އައްޝައިޚް ޢުޘްމާން ޢަބްދުﷲ އަވަހާރަވެއްޖެއެވެ.
ރޭފަތިހުގެ ވަގުތެއްގައި މާލެގައި އޭނާ އަވަހާރަވިއިރު އުމުރުފުޅަކީ 85 އަހަރެވެ.
ޢުޘްމާން ޢަބްދުﷲގެ ކަށުނަމާދު ކުރުން އަންނާނީ މިއަދުގެ އަޞުރު ނަމާދަށްފަހު އިސްލާމީ މަރުކަޒުގައިެވެ.
ޢުޘްމާން ޢަބްދުﷲ، އަކީ ރާއްޖޭގައި ދީނީ ހޭލުންތެރިކަން އިތުރުކުރެއްވުމަށް ގިނަގުނަ މަސައްކަތް ކޮށްދެއްވާފައިވާ ބޭފުޅެކެވެ. ޓީވީ ރޭޑިއޯ މެދުވެރިކޮށް އެކި މަޢުޟޫޢުތަކަށް ޝައިޚް ޢުޘްމާން ޢަބްދުﷲވަނީ ދީނީ ނަސޭޙަތްދެއްވާފައެވެ.
އެގޮތުން ޒަކާތާއި ބެހޭގޮތުން ދީނީގޮތުން މަޢުލޫމާތު އޮޅުންފިލުއްވާދެއްވުމަށް ކުރެއްވި މަސައްކަތަކީ ފާހަގަކުރެއްވޭ މަސައްކަތްތަކެކެވެ. އެގޮތުން 1983 ވަނަ އަހަރު އޭރުގެ ރައީސުލްޖުމްހޫރިއްޔާ އަލްއުސްތާޛް މައުމޫން ޢަބްދުލްޤައްޔޫމް އުފެއްދެވި ޒަކާތާބެހޭ އޮފީސް ހިންގެވުން ޙަވާލުކުރެއްވީ ޢުޘްމާން ޢަބްދުﷲއެވެ.
ޓީވީ ޕްރޮގްރާމްތަކުގެ އިތުރުން ޢުޘްމާން ޢަބްދުﷲވަނީ ދީނީ އެކި ފޮތްތައްވެސް ލިޔުއްވާފައެވެ. އޭގެ ތެރޭގައި ދަމުނަމާދާއި ސުންނަތް ނަމާދުތައް، އިސްލާމް ދީނުގައި އަންހެނުންގެ ޢައުރަ ފަދަ ފޮތްތައް ހިމެނެއެވެ. ހަމައެއާއެކު ޢަރަބި ބަހުން ލިޔުއްވާފައިވާ އެތައް ފޮތްތަކެއްވަނީ ދިވެހި ބަހަށް ތަރުޖަމާކުރައްވާފައެވެ. މީގެތެރޭގައި އެންމެ މަޝްހޫރު އެއްފޮތަކީ ފިޤުހުއް ސުންނާ ފޮތެވެ.
އިސްލާމްދީނުގެ ހޭލުންތެރިކަން އިތުރުކުރުމާއި، ޚިދުމަތްކުރުމާއި، ދިނީ ޢިލްމު އުނގަންނައިދިނުމުގެ ދާއިރާއިން ޤައުމީ އިނާމާއި ޝަރަފުވެރިކަމުގެ ޤައުމީ އިނާމު 2012 ސަރުކާރުންވަނީ ދެއްވާފައެވެ.
