފުޞާ ބޭނުންވީ ، މުރުތަޟާ ހަވީރު ގެޔަށް އަންނައިރު އަންނާނީ ، ތަހުނިޔާ ގޮވައިގެންކަން ކަށަވަރު ކުރުމަށެވެ. މުރުތަޟާގެ ޖަވާބަކަށްވީ ނޫނެކެވެ. އޭނާއަށް އެކަން ކުރެވޭކަށް ނެތެވެ. އެނބުރި ގެޔަށް އަންނަންވީ މަގު ، ތަހުނިޔާއަށް އެނގޭނެއެވެ. އެހެންމީހަކު ، މަގުދައްކާކަށް ނުޖެހޭނެއެވެ.

އެކަމާ ޙަފުޞާއަކަށް ހިތްހަމަޖައްސައެއް ނުލެވުނެވެ. ޙަފުޞާއަށް ނިންމުނީ ، އެކަންކުރަން މުރުތަޟާ ބޭނުންނުވާ ކަމުގައެވެ. އެހެނަސް ، އެވަރުގެ ކުޑަކުޑަ ކަމަކުންވެސް ، ދިރިއުޅުމުގެ ރާސްތާ ފަސޭހަވެގެން ހިނގައިދާނެކަން ، ޙަފުޞާ ، މުރުތަޟާއަށް ހަނދާން ކޮށްދިނެވެ. ތަހުނިޔާ ބަލައި މުރުތަޟާ ހިނގައްޖެނަމަ ، ތަހުނިޔާގެ ހިތުގައި މުރުތަޟާގެ މައްޗަށް ، އަލުން އިތުބާރު އުފެދޭނެއެވެ. މުރުތަޟާ ހިނގައްޖެނަމަ ، ތަހުނިޔާ އުފަލުން އަންނާނެއެވެ. އެކަން މުރުތަޟާއަށް ނުވިސްނޭތީ ޙަފުޞާހުރީ ކަންބޮޑުވެފައެވެ. އެމައްސަލަ ޙައްލުކުރަން މުރުތަޟާ ބޭނުންވާ ގޮތާއި ، ޙަފުޞާ ބޭނުންވާގޮތުގައި ތަފާތުތަކެއް އެބަހުއްޓެވެ. އެކަމުގައި ދެމައިންގެ ވިސްނުން އެއްގޮތެއް ނޫނެވެ. ޙަފުޞާ ބޭނުންވަނީ ކުއްލި އަދި ވަގުތީ ޙައްލެކެވެ. މުރުތަޟާ މަސައްކަތް ކުރަމުން އެގެންދަނީ ، އެކަމަށް ދާއިމީ ޙައްލެއް ހޯދޭތޯއެވެ.

މުރުތަޟާ ، ތަހުނިޔާއަށް ފޯނުކުރި ވާހަކައާއި ، ތަހުނިޔާ އަތުވެދާނެކަމަށް މުރުތަޟާއަށް ނުފެންނަ ވާހަކަ ބުނުމުން ، ޙަފުޞާގާތަށް އައި ރުޅި އަދިވަކިން ގަދަވިއެވެ. މަންމައަށްޓަކައި މިއަދު އެގެޔަށް ދާން ، ގަދަ އަމުރުން އަމުރުކުރުމަށްފަހު ، ޙަފުޞާ އޭނާގެ ފޯނު ކަނޑައިލިއެވެ.

އެކަކާ ނުލައި އަނެކަކަށް އުޅެވޭކަށް ނެތެވެ. އެކަމަކު ، އެކަކުވެސް ގުޅޭކަށް ނެތެވެ. އެންމެންނަކީވެސް އެމީހެއްގެ ގޮތުގައި ރަނގަޅު މީހެކެވެ. މުރުތަޟާ ދެލޯ މަރައިލިއެވެ. އޭނާއަށް ކުރެވޭނެ އިތުރުކަމެއް ، އެކަމުގައި ނެތްކަން މުރުތަޟާއަށް ވިސްނުނެވެ. މަންމަ ކަމަށްވިޔަސް އޭނާއަށް ކުރެވެން ނެތްކަމެއްގައި ، ހެދޭނެ އިތުރުގޮތެއް އޭނާއަކަށް ނުފެނުނެވެ. މުރުތަޟާގެ ބޮލުގައިވެސް އެހާވަރަށް ރިއްސައެވެ. އެކަން އެނގޭމީހަކު މި ދުނިޔެއަކު ނެތެވެ. ކައިރީގައި އޮތް ޕެންޑޯލްގުޅަ ނެގުމަށްފަހު ، ފެންފޮދެއް ބޯލައި ބޭސްކައިގެން ، އަނެއްކާވެސް ، މުރުތަޟާ އޭނާގެ ދެލޯ މަރައިލިއެވެ.

******************************

ތަހުނިޔާމެންގެ ގޭތެރޭގައި އޮތީ ހިތްދަތިކަމާއި ހާސްކަމެވެ. އެކަމަށް ޙައްލެއްލިބެން އޮތް ހަމައެކަނި ގޮތަކީ ، މުރުތަޟާ ، އޭނާގެ ގޮތްދޫކޮށްލައި ، ނޫރުލްޢައިނުއާ ވަކިވުމެވެ. އެނޫންގޮތަކަށް ، ތަހުނިޔާގެ ދިރިއުޅުމަށް ކުރިމަގެއް ފެންނާނެކަމަކަށް ސާޖިދާއަކަށްވެސް ނުފެނެއެވެ. ޢާޞިފުގާތު އެވާހަކަ ދައްކާނެގޮތެއް ސާޖިދާއަކަށް ނޭނގުނެވެ.

އެހުރިހާކަމެއްވެގެން ދިޔައިރުވެސް ، ތަހުނިޔާގެ ފަރާތުންވެސް އަދި ސާޖިދާގެ ފަރާތުންވެސް ، ޢާޞިފަށް އެއްވެސް ކަމެއް އަންގައި ނުލާތިބީތީ ، ޢާޞިފުހުރީ ހިތްހަމަ ނުޖެހިފައެވެ. ވެގެންއުޅޭގޮތެއް އޭނާއަށް ރަނގަޅަށް ސާފުކޮށްދިނުމަށް ، ޢާޞިފު އެދުނެވެ. އޭނާގެ އަޑުގައިވަނީ ހަރުކަށިކަމެވެ. ހިތްހަމަ ނުޖެހުމާއި ރުޅިވެރިކަމެވެ. އެއްވެސްކަމެއް ރަނގަޅަށް އެނގުމަކާނުލައި އެއްވެސް ނިންމުމެއް އިންސާނަކު ނިންމައިފިނަމަ ، އެމީހަކު ލޯބިވާމީހުން އެކަން ބަލައިގަންނަން ޖެހޭނެއެވެ. ތަހުނިޔާގެ ހިތުގައިވާ އުދާސްކަމާއި ކަންބޮޑުވުން ޢާޞިފަށް އިޙްސާސް ކުރެވެއެވެ.

ޢާޞިފަށް ޤަބޫލު ކުރެވޭގޮތުގައި ، ތަހުނިޔާގެ މައިދައިތަ ޙަފުޞާއާއި ފަހަރި ޠާހިރާއަކީ ، ޚުލްޤު ރަނގަޅު ދެމީހުންނެވެ. އެދެމީހުންވެސް ތަހުނިޔާދެކެ އިންތިހާއަށް ލޯބިވެއެވެ. ތަހުނިޔާއަށް ކަމޭ ހިތައެވެ. އެފަދަބަޔަކު ލިބޭނީ ، ވަރަށް ނަސީބުގަދަ އަންހެން ކުއްޖަކަށެވެ. ސާޖިދާވެސް އެކަމަށް އެއްބަސްވިއެވެ. މުރުތަޟާއަށް ބަލާއިރު ، އެއީ ނުލިބޭފަދަ ދަނބިދަރިއެކެވެ. ޢާއިލާގެ އެންމެންވެސް ބަލަހައްޓަމުން އެގެންދަނީ ، އެހާ އަޅައިލުމާއި އޯގާތެރިކަމާއެކު ، ލޯބިންނެވެ.

ޢާޞިފަށް ، މުރުތަޟާ ފެންނަނީ ، އެގެ ބަލަހައްޓައި ރައްކާތެރިކަމާއެކު ، އާބާދުކުރާނެ މީހެއްގެ ގޮތުގައެވެ. އެހެން ނޫންނަމަ ، މުރުތަޟާ ، އިރުއިރުކޮޅުން ތަހުނިޔާއަކަށް ނުގޮވާނެއެވެ. މުރުތަޟާ ، މަގުން ކައްސާލާނަމަ ، ހެޔޮމަގަށް އެޅުވުމަކީ ، ތަހުނިޔާގެ ކަމެއްކަމުގައި މުރުތަޟާ ދެކެއެވެ. ތަހުނިޔާގެ އޯގާތެރިކަމާއި ލޯތްބަކީ ، އެކަމަށް ބޭނުންކުރެވިދާނެ އެންމެ ފުރިހަމަ ހަތިޔާރެވެ.

" ބައްޕާއެވެ ! އެކަމަކު ނޫރުލް ޢައިނު ..... " ތަހުނިޔާގެ ވާހަކަ ، ޢާޞިފް ވަގުތުން ހުއްޓުވިއެވެ. ތަހުނިޔާއާ ދިމާއަށް ހަޅޭއްލަވައިގަތުމުން ، ތަހުނިޔާއަށް ސިހުންލިބި އޭނާގެ ވާހަކަ ހުއްޓުނެވެ.

ނޫރުލްޢައިނުގެ ވާހަކަ ދައްކާނެކަމެއް ނެތެވެ. އެއީ ކީއްކުރަން ދައްކާ ވާހަކައެއްތޯ ޢާޞިފް ސުއާލު ކުރިއެވެ. އެހެންމީހުންގެ ވާހަކަ ނުދައްކާށެވެ ! އެހެންމީހުންގެ ވާހަކަ ދައްކައިގެން ، ދުވަހަކުވެސް އެވާހަކަތަކެއް ހުހެއް ނުވާނެއެވެ. ( ނުނިމޭ )