އާންމު ރައްކާތެރިކަމާއި މުޖުތަމައުގެ ދުޅަހެޔޮކަން ކަށަވަރުކޮށް ރައްޔިތުން ހޭލުންތެރިކުރުވުމަށް ފުލުހުން ކުރަމުންދާ މަސައްކަތުގެ ތެރެއިން، ރ. ހުޅުދުއްފާރު ފިހާރަތައް އިންސްޕެކްޓު ކުރުމުގެ ހަރަކާތެއް ކުރިއަށް ގެންގޮސްފިއެވެ.
މި ޖަނަވަރީ މަހުގެ 21 ވަނަ ދުވަހު ކުރިއަށް ގެންދިޔަ މި ހަރަކާތަކީ ހުޅުދުއްފާރު ޕޮލިސް ޕޯސްޓާއި ރަށު ކައުންސިލު ގުޅިގެން ކުރިއަށް ގެންދިޔަ ހަރަކާތެކެވެ.
މި އިންސްޕެކްޝަންގައި ފިހާރަތަކުގެ ސަލާމަތީ ފިޔަވަޅުތައް އަޅާފައިވާ މިންވަރު ދެނެގަނެ، އާންމު ސިއްހަތަށް ކުރިމަތިވެދާނެ ނުރައްކާތައް ދެނެގަނެ ވިޔަފާރިތަކުގެ ސަލާމަތީކަންކަން ކަށަވަރުކޮށްފައިވެއެވެ. އެގޮތުން، ފިހާރަތަކުގައި ސަރވޭލަންސް ކެމެރާ ހަރުކޮށްފައި ހުރިކަން ކަށަވަރުކުރުމާއެކު އެ ކެމެރާތަކަކީ މިހާރު ވެސް ބޭނުންކުރަމުންދާ ކެމެރާތަކެއްކަން ދެނެގަތުމާއި، ތަނުގެ ވަށައިގެންވާ އަލިކަމުގެ ހާލަތު ބަލާފައިވެއެވެ.
އޭގެ އިތުރުން، މުއްދަތު ހަމަވެފައިވާ އަދި މުއްދަތު ހަމަވާން ކައިރިވެފައިވާ އުފެއްދުންތަކުގެ އިންވެންޓްރީ ބަލައި އުފެއްދުންތަކުގެ ތާޒާކަން ގަވާއިދުން ބެލުމަށް ފިހާރަތަކުގެ ވެރިންނަށް ނަސޭހަތްތެރިވެފައިވެއެވެ. އަދި ސިއްހީ އަދި އަލިފާނުގެ ހާދިސާތަކުން ސަލާމަތްވުމަށް އަޅާފައިވާ ފިޔަވަޅުތައް ބަލައި އިތުރަށް ރަނގަޅުކުރަންހުރި ކަންކަން ބުނެދީ އެކަންކަން ރަނގަޅުކުރުމަށް އިލްތިމާސްކޮށްފައިވެއެވެ.
މި ޕްރޮގްރާމުގެ ތެރެއިން ރަށުގެ ރައްޔިތުންނާއި ވިޔަފާރިވެރިން އަހުލުވެރިކުރުވުމަށް ސަލާމަތީ ރަނގަޅު އުސޫލުތަކާ ބެހޭ މައުލޫމާތު ފޯރުކޮށްދީފައިވެއެވެ. އަމާން ރައްކާތެރި މާހައުލެއް ގާއިމުކުރުމަށް ފުލުހުންކުރަމުންދާ މަސައްކަތުގައި ހުޅުދުއްފާރު ރައްޔިތުންގެ ފަރާތުން ވަރަށްބޮޑު އެއްބާރުލުމެއްދަނީ ލިބެމުންނެވެ.
