ވެރިކަމަށް ވަޑައިގެންނެވުމަށް ވެފައިވާ ވައުދުތަކަކީ ސިއްރުކޮށްގެން ފޮރުވާނެ ކަންތައްތަކެއް ނޫން ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެެވެ.
އެމަނިކުފާނު މިހެން ވިދާޅުވީ ނޫސްވެރިންނާއި މީޑިއާގައި މަސައްކަތްކުރާ ފަރާތްތަކާއި ބައްދަލުކުރެއްވުމަށް ސޯޝަލް ސެންޓަރުގައި ބޭއްވި ޚާއްޞަ ހަފްލާގައި ވާހަކަފުޅު ދައްކަވަމުންނެވެ.
ޑރ. މުއިއްޒު ވިދާޅުވީ އެކަންކަން ކުރައްވާނީ ވަރަށް އިޚުލާސްތެރި ކަމާއިއެކު، ދެފުށް ފެންނަ ގޮތަކަށް ހާމަކަން ބޮޑު ގޮތެއްގައި ކަމަށެވެ. އަދި ކެމްޕޭންގައި ވެވަޑައިގެންފައިވާ ކޮންމެ ވައުދެއް ރައްޔިތުންނަށް ފެންނަން ހުންނާނޭ ކަމަށެވެ.
އެގޮތުން ވެފައިވާ ވައުދުތަކާއި ދައްކަވާފައިވާ ވާހަތަކުގެ ފޮތެއް ނެރޭނެ ކަމަށާއި އެފޮތުން ވަރަށް ސާފުކޮށް ވެވަޑައިގެންފައިވާ ކޮންމެ ވައުދެއް ތަނާއި، ވަގުތާއި އެކު ފެންނަން ހުންނާނޭ ކަމަށް މުއިއްޒު ވިދާޅުވިއެވެ.
ސަރުކާރަކީ ދެފުށްފެންނަ ހާމަކަން ބޮޑު ސަރުކާރަކަށް ވާނެކަމަށާއި އެގޮތުން ސަރުކާރުގެ މަޢުލޫމާތުތައް މީޑިއާއަށް ލިބޭނެ ފަސޭހަ އިންތިޒާމެއް ފަހިކޮށްދެއްވާނެކަމަށް ވެސް އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވިއެވެ.
