މިމަހު ފުރަތަމަ ދުވަހު ސްޕރީމް ކޯޓުން ކޮށްފައިވާ ހުކުމް ތަންފީޒު ކުރަންދެން އައްޑޫގައި މުޒާހަރާ ކުރާނެ ކަމަށް އެމްޑީޕީގެ އައްޑޫދާއިރާގެ ނާއިބު ރައީސް އިބްރާހީމް ރަޝީދު (އިބުރޭ) ވިދާޅުވެއްޖެއެވެ.
އިބުރޭ ވިދާޅުވީ އިއްޔެއާއި، މިއަދު މުޒާހަރާ ކުރިފަދައިން ކުރިއަށްއޮތް ދުވަސްތަކުގައިވެސް މުޒާހަރާ ކުރިއަށްދާނެ ކަމަށެވެ. "ސްޕްރީމްކޯޓުގެ ހުކުމް ތަންފީޒު ކުރަންދެން މި މުޒާހަރާތައް މެދުކެނޑުމެއްނެތި ކުރިއަށްދާނެ،" އޭނާ ވިދާޅުވިއެވެ.
އޭނާ ވިދާޅުވީ ސްޕްރީމް ކޯޓުގެ ފަސް ފަނޑިޔާރަކު ސޮއިކުރައްވައި ފަސް ފަނޑިޔާރުންގެ އިއްތިފާގުން ނެރެފައިވާ ހުކުމެއް ތިން ފަނޑިޔާރަކަށް ބާތިލް ކުރެވޭނެ ކަމަށް ގަބޫލު ނުކުރައްވާ ކަމަށެވެ. އެހެންކަމުން ކުރީގެ ހުކުމް ތަންފީޒު ކުރަންޖެހޭނެ ކަމަށް ގަބޫލުކުރާ ކަމަށެވެ.
އިއްޔެއާއި މިއަދު އައްޑޫގައި ބޭއްވި މުޒާހަރާގައި އެއްވެސް މީހަކު ހައްޔަރު ކޮށްފައެއް ނުވެއެވެ. އެހެންނަމަވެސް މިއަދު މުޒާހަރާގައި ފުލުހުން މުގުރުން ޖެހުމުން ކޮންމެ ވަރަކަށް އަނިޔާވި ކަމަށް އިބްރާހީމް ރަޝީދު ވިދާޅުވިއެވެ. "ފުލުހުން މުގުރުން ޖެހުމުން ނޭވާލާން އެވަގުތު ވަރަށް ދަތިވި. އެކަމަކު ފަސްޓްއެއިޑަށްފަހު ވަރަށް ބޮޑަށް ރަނގަޅުވެފައިހުރީ،" އޭނާ ވިދާޅުވިއެވެ. އިތުރު ފަރުވާއަށް ހޮސްޕިޓަލަށް މިރޭ ދާނެކަމަށް އޭނާ ވިދާޅުވިއެވެ. މާދަމާވެސް މުޒާހަރާ ކުރިއަށްދާނެ ކަމަށް އޭނާ އޭނާ ވިދާޅުވިއެވެ.
