(26ނޮވެމްބަރ 2023 ގައި ޝާއިއުކުރި ބަޔާ ގުޅޭ)
ގެޔަށް އައިސް ، ކޮޓަރިޔަށްވަދެ ، ހަމައިސްކޮޅަށްހުރި ލޯގަނޑުކައިރީ ނޫރު ހުއްޓިލިއެވެ. ނުދައްކަން އުޅުނަސް ، އޭނާގެ ހިތުގައި އަނދަމުން އެދާ އަލިފާންގަނޑުގެ ހޫނު ، ބޭރުން ފެންނަވަރު ވެއެވެ. މޫނުމަތީގައި ފާޅުވާންހުރި ނުތަނަވަސްކަން ، ޚުދު ނޫރުގެ އަމިއްލަ ނަފުސަށްވެސް ސިއްރެއް ނުކުރެވެއެވެ. ހިތުގައި އޮބިއަޅައި އެހިތް މައިތިރިކޮށް ، ގަދަކަމުން ހިނިތުންވެލައިގެން ، ނޫރުގެ މިޒާޖުން އެރޭ ދައްކަމުން އެދިޔަ ސިއްރު އިޙުސާސްތައް ، މުރުތަޟާއަށްވެސް އަދި ތަހުނިޔާއަށްވެސް ފެނުނެވެ.
ނޫރު ، އޭނާގެ އޮމާން މޫނުގައި އަތްކާއްތައިލިއެވެ. މޭގައި އަތްއަޅައި އޮއްބައިލިއެވެ. އޭނާގެ ކުރިމައްޗަށް ސިފަވަމުން އެދަނީ ، މުރުތަޟާގެ ކައިވެނީގެ ރަސްމިއްޔާތަށްވުރެ މާކުރިން ފެށިގެން ، އުފެދިގެން ކުލަޖެހެމުންދިޔަ ، އޭނާގެ މާޒީއާ ގުޅިފައިވާ ހަނދާންތަކެވެ. މުރުތަޟާއާއި އޭނާގެ ލޯބީގެ ބައްދަލުވުންތަކުން ފެށިގެންނެވެ. ދެބަސްވުންތަކުން ފެށިގެން ، އެއުފެދޭ ހިތްހަމަ ނުޖެހުންތަކުގައި އެކަކު އަނެކަކަށް ދޫކޮށް ، މާފުކޮށް ފުރާފުރިހަމަވަމުންގޮސް ، އެދެހިތުގައިވާ ލޯބި ފުރާވަރަށް އެޅެމުން ދިޔަ ދުވަސްތަކުގެ އެކި ހަނދާންތަކެވެ. އަދި އެންމެފަހުން ، މުރުތަޟާއާއި ތަހުނިޔާގެ ކައިވެނީގެ އެކި މަންޒަރު ތަކެވެ. މުރުތަޟާ ، އޭނާގެ އަންހެނުން ތަހުނިޔާގެ އަތުގައި ހިފައިލައިގެން ، ކޮޓަރިއާ ދިމާލަށް ހިނގަމުން ، ފިޔަވަޅުއަޅަމުންދިޔަ ފީތާތަކެވެ. ލޯތްބަކީވެސް ހާދަ ފާޑެއްގެ އެއްޗެކެވެ. އޭގެ އުފެދުމުގެ ފޮނިކަން ގަދަވަމުންގޮސް ، ނިމޭއިރު ފޮނިމާމުޔަށްވުރެ ފޮނިކަން ގަދައެވެ. އޭގެ ފޮނިކަން ، ހިތި ޒަހަރަށް ބަދަލުވެގެން ދާކަށް މާގިނަ ވަގުތެއް ނުނަގައެވެ. އެއަށްފަހު އެހިތުގައި އަޅާ ވޭނަކި ، ބައެއްމީހުންގެ މަރެވެ. އަނެއްބަޔެއްގެ ދިރުމެވެ. އިހުނަށްވުރެ ގަދަ ލޯތްބަކުން ، އެހިތް ތާޒާކޮށް ، ބައެއްމީހުން ދުނިޔެއަށް ނެރެއެވެ. އެކަމަކު ، އެއީ ވަރަށް ހިތްވަރުގަދަ މީހުންގެ ކަމެކެވެ.
ފަހަތުގައިހުރި މީހަކު ، އޭނާއަށް ގޮވައިލި އަޑަށް ، ނޫރު ސިއްސައިގެންގޮސް އެނބުރިލިއެވެ. އެއީ ރައިދާއެވެ. ދޮރުގައި ޓަކިޖަހާޖަހާ ނުހުޅުވީމަ ، ރައިދާއަށް ކޮޓަރިޔަށް ވަދެވުނީއެވެ. އެކަމަށް ، އޭނާ ނޫރުގެ ކިބައިން މާފަށް އެދުނެވެ. ނޫރު ، ހިންދިރުވައިލުމަށްފަހު ، ހިތުގައިހުރި އުދާސްތައް އެތެރެޔަށް ދަމައިލަމުން ، ފަހަރިޔާ ވާހަކަ ދައްކަން ފެށްޓިއެވެ. ކަމެއްވީހެންވެސް ހިއެއް ނުވެއެވެ. އެހެނަސް ، ރައިދާއަކަށް ނޫރުގެ އެ ހިންދިރުވައިލުމުން އެތެރެޔަށް ދުއްވައިލި އުދާހުގެ އަސަރެއް ނުފޮރުވުނެވެ. ރައިދާ އެއައީވެސް ، ނޫރުގެ ޙާލަށް ހަމްދަރުދީވެ ، ނޫރުގެ ކަންކަން ހުރިނެތްގޮތް ބަލައިލުމަށެވެ. ދެފަހަރިންގެ ވާހަކައިގެ ތެރެއިން ، ރައިދާ ބުނި އެއްޗަކާ ކުރިމަތިލާން ނޫރުއަށް ޖެހުނެވެ. ރައިދާކުރީ ސުއާލެކެވެ. ނޫރު މީހަކާ ނީނދެ ހުންނާނީތޯ ރައިދާ އެހިއެވެ.
" އަތުން ބީވެގެންދާ ތަކެއްޗަކީ ، އޭގެ ފަހަތުން ދުވެ އަތުވެދާނެ އަދި ހަމަ އެފަދައިން އަތުނުވެދާނެ އެއްޗެކެވެ. އަހަރެންނަކީ ، އަހަރެންނަށް ބޭނުންނުވާ ތަކެއްޗަށް ހިތްކިޔާ މީހެއްނޫނެވެ. ނުލިބި ، ގެއްލިދާ ތަކެތީގެ ފަހަތަކުން އަހަރެންނެއް ނުދުވާނަމެވެ. އަހަރެން ބޭނުމީ ، އެ ގެއްލިގެންދާ އެއްޗަކަށްވުރެ އަގުހުރި އެއްޗެއް ޙާޞިލުކުރުމަށެވެ. އަހަރެން ދެން ހަދާނެގޮތަކަށް ފަހަރި ނިކަން ، އިންތިޒާރު ކޮށްގެން ހުންނާށެވެ. އަހަރެންނަކީ ބޭކާރުމީހެއްކަމަށް ހެދުމަށް ފުރުޞަތެއް ނުދޭނަމެވެ. އިރާދަ ކުރެއްވިއްޔާ އަހަރެންނަކީވެސް ، އަންހެނެއްކަން ދުނިޔެއަށް ، ނިކަން ދައްކައިލާނަމެވެ. އަހަރެންނާއި މުރުތަޟާގެ ގުޅުމަށް ވެގެން އެދިޔަގޮތަކީ ދެރަގޮތެއްކަމަކަށް އަހަރެންނެއް ނުދެކެވެ. އެކަން އެވީ އޮތް އެންމެ ރަނގަޅަށެވެ. އަހަރެންގެ ދިރިއުޅުން އާބާދުކޮށް ބާއްޖަވެރި ކުރާނީ އަހަރެން އެދޭގޮތަށެވެ. " ނޫރު ބުންޏެވެ.
ހިނިތުންވެލުމާއެކު ، ނޫރު އޭނާގެ ފަހަރިއާ ގާތަށްޖެހިލައި ، ކޮފީތަށްޓެއް ބޯލަން ހިނގާށޭ ބުނެ ، ދެފަހަރިން ކޮޓަރިން ނުކުމެ ބަދިގެއާ ދިމާއަށް މިސްރާބު ޖެހިއެވެ.
ތަހުނިޔާ އިނީ ، މުރުތަޟާގެ ކޮޓަރީގައި އިށީނދެލައިގެންނެވެ. އޭނާއާ އެކީ އެތާއިނީ އަރުސަލާނެވެ. ޠާހިރާ އެތަނަށް އައިސް ، ދައްތަޔަށް އުނދަގޫނުކޮށް ، އަރުސަލާންގެ ކޮޓަރިޔަށް ދާށޭބުނެ ، ދަރިފުޅު ފޮނުވައިލިއެވެ. އެއަށްފަހު ، ތަހުނިޔާގާތު އެނދުމަތީ ޖައްސައިލިއެވެ. މުރުތަޟާވީ ، އެރަސްމިއްޔާތަށް އޮފީހަށް އައި މީހުންނާއެކު އަނގަތަޅައިލަން ، ތިރިޔަށް ގޮހެވެ. އެމީހުން ނުގޮސް ގިނައިރުވީ ، މުރުތަޟާއަށް ގެނައި ހަދިޔާއެއް ޙަވާލުކުރަން ވެގެންނެވެ. އެމީހުން ވަނީ ، މުރުތަޟާއަށް ނާންގައި 7 ދުވަހުގެ ޗުއްޓީއެއް މުރުތަޟާއަށް ހޯދައިދީފައެވެ. އަދި ހަނީމޫނަށް ދިއުމަށްޓަކއި ދެމީހުންގެ ޓިކެޓް ، އެމީހުން މުރުތަޟާއާ ޙަވާލު ކުރިއެވެ. އެހަދިޔާ ޤަބޫލު ނުކުރަން މުރުތަޟާ ގަދަހެދިނަމަވެސް ، އެންމެފަހުން އެކަމަށް އެއްބަސްވިއެވެ. އެހެންނަމަވެސް ، މުރުތަޟާގެ މޫނުމަތިން ފެންނަމުންދާ ހިތި އަސަރުގެ އިޙްސާސް އެމީހުންނަށް ފެނުނެވެ. އެކަން މުރުތަޟާއަށްވެސް އެއުޅެނީ ސިއްރު ނުކުރެވިގެންނެވެ. ހަނީމޫނަށްގޮސް ، ކުރާނީ ކީއްކަމެއް މުރުތަޟާއަކަށް ނޭނގެއެވެ.
ތަހުނިޔާގެ މޫނުމަތިން ފާޅުވާންހުރި ނުތަނަވަސްކަމާއި ހިތްހަމަ ނުޖެހުން ، ޠާހިރާ ދެނެގަތެވެ. އަދި ، ތަހުނިޔާ ހަމަޖައްސައިލުމަށްޓަކައި ވާހަކަ ދައްކަން ފެށްޓިއެވެ. ހުރިހާކަމެއް އެހާ އަވަހަށް ވެ ނިމިދާގޮތްވީމައި ، ތަހުނިޔާއަށް ލިބިފައިވާ ހާސްކަން އެއީ ، ޠާހިރާވެސް ޤަބޫކުކުރާ އެއްޗެކެވެ. ހިތި އަސަރަކުން ފެށުނުނަމަވެސް ، ދުވަސްވަމުން ދިޔަވަރަކަށް ، އެކަން ހަމަޔަކަށް އެޅެމުން ދާނެއެވެ. ދިރިއުޅުމުގެ އެކިފިޔަވަހިތަކުން ދިރިއުޅުމަށް އަންނަ އުފާވެރިކަމާގުޅިގެން ، އެދެމީހުންނަށް ހަމަޖެހުން ލިބޭނެކަމުގައި ޠާހިރާ ބުންޏެވެ. އެއީ މާދުރުގައި އޮތްކަމެއްނޫނެވެ. އެންމެ މުހިންމު ކަމަކީ ، އެކުރެވުނު ކައިވެނިން އެކަކު އަނެކެއްގެ މައްޗަށް ލާޒިމްކުރާ ވާޖިބުތައް ، ތެދުވެރިކަމާއި އަމާނާތްތެރިކަމާއެކު އަދާކުރުމެވެ. ދެމީހުންގެ ވިސްނުން އެއްގޮތްކޮށް ، އެކަކު އަނެކަކަށް ދޫކޮށްގެން ، ދިރިއުޅުމުގެ ކާމިޔާބީތަކާ ހަމަޔަށް ވާޞިލުވުމެވެ. ގޯސް ވިސްނުންތަކުން ދެމީހުންގެ އުޅުމާއި ގުޅުމާ އަދި ހިތްވެސް ސާފުކުރުމެވެ. ކުރިމަތީގައި އޮތް ރީތި އަދި ބާއްޖަވެރި ދިރިއުޅުމަށް ދެމީހުންވެސް ޖާގަ ދިނުމެވެ.
" ޠާހިރާއެވެ ! އެކަންކަމާ ކަނބޮޑުނުވާށެވެ ! ކާރު އިސްޓާރޓް ކޮށް ހިންގައިލުމުގެ ކުރިން އެކްސިޑެންޓެއް ވުމަށް ތައްޔާރުވުމުގެ މާނައެއް ނެތެއްނޫން ހެއްޔެވެ ؟ " ތަހުނިޔާ ، ޠާހިރާއަށް ޖަވާބުދިނެވެ.
ތަހުނިޔާގެ ޖަވާބުން ، ޠާހިރާ ކަންބޮޑެއް ނުވެއެވެ. ތަހުނިޔާއަށް ވެފައި އިންގޮތް ޠާހިރާއަށް އެނގެއެވެ. ޠާހިރާ ވިސްނައިދެމުން ގެންދިޔައީ ، އޭނާގެ ކޮއްކޮ ، މުރުތަޟާއަކީ ގޯސްމީހެއްނޫންކަމުގައެވެ. ރަނގަޅުމީހުންނަށް އިޙްތިރާމްކޮށް ޤަދަރު ކޮށްފިނަމަ ، ބަދަހި ގުޅުމެއް އުފެދިގެން ދާނެއެވެ. ތަހުނިޔާއަކީ ނަސީބުގަދަ މީހެކެވެ. ދެމީހުން ގުޅިގެން ، އެކުގައި ކުރިޔަށް ހިނގައިދިއުމުގެ ފުރުސަތު އެބަ އޮތެވެ. އެކަންކުރުމުގައި ތަހުނިޔާގެ ޒިންމާ ވަރަށް ބޮޑުވާނެއެވެ. މުރުތަޟާއާއެކީ ދިރިއުޅުމުގައި ، ޝަކުވާކުރާނެ އެއްވެސް ފުރުސަތެއް މުރުތަޟާއެއް ނުދޭނެއެވެ. ޠާހިރާ އެދައްކަނީ މުރުތަޟާ ދައްކަންހުރި ވާހަކަ ތަކެކެވެ. ފަހަރެއްގައި މުރުތަޟާއަށް ނުދެއްކިދާނެ ވާހަކަ ތަކެކެވެ. އެވާހަކަތައް ތަހުނިޔާގާތު ބުނުމަށް މުރުތަޟާ ބޭނުން ނުވެދާނެއެވެ. ކޮންމެ ގޮތެއްވިޔަސް ، ޠާހިރާ އެދެއްކީ ގޯސްވާހަކައެއް ނޫނެވެ. އެއީ ތަހުނިޔާ ބަލައިގެންފި ވާހަކަތަކެއްކަމަށް އެއްބަސްވުމުގެ ގޮތުން ، ބޯ ޖަހައިލިއެވެ. އެވަގުތު ، މުރުތަޟާ އައިސް އެކޮޓަރިޔަށް ވަނެވެ. ތަހުނިޔާގާތު ، އެނދުގައި އިށީނދެލައިގެން ދައްތަ އިންތަން ފެނިފައި މުރުތަޟާ ހުއްޓިލިއެވެ. މުރުތަޟާ އައިކަން އެނގުމާއެކު ، ޠާހިރާ އޭނާއާ ދިމާއަށް ހީލުމަށްފަހު ، ކޮޓަރިން ނުކުތެވެ.
މުރުތަޟާ ދޮރުލައްޕާލައި ، މަޑުމަޑުން ހިނގާފައި އައިސް ، ކަރުކެހިލުމަށްފަހު ، ތަހުނިޔާ އެއިނީ ކީއްވެފައިތޯ ސުއާލު ކުރިއެވެ. މުރުތަޟާ އެ ޢިޝާރާތްކުރީ ތަހުނިޔާގެ މޫނުމަތިން ފާޅުވާންހުރި ކަންބޮޑުވުމަށެވެ. ކައިވެނީގެ ފުރަތަމަ ރެއެވެ. މުރުތަޟާއާއި ތަހުނިޔާގެ ކައިވެނި އެ ކުރެވުނީ ، އެދެމީހުން އެކަކު އަނެކަކަށް ރަނގަޅަށް ދަސްވެސް ނުވަނީހެވެ. ލޯބީގެ ވާހަކަ ކީއްކުރަން ހެއްޔެވެ ؟ ދުނިޔަވީ އެއްވެސް ވާހަކައެއްވެސް ، އެދެމީހުން މީގެކުރިން ދައްކައިލާފައެއް ނުވެއެވެ. ކުރެވުނު ނަމަ ކުރެވިފައި އޮތީ އެމީހުންގެ ކައިވެންޏާމެދު ، އެކަކު އަނެކަކު ކަންބޮޑުވާ ކަންކަމުގެ ވާހަކަ ، ހިތްހަމަ ނުޖެހުމެއްގެ ތެރެއިން ފާޅުކުރެވިފައި އޮތުމެވެ.
ތަހުނިޔާގެ މޫނުމަތީގައިހުރި ވަރުބަލިކަން މުރުތަޟާ ފާހަގަ ކުރިއެވެ. އެހާ އަވަހަށް ކައިވެނި ކުރެވުނީމަ ، އެކަމާގުޅުންހުރި ކަންކަމުގައި އަވަދިނެތި އުޅެން ހަދައިގެން ، ތަހުނިޔާ އެހުރީ ވަރަށްބޮޑަށް ވަރުބަލިވެފައެވެ. ދުވަސްކޮޅަކުން އެވަރުބަލިކަން ފިލައިފާނެއެވެ. އެއީ ، މުރުތަޟާ އެހާބޮޑަށް ވިސްނަންވީކަމެއްނޫނެވެ. ތަހުނިޔާ ލައްވާ ، މަންމަ މަސައްކަތްކުރުވާ ގޮތެއްގެ މައްޗަށް ބިނާވެފައި އޮންނާނެ ކަމެކެވެ. ތަހުނިޔާއަކީ ، އޭނާގެ އަމިއްލަ ގޭގައިވެސް ގޭތެރޭގެ މަސައްކަތްކުރަން އާދަވެފައިހުރި ކުއްޖެއްނޫނެވެ. އެކަން ، ޙަފުޞާއަށް އެނގިފައި ނެތުމަކީ ، އެކަށީގެންވާ ކަމެކެވެ. ސާޖިދާ ހިތްހަމަ ނުޖެހިދާނެތީ ، ޙަފުޞާވެސް ، އެކަހަލަ އެއްވެސް ވާހަކައެއް ސާޖިދާއަކާ ނުދައްކައެވެ. ސާޖިދާ އެހާ މީރުކޮށް ކައްކާތީ ، ޙަފުޞާގެ ވިސްނުމަކަށްވެފައި އޮންނާނީ ، ތަހުނިޔާއަށްވެސް މީރުކޮށް ކައްކަން އެނގޭނެކަމަށް ކަމުގައި ވެދާނެއެވެ. ތަހުނިޔާގެ އެއްވާޖިބަކަށްވާނީ އެކަމެވެ. ގޭގެ އެންމެންނަށް ކައްކައި ކާންދީ ގޭތެރެ ބެލެހެއްޓުމެވެ. އެހެނަސް ، އެއީ ތަހުނިޔާއަށް ދަސްވެ ، އެކަމަށް އާދަވެފައިހުރި ކަންކަމެއްނޫނެވެ.
ތަހުނިޔާއަށް ދިނުމަށްޓަކައި މުރުތަޟާ ގެނައި ހަދިޔާ ލެވުނުތަނެއް ނޭނގިގެން ، ކޮޓަރީގެ އެތަންމިތަން ހޯދަމުން ގެންދިޔައެވެ. ކޮޓަރިތެރެއިން ، އެއެއްޗެއް ނުފެނިގެން ، އެންމެފަހުން ބޭރަށް ނުކުމެ ، އެހިފައިގެން އައިސް ތަހުނިޔާއަށް ދިއްކޮށްލިއެވެ. އެއީ ، ތަހުނިޔާއަށް އޭނާދޭ ހަދިޔާއެއްކަމަށް ބަލާށޭ ބުނަމުންނެވެ. އަދި ތަހުނިޔާއަށް އެހަދިޔާ ކަމުދާނެކަމަށް ބަލަމޭ ބުނަމުންނެވެ.
" ކޮންމެ އެއްޗަކީވެސް ، އެއެއްޗެއް އޮންނަންވީ ތަނެއްގައި އޮންނާނެ އެއްޗެކެވެ . އަދި ، އޭގެ ހަނދާނުން އިންސާނުންގެ ހިތަށް ތަދުވާވަރަށް ހަނދާންވެ ، ތަކުލީފަކަށް ހަދާނެއެވެ. " މުރުތަޟާއާ ދިމާއަށް ބަލައިލަމުން ، ތަހުނިޔާ ބުންޏެވެ.
މުރުތަޟާގެ ފޯނު ރިންގްވާންފެށީމަ ، މުރުތަޟާއާއި ތަހުނިޔާއާ ދެމީހުންނަށް އެއްފަހަރާ ބަލައިލެވުނެވެ. އެއީ ނޫރުގެ ފޯނެކެވެ. މުރުތަޟާ އެބަލައިދިޔަ އެއްޗެއް ބަލައި ދިޔައީ އެނދުމަތީ ފޯނު ބާއްވާފައެވެ. މުރުތަޟާ އައުމުގެ ކުރިންވެސް ދެފަހަރަށް ނޫރު ގުޅައިފިއެވެ. އެހެންނަމަވެސް ، ރިންގވަމުން ވަމުންގޮސް ފޯނު ކެނޑުނުއިރުވެސް ، ތަހުނިޔާ އެފޯނެއް ނުނަގައެވެ. އެއީ ނޫރުގެ ފޯނެއްކަން ، ތަހުނިޔާއަށް އެނގެއެވެ. އެހެންނަމަވެސް ، އެވަގުތު ، އެފޯނު ނެގުމަކީ އެހާ މުނާސަބުކަމެއް ކަމަކަށް ތަހުނިޔާއަކަށް ނުފެނުނެވެ. އަމްދުން ، މުރުތަޟާގެ ފޯނަށް އަންނަ ކޯލް ނެގުން އެއީ ތަހުނިޔާ ކުރާނެކަމެއްނޫނެވެ. އެއީ ކޮންމެ މީހެއްގެ ފޯނެއްކަމަށްވިޔަސް ، ތަހުނިޔާ ، މުރުތަޟާގެ ފޯނަކާ ނުބެހޭނެއެވެ. މުރުތަޟާ އެ ފޯނުނަގައި ކަނޑައިލިއެވެ. މުރުތަޟާއާ ދިމާއަށް ބަލަހައްޓައިގެން އިރުކޮޅަކު އިނުމަށްފަހު ، ތަހުނިޔާ ތެދުވެގެން ބޭރަށް ނުކުތެވެ. ތަހުނިޔާ ބޭރަށް ދިޔައީ ، މުރުތަޟާއަށް ނޫރު ގުޅައިގެން އެކަމާ ހިތްހަމަ ނުޖެހިގެންނެއްނޫނެވެ. ޙާލަތުގެ ނާޒުކުކަން މުރުތަޟާއަށް ވިސްނައިދޭން ވެގެންނެވެ. އެކައިވެންޏާ ގުޅިފައިވާ އެތައްކަމެއް ، އެދެމީހުންގެ ދެމެދަށް ވަންނާނެކަން ތަހުނިޔާއަށް އެނގެއެވެ. އޭގެ ތެރެއިންވެސް ސަލާމަތްވާން އުނދަގޫވާނީ ނޫރުގެ ފަރާތުން އަންނަ ކަންކަމެވެ. އެކަމަކު ، ތަހުނިޔާއަށް އެއީ މައްސަލައެއްނޫނެވެ. ނޫރުއާއި މުރުތަޟާގެ ގުޅުމުގެ ޙަޤީޤަތް އެންމެ ރަނގަޅަށް އެނގޭނެ އެކަކީ ތަހުނިޔާއެވެ. އޭގެ ތަކުލީފުތައް އުފުއްލަން ، ތަހުނިޔާ އެހުރީ ތައްޔާރުވެގެންނެވެ.
ނޫރު ގުޅަމުން އެގެންދަނީ އޭނާގެ އިޚުތިޔާރުގައެއްނޫނެވެ. ގެޔަށް އައިސް ވަދެ ، ހިތާދެކޮޅަށް އޭނާގެ ނަފުސަށް ލިބެމުންއެދިޔަ ހާސްކަމުގެ ސަބަބުން ، ނޫރުގެ ނޭވާކުރުވިއެވެ. މެޔަށް ތަދުވާގޮތްވިއެވެ. ނޭވާކުރުވެގެންގޮސް ، ހާސްކަން ބޮޑުވާން ފެށީމަ ، ބެލްކަންޏަށް ނުކުމެ ، ސާފުވައިލިބޭގޮތަށް މަޑުކޮށްލައިގެންހުރެ ، އަމިއްލަ ނަފްސު ކޮންޓްރޯލްކުރެވޭތޯ ބަލަމުން ގެންދިޔައެވެ. އެހެންނަމަވެސް ، އެކަމެއް ނޫރުއަކަށް ނުވިއެވެ. މުރުތަޟާއަށް އޭނާއަށް ފޯނުކުރެވުނީ އިޚުތިޔާރަކު ނޫނެވެ. އެކަމަކު ، މުރުތަޟާ ފޯނު ނުނެގީމަ ، ހިތަށް ލިބުނު ހާސްކަން އަދި ވަކިން ބޮޑުވިއެވެ. މޭގައި އަތްއަޅައިގެން ގުދަށް އޮވެ ، މުރުތަޟާއަށް އަނެއްކާވެސް ގުޅިއެވެ. މުރުތަޟާ ކަނޑައިލި ފޯނަކީ އެއީއެވެ. ކުރިން ދެފަހަރަށް ގުޅީމަވެސް ފޯނު ނުނަގާފައި ، އެންމެފަހުން ގުޅިފަހަރު ފޯނު ކަނޑައިލީމަ ، ނޫރުގެ ހިތަށް ކުރި އަސަރުން ނޭވާ ނުލެވޭވަރުވިއެވެ. ބޮލަށް އެނބުރުން އަރައިގެން ގުދުވެލި ވަގުތު ، ނޫރުއަށް ފެނިގެން އެދިޔައީ ، ކުރިމަތީހުރި މުރުތަޟާމެންގޭގެ ބެލްކަންޏެވެ. އެއީ ، ނޫރުއާއި މުރުތަޟާގެ ލޯބީގެ އެތައް ބައްދަލުވުންތަކެއްގައި އެތައް އިރެއް ހޭދަކުރެވިފައި އޮތް ތަނެކެވެ. ބައެއް ރޭރޭ ، ދަންވަންދެންވެސް މުރުތަޟާގެ ގެޔަށްގޮސް ، މުރުތަޟާއާއެކު ނޫރުގެ ވަގުތުތައް ހޭދަކޮށްފައި ވެއެވެ. އެދެމީހުންގެ ލޯބީގެ އެތައް ފިރުމުންތަކަކަށް އެބެލްކަނީ ހެކިވާނެއެވެ.
އެގޭގެ ބެލްކަނީ ފެނުމާއެކު ، ނޫރުގެ ހަށިގަނޑުން ބޭރުވަމުން އައި ނޭވާ އިތުރަށް ކުރުވިއެވެ. އޭނާގެ ހަށިގަނޑުގައި ހަތަރުފަރާތުން ފިއްތެމުންއައި ދަނގަޑު ދައްޗެއްގައި ޖެހުނު ކަހަލައެވެ. ގަދަކަމުން ނޭވާލަމުންގޮސް ، މަޑުމަޑުން ބެލްކަނީގެ ތަޅުންމައްޗަށް ތިރިވިއެވެ. އޭނާގެ އަތުގައި އޮތް ފޯނު ، އެވަގުތު އޮތީ ތަޅުންމައްޗަށް ވެއްޓިފައެވެ. އެވަގުތު ، ފޯނު ރިންގް ވާން ފަށައިފިއެވެ. މަޑުމަޑުން ، އެފޯނަށް ނޫރު ބަލައިލިއެވެ. އެއީ މުރުތަޟާގެ ކޯލެކެވެ. ނޫރުގެ މޫނުމައްޗަށް ހިނިތުންވުމެއް ވެރިވިއެވެ. ކުއްލިޔަކަށް ފޯނު ނެގިއެވެ. އޭނާގެ ހަށިގަނޑުގައި އަޅަމުންދިޔަ ހުރިހާ ވޭނެއް ، އެއްފަހަރުން ފިލައިދިޔައެވެ. ފުންނޭވާއެއް ލުމަށްފަހު ، ހިނިތުންވުމާއެކު ، އޭނާގެ އިސްކޮޅަށް ހިންދެމިލިއެވެ. އަދި ، ފޯނުނަގައި މުރުތަޟާއާ ވާހަކަ ދައްކަން ފެށްޓިއެވެ. ނޫރުއަށް ގޮވައިލެވުނީ ހަމައެކަނި މުރުތަޟާގެ ނަމުންނެވެ.
" ނޫރު ތިކުރަނީ ކޮންކަމެއް ހެއްޔެވެ ؟ މިއީ ކޮންފަދަކަމެއް ހެއްޔެވެ ؟ އަހަރެން ދިރިހުއްޓަކަވެސް ނުދެއެވެ. މަރުވިޔަކަވެސް ނުދެއެވެ. " ނޫރުއާ ދިމާއަށް މުރުތަޟާ ހަޅޭއްލަވައިގަތެވެ.
ނޫރުއަށް އެއީ މައްސަލައެއް ނޫނެވެ. މުރުތަޟާއަށް ނޫރުގެމަތިން ހަނދާން ނައްތައި ނުލެވޭނެކަން އެނގެއެވެ. މިރެޔަކީ ، މުރުތަޟާގެ ކައިވެނީގެ ރެޔެވެ. ތިމާގެ އަލަތު އަނބިމީހާއާ ވާހަކަ ދައްކާލައި ، ހިތްއުފާކޮށްލަން ، އަނބިމީހާގާތުގައި އޮތުމުގެ ބަދަލުގައި ، މެންދަމު ބާރަޖެހިއިރު ، މުރުތަޟާ ވާހަކަދައްކަމުން އެގެންދަނީ ނޫރުއާއެވެ. އެކަން އެނގިއްޖެމީހެއްގެ ހިތަށް އަރާނީ ކީކޭ ހެއްޔެވެ ؟ އެމީހެއްގެ ހިތަށް އަރާނީ މިހާރުވެސް ، ނޫރު އެއީ މުރުތަޟާއާއި ތަހުނިޔާއާ ދެމެދަށް އެޅިފައިވާ ހުރަހެކޭ ނޫންހެއްޔެވެ. ( ނުނިމޭ )
varah varahves reethi