ރާއްޖޭގެ ކުރީގެ ނާއިބުރައީސް އަހުމަދު އަދީބުގެ ހާލު ކުރިއަށްވުރެ ދެރަކަމަށް އެމަނިކުފާނުގެ ގާނޫނީ ވަކީލު މޫސާ ސިރާޖު ވިދާޅުވެއްޖެއެވެ.
ރާއްޖޭގެ ބައެއް މީޑިއަމް ތަކަށް މައުލޫމާތު ދެއްވަމުން ސިރާޖު ވިދާޅުވެފައިވަނީ އަދީބުގެ ހާލުކޮޅު ދެރަކަން ފާހަގަ ކުރެވުނީ ދުވަސް ތަކަށްފަހު އެމަނިކުފާނާ މިއަދު ބައްދަލުވުމުންނެވެ.
އަދީބާ ބައްދަލު މިވީ ބައްދަލު ނުވާތާ 18 ވަރަކަށް ދުވަސް ފަހުން ކަމަށް ސިރާޖުވަނީ ވިދާވެ. މިއަދުވެސް ބައްދަލުވީ ވަރަށް މަސައްކަތުން ކަމަށްވެސް ވިދާޅުވެފައިވެއެވެ. މިމަހު ފުރަތަމަ ދުވަހު ސްޕްރީމް ކޯޓުން ނެރުނު އަމުރަށްފަހު މިއަދުނޫނީ ވަކީލުންނާ އަދީބާ ބައްދަލުވެފައި ނުވާކަމަށް އޭނާ ވިދާޅުވެފައިވެއެވެ.
ތަފާތު އެކި ކުށްކުރިކަން އެމަނިކުފާނުގެ މައްޗަށް ކޯޓުގައި ސާބިތުވުމުން އެމަނިކުފާނު ގެންދަވަނީ 33 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އިތުރު މައްސަލަތަކެއްގެ ތުހުމަތު މިހާރުވެސް އެމަނިކުފާނުގެ އިސްތަށިފުޅުގައި ވަނީ އެޅިފައެވެ. އެ މައްސަލަތައްވެސް ގެންދަނީ ބަލަމުންނެވެ.
އެމަނިކުފާނުގެ ހާލު ދެރަވެ ވަރަށްފަހުންވަނީ ޖަލުގޮޅިއަށް ވެއްޓިވަޑައިގެންފައެވެ. އެ ދުވަހު ހޭފުޅުލެއްވުނީ ޖަލު އޮފިސަރަކު އެމަނިކުފާނުގެ އިސްތަށިފުޅަށް ފެން އެޅުމުން ކަމަށް ސިރާޖު ވިދާޅުވެފައިވެއެވެ.
އަދީބާ މިއަދު ބައްދަލު ކުރެވުނީ އާންމު އުސޫލާ ޚިލާފަށް މިދުވަސްވަރު ފުލުހުން ހަމަޖައްސާފައިވާ ގަވާއިދިގެ ދަށުން، 30 މިނިޓަށް ކަމަށް ސިރާޖުވަނީ ވިދާޅުވެފައެވެ. އެގޮތަށް ހަމަޖެއްސެވީ ކުއްލި ނުރައްކަލުގެ ހާލަތު އިއުލާން ކުރައްވައިފައި އޮތުމުން ކަމަށް ފުލުހުންވަނީ ވިދާޅުވެފއެވެ.
