އަޑު ނީވޭ " ދިވެހިރާއްޖޭގެ އަޑު "

ރޭޑިއޯ ބްރޯޑްކާސްޓިން ، ރާއްޖޭގައި އެންމެ ފުރަތަމަ ފެށުނީ ، މީގެ ފަސްދޮޅަސް އަހަރުކުރިން ،  29 ޑިސެމްބަރ 1962 ގައި " މާލޭ ރޭޑިއޯ " ގެ ނަމުގައެވެ. ފެށުމުގައި ބްރޯޑްކާސްޓް ކުރެވުނީ އެންމެ  5 މިނެޓާއި 10 މިނެޓާ ދެމެދުގެ ކުޑަކުޑަ ވަގުތުކޮޅަކަށެވެ. " މާލޭ ރޭޑިއޯ " ގެ އަޑު ، އޭރު އިވެނީ މާލެއާއި މާލެކައިރީގައިވާ ރަށްރަށަށް އެކަންޏެވެ. އެޙާލަތު މިހާރު މިވަނީ އިޢާދަ ވެފައެވެ. " ދިވެހިރާއްޖޭގެ އަޑު " ދިވެހިރާއްޖެއަކަށް މިހާރަކު ނުލިބެއެވެ. މާލެއާ ކައިރި ހުރާފަދަ ބައެއް ރަށްރަށުގައި ގެންގުޅޭ ރޭޑިއޯ ފޮށްޓާ ހަމަޔަށްވެސް " ދިވެހިރާއްޖޭގެ އަޑު " ގެ އަޑެއް ނުފޯރައެވެ.

ފޮނި އަދި ދިގު ތާރީޚެއް އޮތް " ދިވެހިރާއްޖޭގެ އަޑު " ގެ އަގުހުރި ޚިދުމަތްތަކުން ، ދިވެހި ރައްޔިތުންވަނީ ، އެބައިމީހުންގެ މުނިފޫހި ފިލުވާފައެވެ. ދީނީ އަދި ޢިލްމީ ، އެތައް ފިލާވަޅުތަކެއް ދަސްކޮށްފައެވެ. ރާއްޖެއާއި ދުނިޔޭގެ އެތަން މިތާނގައި ހިނގަމުންދިޔަ ކަންކަމުގެ މަޢުލޫމާތުން ނަފްސު މުއްސަނދިކޮށްފައެވެ. ހީވާގި ، ފަންނުވެރި އެތައްބަޔެއްގެ ބުރަ މަސައްކަތުން ، " ދިވެހިރާއްޖޭގެ އަޑު " މުޅި ދިވެހިރާއްޖެޔަށް ފެތުރިގެންދިޔަ ޒަމާން ނެތިއްޖެއެވެ. ހުޅުމާލެ ބްރިޖް އަޅަން، އަޑުގެ އެންޓަނާ ނަގައި ކުނީގެ ގޮތުގައި ތިލަފުށްޓަށް ގެންދެވުނު ހިސާބުން ، " ދިވެހިރާއްޖޭގެ އަޑު " ގެ އަޑުވަނީ ރާއްޖެއިން ކެނޑިގެން ގޮއްސައެވެ. މިހާރު ، " ދިވެހިރާއްޖޭގެ އަޑު " ، ރާއްޖޭގެ އެކިކަންކޮޅުތަކަކަށް ނުލިބެއެވެ. ރާއްޖޭގެ އެންމެހައި ރައްޔިތުން ހިތާއި ނަފްސުން ލޯބިވި ، " ދިވެހިރާއްޖޭގެ އަޑު " ގެ ހިތްގައިމު އަޑުތައް ކެނޑިއްޖެއެވެ.

ހިތާއި ހިތުގެ ގުޅުމަކުން ގުޅިފައިވި ، ހިތްތައް ކަތިލި ، އެ އަޑުތަކެއްގެ ނަޣުމާއިން ދިވެހި މެދުއުޑު ގުގުމިއެވެ. ހިތާއި ނަފުސަށް އަރާމާއި އުފާލިބެމުންދިޔަ ، ޙަފުޞާ ، ނަޖުމާ ، ޝަރުމީލާ ، ޒާހިދާ ، މުއުމިނާ ، ނިޢުމާ ، އަދި ޒުނޭރާގެ ލޯބި އަޑެއް މިހާރަކު ނުއިވެއެވެ. އެއީ ، އެއްދުވަސްވަރެއްގައި ރާއްޖޭގެ ރައްޔިތުންގެ ލޯތްބާއި އިޙްތިރާމް ލިބިގެންވި ، ހިތްގައިމު ، ރަންއަޑުގެ ޚިދުމަތްތެރިންނެވެ. ރޭޑިއޯގެ ބެޓެރީ ދަށްވުމުން ، ކަންފަތުގައި ޖައްސައިގެން ، އެއަޑުތައް އަހަން ކެތްމަދުވެފައިތިބި އަޑުއަޑެވެ. ޒަމާން ބަދަލުވެ ، އަޑުވެސް ބަދަލުވެގެން ގޮސް ، އެ ހިތްގައިމު އަޑުތައް ކެނޑި ، މިހާރު މިވަނީ ، ޒުވާން އަޑުތަކެއް ލިބިއޮތް ނަމަވެސް " ދިވެހިރާއްޖޭގެ އަޑު " ގެ އަގުހުރި އަޑުވެސް ކެނޑިފައެވެ. އެތައް ޒަމާނެއްވަންދެން ، އެއަޑަކަށް ދިވެހިން ފަޚުރުވެރިވި ، " ދިވެހިރާއްޖޭގެ އަޑު " ގެ އަޑު މިހާރު ، ދިވެހިރާއްޖެއަކަށް ނުފޯރައެވެ. 60 އަހަރު ފަހަތަށް ސޮއްސާލައި ، އެޅި ފުރަތަމަ ފިޔަވަޅާ ހަމަޔަށް ފަހަތަށް ދިޔައީއެވެ. ފަންނުވެރި ، އިޚުލާޞްތެރި އެތައްބަޔެއްގެ ޤުރުބާނީއާއި ބުރަމަސައްކަތުން އުފަންކޮށްފައިވާ ހިތްގައިމު އަޑެއް ކަނޑުވައިލީ ފެންފޮދެއް ބޯލާފައި ވަޔެއްލާފަދަ ނިކަމެތި ތަޞައްވުރެއްގައެވެ. ކަހަރުވަކެކޭވެސް ހިތަކަށް ނާރައެވެ.  29 ޑިސެމްބަރ 1962 ގައި އުފެދުނީ " މާލޭ ރޭޑިއޯ " އެވެ. މިހާރުވެސް މިއޮތީ ، " ދިވެހިރާއްޖޭގެ އަޑު " ގެ ނަމުގައި ނަމަކަށް އޮތް ، ހަމައެކަނި މާލެ ސަރަޙައްދަށް އަޑުފޯރާ ، މާލޭ ރޭޑިއޯ އެކެވެ. ހިތާމައިގެ ކޮޅެއް އެބަ އޮތްތޯއެވެ.

ކަނޑުހުރަސްކޮށް ، އެއްރަށުން އަނެއް ރަށަށް ދަތުރުކުރަން ބްރިޖުވެސް އަޅަންވީއެވެ. ޒަމާނަށް އަންނަ ތަރައްޤީއެއް ނުހުއްޓުވޭނެއެވެ. ބްރިޖުއަޅަން ނަގާ އެންޓަނާ ތިލަފުށްޓަށް ގެންގޮސް ކުނީގެ ގޮތުގައި އެއްލައިވެސް ލާންވީއެވެ. ހަމަ އެއާއެކު ، މާ ސިންގާ ކަނޑު ހުރަސްކޮށް ، އެއްރަށުން އަނެއްރަށަށް ދަތުރުކުރާ " ދިވެހިރާއްޖޭގެ އަޑު " އަށްވެސް ދަތުރުކުރެވޭނެ އިންތިޒާމް ހަމަޖެއްސެން ޖެހެއެވެ. އެންޓަނާއަކާހެދި އެއަޑު ، ދިވެހި ކަންފަތްކަށް ނުއިވި އޮންނާކަށް ނުޖެހެއެވެ. ދަތުރުފަތުރުގެ ނިޒާމަށް އަންނަ ތަރައްޤީން ، ތަނުގައި ޤާއިމްކުރެވިފައި ދިގު ތާރީޚެއް އޮތް ، މުއާޞަލާތުގެ ނިޒާމް ނިކަމެތިވެގެން ދިއުމަކީ ، އަދި ތަރައްޤީއެއް ނޫނެވެ.

" ދިވެހިރާއްޖޭގެ އަޑު " ދިވެހިރާއްޖޭގެ ރައްޔިތުން ގެންގުޅޭ ރޭޑިއޯއަކަށް މިހާރަކު ނުލިބެއެވެ. އިވެނީ ހަމައެކަނި މާލޭގެ ރައްޔިތުންނަށެވެ. މާލޭގެ ރައްޔިތުންގެ ސިޓިންގރޫމުގައި ހުންނަ ޓީވީގެ އަޑު ، މާބާރު ކުރެވެއެވެ. ރޭޑިއޯ ގިނައިން ، ހުންނަނީ ބަދިގޭގައި އުޅޭ ކުދިންނަށެވެ. އެންޓަނާއަކާހުރެ ، " ދިވެހިރާއްޖޭގެ އަޑު " ދިވެހި ރައްޔިތުންނާ ހަމަޔަށް ނުފޯރާ އޮވެގެން ނުވާނެއެވެ. އެއަށްވުރެ ރާއްޖެ މިވަނީ ތަރައްޤީ ވެފައެވެ. ޒަމާނީ ވަޞީލަތްތަކުން މުއްސަނދި ވެފައެވެ. އަޑު ދަތުރުކުރަން ، އެންޓަނާނޫން ގޮތެއް ހޯދޭވަރަށް ރާއްޖެ މިވަނީ ކުރިއަރާފައެވެ. ބޭނުންވަނީ ، ޝަޢުޤުވެރިކަމާއެކު އެކަމަށް ކެރިގެން ކުރިމަތިލާނެ ޒިންމާދާރު ބަޔެކެވެ. " ދިވެހިރާއްޖޭގެ އަޑު " އަށް ފަރުވާދީގެން ، އައިސީޔޫ އިން ނެރޭތަން ފެނިގެން ދިއުމަކީ ރަށްފުށުގެ ރައްޔިތުންގެ ފޮނި އުއްމީދަކަށް ވާނެއެވެ. އެއީ ، އެއްދުވަސްވަރެއްގައި އެބައިމީހުންގެ އެންމެ ގާތް އެކުވެރިޔާކަމަށް ވާތީއެވެ.