ދިވެހީންގެ ރާއްޖެ ދިވެހީންނަށް ހޯދައިދިނުމަށް ރައީސް ޑރ. މުއިއްޒުއަށް ވަގުތު ބޭނުން ކަމުގައި މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހުމަދު ޝިޔާމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައި މިވަނީ ކުރީގެ ރައީސް އަބްދުﷲ ޔާމީން އާއި ރައީސް ޑރ. މުހައްމަދު މުއިއްޒު އާ ދެމެދު ޚިޔާލުތަފާތުވުންތަކެއް އުފެދިފައިވާ ދަނޑިވަޅެއްގައެވެ.
މިކަން ކުރެވޭނީ ހުރިހާ ފަރާތްތަކެއް، ވަކިން ހާއްސަކޮށް ޕީޕީއެމް-ޕީއެންސީގެ މެންބަރުން އެއްބާރުލުމާއި އެހީތެރިކަން ދީގެން ކަމަށް ވެސް ޝިޔާމް ވިދާޅުވިއެވެ. އަދި ރައްޔިތުން އެދޭ އަމާޒަށް ގައުމު ގެންގޮސް ދެއްވައި، ރައީސް ޑރ. މުއިއްޒަށް އެންމެ ފުރިހަމައަށް އެއްބާރުލުން ދީ އެ މަނިކުފާނާ ހަވާލު ކުރެއްވި ގައުމީ މަސްއޫލިއްޔަތު އެންމެ ފުރިހަމައަށް އަދާކުރައްވާނެ ކަމަށް ވެސް ޝިޔާމް ވިދާޅުވިއެވެ.
މީގެ އިތުރުން މި ގައުމާއި ރައްޔިތުންނަށް އިހުލާސްތެރި މަސައްކަތްތަކެއް ކޮށްދެއްވައި ދިވެހީން ގެނައި މި އުއްމީދީ ސަރުކާރު ދަމަހައްޓަން އެންމެ ކުރީސަފުގައި މަސައްކަތް ކޮށްދެއްވާނެ ކަމަށް ވެސް ޝިޔާމް ވިދާޅުވިއެވެ.
ޝިޔާމް ވިދާޅުވީ 19 ވަނަ މަޖިލީހާއެކު، ޕާޓީގެ ނައިބު ރައީސެއްގެ ވެސް މަސްއޫލިއްޔަތާއެކު، މަޖިލީހުގައި އިދިކޮޅު ޕާޓީއެއްގެ ގޮތުގައި މަދު މެންބަރުންކޮޅަކާ އެކު ސަރުކާރު ޖަވާބުދާރީ ކުރުވުމުގެ މުހިއްމު މަސްއޫލިއްޔަތު ވެގެން ދިޔައީ ބުރަ އަދި އެހާމެ އުނދަގޫ މަސައްކަތަކަށް ކަމަށެވެ. އަދި އެންމެ ބޮޑު ގޮންޖެހުމަކަށް ވީ ޕާޓީގެ ރައީސް، ޔާމީން ހައްގުނޫން ސިޔާސީ ހުކުމެއްގައި ޖަލުގައި ގައިދުކޮށްގެން އެމަނިކުފާނުގެ އިންތިހާބީ ހައްގު ސަރުކާރުން ނިގުޅައިގަނެގެން ކުރިމަތިކުރުވި ދަތި ދުވަސްތައް ކަމަށެވެ.
އިންތިހާބީ ރައީސެއްގެ ގޮތުގައި ރައީސް ޑރ. މުއިއްޒު ކުރީގެ ސަރުކާރަށް ކުރެއްވި ފުރަތަމަ އިލްތިމާސަކީ ޔާމީން ކުޑަމިނުން ގެކޮޅަށް ބަދަލު ކޮށްދެއްވުމަށް އެދިވަޑައިގަތުން ކަމަށް ފާހަގަ ކުރައްވަމުން ޝިޔާމް ވިދާޅުވީ އެ އިލްތިމާސާ އެއްގޮތަށް ރައީސް ޔާމީން ގެކޮޅަށް ބަދަލުކުރެވުނު ކަމަށެވެ.
މީގެ އިތުރުން ރައީސް ޑރ. މުއިއްޒު އާއެކު ރައްޔިތުންގެ ވަރަށް ގިނަ އުންމީދުތަކެއް ވާކަމަށާއި ރައްޔިތުން އެ މަނިކުފާނު ވެރިކަމަށް އިންތިހާބު ކުރަން ޖެހުނު ސަބަބުތަކެއް ވެސް އެބަހުރި ކަމަށެވެ. މި ގޮތުން ދިވެހިން އަޅުވެތިކަމަށް ދާން ބޭނުން ނުވާކަމަށާއި އިސްލާމްދީން މަތިވެރިކުރުމާއި ގައުމު ދަރަނިން ސަލާމަތް ކުރަން ބޭނުންވާކަމަށް ޝިޔާމް ވިދާޅުވިއެވެ. އަދި ސުލްހަވެރި އަމާންވެއްޓެއް ގާއިމު ކުރަން ބޭނުންވާ ކަމަށާ ތަރައްގީއާއި ތަމައްދުން އަދި އުފާފާގަތި ފުދުންތެރި ދިރިއުޅުމެއް ދިވެހިން ބޭނުން ވާކަމަށް ޝިޔާމް ވިދާޅުވިއެވެ.
